Okwehayo Kwawe Oyekundiire Ka Kuhimbisise Yehova!

1, 2. (a) Elifaazi na Biludaadi bakagamba ki aha ku Ruhanga arikureeba obuheereza bwaitu? (b) Enshonga egyo Yehova we akagigambaho ki?

EMYAKA mingi enyima, abashaija bashatu bakaza owa Yobu omuheereza wa Ruhanga omwesigwa. Omwe aha bashaija abo, Elifaazi Omutemaani, akabuuza Yobu ebibuuzo ebi: “Omuntu aine eki yaakugasira Ruhanga? Noogira ngu iwe okuba ohikiriire, kiine eki kirikushemeza ow’Obushoboorozi Bwona? Nari shi okushemeza emitwarize yaawe kiine eki kirikumwongyeraho?” (Yobu 22:1-3) Elifaazi akaba naateekateeka ngu eky’okugarukamu buzima ni ngaaha. Omushaija ondiijo Biludaadi Omushuuhi, akoongyeraho ngu tikirikubaasika abantu kuba abashemeire omu maisho ga Ruhanga.​—Shoma Yobu 25:4.

² Elifaazi na Biludaadi bakaba nibenda kureetera Yobu kuteekateeka ngu okuteeraho kwe kuheereza Yehova kukaba kutaine mugasho. Abashaija abo bakaba nibenda ngu Yobu aikirize ngu abantu tituri b’omuhendo ahari Ruhanga kukira ekiyenje, enyogori, nari omunyongororwa. (Yobu 4:19; 25:6) Mbwenu shi bakaba nibagamba batyo ahabw’okugira ngu bakaba bari abacureezi? (Yobu 22:29) Amazima gari ngu Yehova ari ahaiguru munonga kandi waamugyeragyeranisa naitwe, turi ab’ahansi munonga. Twaba turi aha mutwe gw’orushozi, nari twaba turi omu nyonyi reero tukareebera omu dirisa yaayo, nibwo turikumanya omuntu ku ari akantu kakye kandi ak’ahansi. Kwonka shi okwo nikwo Yehova arikureeba okuteeraho kwaitu kumuheereza n’okwejumba omu mirimo y’Obukama? Ngaaha! Yehova akagambira Elifaazi, Biludaadi, n’omushaija ondiijo orikwetwa Zofari, ngu bakaba nibagamba ebishuba. Kandi Yehova akagira ngu akaba naasiima Yobu kandi akamweta ‘omwiru we’ nari omuheereza we. (Yobu 42:7, 8) N’ahabw’ekyo nitubaasa kuhamya ngu abantu abatahikiriire nibabaasa kuba ‘ab’omugasho ahari Ruhanga.’

“OMUHAIRE KI?”

3. Elihu akagamba ki aha kuteeraho kwaitu kuheereza Yehova, kandi akaba naamanyisa ki?

³ Omushaija muto orikwetwa Elihu akaba naahurira ebi abashaija abo bashatu baabaire nibagambira Yobu. Ku baaherize kugamba, Elihu akabuuza Yobu ebirikukwata ahari Yehova ati: “Ku ohikiriire, omuhaire ki? Nari shi, ahairwe ki ekirugire omu ngaro zaawe?” (Yobu 35:7) Mbwenu shi Elihu nawe akaba ariyo naagira ngu okuteeraho kwaitu kuheereza Ruhanga tikwine mugasho? Ngaaha. Yehova tarahanire Elihu, nk’oku yaahanire abashaija abandi bashatu. Elihu akaba naateeraho kugamba enshonga y’omutaano. Akaba ariyo naayoreka ngu n’obu twakuba tutaramize Yehova, Yehova taine ki arikufeerwa. Yehova aijwire tihaine eki abuzireho. Tihaine eki turikubaasa kukora ekirikubaasa kumureetera kuba omutungi nari ow’amaani. Nangwa n’emitwarize mirungi ei twine nari okubaasa, nibiruga ahari Yehova, kandi naareeba oku turikubikoresa.

4. Yehova naayehurira ata twagirira abandi embabazi?

⁴ Abarikuheereza Yehova twabagirira rukundo etahwaho, naareeba ebikorwa byaitu nk’abariyo nitubikorera we. Enfumu 19:17 nihagira hati: “Ogirira abooro embabazi, aba naaguza Mukama; aryamuzimuurira ebi yaakozire.” Buzima Yehova naareeba buri murundi ogu turikugirira abandi embabazi. N’obu Yehova niwe yaahangire eiguru n’ensi, naareeba ebi turikukorera abandi nk’eibanja ahari we, eri arikutushashura arikutuha ebiconco bingi eby’omuhendo. Yesu Omwana wa Ruhanga, eki akakihamya.​—Shoma Luka 14:13, 14.

