Yehova Naayebembera Abaheereza Be

1, 2. (a) Abajurizi ba Yehova nibataana bata aha diini ezindi? (b) Nituza kwega ki omu kicweka eki n’ekirikukurataho?

ABANTU nibakira kubuuza Abajurizi ba Yehova ngu, “Omwebembezi waanyu n’oha?” Nibabuuza eki ahabw’okuba omu madiini maingi nibaba baine omushaija nari omukazi orikubeebembera. Kwonka, nikitwesiimisa ahabw’okugira ngu Omwebembezi waitu ti muntu otahikiriire. Kureka, Omwebembezi waitu ni Yesu Kristo! Kandi naayorobera Ishe Omwebembezi, Yehova.​—Matayo 23:10.

² Kandi hariho na guruupu y’abashaija abarikwetwa ‘omwambari omwesigwa kandi ow’obwengye,’ abarikwebembera abaheereza ba Ruhanga omu nsi obunaku obu. (Matayo 24:45) Kwonka shi nitumanya tuta ngu buzima Yehova niwe arikutwebembera kurabira omu Mwana we? Nituza kureeba enshonga ishatu ahabw’enki turikubaasa kukihamya. N’obu Yehova araabe atwire naakoresa abantu abamwe kwebembera abaheereza be, nikyeyoreka gye ngu Yehova atwire ari Omwebembezi, kandi naija kugumizamu naayebembera abaheereza be.​—Isaaya 58:11.

OMWOYO GURIKWERA GUKABAHWERA

3. Niki ekyabaasiise Musa kwebembera Abaisraeli?

³ Omwoyo gurikwera gukabaasisa abajwekyerwa ba Ruhanga. Ruhanga akatoorana Musa kuba omwebembezi w’Abaisraeli. Niki ekyamuhweraire kukora omurimo mukuru ogu? Yehova akaha Musa ‘omwoyo gwe ogurikwera.’ (Shoma Isaaya 63:11-14.) Buzima Yehova niwe yaabaire naayebembera abaheereza be, ahakuba omwoyo gwe ogurikwera nigwo gwabaire niguhwera Musa.

4. Niki ekyabaire nikyoreka ngu Musa aine omwoyo gurikwera? (Reeba ekishushani aha kutandika.)

⁴ Mbwenu shi abantu bakaba nibakireeba ngu Musa aine omwoyo gurikwera? Eego! Omwoyo gwa Yehova ogurikwera gukabaasisa Musa kukora eby’okutangaaza omu maisho ga Faraho, omutegyeki wa Misri. (Okuruga 7:1-3) Omwoyo gurikwera gukahwera Musa kuba omwebembezi oine okugumisiriza na rukundo. Akaba naataana n’abeebembezi ba Misri abaabaire baine omwaga kandi barikweyendeza! (Okuruga 5:2, 6-9) Buzima, Yehova akaba atooraine Musa kuba omwebembezi w’abaheereza be.

5. N’oha ondiijo ou Yehova yaahaire omwoyo gwe gurikwera kwebembera abaheereza be?

⁵ N’oha ondiijo ou Yehova yaahaire omwoyo gwe gurikwera kwebembera abaheereza be? Baibuli neegira eti: “Yoshua mwene Nuuni akaba aijwire omwoyo gw’obwengye.” (Eky’Ebiragiro 34:9) Omwoyo gwa Yehova “gwaija ahari Gideoni.” (Abaramuzi 6:34) Kandi omwoyo gwa Yehova gukaija ahari Daudi gwamuha amaani. (1 Samueli 16:13) Abashaija aba boona bakaba nibeesiga omwoyo gwa Ruhanga kubahwera kukora ebintu ebi baabaire batarikubaasa kukora ahabw’amaani gaabo. (Yoshua 11:16, 17; Abaramuzi 7:7, 22; 1 Samueli 17:37, 50) Buzima, Yehova niwe yaabaire naabaha amaani g’okukora ebintu ebyo, n’ahabw’ekyo niwe wenka owaabaire aine kuhimbisibwa.

