EKICWEKA EKY’OKWEGA 34
EKYESHONGORO 3 Amaani Gaitu, Amatsiko Gaitu, Obwesigye Bwaitu
Ikiriza Ngu Yehova Akakusaasira
‘Okansaasira orubanja rw’ekibi kyangye.’—ZAB. 32:5.
ENTIMA
Enshonga ahabw’enki twine kwikiriza ngu Yehova akatusaasira n’oku Baibuli erikutuhamiza ngu naasaasira abasiisi abeeteisiize kimwe.
1-2. Abasiisi abarikweteisiza kimwe nibabaasa kwehurira bata? (Reeba n’ekishushani.)
OMUGABE Daudi akaba naamanya obusaasi oburi omu kweshinja ahabw’ebibi eby’enyima. (Zab. 40:12; 51:3; Enshoboorora ya Zab 51) Kwonka ku yaayeteisiize kimwe, Yehova akamusaasira. (2 Sam. 12:13) N’ahabw’ekyo Daudi akagira obuhuumure ku yaamanyire ngu Yehova akamusaasira.—Zab. 32:1.
2 Nka Daudi, naitwe nitubaasa kutunga obuhuumure oburikuruga omu kumanya ngu Yehova atugiriire embabazi kandi yaatusaasira. Nikihuumuriza twamanya ngu Yehova naaba ayeteekateekire kutusaasira ebibi byaitu n’obu byakuba biri eby’amaani twayeteisiza kimwe, kandi tukamariirira kutagaruka kubikora! (Enf. 28:13; Byak. 26:20; 1 Yoh. 1:9) Ka nikihuumuriza kumanya ngu Yehova ku arikutusaasira, naaba yaatusaasirira kimwe orikushusha ngu ekibi ekyo titukakikorahoga!—Ezk. 33:16.
Omugabe Daudi akahimba ebyeshongoro bya zaaburi bingi ebirikushoboorora okusaasira kwa Yehova (Reeba akacweka 1-2)
3-4. Munyaanyazi-itwe omwe akeehurira ata bwanyima y’okubatizibwa, kandi nituza kureeba ki omu kicweka eki?
3 Kwonka, abantu abamwe nikibaasa kubagumira kwikiriza ngu Yehova akabasaasira. Teekateeka aha ky’okureeberaho kya Jennifer, owaakuriire omu mazima. Ku yaahikire omu bushogoyo akatandika kwejumba omu bikorwa bibi kandi akaba abishereka abazaire be. Bwanyima y’emyaka akagarukira Yehova kandi yaabatizibwa. Naagira ati: “Enyima nkaba ninkunda munonga eby’obugaiga, obushambani, okunywa amaarwa mingi, kandi ndikugira ekiniga ky’amaani. Nkaba niimanya ngu bwanyima y’okweshengyereza Yehova kunsaasira n’okweteisa, akansaasira ahabw’ekitambo kya Kristo. Kwonka omu mutima gwangye nkaba ntarikuhamiza kimwe ngu akansaasira.”
4 Mbwenu shi naiwe obumwe noogumirwa kwikiriza ngu Yehova akakusaasira ebibi ebi waakozire? Yehova naayenda ngu ogire obwesigye omu mbabazi ze nka Daudi. Omu kicweka eki, nituza kureeba ahabw’enki twine kwikiriza ngu Yehova akatusaasira ebibi byaitu eby’enyima, n’ekirikubaasa kutuhwera kukikora.
AHABW’ENKI TWINE KWIKIRIZA NGU YEHOVA AKATUSAASIRA?
5. Sitaane naayenda ngu twikirize ki? Ha eky’okureeberaho.
5 Twikiriza ngu Yehova akatusaasira, nikibaasa kutuhwera kwetantara kugwa omuri gumwe aha mitego ya Sitaane. Ijuka ngu Sitaane ayeteekateekire kukora kyona eki arikubaasa kuturemesa kuheereza Yehova. Naateeraho kutureetera kuteekateeka ngu ebibi byaitu tibirikubaasa kusaasirwa. Teekateeka aha kyahikire aha mushaija ow’omuri Korinso owaihirwe omu kibiina ahabw’obushambani. (1 Kor. 5:1, 5, 13) Ku yaayeteisize, Sitaane akaba naayenda ngu ab’omu kibiina ekyo batakamusaasira, n’obu kwakuba okumwikiriza kugaruka omu kibiina. Kandi Sitaane akaba naayenda ngu omushaija ogwo ateekateekye ngu tarikubaasa kusaasirwa reero ‘arengwe obusaasi’ arekyere aho kuheereza Yehova. Sitaane takahinduraga aha kigyendererwa kye kandi naakikoresa akakoryo ako na hati. Kwonka “tituri batarikumanya bwengye bwe obu arikutucwera.”—2 Kor. 2:5-11.
