Amashomo agu Nyegire Kuruga aha Mwegyesa Orikukirayo

EKY’OKUREEBERAHO KY’ABAZAIRE BANGYE

Omuri 1950, abazaire bangye bakafuruka kuruga Italy kuza Kindersley, omuri Saskatchewan, eya Canada. Bwanyima y’obwire bukye bakeega amazima kandi gaaba enshonga nkuru omu ka yaitu. Ninyijuka obu naabaire nkiri muto, ku twabaire tuza omu kubuurira, nkaba mara eizooba ryona ndikubuurira n’abazaire bangye. N’ahabw’ekyo obumwe ningamba omu muringo gw’okuzaana ngu nkaba “payoniya omuhwezi” nyine emyaka munaana!

Abazaire bangye bakaba bari abooro kwonka bakatuteeraho eky’okureeberaho kirungi ky’okwefeerereza kubaasa kuheereza Yehova. Nk’eky’okureeberaho, omuri 1963 bakaguza bingi aha bintu ebi baabaire baine kubaasa kutunga esente z’okuza aha ruteerane oruhango orurikubamu ab’amahanga agandi omuri Pasadena, California U.S.A. Omuri 1972 tukagyenda mahiro 620 kuza Trail erikushangwa British Columbia, omuri Canada, kubuurira omu kyanga ahu abantu barikugamba Oruitare. Tata akaba naakora omurimo gw’okureeberera amaju. Akanga kumukuza aha murimo kugira ngu abaase kuta omutima aha by’omwoyo.

Ninsiima munonga eky’okureeberaho eki abazaire bangye baanteraireho na beene tata bashatu. Bakampwera kwega eishomo rikuru erindikwijuka na hati ngu: Naayebembeza Obukama, Yehova naija kundeeberera.—Mat. 6:33.

OBU NAAROZA AHA BUHEEREZA BW’OBUTWIRE OMURUNDI GW’OKUBANZA

Omuri 1980, nkataaha omu bushwere na Debbie, munyaanyazi-itwe murungi owaabaire aine ebigyendererwa by’omwoyo. Tukaba nitwenda kuza omu buheereza bw’obutwire, n’ahabw’ekyo Debbie akaba payoniya bwanyima y’ameezi ashatu tuherize kugaitwa. Bwanyima y’omwaka gumwe tuherize kutaaha omu bushwere, tukaza omu kibiina kikye ekyabaire nikyetenga obuhwezi reero naanye naaba payoniya.

Kwonka bwanyima y’obwire bukye, tukahwamu amaani kandi tukaba nitwenda kurugayo. Tutakagyenzire, tukabanza twagambira omureeberezi orikutaayaayira ebibiina oku twabaire nitwehurira. Omu muringo gwa rukundo, akatugarukamu ati: “Niimwe abarikugumisa embeera yaanyu. Mutaire omutima aha buremeezi obu mwine. Kwonka mwateeraho kuta omutima aha birungi ebi mutungire nimuza kubireeba.” Obwo bukaba buri obuhabuzi obu twabaire nitwetenga. (Zab. 141:5) Tukagyendera aha buhabuzi obwo ahonaaho kandi tukakyetegyereza ngu hariho ebirungi ebi twabaire tutungire. Baingi omu kibiina bakaba nibenda kwongyera aha buheereza bwabo otwariremu abato, n’abaabaire bari omu bushwere n’abantu abatari mu mazima. Eryo rikaba riri ishomo rikuru ahariitwe. Tukeega kuta omutima aha birungi n’okutegyereza Yehova kugonjoora embeera ezigumire. (Mik. 7:7) Tukagaruka twatunga okushemererwa kandi embeera zaitu zikatereera.

Abaabaire nibatwegyesa omu ishomero rya Baapayoniya bakaba baaheereizeho omu mahanga agandi. Bakatworeka ebishushani kandi baagamba aha buremeezi n’emigisha ei baatungire omu buheereza obwo kandi ekyo kikatureetera kugira ekihika ky’okuheereza nk’abamiisani. N’ahabw’ekyo tukacwamu kutaho ekigyendererwa ky’okuza omu buheereza obwo.

Kubaasa kuhika aha kigyendererwa ekyo, omuri 1984 tukaza omu kyanga ekirikugamba Orufaransa omuri Quebec, mahiro nka 2,485 kuruga British Columbia. Tukaba twine kumanyiira entwaza nsya n’okwega orurimi rusya. Kandi bwanyima tukatunga oburemeezi omu by’esente. Obumwe tukaba tuhumba obumondi obwabaire butsigara omu musiri gw’omuhingi. Debbie akeega kubuteeka gye omu miringo mingi! Kwonka nabwo, tukaguma nitugumisiriza tushemereirwe. Tukeereebera n’agaitu ngu Yehova akaba naatureeberera.—Zab. 64:10.

