Rukundo ya Ruhanga Neegumaho Ebiro Byona

1-2. Abakristaayo abaingi baine buremeezi ki?

TEERA akashushani eryato ririkuraba omu eihunga ry’amaani, ebingonzi by’amaani birikuritwara oku n’oku. Eryato eryo kubaasa kutatwarwa ebingonzi, omuvugi waaryo aine kunaga enanga omu maizi. Omu mbeera egyo, enanga neerihwera kuguma rihami omu mwanya gumwe.

² Waahikwaho oburemeezi, noobaasa kwehurira nk’eryato eryo. Enyehurira zaawe nizibaasa kuhindahinduka. Obumwe nooba oine obwesigye ngu Yehova naakukunda kandi naakushagika, kwonka obundi obangaanisa yaaba naareeba embeera ei orikurabamu. (Zab. 10:1; 13:1) Munywani waawe naabaasa kukugambira ebigambo by’okukugumya, kandi ekyo kikureetere kwehurira gye kumara akaire. (Enf. 17:17; 25:11) Kwonka bwanyima ogaruka obangaanisa. Noobaasa n’okwebuuza yaaba Yehova akutsigireho. Mbwenu shi waaba ori omu mbeera egyo, noobaasa kuhamya ota ngu Yehova takutsigireho? Kandi noobaasa kukora ki kuguma oine obuhame ngu Yehova naakukunda, kandi naakushagika?

3. Ebigambo ‘embabazi nari rukundo etarikuhinduka’ ebiri omu Zaaburi 31:7 na 136:1 nibimanyisa ki, kandi ahabw’enki nitugira ngu Yehova niwe arikukirayo kworeka omutwarize ogwo? (Reeba n’ekishushani.)

³ Omuringo gumwe oku orikubaasa kugumisiriza oburemeezi n’okwijuka rukundo ya Yehova n’oku ari omwesigwa. (Shoma Zaaburi 31:7; 136:1.) Ekigambo ekyavunwirwemu “embabazi” kiine amakuru g’okworeka rukundo y’akaramata n’okuhamira munonga aha muntu. Yehova niwe arikukirayo kworeka omutwarize ogwo. Nangwa Baibuli neemugambaho ‘nk’oijwire embabazi [nari rukundo etarikuhinduka].’ (Kur. 34:​6, 7) Kandi Baibuli neegamba ahari Yehova eti: “Ogira embabazi nyingi [nari rukundo etarikuhinduka] ahari boona abakutakira.” (Zab. 86:5) Teekateeka aha ki kirikumanyisa: Yehova tarikutsigaho abaheereza be abeesigwa! Okwijuka ngu Yehova n’omwesigwa nikibaasa kukuhuumuriza waahikwaho oburemeezi.—Zab. 23:4.

TEEKATEEKA AHARI RUKUNDO YA YEHOVA NK’AMAZIMA AGARIKUTANDIKIRWAHO

4. Ha eby’okureeberaho eby’amazima ga Baibuli agarikutandikirwaho, kandi oshoboorore ahabw’enki kitoorobi kubeihwabeihwa bwanyima y’okugamanya.

⁴ Omuringo ogundi oku turikubaasa kwemera oburemeezi n’okuteekateeka ahari rukundo ya Yehova nk’amazima ga Baibuli agarikutandikirwaho. Ebigambo “amazima ga Baibuli agarikutandikirwaho” nibimanyisa ki ahariiwe? Obundi noogateekateekaho nk’enyegyesa ezi waabandize kwega omu Kigambo kya Ruhanga. Nk’eky’okureeberaho, okeega ngu Yehova n’eiziina rya Ruhanga, ngu Yesu n’Omwana wa Ruhanga omwe nyamunegyere, abaafiire tihaine ki barikumanya, kandi ngu nihaija kubaho Paradiso ahu abantu baratuure ebiro byona. (Zab. 83:18; Mub. 9:5; Yoh. 3:16; Kush. 21:​3, 4) Tihaine owaabaire naabaasa kukubeihabeiha bwanyima y’okwikiriza amazima ago. Ahabw’enki? Ahabw’okuba okeetegyereza ngu n’amazima againe obuhame kuruga omu Baibuli. Hati ka twetegyereze oku okureeba rukundo ya Yehova nk’amazima ga Baibuli agarikutandikirwaho kirikubaasa kukuhwera kweihamu emiteekateekyere ngu Yehova tarikukufaho nari ngu tarikureeba ebi orikurabamu.