6. Niki ekirikubaasa kutuhwera kweihaho omugugu gw’okweshinja?
6 Twikiriza ngu Yehova akatusaasira, nitweihaho omugugu gw’okweshinja. Twakora ekibi, n’eky’obuhangwa kweshinja. (Zab. 51:17) Kandi ekyo ni kirungi ahabw’okuba omuntu waitu ow’omunda naabaasa kutureetera kugira eki twakora kutereeza enshobe yaitu. (2 Kor. 7:10, 11) Kwonka twayeteisa haza tukagumizamu kweshinja kumara obwire buraingwa, nitubaasa kurekyera aho kuheereza Yehova. N’ahabw’ekyo twikiriza ngu Yehova akatusaasira nitubaasa kurekyeraho kweshinja, kandi tugumizemu kumuheereza nk’oku arikwenda tushemereirwe n’omutima ogutarikweshinja. (Kol. 1:10, 11; 2 Tim. 1:3) Kwonka shi, nitubaasa kwehamiza tuta ngu Ruhanga akatusaasira?
NIKI EKIRIKUBAASA KUTUHWERA KWIKIRIZA NGU YEHOVA AKATUSAASIRA?
7-8. Yehova akeegambaho ata obu yaabaire naagamba na Musa, kandi ekyo nikituha buhame ki? (Okuruga 34:6, 7)
7 Teekateeka aha ku Yehova yaayegambireho. Nk’eky’okureeberaho, teekateeka aha bi Yehova yaagambiire Musa aha Rushozi Sinai.a (Shoma Okuruga 34:6, 7.) Aha mitwarize yoona ei Yehova yaabaire naabaasa kwegambaho, akareeba kishemeire kwegambaho nka “Ruhanga ow’okusaasira n’embabazi.” Mbwenu shi Ruhanga nk’ogwo akaaremwa kusaasira omuntu orikumuramya oyeteisiize kimwe enshobe ye? Ngaaha buzima! Yaatwaza atyo naaba yaayoreka ngu taine mbabazi, kandi ngu aine omutima gugumire. Kwonka Yehova tarikubaasa kugira emitwarize nk’egyo.
8 Nitubaasa kuhamya ngu Yehova tarikubaasa kwegambaho ebishuba ahabw’okuba ni Ruhanga orikwesigwa. (Zab. 31:5) N’ahabw’ekyo nitubaasa kwesiga ebi arikugamba. Waaba noogumirwa kurekyeraho kweshinja ahabw’enshobe ez’enyima, noobaasa kwebuuza oti: ‘Niinyikiriza ngu buzima Yehova n’omunyambabazi kandi naasaasira omuntu weena orikweteisa? Mbwenu shi tinshemereire kwikiriza ngu naanye akansaasira?’
9. Okusaasirwa ebibi byaitu nikimanyisa ki? (Zaaburi 32:5)
9 Teekateeka aha bi Yehova yaareetaire abaahandiikire Baibuli kuhandiika aha kusaasira kwe. Nk’eky’okureeberaho, teekateeka aha ku Daudi, yaashoboroire okusaasira kwa Yehova. (Shoma Zaaburi 32:5.) Akagira ati: ‘Okasaasira orubanja rw’ekibi kyangye.’ Ekigambo ky’Oruheburaayo ekyavunwirwemu “okusaasira” nikibaasa kumanyisa “okwekorera,” “okutwara” nari “okukiriza.” Yehova ku yaasaasiire Daudi, okaba nooshusha ngu akakiriza omugugu gw’ebibi bye yaagutwara. Bwanyima Daudi akaruhuuka ahabw’okwihwaho omugugu gw’okweshinja ogwabaire gumuremereire. (Zab. 32:2-4) Naitwe nikwo turikubaasa kwehurira bwanyima y’okusaasirwa. Twayeteisa eby’okutahikiirira byaitu, titushemereire kuguma twekoreire omugugu gw’okweshinja ahabw’ebibi ebi Yehova akiriize akatwara.