Eizooba rimwe bakatuteerera esimu kitaraariire barikutweta kuza kuheereza aha Beseeli ya Canada. Tukaba twijwize foomu y’okuza omu ishomero rya Gileadi, n’ahabw’ekyo tikiratushemeize munonga. Kwonka tukaikiriza kuzayo. Ku twahikireyo, tukabuuza ow’eishe-emwe Kenneth Little, owaabaire ari aha Kakiiko nk’Eitaagi tuti: “Kandi shi foomu ezi twijwize kuza omu Ishomero rya Gileadi?” Akatugarukamu ati, “Nitwija kwambuka orutindo orwo ku turaaruhikeho.”

Bwanyima ya saabiiti emwe nyowe na Debbie tukeetwa omu Ishomero rya Gileadi. N’ahabw’ekyo tukaba twine kucwamu yaaba turaaze omu Gileadi nari kuguma aha Beseeli. Ow’eishe-emwe Little akatugira ati: “Kyona eki muraacwemu, obumwe nimwija kuteekateeka ngu kuri mwacwiremu omuringo ogundi. Tihaine okucwamu okurikukira okundi, Yehova naabaasa kuha omugisha encwamu zombi.” Tukacwamu kuza omu ishomero kandi bwanyima y’emyaka tureebire oku obuhabuzi bw’ow’eishe-emwe Little yaatuhaire burugiremu ebirungi. Kandi kaingi, tugambiire abandi obuhabuzi obwo, abarikwenda kucwamu aha bikwatiraine n’obuheereza bwabo.

EMBEERA OMU BUHEEREZA BW’OBUMIISANI

Tukashemererwa kuba bamwe aha beegi 24 abaabaire bari omu Ishomero rya Gileadi erya 83 eryabaire Brooklyn, New York, omuri Apuri 1987. Ow’eishe-emwe Ulysses Glass na Jack Redford nibo baabaire nibatwegyesa. Ameezi ataano gakahwaho juba, twaheza Ishomero omu Kwamwenda 6, 1987. Bwanyima tukoherezibwa Haiti hamwe n’abamiisani abandi; John, Marie na Goode.

Kuruga 1962 obu abamiisani baabingwa Haiti bakaba batakagarukayoga. Bwanyima ya saabiiti ishatu tuherize Ishomero tukeeshanga turikuheereza omu kyaro ky’enshozi za Haiti omu kibiina kikye ky’ababuurizi 35. Tukaba turi bato, tutarikumanya bingi kandi turikutuura twenka omu nju y’abamiisani. Abatuuzi baayo bakaba bari abooro, kandi batarikubaasa kushoma. Omu bwire bukye tutandikire obuheereza bw’obumiisani, hakabaho entaro, obwesharingo, okuhamba gavumenti n’obusoorora.

Kwonka tukaba nitubaasa kwegyera bingi aha ab’eishe-emwe na banyaanyazi-itwe abeeziriki omuri Haiti. Baingi bakaba nibaraba omu mbeera zigumire kwonka bakaba nibakunda Yehova n’obuheereza. Nk’eky’okureeberaho, hakaba hariho munyaanyazi-itwe omwe owaabaire akaikwire atarikubaasa kushoma, kwonka akaba akakwatsire ebyahandiikirwe 150 omu mutwe. Embeera ezi abantu baabaire nibarabamu buri izooba zikahamya okumariirira kwaitu okw’okubuurira amakuru marungi g’Obukama ngu nibwo bwonka oburaije kumaraho oburemeezi bw’abantu. Twine okushemererwa ahabw’okureeba bamwe aha beegi baitu ba Baibuli barikuheereza nka baapayoniya ab’obutwire, ab’omutaano kandi abandi n’abareeberezi omu kibiina.

Obu twabaire turi Haiti, nkabugana Trevor, omutsigazi owaabaire ari omumiisani omu diini y’Abaamamoni. Kandi obumwe tukaba kugaaniira ahari Baibuli. Bwanyima y’emyaka, akampandiikira ebaruha arikugira ati: “Ninza kubatizibwa aha ruteerane oruhango orurikukurataho! Niinyenda kugaruka Haiti kuheereza nka payoniya w’omutaano omu kicweka ahu naabaire ndi omumiisani w’Abaamamoni.” Kandi ekyo nikyo yaakozire kumara emyaka ari n’omukazi we.

