Ba Omucureezi Oikirize ngu Haine ebi Otarikumanya

1. Ruhanga akatuhanga turikubaasa kukora ki, kandi ahabw’enki?

YEHOVA akatuhanga omu muringo ogurikutangaaza. Nk’eky’okureeberaho, nitubaasa kuteekateeka, kwega ebintu bisya, kwetegyereza n’okukora ebintu omu muringo gw’obwengye. Mbwenu shi ahabw’enki yaatuhangire atyo? Naayenda ngu tumumanye kandi tumuheereze n’okubaasa kwaitu kw’okuteekateeka.—Enf. 2:​1-5; Rom. 12:1.

2. (a) Twine bugarukiro ki? (Yobu 37:​23, 24) (Reeba n’ekishushani.) (b) Nitugasirwa tuta twamanya obugarukiro bwaitu?

² N’obu turaabe twahangirwe n’okubaasa kw’okwega ebintu bisya, haine ebi tutarikumanya. (Shoma Yobu 37:​23, 24.) Teekateeka ahari Yobu. Yehova akamubuuza aha bintu bingi ebyamuhweraire kwetegyereza ngu hakaba hariho bingi ebi yaabaire atarikumanya. Ekyo kikamureetera kuba omucureezi n’okutereeza emiteekateekyere ye. (Yob. 42:​3-6) Naitwe nitugasirwa munonga twayetegyereza ngu haine ebi tutarikumanya. Obucureezi nk’obwo nibutuhwera kugira obwesigye ngu Yehova naija kutumanyisa ebi tushemereire kumanya kugira ngu tubaase kucwamu omu muringo gw’obwengye.—Enf. 2:6.

3. Nituza kushwijuma ki omu kicweka eki?

³ Omu kicweka eki, nituza kugamba ahari bimwe ebi tutarikumanya n’oburemeezi oburikubaasa kurugamu. Nituza n’okushwijuma ahabw’enki ni kirungi okutamanya ebintu ebimwe. Ebi byona nibiza kutuhwera kwongyera kuhamya obwesigye bwaitu ngu Yehova, “Oine okumanya okuhikire,” naatugambira ebyo ebi twine kumanya.—Yob. 37:16.

TITURIKUMANYA OBU EMPERU ERAABEHO

4. Kurugiirira ahari Matayo 24:​36, niki eki tutarikumanya?

⁴ Shoma Matayo 24:36. Titurikumanya obu emperu y’entebeekanisa y’obusingye obu eraabeho. Na Yesu obu yaabaire ari omu nsi, akaba atarikumanya ‘ekiro n’obunaku’ obu emperu eraabeho.a Akagambira entumwa ze ngu Yehova Orikukirayo kukwata obwire, naayesigariza obwire bw’ebintu ebimwe omu “bushoboorozi bwe wenka.” (Byak. 1:​6, 7) Yehova yaataireho obwire obu emperu y’ensi egi eraabeho, kwonka itwe titurikubaasa kumanya obwire bwenyini obu ekyo kiraabeho.

5. Nitubaasa kukwatwaho tuta ahabw’okugira ngu titurikumanya obu emperu eraabeho?

⁵ Kurugiirira aha bi Yesu yaagambire, titurikumanya obwire obu twine kumara tutegyereize emperu kubaasa kuhika. N’ahabw’ekyo kyorobi kuhwamu amaani nari kwehwa amatsiko na munonga twaba tutwire tutegyereize ekiro kya Yehova kumara obwire buraingwa. Ab’eka yaitu nari abandi baatujuma ahabw’ebi turikwikiriza, nikibaasa kutugumira kugumisiriza. (2 Pet. 3:​3, 4) N’ahabw’ekyo kyorobi kuteekateeka ngu kuri nitumanya eizooba ryenyini obu emperu eraabeho, tukaayongyeire kugumisiriza oburemeezi bwona oburikutuhikaho, otwariiremu n’okujumwa.