10-11. Ebigambo “orahuka kusaasira” nibitwegyesa ki ahari Yehova? (Zaaburi 86:5)
10 Shoma Zaaburi 86:5. Omu kyahandiikirwe eki, Daudi naagamba ahari Yehova ‘nk’orahuka kusaasira.’ Ekitabo kimwe aha birikushoboorora Baibuli kikagamba aha bigambo ebyo kiti: “[Yehova] ‘n’omusaasizi,’ kandi ogwo ‘n’omuringo gwe.’” Ahabw’enki Yehova ari omu muringo ogwo? Ekicweka ky’omushororongo ogwo ekirikukurataho nikishoboorora kiti: “Ogira embabazi nyingi ahari boona abakutakira.” Nk’oku tureebire omu kicweka eky’enyima, rukundo etahwaho neereetera Yehova kugira omukago guhami n’abaheereza be abeesigwa ogutarikubaasa kuhwaho. Rukundo egyo neemuhiga ‘kusaasirira kimwe’ abasiisi boona abarikweteisa. (Isa. 55:7) Waaba noogumirwa kwikiriza ngu Ruhanga akakusaasira, noobaasa kwebuza oti: ‘Niinyikiriza ngu Yehova n’omunyambabazi, kandi naarahuka kusaasira abasiisi boona abarikweteisa bakamutakira ngu abagirire embabazi? Mbwenu shi tinshemereire kwikiriza ngu akansaasira obu naamutakira ngu angirire embabazi?’
11 Nitubaasa kutunga okuhuumurizibwa twamanya ngu Yehova naayetegyereza gye oku tukozirwe, kandi naamanya ngu tituhikiriire. (Zab. 139:1, 2) Ekyo nikyorekwa omuri Zaaburi ya Daudi endiijo erikutuhwera kwikiriza ngu Yehova akatusaasira.
OTEEBWA EBI YEHOVA ARIKWIJUKA AHARIITWE
12-13. Kurugiirira ahari Zaaburi 103:14, Yehova naijuka ki ahariitwe, kandi ekyo nikimureetera kukora ki?
12 Shoma Zaaburi 103:14. Daudi akagira ngu Yehova “naijuka ku turi omucuucu.” Daudi akakoresa ebigambo ebyo kushoboorora emwe aha nshonga ahabw’enki Yehova ayeteekateekire kusaasira abaheereza be abarikweteisa: Butoosha naijuka ngu n’abasiisi. Kubaasa kwetegyereza gye enshonga egi, ka twongyere kushwijuma ebigambo bya Daudi.
13 Daudi akagira ngu Yehova “naamanya obuhangwa bwaitu.” Akahanga Adamu “omu mucuucu gw’ahansi” kandi naamanya ngu n’abantu abahikiriire baine obugarukiro. Nk’eky’okureeberaho, nibeetenga kurya, kubyama n’okwitsya. (Kut. 2:7) Kwonka Adamu na Haawa ku baasiisire, okuba omucuucu kikongyera kugira amakuru. Ahabw’okugira ngu turi baijukuru baabo, nituzaarwa tutahikiriire ekirikutureetera kukora ebibi. Yehova tarikukoma aha kumanya ngu turi abasiisi kyonka, kureka ‘naakiijuka’ nk’oku Daudi yaagambire. Ekigambo ky’Oruheburaayo ekyakoresiibwe nikibaasa kumanyisa okugirirwa embabazi. N’ahabw’ekyo nitubaasa kugira ngu ebigambo bya Daudi nibimanyisa ngu: Yehova naamanya ngu nitubaasa kushiisha emirundi mingi, kwonka twashiisha, naarahuka kutugirira embabazi n’okutusaasira twayeteisiza kimwe.—Zab. 78:38, 39.
14. (a) Daudi akashoboorora ngu Yehova naatusaasira ekirikwingana ki? (Zaaburi 103:12) (b) Eky’okureeberaho kya Daudi nikyoreka kita ngu Yehova naatusaasirira kimwe? (Reeba akabokusi “Oku Yehova Arikutusaasira kandi Akeebwa Ebibi Byaitu.”)
14 Yehova naatusaasira ekirikwingana ki? (Shoma Zaaburi 103:12.) Daudi akagira ngu Yehova ku arikutusaasira, naatwara ebibi byaitu hare “nk’oburugwa-izooba oku eri hare n’oburengyerwa-izooba.” Emyanya ebiri egyo terikubaasa kubugana. Ekyo nikitwegyesa ki aha bibi ebi Yehova arikutusaasira? Kimwe aha bitabo ebirikushoboorora Baibuli nikigamba aha mushororongo ogwo kiti: “Ruhanga naatwara ebibi byaitu hare ahu atarikubaasa kugaruka kubireeba nari kubiijuka, n’ekinuuko kyabyo nikihweraho kimwe.” Kiteekateekeho, haagira ekyanuuka, nikibaasa kutureetera kugira eki twaijuka. Kwonka Yehova ku arikutusaasira, nooshusha ngu tihariho ekinuuko ekirikusigaraho kumwijutsya enshobe ei twakozire kugira ngu agaruke kutugirira ekiniga.—Ezk. 18:21, 22; Byak. 3:19.