EUROPE, BWANYIMA OMURI AFRICA

Tukooherezibwa kuheereza omu kicweka kya Europe ahu omurimo gw’okubuurira gwabaire nigukitandika. Omuri 1992 tukahika Ljubljana, Slovenia, haihi n’ahu abazaire bangye baakuriire batakafurukiire Italy. Ebicweka bya Yugoslavia bikaba bikirimu orutaro, kandi ofiisi y’eitaagi eya Vienna, Austria, ekaba neekwatanisa na ofiisi eza Zagreb, Croatia, na Belgrade, Serbia, kureeberera omurimo gw’okubuurira omu kicweka ekyo. Kwonka bwanyima y’amahanga ago kwetegyeka, buri ihanga rikaba riine kutunga Beseeli eyaaryo.

Ekyo kikaba nikitwetengyesa kwega orurimi orundi n’okumanyiira entwaza y’ekicweka. Abatuuzi b’ekicweka ekyo bakaba bagira ngu, “Jezik je težek,” ekirikumanyisa ngu “Orurimi rugumire.” Ekyo buzima nikwo kyabaire kiri! Tukakwatwaho munonga obwesigwa bw’ab’eishe-emwe na banyaanyazi-itwe abaabaire beteekateekire kworobera empinduka z’ekibiina, kandi tukareeba oku Yehova yaabahaire omugisha. Tukagaruka kureeba oku Yehova arikushoboorora enshonga omu muringo gwa rukundo kandi omu bwire obuhikire. Obwire obu twamazire Slovenia bukatwijutsya amashomo makuru agu twabaire twayegire kandi twayega n’agandi.

Kwonka hakaba hariho empinduka ezindi ezaabaire ziri haihi kubaho. Omu 2000 tukoherezibwa Côte d’Ivoire, omuri West Africa. Kwonka ku haabaireho orutaro, tukatwarwa Sierra Leone omu Kwaikumi-na-kumwe 2002. Kwonka ku twahikireyo tukashanga orutaro orwabaire rumazireyo emyaka 11 ruherize kuhendera. Kikaba kigumire kuruga Côte d’Ivoire ahonaaho. Kwonka, amashomo agu twayegyireyo gakatuhwera kuguma tushemereirwe omu mbeera ezo.

Tukata omutima aha bantu abaabaire nibenda kwega amazima omu kicweka ekyo, n’ab’eishe-emwe na banyaanyazi-itwe abaabaire bagumisiririize orutaro kumara emyaka. Bakaba bari abooro kwonka bakaba nibenda kuha abandi aha bi baabaire baine. Munyaanyazi-itwe omwe akaha Debbie ebijwaro, Debbie ku yaateireho kwanga munyaanyazi-itwe ogwo akagira ati: “Omu rutaro, ab’eishe-emwe kuruga omu mahanga agandi bakatushagika, n’ahabw’ekyo obu nibwo bwire naitwe kuhwera abandi.” Tukataho ekigyendererwa ky’okubatooreza.

Bwanyima tukagaruka omuri Côte d’Ivoire, kwonka hakagaruka haabaho orutaro. Reero omuri Novemba 2004, bakatutwarira omu nyonyi buri omwe akwaitse enshaho erikuremeera kiro 10 zonka. Tukaraara ahansi omu nkambi y’amahe ga Bufaransa, kandi eizooba eryakuratsireho tukatwarwa Switzerland. Tukahika aha ofiisi y’eitaagi nka shaaha mukaaga z’ekiro. Ab’akakiiko ka itaagi hamwe n’Abeegyesa Baishomero ry’Abaheereza n’abakazi baabo bakatwakiira na rukundo mpango barikutugwa omunda, baatuha eby’okurya birikutagata hamwe na cokureeti nyingi. Buzima tukakwatwaho munonga.

Tukooherezibwa kuheereza omuri Ghana kumara akaire kakye bwanyima twagaruka Côte d’Ivoire orutaro ku rwakyendeire. Obufura bw’ab’eishe-mwe bukatuhwera munonga kugumisiririza embeera ezo zoona. Nyowe na Debbie tukaikirizana ngu n’obu rukundo y’eishe-emwe guraabe guri omucwe omu kibiina kya Yehova, titushemereire kugikwata eijaga. Amazima gari ngu, omu buremeezi obwo bwona tukeegyeramu amashomo makuru.