5. Nituza kushwijuma bibuuzo ki?

⁵ Ira, Yehova akeeta nabi Isaaya kumujwekyera kandi akamuheereza omu muringo gw’omutaano. (Isaaya 6:8-10) Isaaya akaikiriza ayekundiire kandi yaagira ati: “Ndi aha; ba niinye waatuma!” N’obunaku obu, Yehova naaha abantu abeesigwa omugisha gw’okwejumba omu murimo ogu. Abaheereza ba Yehova baingi nibooreka ngu baine emiteekateekyere nk’eya Isaaya. Beeteekateekire kwikiriza kuheereza Yehova omu miringo n’emyanya mingi kandi bakeemera embeera zigumire n’oburemeezi bwingi. Kwonka omuntu naabaasa kwebuuza ati: ‘Ninsiima omugisha gw’okwehayo nyekundiire omu buheereza bwa Yehova, kwonka shi eki ndikukora buzima kiine omugasho gwona? Yaaba ndiho nari ntariho, Yehova tarikwija kureetera omurimo gwe kukorwa?’ Oraayehuriireho otyo? Ka tushwijume oku ebyahikire aha baheereza ba Yehova babiri aba ira, Debora na Baraka, birikubaasa kutuhwera kugarukamu ebibuuzo ebyo.

RUHANGA, OKUTIINA NAAKUHINDURAMU OBUMANZI

6. Ahabw’enki kyabaire nikireebeka nk’ekyorobi eihe rya Yabini kusingura ery’Abaisraeli?

⁶ Baraka akaba ari Omwisraeli omurwani, kandi Debora akaba ari nabikazi. Kumara emyaka 20, Yabini omugabe wa Kanaani akaba “naita kubi” Abaisraeli. Eihe rya Yabini rikaba niritiinisa munonga kandi ririkutwariza kubi n’Abaisraeli abaabaire nibatuura omu byaro baahika n’aha kutiina kuruga omu maka gaabo. Eihe rya Yabini rikaba riine ebigaari by’ebyoma 900, kwonka Abaisraeli bakaba bataine by’okurwanisa ebihikire nari eby’okujwara kwerinda.​—Abaramuzi 4:1-3, 13; 5:6-8.a (Reeba obugambo obw’ahansi.)

7, 8. (a) Yehova akabanza kuha Baraka buhabuzi ki? (b) Abaisraeli bakasingura bata eihe rya Yabini? (Reeba ekishushani aha kutandika.)

⁷ Abaisraeli waabagyeragyeranisa n’eihe rya Yabini, bakaba nibareebeka nk’abataine maani kandi aboorobi kusingura. Kwonka Yehova akaragiira Baraka kurabira omu nabikazi Debora ati: ‘Gyenda oteeranire abantu kakumi [10,000] aha kibungo Tabora, noobaiha omu ruganda rwa Nafutaali n’orwa Zebuluuni. Naanye niinyija kukureetera Sisera omukuru w’eihe rya Yabini, akubugane aha mugyera Kishoni n’ebigaari bye n’engabo ze nyingi munonga, mmuheyo omu mikono yaawe.’​—Abaramuzi 4:4-7.

⁸ Abantu ku baahuriire ngu niheetengwa abahwezi abeekundiire, abashaija 10,000 baayerundanira aha Rushozi Tabora. Baraka n’abashaija be bakaza omu rutaro barikurwanisa eihe ry’abazigu baabo aha mwanya ogurikwetwa Tanaki. (Shoma Abaramuzi 4:14-16.) Mbwenu shi Yehova akahwera Abaisraeli? Eego. Ahonaaho hakagwa enjura y’eihunga, omwanya ogu baabaire nibarwaniramu ogwabaire gwomire gwahinduka ebyondo. Eki kikaha Abaisraeli omugisha. Baraka akabinga eihe rya Sisera mahiro 15, kuhika omu mwanya ogurikwetwa Harosheesi. Ku baabaire bari omu muhanda nibahunga, ekigaari kya Sisera kikakwatira omu byondo. Akaruga omu kigaari kye yairuka yaaza Zaananimu, obundi ahari haihi na Kedeshi. Okwe niyo Sisera yaagire kweshereka omu ihema ry’omukazi orikwetwa Yayeli. Sisera akaba aruhire munonga yaagwejegyerera kimwe. Sisera ku yaabaire agwejegyeire, Yayeli akagira obumanzi yaamwita. (Abaramuzi 4:17-21) Yehova akahwera Abaisraeli kusingura abazigu baabo!b (Reeba obugambo obw’ahansi.)