6. Ahabw’enki Ruhanga yaabaire naayenda ngu abantu boorobere abeebembezi baabo omuri Israeli?

⁶ Abaisraeli bakaba baine kukora ki bwanyima y’okureeba ngu omwoyo gwa Ruhanga ogurikwera guhaire amaani Musa, Yoshua, Gideoni, na Daudi? Bakaba baine kuha ekitiinisa abashaija aba. Abantu ku baayetomboiteire Musa, yetegyereze oku Yehova yaababuurize: “Abantu aba baryahitsya hi okungaya?” (Okubara 14:2, 11) Hatariho kubanganisa, Yehova akaba atooraine abashaija abo kwebembera abaheereza be. Abantu ku baabaire baboorobera, kimanyisa ngu bariyo nibakuratira Yehova nk’Omwebembezi waabo.

BAKAHWERWA BAAMARAIKA

7. Baamaraika bakahwera bata Musa?

⁷ Baamaraika bakahwera abajwekyerwa ba Ruhanga. (Shoma Abaheburaayo 1:7, 14.) Ruhanga akakoresa baamaraika kwebembera Musa. Omurundi gw’okubanza, ‘maraika akamubonekyera aha Rushaka’ yaamuha omurimo gw’okujuna Abaisraeli n’okubeebembera. (Ebyakozirwe 7:35) Ogwa kabiri, Ruhanga akakoresa baamaraika kuha Musa Ebiragiro ngu abimanyise Abaisraeli. (Abagalatia 3:19) Ogwa kashatu, akagambira Musa ati: “Otware abantu abo omu mwanya ogu naakugambiire; reeba, maraika wangye naija kukwebembera.” (Okuruga 32:34) Baibuli terikugira ngu Abaisraeli bakaba nibareeba maraika arikukora ebintu ebyo. Kwonka, kurugiirira aha ku Musa yaabaire naamanyisa abantu ebiragiro bya Ruhanga n’oku yaabaire naabeebembera, kikaba nikyeyoreka butunu ngu baamaraika nibamuhwera.

8. Baamaraika bakahwera bata Yoshua na Hezekia?

⁸ Ni baahi abandi abu baamaraika baahwereire? Baibuli neegira ngu “Omukuru w’eihe rya” Yehova, nari maraika, akahwera Yoshua kusingura Abakanaani. (Yoshua 5:13-15; 6:2, 21) Bwanyima, obu Omugabe Hezekia yaabaire naayebembera Abaisraeli, eihe rihango ry’Abaasiria rikatiinatiinisa kucwekyereza Yerusaalemu. Kwonka omu kiro kimwe, “maraika wa” Yehova akaita abashaija 185,000.​—2 Abagabe 19:35.

9. N’obu abajwekyerwa ba Ruhanga baraabe baabaire batahikiriire, Abaisraeli bakaba baine kukora ki?

⁹ Baamaraika bahikiriire. Kwonka abantu abu baahwereire bakaba batahikiriire. Nk’eky’okureeberaho, Musa eizooba rimwe akaremwa kuhaisa Yehova ekitiinisa. (Okubara 20:12) Yoshua tarabuurize Ruhanga obu Abagibeoni baabaire nibenda kukora nawe endagaano. (Yoshua 9:14, 15) Hariho obu Hezekia yaagira amaryo. (2 Obusingye 32:25, 26) N’obu abashaija aba baraabe baabaire batahikiriire, Abaisraeli bakaba baine kworobera obwebembezi bwabo. Abaisraeli bakaba nibabaasa kureeba ngu Yehova naakoresa baamaraika kuhwera abashaija aba. Kandi kwo buzima, Yehova niwe yaabaire naayebembera abaheereza be.

BAKAHWERWA EKIGAMBO KYA RUHANGA

10. Ebiragiro bya Ruhanga bikahwera bita Musa?

¹⁰ Abajwekyerwa ba Ruhanga bakaba beebemberwa Ekigambo kye. Baibuli neegamba aha biragiro nk’ebihandiikirwe “omu kitabo kya Musa.” (1 Abagabe 2:3) Kwonka nabwo Baibuli neekyoreka gye ngu Yehova niwe yaabaire ahaire Abaisraeli Ebiragiro. Kandi Musa nawe akaba naabyorobera. (2 Obusingye 34:14) Nk’eky’okureeberaho, bwanyima ya Yehova kugambira Musa oku aine kwombeka eihema, Musa akakora ebi Yehova “yaamuragiire byona oku byabaire biri.”​—Okuruga 40:1-16.