5. Shoboorora oku orikubaasa kusingura enyegyesa z’ebishuba.

⁵ Obu waatandika kwega Baibuli, niki ekyakuhweraire kwanga enyegyesa z’ebishuba? Obundi n’okugyeragyeranisa ebi waabaire nooyega omu diini yaawe n’ebi Baibuli erikwegyesa. Teekateeka aha ky’okureeberaho eki: Ka tugire ngu okaba noikiriza ngu Yesu ni Ruhanga Ow’obushoboorozi Bwona. Ku waagumizemu kwega Baibuli, okeebuuza oti: “Buzima enyegyesa egi ehikire?” Bwanyima y’okushwijuma gye obuhame oburi omu Byahandiikirwe, okareeba ngu enyegyesa egyo egwire. Ekyo kikakureetera kwikiriza eki Baibuli erikwegyesa ngu Yesu “n’Omwana wa Ruhanga omwe nyamunegyere” kandi “omujigaijo omu byahangirwe byona.” (Kol. 1:15; Yoh. 3:18) Amazima gari ngu, enyegyesa z’ebishuba niziba zitsimbire emizi omu mitima yaitu, kandi zigumire kweihamu. (2 Kor. 10:​4, 5) Kwonka ku waazeihiremu, toragarukire kubeihwabeihwa.—Fil. 3:13.

6. Ahabw’enki noobaasa kuhamya ngu “embabazi” [nari rukundo ya Yehova etarikuhinduka] n’enyegyesa ya Baibuli erikutandikirwaho?

⁶ Noobaasa kukora nikyo kimwe kyahika aha ki Baibuli erikwegyesa ahari rukundo ya Yehova. Waahikwaho okugyezibwa reero okatandika kubangaanisa yaaba Yehova naakukunda, yebuuze oti: ‘Mbwenu shi emiteekateekyere yangye ehikire?’ Ekigambo ekyakoresiibwe omuri Zaaburi 136 kumanyisa ‘embabazi [nari rukundo]’ nikitwariramu okuhamira aha muntu. Mbwenu shi ahabw’enki Yehova yaahigire omuhandiiki wa Zaaburi kugamba ahari rukundo ye omu muringo ogwo? Ahabw’enki ebigambo “embabazi ze [nari rukundo ye etarikuhinduka] n’ey’ebiro byona” byakoresiibwe emirundi 26 omuri zaaburi eya 136? Nk’oku twareeba rukundo ya Yehova etarikuhinduka ei ainiire abantu be n’emwe aha nyegyesa za Baibuli ezirikutandikirwaho ezi orikwikiriza n’omutima gumwe kuruga omu Kigambo kya Ruhanga. Tikihikire kuteekateeka ngu Yehova naakureeba nk’otaine mugasho nari ngu tarikukunda. Yaangira emiteekateekyere egyo nk’oku waayangire enyegyesa z’ebishuba.

7. Ha eby’okureeberaho bya bimwe aha byahandiikirwe ebirikutuhamiza ngu Yehova naatukunda.

⁷ Omu Baibuli harimu ebindi bingi ebirikutuhamiza ngu Yehova naatukunda. Nk’eky’okureeberaho, Yesu akagambira abakuratsi be ati: “Nimukira ebiteera-nkumba bingi.” (Mat. 10:31) Yehova nawe akagambira abantu be ati: ‘Niinyija kukuha amaani, nkuhwere, nkuramire n’omukono gwangye gwa buryo ogw’obusinguzi.’ (Isa. 41:10) Yetegyereze oku ebigambo ebyo birikutuhamiza. Yesu taragizire ngu ‘nimubaasa kuba nimukira ebiteera-nkumba,’ na Yehova tarikugira ngu ‘obundi niinyija kukuhwera.’ Kureka nibagira bati: “Nimukira ebiteera-nkumba bingi” kandi ngu, “Niinyija kukuhwera.” Waahikwaho oburemeezi okatandika kubangaanisa ngu Yehova tarikukukunda, ebyahandiikirwe nk’ebyo nibibaasa kukuhwera kwehurira gye, kandi bikuhamize ngu buzima Yehova naakukunda, ahakuba nibyesigwa. Waashaba kandi okabiteekateekaho, nikiija kukureetera kwikirizana n’ebigambo ebiri omuri 1 Yohaana 4:16 ebirikugira biti: “ltwe nitumanya, kandi nitwikiriza okukunda oku Ruhanga atukunda.”a