OKUZA OMURI MIDDLE EAST

Omu 2006 tukatunga ebaruha kuruga aha ofiisi enkuru erikutumanyisa ngu tukaba tuhairwe obuheereza obusya omuri Middle East. Ekyo kikaba nikimanyisa ngu tukaba nitwija kuza omu myanya misya, twege endimi nsya, emitwarize misya kandi tuhikweho oburemeezi obundi. Hakaba hariho bingi eby’okwega omu kicweka ekyo ekyabaire kibaganisiibwemu eby’obutegyeki n’amadiini. Tukakunda endimi ezitarikushushana ezaabaire nizigambwa omu kibiina n’okureeba emigisha erikuruga omu kukuratira obuhabuzi bw’ekibiina. Ab’eishe-emwe na banyaanyazi-itwe bakatushemeza munonga ahabw’okuba baingi ahari bo bakaba nibagumisiriza n’obumanzi okuhakanisibwa ab’omu maka gaabo, abu baabaire nibashoma nabo, abu baabaire nibakora nabo n’abataahi baabo.

Omu 2012 tukaza omu ruteerane oruhango orw’omutaano omuri Tel Aviv, Israel. Oruteerane orwo nirwo rwabandize kuteeranira hamwe abantu ba Yehova omurundi gw’okubanza omu kyanga ekyo kuruga obu habaho Pentekoote 33 Y.A.K. Buzima tindyebwa ruteerane orwo!

Omu bwire obwo, tukatumwa kutaayaaya omu ihanga ahu omurimo gwaitu gwabaire guzibiirwe. Tukatwara bimwe aha bitabo byaitu, twabigabira abantu omu buheereza, kandi twaza n’omu nteerane enkye. Tukaba tubugana abaserukare abaabaire baba bakwaitse embundu, emyanya y’okucaaka, kwonka tukaba tuhurira twine oburinzi ahabw’okuraba omu myanya egyo n’obwegyendesereza, n’ababuurizi bakye.

OKUGARUKA OMURI AFRICA

Omu 2013 tukatunga obujunaanizibwa obundi obw’okuza kuheereza aha itaagi rya Congo Kinshasha. Eihanga eri n’erigaiga omu by’obuhangwa kwonka rikaba riteirwe obworo hamwe n’obutabanguko bwingi. Omu kubanza tukagira tuti, “Africa nitugimanya, buzima tweteekateekire kuzayo.” Kwonka nabwo tukaba tukiine bingi by’okwega na munonga kyahika aha kukoresa eby’engyenda ebitatunguukire. Ku twahikireyo tukashangayo ebirungi bingi by’okutaho omutima nk’eky’okureeberaho ab’eishe-emwe bakaba nibagumisiriza kandi bashemereirwe n’obu baraabe baabaire baine oburemeezi omu by’entaatsya. Bakaba nibakunda kuza omu kubuurira kandi barikuteeraho munonga kuza omu nteerane enkye n’empango. Tukeereebera n’agaitu oku omurimo gw’obukama gwayongyeire kutunguuka ahabw’obushagiki bwa Yehova n’emigisha ye. Obwire obu twamazire nituheereza omuri Congo tukabwegyeramu amashomo makuru kandi bukatuhwera kugira abanywani bingi.

Omwaka 2017 gurikuhendera, tukaza omu buheereza obundi omuri South Africa. Egi niyo ofiisi y’eitaagi erikukirayo obuhango ei twaraheereizeho, kandi tukaheebwa n’obujunaanizibwa busya aha Beseeli egyo. N’aha murundi ogu tukaba twine bingi by’okwega kwonka amashomo agu twabaire twayegire enyima gakatuhwera omu buheereza busya obwo. Nitukunda ab’eishe-emwe na banyaanyazi-itwe abamazire obwire bwingi barikugumisiriza omu bwesigwa. Kandi nikishemeza kureeba Ababeseeli nibakorera hamwe n’obu baraabe baine erangi n’entwaza zitarikushushana. Nikireebwa butunu ngu Yehova ahaire abantu be omugisha gw’obusingye barikugumizamu kujwara omuntu omusya n’okugyendera aha misingi ya Baibuli.

Kumara emyaka, nyowe na Debbie tugiire omu buheereza butari bumwe na bumwe oburikushemeza, twayega entwaza zitarikushushana, n’endimi nsya. N’obu biraabe bibaire bitoorobi, butoosha tureebire oku Yehova atworekire rukundo ye etahwaho kurabira omu kibiina kye n’ab’eishe-emwe. (Zab. 144:2) Nituhamiza kimwe ngu okutendekwa oku tutungire omu buheereza bw’obutwire kutuhwereire kwongyera kuba abaheereza ba Yehova barungi.

Ninsiima oku abazaire bangye bankurize, obushagiki bw’omukazi wangye Debbie, n’eby’okureeberaho birungi omuka yaitu y’eby’omwoyo omu nsi yoona. Tumaririire kugumizamu nitwega amashomo agandi kuruga aha Mwegyesa waitu Orikukirayo kuhikira kimwe omu nsi ensya.