EMITEEKATEEKYERE ETARIKUSHUSHANA AHA KUHEEREZA OYEKUNDIIRE

9. Omu Abaramuzi 5:20, 21 nitwegamu aha bikwatiraine n’orutaro rw’okurwanisa Sisera?

⁹ Nitwega bingi aha birikugambwaho omu Abaramuzi eshuura ya 4 turikushoma eshuura y’ekitabo ekyo erikukurataho. Abaramuzi 5:20, 21 nihagira hati: “Eiguru rihurwire; enyonyoozi omu ngyendo zaazo zaarwanisa Sisera. Omugyera Kishoni gwabatwara.” Mbwenu shi eki nikimanyisa ngu baamaraika bakahwera Abaisraeli omu rutaro oru, nari enjura ekaruga omu iguru yaaba niyo yaabaita? Baibuli terikushoboorora ekyo. Kwonka n’eky’oburyo kuteekateeka ngu Yehova akajuna abantu be arikureetera eiguru kugwisa enjura omu mwanya ogwo gwenyine reero ebigaari 900 by’orutaro byashaaya byaremwa kugyenda gye. Omu Abaramuzi 4:14, 15, nihooreka emirundi eshatu Yehova arikugambwaho ngu niwe yaahwereire Abaisraeli kusingura. Aha bashaija Abaisraeli 10,000 tihaine owaabaire naabaasa kwebarira obusinguzi obu.

10, 11. Merozi kikaba kiri ki, kandi ahabw’enki yaakyeenirwe?

¹⁰ Hati ka tushwijume ekintu kirikushemeza munonga. Bwanyima y’Abaisraeli kusingura, Debora na Baraka bakeeshongora barikuhimbisa Yehova. Bakeeshongora bati: “Mukyeene Merozi, nikwo maraika wa Mukama arikugira; mukyeene munonga abatwireyo, ahakuba tibaizire kuha Mukama emikono, kumuha emikono kurwanisa ab’amaani.”​—Abaramuzi 5:23.

¹¹ Merozi kikaba kiri ki kyenyine? Buzima titurikumanya kyenyine eki kyabaire kiri. Kwonka omukyeeno ogwo gukakora gye ahakuba Merozi ekahweraho kimwe. Noobaasa kushanga ngu Merozi rukaba ruri orurembo oru abantu barwo baayangire kwehayo kwegaita ahari Baraka omu rutaro. Obu abashaija 10,000 baayehaireyo kurwanisa Abakanaani, abantu ba Merozi nibabaasa kuba baahuriire omuranga ogwo. Nari Merozi nirubaasa kuba rwabaire ruri orurembo oru Sisera yaarabiremu arikuhunga kutoroka ahari Baraka. Obundi abantu ba Merozi bakaba baine omugisha gw’okukwata Sisera kwonka baayanga kumukwata. Teekateeka barikureeba omurwani arikutiinisa naaraba omu nguuto zaabo arikuhunzya amagara ge! Bakaba nibabaasa kukora ekintu ky’omugasho kushagika ekigyendererwa kya Yehova. Ku ogire ngu ekyo bakakikora, akaba naija kubashumbuusha. Kwonka ku baatungire omugisha gw’okugira eki baakora ahabwa Yehova, tihaine ki baakozire. Nikireebeka Yayeli akaba naataana aha bantu ba Merozi, ahakuba we akooreka obumanzi.​—Abaramuzi 5:24-27.