8. Noobaasa kukora ki obumwe waatandika kubangaanisa yaaba Yehova naakukunda?

⁸ Kwonka shi obumwe ku waakuba nookibangaanisa yaaba Yehova naakukunda? Gyeragyeranisa enyehurira zaawe n’ebi orikumanya omu Baibuli. Tikihikire kwesiga enyehurira zaitu ahakuba nizibaasa kutuhabisa, kwonka ebiturikumanya omu Baibuli nibituhamiza ngu Yehova naatukunda. N’ahabw’ekyo twayanga kukiikiriza ngu Yehova naatukunda, nituba nitwehuzya omutwarize gwe ogurikukirayo ogwa rukundo.—1 Yoh. 4:8.

TEEKATEEKA AHARI RUKUNDO EI YEHOVA AKWINIIRE

9-10. Yesu akaba naagamba ahari ki obu yaagira ngu: “Isheboona nawe abakunda” omuri Yohaana 16:​26, 27? (Reeba n’ekishushani.)

⁹ Nitubaasa kwega bingi ahari rukundo ya Yehova twashwijuma gye ebigambo ebi Yesu yaagambiire abakuratsi be obu yaabagira ati: “Isheboona nawe abakunda.” (Shoma Yohaana 16:​26, 27.) Yesu taragambire ebigambo ebyo kureetera abeegi be kwehurira gye. Ahakuba emishororongo eyetooroire ebigambo ebyo, neeyoreka ngu akaba atarikugamba aha nyehurira zaabo omu kaire ako. Kureka, akaba naagamba aha nshonga endiijo ekwatiraine n’okushaba.

¹⁰ Yesu akaba yaaheza kugambira abeegi be ngu bashemereire kushaba barikurabira omuri we baitu bataba niwe baashaba. (Yoh. 16:​23, 24) Ekyo kikaba kiri kikuru aharibo kukimanya. Bwanyima y’okuzooka kwe, abeegi be nibabaasa kuba baayenzire kumushaba, ahabw’okuba bakaba nibamumanya nka munywani waabo. Nibabaasa kuba baateekateekire ngu ahabw’okugira naabakunda munonga, akaba naija kubahurikiza kandi ayeshengyereze Ishe kubahwera. Kwonka Yesu akabagira ngu tibashemereire kuteekateeka batyo. Ahabw’enki? Akabagira ati: “Isheboona nawe abakunda.” Amazima ago ni gamwe aha mazima ga Baibuli agarikutandikirwaho agarikukwata aha kushaba. Teekateeka aha ki ekyo kirikumanyisa ahariiwe: Okwega Baibuli kukuhwereire kumanya Yesu n’okumukunda. (Yoh. 14:21) Kwonka nk’abeegi ba Yesu ab’ekyasha ky’okubanza, naiwe noobaasa kushaba Ruhanga n’obwesigye orikumanya ngu ‘nawe naakukunda.’ Buri murundi ogu orikushaba Yehova, nooyoreka okwikiriza oku oine omu bigambo ebyo.—1 Yoh. 5:14.

TEERAHO KWETEGYEREZA EKIRIKUKUREETERA KUBANGAANISA

11. Ahabw’enki Sitaane naashemererwa twabangaanisa rukundo ya Yehova?

¹¹ Niki ekirikutureetera kubangaanisa rukundo ya Yehova? Noobaasa kugarukamu ngu ni Sitaane, kandi waagarukamu otyo obumwe nooba ohikire. Ahabw’okuba Sitaane “naasherura ou araarye,” kandi nikimushemeza yaareeba nitubangaanisa rukundo ya Yehova. (1 Pet. 5:8) Kandi rukundo ei Yehova aine ekamuhiga kutuha ekitambo ekintu eki Sitaane arikwenda ngu tureebe nk’ekitarikubaasa kutugasira. (Heb. 2:9) Mbwenu shi n’oha orikugasirwa twabangaanisa rukundo ya Yehova? Ni Sitaane. Kandi twahanika omu bwire bw’oburemeezi nituba twahikiiriza ekigyendererwa kye. Teekateeka aha ku Sitaane arikuteeraho munonga kutureetera kubangaanisa rukundo ya Yehova. Yehova tarikukunda Sitaane, n’ahabw’ekyo Sitaane naakoresa ‘bugobya bwe,’ kutureetera kuteekateeka ngu niitwe abu Yehova atarikukunda, kandi abu acwereire orubanja. (Efe. 6:11) Twamanya eki omuzigu waitu Sitaane ariyo naateeraho kukora, nitubaasa kuhamya okumariirira kwaitu ‘kumurwanisa.’—Yak. 4:7.