11, 12. (a) Yoshua n’abagabe abaabaire nibategyeka abantu ba Ruhanga bakaba baine kukora ki? (b) Ekigambo kya Ruhanga kikahwera kita abashaija abaabaire nibeebembera?

¹¹ Obu Yoshua yaabaire ari omwebembezi akaba aine bimwe aha biri omu Kigambo kya Yehova, kandi Yehova akagira ati: “Ogume nookiteekateekaho nyomushana na nyekiro, obone kwerinda, ohitsye byona ebihandiikirwemu.” (Yoshua 1:8) N’abagabe abaizire kutegyeka abantu ba Ruhanga, buri omwe aharibo akaba aine kuhandiika ekitabo ekye eky’Ebiragiro, akabishoma buri izooba, kandi akoorobera “ebigambo byona eby’ebiragiro n’ebyatairweho,” n’okubigyenderaho.​—Shoma Eky’Ebiragiro 17:18-20.

¹² Ekigambo kya Ruhanga kikaba kihwera kita abeebembezi? Teekateeka aha ky’okureeberaho ky’Omugabe Yosia. Bwanyima y’okubona ebiragiro bya Musa, omuhandiiki w’Omugabe Yosia akatandika kubimushomera.a (Reeba obugambo obw’ahansi.) “Omugabe ku yaahuriire ebigambo by’omu kitabo ky’Ebiragiro, yaataagura ebijwaro bye.” Bwanyima y’ekyo, Ekigambo kya Ruhanga kikahiga Omugabe Yosia kucwekyereza ebishushani ebirikuramibwa byona ebyabaire biri omu ihanga ryabo, kandi yaatebeekanisa n’Obugyenyi bw’Okuhingurwaho obwabaire nibukirayo obuhango. (2 Abagabe 22:11; 23:1-23) Ahabw’okugira ngu Yosia n’abeebembezi abandi abeesigwa bakakuratira Ekigambo kya Ruhanga, bakaba beeteekateekire kukora empindahinduka kworobera obuhabuzi obu Ruhanga yaabaire ahaire abantu be. Empindahinduka ezo zikahwera abantu ba Ruhanga kumworobera.

13. Abeebembezi b’abaheereza ba Ruhanga bakaba nibataana bata aha b’amahanga agandi?

¹³ Abeebembezi b’amahanga agandi bakaba beebemberwa abantu abarikukoresa obwengye bwabo obwine obugarukiro. Nk’eky’okureeberaho, abeebembezi b’Abakanaani n’abantu baabo bakaba nibakora ebintu bibi munonga, ebyabaire nibitwariramu ab’eka emwe kutaaha hamwe omu bushwere, ebitingwa, okuteerana n’enyamaishwa, okuhonga abaana, n’okuramya ebishushani. (Abaleevi 18:6, 21-25) N’abeebembezi b’Abababulooni n’Abamisri bakaba bataine biragiro by’obwecumi nk’eby’abaheereza ba Ruhanga. (Okubara 19:13) Kwonka, abaheereza ba Ruhanga bakaba nibareeba oku abeebembezi baabo abeesigwa baabaire nibabahiga kurinda okuramya kwabo kuguma kuri okurikwera, kuba abeecumi aha mubiri, n’okwerinda obushambani. Buzima, Yehova niwe yaabaire naabeebembera.

14. Ahabw’enki Yehova yaabaire ahana bamwe aha baabaire nibeebembera abaheereza be?

¹⁴ Ti bagabe boona abaabaire nibategyeka abaheereza ba Ruhanga ngu bakaba nibakuratira obuhabuzi bwa Ruhanga. Abagabe abatari beesigwa bakanga kworobera obuhabuzi bw’omwoyo gwe ogurikwera, baamaraika be, n’Ekigambo kye. Obumwe, Yehova akaba abahana nari ataho abeebembezi abandi omu mwanya gwabo. (1 Samueli 13:13, 14) Bwanyima, Yehova akatoorana omuntu owaabaire naija kuba omwebembezi ohikiriire.

