1925​​—⁠Emyaka Igana Ehingwire

AMATSIKO GATAHWAIRE

Omuri 1925, baingi aha Beegi ba Baibuli bakaba baine amatsiko ngu ensi yoona ekaba neija kuhinduka Paradiso omu mwaka ogwo. Ahabw’enki? Ow’eishe-emwe Albert Schroeder owaaheereize aha Kakiiko Akareeberezi akashoboorora ati: “Tukaba nituteekateeka ngu abakuratsi aba Yesu entoore abaabaire bakiri omu nsi bakaba nibaija kutwarwa omu iguru kutegyeka omu Bukama bwa Ruhanga, reero abashaija aba ira abeesigwa nka Abrahamu, Daudi n’abandi bakaba nibaija kuzooka bategyeke omu gavumenti ey’omu nsi barikukwatanisa n’Obukama bwa Ruhanga.” Kwonka ebi baabaire biniire amatsiko omu mwaka ogwo tibirabaireho, n’ahabw’ekyo bamwe bakeehurira nk’abu bareebize.—Enf. 13:12.

N’obu baraabe baabaire nibeehurira batyo, baingi aha Beegi ba Baibuli bakaguma baine bingi by’okukora omu murimo gw’okubuurira, kandi bakeeyongyera kumanya obujunaanizibwa bwabo nk’Abajurizi ba Yehova. Nk’eky’okureeberaho, teekateeka aha ki baakozire kujanjaaza amazima omu myanya ya haihi n’eya hare.

OKWOMBEKA RADIYO EZINDI

Omu 1924 abantu baingi bakaba nibahurikiza radiyo ya WBBR n’ahabw’ekyo omwaka ogwakuratsireho Abeegi ba Baibuli bakombeka radiyo endiijo ey’amaani haihi na Chicago, Illinois. Ekaba neeyetwa WORD. Ralph Leffler omwe aha baayombekire radiyo egyo, akagira ati: “Omu bwire bw’obutiti, radiyo egi ekaba ehurirwa omu myanya eya hare n’eya haihi.” Nk’eky’okureeberaho, eka emwe eyaabaire neetuura hare omu rurembo Pilot Station omuri Alaska kiromita ezirikurenga 5,000, bakahurikiriza puroguraamu yaayo ey’okubanza. Bwanyima, eka egyo ekahandiikira abaabaire nibakora aha radiyo egyo ebaruha barikubasiima aha bwa puroguraamu ey’eby’omwoyo eyaabagarwiremu amaani.

Omunaara gw’Omurinzi ogwa Desemba 1, 1925, gukagamba aha kujanjaara kwa radiyo egyo guti: “WORD n’emwe aha radiyo z’amaani omuri United States erikukorera aha maani ga waati 5,000. Radiyo egi neehurirwa gye omuri burengyerwa-izooba na burugwa-izooba bwa United States, Cuba na bukiizi bwa buryo bwa Alaska. Baingi abatakahurirahoga amazima nibenda kumanya ebirikukiraho ahabw’okuhurikiza radiyo egi.”

Omu bwire nibwo bumwe, Abeegi ba Baibuli bakaba nibateeraho kukoresa radiyo kwongyera kujanjaaza amakuru marungi omuri Canada. Omuri 1924 radiyo CHUC ekombekwa omuri Saskatoon, erikushangwa Saskatchewan. Ekaba eri emwe aha radiyo z’ediini omuri Canada ezaabandize. Omuri 1925 bakaaba nibenda kufurura radiyo egyo. N’ahabw’ekyo ekibiina kikagigura yaatwarwa omu kyombeko ekyabaire kikuzire ekirikwetwa Regent, omuri Saskatoon eki ekibiina kyaguzire kandi kikakihuunduza.