6. Ahabw’enki kiri kirungi ahariitwe okutamanya obu emperu eraabeho?

⁶ Kwonka titurikuheereza Yehova tutaire omutima aha mperu orikushusha ngu niho turaagarukire kumuheereza. Amazima gari ngu Yehova okutatumanyisa obu emperu eraabeho, nikituha omugisha gw’okworeka ngu nitumuheereza ahabw’okumukunda kandi nitumwesiga. N’ahabw’ekyo, omu mwanya gw’okuta omutima aha bu ‘ekiro kya Yehova’ kiraije, nituta omutima aha bi turikubaasa kuhikiiriza buri izooba. Omu kukora ekyo, nitwongyera kuhamira ahari Ruhanga kandi tukora kyona eki turikubaasa kumushemeza.—2 Pet. 3:​11, 12.

7. Niki eki turikumanya?

⁷ Ni kikuru kuta omutima aha bi turikumanya. Nitumanya ngu ebiro by’emperu bikatandika omuri 1914. Yehova akahandiikisa obunabi bwa Baibuli oburikukwata aha mwaka ogwo n’ebyabaire nibiija kubaho bwanyima yaagwo. N’ahabw’ekyo nituhamiza kimwe ngu ‘eizooba rya Yehova erikuru riri haihi.’ (Zef. 1:14) Kandi nitumanya ngu Yehova atuhaire omurimo mukuru gw’okukora, ogw’okugambira abantu baingi nk’oku kirikubaasika aha makuru marungi g’Obukama. (Mat. 24:14) Amakuru marungi gariyo nigabuurirwa omu mahanga agarikuhika 240, omu ndimi ezirikurenga 1000. N’ahabw’ekyo tikirikutwetengyesa kumanya ‘ekiro n’obunaku’ kubaasa kubuurira amakuru marungi n’omujinya.

TITURIKUMANYA OKU YEHOVA ARAATWAZE

8. Ebigambo ‘omurimo gwa Ruhanga’ nibimanyisa ki? (Omubuurizi 11:5)

⁸ Titurikumanya ‘emirimo ya Ruhanga’ yoona. (Shoma Omubuurizi 11:5.) Ebigambo ebyo nibimanyisa eki Yehova arikureetera kubaho nari eki arikwikiriza ngu kibeho kubaasa kuhikiiriza ekigyendererwa kye. Titurikumanya ahabw’enki Yehova naikiriza ebintu ebimwe kubaho nari omuringo ogu araakorese kutuhwera. (Zab. 37:5) Titurikubaasa kumanya ebintu ebyo byona, nk’oku abanyasaayansi bakiremirwe kumanya oku omwana arikukura omunda ya nyina

9. Nitubaasa kugumirwa kukora ki, ahabw’okutamanya oku Yehova araatwaze?

⁹ Nitubaasa kuremwa kucwamu eki turaakore ahabw’okutamanya oku Yehova araatwaze kutuhwera. Nitubaasa kweziringa kwongyera aha buheereza bwaitu nk’okworobya embeera zaitu, n’okuza omu myanya ahu ababuurizi barikwendwa munonga. Nitubaasa kubaanganisa yaaba nitusiimwa Yehova twaremwa kuhika aha bigyendererwa byaitu, twaremwa kutunga abeegi ba Baibuli omu kubuurira nari twahikwaho oburemeezi omu kukora emirimo y’ekibiina.

10. Ahabw’okutamanya oku Yehova araatwaze nikibaasa kutuhwera kugira mitwarize ki?

¹⁰ Okutamanya oku Yehova araatwaze nikibaasa kutuhwera kugira emitwarize mikuru nk’obucureezi n’okuba abaringaniire. Nikituhwera kwetegyereza ngu ebiteekateeko bya Yehova nibikirira hare ebyaitu. (Isa. 55:​8, 9) Kandi, nitwega n’okwongyera kwesiga Yehova omu buri kimwe eki turikukora. Twatunga ebirungi omu kubuurira nari omu mirimo y’ekibiina, twine kuhimbisa Yehova. (Zab. 127:1; 1 Kor. 3:7) Kwonka nabwo haarugamu embeera ezi tutarikuteekateeka, twine kukiijuka ngu Yehova naamanya kyona eki turikukora kumuheereza. (Isa. 26:12) Nitukora eki tushemereire kukora reero ebindi tubimurekyera. Twine obwesigye ngu naija kutuha eby’okukuratira ebi turikwetenga n’obu araabe atarikukikora omu muringo gw’eky’okutangaaza nk’oku yaabaire akora omu bwire bwa Baibuli.—Byak. 16:​6-10.