12-13. Ekibi eki twahungwire nikibaasa kutureetera kita kubangaanisa rukundo ya Yehova?

¹² Hariho ekindi ekirikubaasa kutureetera kubangaanisa rukundo ya Yehova. Ni kintu ki ekyo? N’obutahikiirira bwaitu. (Zab. 51:5; Rom. 5:12) Ekibi kikataanisa omuntu n’omuhangi we, kandi kyashiisha emiteekateekyere ye, omutima gwe, n’omubiri gwe.

¹³ Ekibi nikitabangura enyehurira zaitu kitureetera kuguma nitwecwera orubanja, okwerarikirira, okwehurira nk’abataine burinzi n’enshoni. Nitubaasa kugira enyehurira ezo twakora ekibi. Kwonka nizibaasa kwija kitaraariire, ahabw’okuba butoosha nitumanya ngu turi abasiisi ekirikutaanira kimwe n’oku twahangirwe. (Rom. 8:​20, 21) Nk’oku emotoka etarikubaasa kugyenda gye yaaba eine omupiira gutaine mwika, nikwo n’abantu abatahikiriire batarikubaasa kukora gye nk’oku baabaire bari batakasiisire. N’ahabw’ekyo tikirikututangaaza kureeba ngu obumwe nitubangaanisa rukundo ya Yehova. Ekyo kyabaho, twine kwijuka ngu Yehova ni ‘Ruhanga nyamuhanga orikutiinwa . . . agirira embabazi [nari rukundo etarikuhinduka] abarikumukunda, bakoorobera ebiragiro bye.’—Neh. 1:5.

14. Okuteekateeka aha kitambo nikibaasa kutuhwera kita kusingura okubangaanisa ngu Yehova tarikubaasa kutukunda? (Abarooma 5:8) (Reeba n’akabokusi “Yerinde ‘Obugobya bw’Ekibi.’”)

¹⁴ Obumwe nitubaasa kwehurira nk’abatashemereire rukundo ya Yehova. Kandi amazima gari ngu titugishemereire, kandi ekyo nikyo kirikuhindura rukundo egyo kuba ey’omutaano. Tihaine eki turikukora kuba abahikire kugigira. Kwonka nabwo, ekitambo nikirihiirira ebibi byaitu, kandi Yehova akataho entebeekanisa egyo ahabw’okutukunda. (1 Yoh. 4:10) Ijuka ngu Yesu akaija kujuna abasiisi batari abantu abahikiriire. (Shoma Abarooma 5:8.) Tihaine orikubaasa kukora ebintu omu muringo oguhikiriire, kandi ekyo tikyo Yehova arikutushaba kukora. Twayetegyereza ngu obutahikiirira bwaitu nibubaasa kutureetera kubangaanisa rukundo ya Yehova, nikituhiga kumariirira kurwanisa emiteekateekyere egyo.—Rom. 7:​24, 25.

CWAMU KUHAMIRA AHARI YEHOVA

15-16. Twaguma tuhamiire ahari Yehova, nitubaasa kugira bwesigye ki, kandi ahabw’enki? (2 Samueli 22:26)

¹⁵ Yehova naayenda ngu tukore ekihikire ‘turikumuhamiraho.’ (Bir. 30:​19, 20) Twakora ekyo nitubaasa kugira obwesigye ngu nawe naija kutuhamiraho. (Shoma 2 Samueli 22:26.) Twaguma turi abeesigwa ahari Yehova, nitubaasa kugira obwesigye ngu naija kutuhwera kuraba omu buremeezi.

¹⁶ Nk’oku twareeba, twine enshonga nyingi ahabw’enki twine kugumisiriza twahikwaho oburemeezi. Nitumanya ngu Yehova naatukunda, kandi naija kutushagika. Ekyo nikyo Baibuli erikwegyesa. Twabangaanisa rukundo ye, nitubaasa kuteekateeka aha bi turikumanya omu mwanya gw’okuturikwehurira omu kaire ako. N’ahabw’ekyo, ka tugume nitwesiga amazima ag’omu Baibuli ngu rukundo ya Yehova etarikuhinduka n’ey’ebiro byona.