Radiyo egi ekahwera abantu baingi abaabaire nibatuura omu myanya y’ebyaro omuri Saskatchewan kuhurira amakuru marungi omurundi gw’okubanza. Nk’eky’okureeberaho, omukazi orikwetwa Graham owaabaire naatuura omu tauni emwe eyehereire, akahandiika arikushaba ebitabo by’okumwegyesa Baibuli bwanyima y’okuhurikiza emwe aha puroguraamu. Ow’eishe-emwe George Naish akagira ngu okushaba kw’omukazi ogwo kukoreka ngu naayendera kimwe kwegyesibwa, n’ahabw’ekyo tukamwoherereza ebitabo byona bya Studies in the Scriptures.” Omu bwire bukye, omukazi ogwo akaba yaatandikire kujanjaaza amakuru murungi omu byanga ebindi.

OKUHINDURA OMU BI TURIKWIKIRIZA

Omunaara gw’Omurinzi ogwa Maaci 1, 1925, gukaba gurimu ekicweka kikuru ekyabaire ekiine omutwe “Birth of the Nation.” Ahabw’enki ekicweka ekyo kyabaire kiri kikuru? Enyimaho, Abeegi ba Baibuli bakaba nibamanya ngu Sitaane akaba aine ekibiina ekirimu emyoyo mibi, kandi naategyeka amadiini, eby’obushuubuzi n’ab’eby’obutegyeki ab’ensi egi. Kwonka, “omwambari omwesigwa kandi ow’obwengye” akakoresa ekicweka eki kuhwera ab’eishe-emwe kwetegyereza ngu na Yehova aine ekibiina ekirikutaanira kimwe n’ekya Sitaane. (Mat. 24:45) Ekindi, omwambari akashoboorora ekyarugire omu rutaro ‘orwabaireho omu iguru’ omuri 1914, obu Sitaane na baadaimoni be baabingwa omu iguru bakanagwa omu nsi.—Kush. 12:​7-9.

Abamwe bakagumirwa kwikiriza enyetegyereza nsya egyo. N’ahabw’ekyo, ekicweka eki kikagira kiti: “Ku haraabe hariho batarikwikiriza ebyagambwaho aha, bashemereire kugumisiriza, bakeesiga Mukama, kandi bakamutegyereza n’omutima ogushemeire.”

Tom Eyre kuruga Britain owaabaire ari payoniya omu bwire obwo, akashoboorora oku Abeegi ba Baibuli baayehuriire aha kicweka ekyo arikugira ati: “Ab’eishe-emwe bakashemererwa munonga ahabw’okushoboorokyerwa Okushuuruurwa 12. Ku twayetegyereize ngu Obukama butairweho omu iguru, tukagira omujinya gw’okugambira abandi aha makuru marungi ago. Kikatuhiga kwongyera aha buheereza bwaitu n’okureeba oku Yehova yaabaire naija kwebembera abantu be kukora ebintu by’amaani omu biro by’omumaisho.”

OKUJURIRIRA YEHOVA

Hati, Abajurizi ba Yehova nibamanya gye ebigambo ebiri omuri Isaaya 43:10 aharikugira ngu, “Yehova naagira ati: Imwe n’omuheereza wangye ou naatooraine, muri baakareebi b’okuhamya ebyangye.” Kwonka 1925 gutakahikire, ekyahandiikirwe ekyo kikaba kitarikukira kukoresibwa omu bitabo byaitu. Kwonka ekyo kikaba kiri hakye kuhinduka. Omuri 1925, Omunaara gw’Omurinzi gukagamba ahari Isaaya 43:10 na 12 omu magaziini 11!

Aha kuhendera kwa Agusto 1925, Abeegi ba Baibuli bakagira ruteerane oruhango omuri Indianapolis, Indiana. Obutumwa bwa Joseph F. Rutherford obw’okwakiira abantu obwabaire buri aha ntebeekanisa y’oruteerane bukaba nibugira buti: “Twizire aha ruteerane oru . . . kutunga amaani kuruga ahari Mukama kugira ngu tubaase kugarukayo omu buheereza twine omujinya gw’okujuririra Yehova.” Omu biro munaana by’oruteerane orwo, abaabaire bariho bakahigwa kujuririra Yehova baatunga akagisha koona.