YEHOVA OKUTOORANA OMWEBEMBEZI OHIKIRIIRE

15. (a) Baanabi bakooreka bata ngu omwebembezi ohikiriire ariyo naija? (b) N’oha owaabaire ari omwebembezi ohikiriire?

¹⁵ Kumara emyaka mingi, Yehova akaraganisa ngu naija kutoorana omwebembezi w’abaheereza be ohikiriire. Nk’eky’okureeberaho, Musa akagambira Abaisraeli ngu Yehova “Ruhanga waanyu aryabaimukiza nabi nkaanye, arugye omuriimwe omuri beene waanyu; ogwo niwe murihurira.” (Eky’Ebiragiro 18:15) Isaaya akagira ngu Ogu akaba naija kuba “omwebembezi kandi omutegyeki.” (Isaaya 55:4) Kandi Danieli akahandiika ahari Mesia, owaabaire naija kuba ‘Omunyiginya’ nari Omwebembezi. (Danieli 9:25) Kandi, Yesu Kristo nawe akeegambaho nk’Omwebembezi nari “Omukama” w’abaheereza ba Ruhanga. (Shoma Matayo 23:10.) Abeegi ba Yesu bakamukuratira beekundiire, kandi bakaba nibaikiriza ngu akaba atoorainwe Yehova. (Yohaana 6:68, 69) Niki ekyabaire nikibahamiza ngu Yesu Kristo niwe Yehova yaabaire naaza kukoresa kwebembera abaheereza be?

16. Ni buhame ki obwayorekire ngu Yesu akaba naahwerwa omwoyo gurikwera?

¹⁶ Omwoyo gurikwera gukahwera Yesu. Yesu ku yaabatiziibwe, Yohaana akareeba ‘eiguru rikinguukire, n’Omwoyo nigumushuumaho nk’enkombe.’ Bwanyima y’ekyo, ‘omwoyo gukamutwara omu ihamba.’ (Mako 1:10-12) Obu Yesu yaabaire naabuurira omu nsi, omwoyo gwa Ruhanga gukaba gumuhwera kwegyesa n’okukora eby’okutangaaza. (Ebyakozirwe 10:38) Okwongyera ahari ekyo, omwoyo ogurikwera gukamuhwera kugira emitwarize nka rukundo, okushemererwa, n’okwikiriza kw’amaani. (Yohaana 15:9; Abaheburaayo 12:2) Tihariho mwebembezi ondiijo owaabaire naareebwa butunu ngu aine omwoyo gwa Ruhanga ogurikwera okukira Yesu. Buzima, Yehova akaba atooraine Yesu kuba Omwebembezi.

17. Baamaraika bakahwera bata Yesu?

¹⁷ Baamaraika bakahwera Yesu. Obwire bukye Yesu aherize kubatizibwa, ‘baamaraika bakaija, baamuheereza.’ (Matayo 4:11) Harikuburayo eshaaha nkye akafa, ‘maraika akamweyoreka naaruga omu iguru, yaamugumya.’ (Luka 22:43) Yesu akaba naamanya ngu Yehova naabaasa kutuma baamaraika kumuhwera yaaba naayenda obuhwezi.​—Matayo 26:53.

18, 19. Ekigambo kya Ruhanga kikeebembera kita Yesu n’omu kwegyesa?

¹⁸ Yesu Akeebemberwa Ekigambo kya Ruhanga. Kuruga obu Yesu yaatandika kubuurira kuhitsya aha kufa kwe, akaba naagyendera aha buhabuzi bw’Ebyahandiikirwe. Nangwa n’obu yaabaire ariyo naafa, akagamba aha bunabi oburikukwata ahari Mesia. (Matayo 4:4; 27:46; Luka 23:46) Kwonka, abeebembezi b’ediini obunaku obwo bakaba nibataanira kimwe na Yesu. Bakaba batarikwenda kugyendera aha Kigambo kya Ruhanga ahu kyabaire kitarikushagika enyegyesa zaabo. Yesu akajuriza ebyahandiikirwe obu yaabagambaho ati: “Imwe ndyarya ‘mwe, Isaaya akabaraguraho kurungi, obu yaagira ati: Ab’eihanga eri nibampa ekitiinisa ky’aha minwa, kwonka emitima yaabo endi hare. Bandamiza busha, ahakuba okwegyesa, oku beegyesa, kuba okw’ebiragiro by’abantu.” (Matayo 15:7-9) Yehova akaba atarikubaasa kutoorana abashaija abaabaire batarikukoresa Ekigambo kye kwebembera abantu be.