11. Nitumanya ki ebirikubaasa kutuhwera?

¹¹ Guma noijuka ebi turikumanya ngu butoosha Yehova naatukunda, n’omuringaaniza kandi n’omunyabwengye. Naasiimira kimwe byona ebi turikukora kumuheereza n’ebi turikukorera ab’eishe-emwe bagyenzi baitu, kandi nitumanya ngu butoosha Yehova naaha omugisha abarikumuhamiraho.—Heb. 11:6.

TITURIKUMANYA EKIRAABEHO NYENTSYA

12. Kurugiirira aha biri omuri Yakobo 4:​13, 14, niki eki tutarikumanya?

¹² Shoma Yakobo 4:​13, 14. Amazima gari ngu, titurikumanya oku embeera zaitu ziraabe nyentsya. Omu ntebeekanisa y’obusingye obu, twena nituhikwaho “obunaku n’ebihikiirizi.” (Mub. 9:11) N’ahabw’ekyo, titurikubaasa kumanya yaaba ebigyendererwa byaitu biraahikiirire nari yaaba turaagumeho kubireeba nibihikiirira.

13. Okutamanya ekiraabeho nyentsya nikibaasa kutukwataho kita?

¹³ Nikibaasa kutugumira kugumisiriza ahabw’okutamanya ekiraabeho nyentsya. Ekyo nikibaasa kubaho kita? Nitubaasa kwerarikirira munonga ahabw’ebirikubaasa kubaho kitureetere kuburwa okushemererwa. Ebihikiirizi ebirikutuhikaho ahonaaho n’ebirikwija kitaraariire, nibibaasa kutureetera kugira amaganya n’obusaasi. Kandi amatsiko gaitu gaaremwa kuhikiirira, nitubaasa kuhwamu amaani.—Enf. 13:12.

14. Okushemererwa kwaitu okwabuzima nikurugiirira ahari ki? (Reeba ebishushani.)

¹⁴ Twagumisiriza embeera zoona ezirikutuhikaho, nitworeka ngu nituheereza Yehova ahabw’okumukunda hatari ahabw’okweyendeza. Baibuli neeyoreka ngu titwine kuteekateeka ngu Yehova naija kuturinda kutahikwaho oburemeezi, nari kutugambira embeera eziraatuhikeho. Naamanya ngu okushemererwa kwaitu tikurikurugiirira aha kumanya ebiraabeho omu biro by’omumaisho, kureka aha kusherura obuhabuzi bwe n’okubworobera. (Yer. 10:23) Kandi, twamwesiga omu bi turikucwamu, nituba turi nk’abarikugira ngu, ‘[Yehova] ku araakunde, nitwija kugumaho tukore eki na kiriya.’—Yak. 4:15.

15. Niki eki turikumanya aha biro by’omumaisho?

¹⁵ N’obu turaabe tutarikumanya buri kimwe ekiraatuhikeho, nitumanya ngu Yehova aturaganiise amagara agatahwaho yaaba omu nsi nari omu iguru. Nitumanya ngu tarikubaasa kubeiha, kandi tihaine ekirikubaasa kumuremesa kuhikiiriza ebi arikuraganisa. (Tit. 1:2) Niwe wenka orikubaasa ‘kuranga eby’emperu, naiha omu biro bya ira, araanga ebitakabaireho.’ Ebi yaagambire ira bikahikiirira n’ahabw’ekyo nituhamya ngu n’ebi arikuraganisa omu biro by’omumaisho nibiija kuhikiirira. (Isa. 46:10) Nituhamiza kimwe ngu tihaine ekirikubaasa kuremesa Yehova kutukunda. (Rom. 8:​35-39) Twahikwaho embeera egumire naatuha obwengye, atuhuumuriza, kandi atuha n’amaani g’okugumisiriza. Nitubaasa kuhamya ngu Yehova naija kutuhwera kandi atuhe emigisha.—Yer. 17:​7, 8.

YEHOVA NAATUMANYA GYE KUKIRA OKU TURIKWEMANYA

16. Nk’oku kirikworekwa omuri Zaaburi 139:​1-6, Yehova naatumanya ekirikwingana ki, kandi ekyo nikikureetera kwehurira ota?