Orwamukaaga, Agusto 29, Ow’eishe-emwe Rutherford akaha orubazo orwabaire rwine omutwe “A Call to Action.” Omu rubazo orwo, akahamiiriza obukuru bw’okubuurira arikugira ati: “Yehova naagambira abantu be ati: ‘Muri abajurizi bangye . . . niinye Ruhanga.’ Bwanyima Yehova yaabaragira arikugira ati: Mwimukize abantu orurango.’ Tihariho abandi bantu abarikubaasa kukora ekintu eki, oyihireho [abantu be] abaine omwoyo gwa Mukama, kandi abajurizi be.”—Isa. 43:12; 62:10.

Bwanyima y’orubazo rw’Ow’eishe-emwe Rutherford abaabaire bamuhurikiriize boona bakaikirizana aha bigambo ebi yaabashomiire omu kihandiiko ekiine omutwe “Message of Hope,” ekyabaire nikyoreka ngu Obukama bwa Ruhanga nibwo bwonka oburaije kureetaho “obusingye obwabuzima, entunguuka, amagara amarungi, obugabe, n’okushemerererwa okwabuzima.” Obutumwa obu bukavunuurwa omu ndimi nyingi kugira ngu bubaase kukoresibwa omu kubuurira. Hakagabwa turakiti nk’obukaikuru 40.

Abeegi ba Baibuli bakaba batarikumanywa nk’Abajurizi ba Yehova kumara emyaka mingi. Kwonka, bakaba nibongyera kwetegyereza ngu baine obujunaanizibwa bukuru obw’okujuririra Yehova.

OKUGARUKIRA ABARIKWENDA KUMANYA EBIRIKUKIRAHO

Abeegi ba Baibuli ku baayeyongyeire kukanya omu nsi yoona, bakahigwa kugarukira abaabaire nibenda kwongyera kumanya amakuru marungi. Bwanyima y’ehururu y’okugaba turakiti Message of Hope, akatabo Bulletina kakagira kati: “Mwetebeekanise kugarukira amaka agu ababuurizi bataratsigiire ebitabo, kwonka ahu baatsigire turakiti eya Message of Hope.”

Akatabo Bulletin aka Jenwari 1925 kakaba karimu ripoota eyaahairwe omwegi wa Baibuli owa Plano, Texas owaagizire ati: “Nikitangaaza kureeba ngu ekicweka ekirikuba kibuuriirwe emirundi mingi nikikira kubamu abarikwenda kwega amazima kukira ebicweka ebitakabuuriirwemu. Tauni nkye omu kicweka kyaitu ebuuriirwe emirundi etaano omu myaka ikumi. . . . Enyimaho, munyaanyazi-itwe Hendrix na maawe bakagaruka omu kicweka ekyo, kandi bakagaba ebitabo bingi okukira obundi bwona.”

Kandi omu ihanga rya Panama, payoniya akahandiika ati: “Abantu baingi abaambingire aha miryango yaabo nkashanga bahindwire emitwarize yaabo ku naagarukireyo aha murundi gwa kabiri n’ogwa kashatu. Omwaka ogu ntaire omutima aha kugarukira abu naabaire naabuuriire, kandi ntugiremu ebirungi bingi.”

OKUGIRIRA EKIHIKA EBIRO BY’OMUMAISHO

Omu baruha ya buri mwaka ei Ow’eishe-emwe Rutherford yaahandiikiire baapayoniya, akagamba aha byakozirwe omu mwaka ogwo n’ebi baabaire baine kukurasaho. Akagira ati: “Omwaka oguhwaire, mutungire omugisha gw’okuhuumuriza abaabaire nibeehurira nk’abu bareebize. Okukora ekyo kibareeteire okushemererwa. . . . Kandi omwaka ogurikukurataho niguza kubabaasisa kujuririra Ruhanga n’obukama bwe, kandi tukooreka ngu turi abaheereza be abaabuzima. . . . Twena ka tugumizemu kukoresa amaraka gaitu kuhimbisa Ruhanga waitu kandi Omugabe waitu.”

Aha kuhendera kw’omwaka 1925, ab’eishe-emwe bakaba nibakora entebeekanisa y’okuhangusya ebyombeko bya Beseeli omuri Brooklyn. Omu mwaka 1926 nibwo baabaire nibaza kutandika purogyekiti mpango y’okwombeka eyaabaire etakabahoga omu kibiina.