¹⁹ Kandi Yesu akakoresa Ekigambo kya Ruhanga obu yaabaire naayegyesa abandi. Abeebembezi b’ediini ku baamuhakaniise, tarakoreise obwengye bwe nari ebi arikumanya kubagarukamu. Omu mwanya gw’ekyo, akeegyesa abantu arikukoresa Ebyahandiikirwe. (Matayo 22:33-40) Ekindi Yesu akaba naabaasa kugambira abandi ebintu ebirikutangaaza ebirikukwata aha bi yaareebire omu iguru. Omu mwanya gw’ekyo, ahabw’okugira ngu akaba naakunda Ekigambo kya Ruhanga, akaba aine ekihika ky’okubuurira abandi, kandi ‘akashuuruura obwengye bwabo, ngu bashoboorokyerwe Ebyahandiikirwe.’​—Luka 24:32, 45.

20. (a) Yesu akahimbisa ata Yehova? (b) Emiteekateekyere ya Yesu ekaba neetaana eta aha ya Heroode Aguripa I?

²⁰ N’obu Yesu araabe yaabaire naabuurira abantu bakatangaara, butoosha ekitiinisa akaba akiha omwegyesa we, Yehova. (Luka 4:22) Omushaija omutungi ku yaateireho kuha Yesu ekitiinisa ngu ‘n’Omwegyesa Murungi,’ Yesu akecureeza yaagira ati: “Noonyetera ki omurungi? Tihariho murungi, kureka Ruhanga wenka.” (Mako 10:17, 18) Kwonka, Heroode Aguripa I owaabaire omwebembezi wa Buyudaaya bwanyima y’emyaka nka munaana, akaba aine emiteekateekyere erikutaana n’eya Yesu. Eizooba rimwe, aha ruteerane orw’omutaano, Heroode akajwara ekijwaro kirungi munonga kandi eky’obuguzi bwingi. Abantu ku baamureebire kandi bakahurira n’ebi arikugamba, bakagambira ahaiguru nibagira bati: “Eiraka eri n’erya ruhanga, ti ry’omuntu!” Heroode akaba naakunda kuhimbisibwa. Kwonka niki ekyabaireho? “Ahonaaho maraika wa Mukama yaamuteera, ahakuba tarahaire Ruhanga kitiinisa; yaariibwa enyogori, yaafa.” (Ebyakozirwe 12:21-23) Buzima, Yehova akaba atatooraine Heroode nk’omwebembezi. Kwonka, Yesu akooreka ngu akaba atoorainwe Ruhanga, kandi akaguma naahimbisa Yehova Omwebembezi w’abantu Orikukirayo.

21. Nituza kushwijuma ki omu kicweka ekirikukurataho?

²¹ Yehova akaba naayenda ngu Yesu abe Omwebembezi kumara emyaka mingi munonga. Bwanyima ya Yesu kuzooka, akagambira abeegi be ati: “Mpairwe obushoboorozi bwona omu iguru n’omu nsi.” Akoongyeraho ati: “Kandi reeba, ndi hamwe naimwe ebiro byona okuhitsya obu ensi egi erihwaho.” (Matayo 28:18-20) Kwonka Yesu naabaasa kwebembera ata abaheereza ba Ruhanga omu nsi, kandi obwo ari omu iguru atarikureebwa? Yehova akaba naabaasa kukoresa oha kujwekyera Yesu omu nsi? Kandi Abakristaayo bakaba nibaija kumanya bata abu Ruhanga arikukoresa kumujwekyera? Ekicweka ekirikukurataho nikiija kugarukamu ebibuuzo ebyo.