¹⁶ Shoma Zaaburi 139:​1-6. Omuhangi waitu naamanya oku tukozirwe kandi naayetegyereza okubaasa kwaitu, enyehurira zaitu n’oku turikuteekateeka. Butoosha naatutaho omutima kandi naamanya ebirikutukwataho. Nk’eky’okureeberaho, Yehova naamanya ebi turikuteekateeka. Ku turikugamba, naayetegyereza ebigambo byaitu, eki turikumanyisa, n’ekirikutureetera kugamba. Naayetegyereza ebi turikukora n’ekirikutureetera kubikora. Nk’oku Omugabe Daudi yaagambire, Yehova naatufaho kandi tihaine ekirikubaasa kumuremesa kutuhwera. Ka nikitureetera kwehurira gye kumanya ngu Ow’obushoboorozi bwona kandi Omuhangi wa iguru n’ensi naatutaho omutima! Daudi akagira ati: “Okumanya nk’okwo nikuntangaaza kurengyesereize, n’okw’ahaiguru munonga, tindikukubaasa.”—Zab. 139:6.

17. Ahabw’enki nikibaasa kutugumira kwikiriza ngu Yehova naatumanya gye?

¹⁷ Obumwe, nikibaasa kutugumira kureeba Yehova nka Tataitwe orikutukunda kandi orikutumanya gye, ahabwe ei twakuriire, n’ebi twabaire nitwikiriza. Nari, nitubaasa kuteekateeka ngu enshobe ezi twakozire enyima ni mbi munonga n’ahabw’ekyo Yehova tarikubaasa kutwetaho kandi ari hare naitwe. Na Daudi obumwe akeehurira atyo. (Zab. 38:​18, 21) Nari omuntu orikuteeraho kuhindura emitwarize ye kugira ngu ehikaane n’emitindo ya Yehova naabaasa kwebuuza ati, ‘Ruhanga ku araabe naamanya gye, ahabw’enki atarikundeka nkakora eki omubiri gwangye gurikwenda ngu nkore?’

18. Nitugasirwa tuta twikiriza ngu Yehova naatumanya gye kukira oku turikwemanya? (Reeba n’ebishushani.)

¹⁸ Nitubaasa kwega kwikiriza ngu Yehova naatumanya gye kukira oku turikwemanya, kandi naatureebamu ebirungi ebi tutarikubaasa kwereebamu. Kandi, n’obu araabe naareeba obweremwa bwaitu, naatukunda ahabw’okuba naayetegyereza oku turikwehurira n’oku turikutwaza. (Rom. 7:15) Twaba nituhamiza kimwe ngu Yehova naatumanya gye kandi naatureebamu ebirungi, nitwongyera kugira omuhimbo gw’okumuheereza omu bwesigwa kandi tushemereirwe.

19. Niki eki turikumanya gye ahari Yehova?

¹⁹ Nitumanya ngu Yehova ni rukundo, kandi ekyo buzima titurikukibangaanisaho. (1 Yoh. 4:8) Nitumanya ngu emitindo ye ehikiriire neeyoreka rukundo ei atwiniire kandi ngu butoosha naatufaho. Nitumanya ngu Yehova naayenda tutungye amagara agatahwaho kandi akahayo ekitambo kugira ngu ekyo kibeho. Ekiconco ky’ekitambo nikituhamiza ngu nitubaasa kusiimwa Yehova n’obu turaabe tutahikiriire. (Rom. 7:​24, 25) Nitumanya ngu “Ruhanga ni mukuru okukira emitima yaitu, kandi naamanya byona.” (1 Yoh. 3:​19, 20) Yehova naareeba buri kimwe ekirikutukwataho, kandi aine obwesigye ngu nitubaasa kukora ebi arikukunda.

20. Niki ekiraatuhwere kwetantara kwerarikirira aha bitarikwetengyesa?

²⁰ Yehova atumanyiise byona ebi twine kumanya obunaku obu. Twikiriza amazima ago, titurikwija kwerarikirira aha bi tutaineho bushoboorozi reero tute omutima aha nshonga enkuru. Twakora ekyo, nitworeka ngu nitwesigira kimwe Yehova Ruhanga, “Oine okumanya okuhikire.” (Yob. 36:4) N’obu haraabe hariho enshonga ezimwe ezi tutarikumanya hati, nitumanya ngu Yehova naija kutwegyesa ebintu bingi omu biro by’omumaisho kandi nituza kwongyera kumanya bingi ebirikukwata ahari Ruhanga waitu ow’omutaano.—Mub. 3:11.