15. Nitubaasa kukora ki twagumizamu kweshinja ahabw’enshobe ezi twakozire enyima?
15 Ebigambo bya Daudi ebiri omu Zaaburi 103, nibibaasa kutuhwera bita kwikiriza ngu Yehova akatusaasira? Twagumizamu kweshinja ahabw’ebibi eby’enyima, nitubaasa kwebuuza tuti: ‘Naayebwa ngu Yehova naijuka ngu ndi omusiisi, kandi naasaasira omusiisi nkaanye orikweteisa? Ninyijuka ebi Yehova arikucwamu kwebwa ahariinye, nk’ebibi ebi ansaasiire, kandi ngu tarikubaasa kugaruka kungirira ekiniga ahabw’ebibi ebyo?’ Yehova tarikuta omutima aha bibi byaitu eby’enyima, n’ahabw’ekyo naitwe titushemeire kukikora. (Zab. 130:3) Twaikiriza ngu Yehova akatusaasira, nikituhwera kwesaasira, kandi tugumizemu kumuheereza.
16. Shoboorora akabi akari omu kuguma nitweshinja ahabw’ebibi ebi twakozire enyima. (Reeba n’ekishushani.)
16 Teekateeka aha ky’okureeberaho eki. Okuguma nitweshinja ahabw’ebibi byaitu eby’enyima, ninka okuteeraho kuvuga emotoka kwonka tukaguma tutaire amaisho aha ndeeberwamu erikworeka eby’enyima. Obumwe ni kirungi kuhitsya obwire okareeba kakye aha ndeeberwamu egyo, kukuhwera kumanya akabi akarikubaasa kureetwa enyima. Kwonka kubaasa kugumizamu noovuga gye, oine kureeba ei orikutoora. Nikyo kimwe, nikibaasa kutuhwera obumwe twateekateeka aha nshobe zaitu ez’enyima, ahabw’okuba nitubaasa kuzeegyeraho, kandi tumariirire kutagaruka kuzikora. Kwonka twaguma tuzitaireho omutima, okweshinja nikubaasa kuturemesa kuheereza Yehova omu bwijwire. Omu mwanya gw’ekyo, ka tute omutima omu maisho ei turikutoora. Turi omu muhanda ogurikuza omu magara, omu nsi ensya ei Ruhanga yaaturaganiise ahu ebiteekateeko bibi bitarigaruka kwijukwa.—Isa. 65:17; Enf. 4:25.
Nk’oku omuvugi w’emotoka arikuguma naareeba ahu arikutoora beitu etari endeeberwamu erikworeka eby’enyima, naitwe twine kuta omutima aha migisha eya nyentsya, zitari nshobe ezi twakozire enyima (Reeba akacweka 16)
GUMIZAMU NOOHAMIZA OMUTIMA GWAWE
17. Ahabw’enki twine kugumizamu nituhamiza omutima gwaitu ngu Yehova naatukunda, kandi ngu akatusaasira?
17 Twine kugumizamu nituhamiza omutima gwaitu ngu Yehova naatukunda kandi ngu akatusaasira. (1 Yoh. 3:19) Ahabw’enki? Ahabw’okuba Sitaane tarikwija kurekyera aho kutureetera kuteekateeka ngu Yehova tarikutukunda, kandi ngu tarikubaasa kutusaasira. Ekigyendererwa kye n’okuturemesa kuheereza Yehova. Twine kukimanya ngu Sitaane naaza kwongyera aha kuteeraho kwe kuturemesa, ahabw’okuba naamanya ngu asigaize obwire bukye munonga. (Kush. 12:12) N’ahabw’ekyo, titwine kumwikiriza kusingura.
18. Noobaasa kukora ki kubaasa kuhamiza kimwe ngu Yehova naakukunda kandi ngu akakusaasira?
18 Okubaasa kuhamya obwesigye bwawe ngu Yehova naakukunda, teeraho kugyendera aha nshonga ezigambirweho omu kicweka eky’enyima. Kandi kubaasa kuhamiza omutima gwawe ngu Yehova akakusaasira, teekateeka aha ku yaayegambireho. Teekateeka aha bi Yehova yaareetaire abaahandiikire Baibuli kugamba aha kusaasira kwe. Ijuka ngu naamanya gye ngu tohikiriire, kandi naija kukutwariza omu muringo gw’embabazi. Kandi ijuka ngu yaakusaasira, naakusaasirira kimwe. Obwo nibwo oraije kubaasa kugamba n’obumanzi nk’obu Daudi yaabaire aine omu mbabazi za Yehova orikugira oti: “Yehova, yebare ahabw’okunsaasira ‘orubanja rw’ekibi kyangye.’!”—Zab. 32:5.
EKYESHONGORO 1 Emitwarize ya Yehova
a Reeba ekicweka “Draw Close to God—When Jehovah Described Himself” omu Omunaara gw’omurinzi ogwa Mei 1, 2009.