12. Ni miteekateekyere ki y’abantu etarikushushana eri omu Abaramuzi 5:9, 10, kandi eki kishemereire kutukwataho kita?

¹² Omu Abaramuzi 5:9, 10, emiteekateekyere y’abashaija 10,000 abaayehaireyo beekundiire ekaba neetaana n’ey’abo abaayangire kwehayo kuhwera. Debora na Baraka bakasiima ‘abeebembezi ba Israeli abaayehaireyo omu bantu n’omutima gwekudiire.’ Bakaba bari ab’omutaano munonga aha barikugyendera “aha ndogoya za kisa,” abaateekateekire ngu n’ab’omuhendo munonga kwehayo omu buheereza obu. Abantu abo nibagambwaho ‘nk’abashutama aha mikyeeka y’ekikama’ kandi “abagyendesa ebigyere omu mihanda,” bari omu busingye bwabo. Okutaana n’ekyo, abaayehaireyo beekundiire bakagyenda na Baraka kurwanira omu bibungo by’enkiri ebya Tabora n’omu ruhanga rw’ekisharara orwa Kishoni. Abo abaabaire batarikwenda kukora bakaba baine kuteekateeka. Bakaba baine kutaho omutima kandi bakateekateeka aha migisha ei baafeereirwe ahabw’okwanga kwehayo beekundiire omu murimo gwa Yehova. Naitwe obunaku obu, twine kushwijuma emiteekateekyere ei twine aha kuheereza Ruhanga.

13. Emiteekateekyere y’oruganda rwa Reubeeni, orwa Daani, na Asheri ekaba neetaana eta n’ey’oruganda rwa Zebuluuni na Nafutaali?

¹³ Abashaija 10,000 abaayehaireyo bakatunga omugisha gw’okureeba oku Yehova ari Omutegyeki w’ebintu byona. Bakabaasa kugambira abandi “eby’okuhikiirira ebi Mukama yaakozire.” (Abaramuzi 5:11) Okutaana n’ekyo, oruganda rwa Reubeeni, orwa Daani, n’orwa Asheri bakaba nibafayo munonga aha by’obugaiga byabo, nk’entaama zaabo, emeeri zaabo, n’enyambukiro zaabo, okukira omurimo gwa Yehova. (Abaramuzi 5:15-17) Kwonka ti nganda zoona ngu zikaba ziri zityo. Oruganda rwa Zebuluuni na Nafutaali ‘bakooga amagara gaabo, tibatiina kufa,’ baashagika Debora na Baraka. (Abaramuzi 5:18) Nitubaasa kwega amashomo makuru kuruga aha bantu aba abaabaire baine emiteekateekyere etarikushushana aha buheereza bw’okwehayo oyekundiire.

“MUHIMBISE” YEHOVA!

14. Nitworeka tuta ngu nitushagika obutegyeki bwa Yehova?

¹⁴ Obunaku obu, titurikushagika obutegyeki bwa Yehova turikurwana. Omu mwanya gw’ekyo, nitworeka obushagiki bwaitu turikubuurira n’obweziriki kandi twine omuhimbo. Kukira oku kyabaire kiri ira, hati abarikwehayo beekundiire nibeetengwa munonga. Obukaikuru bw’ab’eishe-emwe na banyaanyazi-itwe nangwa n’abato, nibeehayo beekundiire omu buheereza bw’obutwire obutari bumwe na bumwe. Nk’eky’okureeberaho, baingi ni baapayoniya, n’Ababeseeli, nibombeka Ebyombeko by’Obukama, kandi abamwe nibahwera aha nteerane empango. Abareeberezi abamwe bari aha bukiiko oburikukora aha by’obujanjabi n’obukiiko oburikutebeekanisa enteerane empango. Twine obuhame ngu Yehova naatusiima ahabw’okuheereza twekundiire omu muringo gwona ogurikwetengyesa, kandi tarikwija kwebwa okwefeerereza kwaitu.​—Abaheburaayo 6:10.

15. Nitubaasa kuhamya tuta ngu omujinya ogu twiniire omurimo gwa Yehova ti guriyo nigufa?

¹⁵ Twine kushwijuma emiteekateekyere yaitu ei twine aha kwehayo twekundiire. Nitubaasa kwebuuza: ‘Nitureka abandi baba nibo baakora emirimo emingi? Ninta omutima aha kwetungira eby’obugaiga omu mwanya gw’okuheereza Yehova? Nari ninteeraho kuba emanzi nka Baraka, Debora, Yayeli n’abashaija 10,000 abaayehaireyo kuhwera ndikukoresa ebi nyine kuheereza Yehova? Ndiyo ninteekateeka aha kuza omu rurembo orundi nari eihanga erindi kuza kukora esente nyingi kugira ngu mbe gye? Ku kiraabe nikwo kiri, ninshaba Yehova aha ku okugyenda oku kuraakwate aha ka yangye n’ekibiina?’c (Reeba obugambo obw’ahansi.)

16. N’obu Yehova araabe aine buri kimwe, niki eki turikubaasa kumuha?

¹⁶ Yehova naatuha ekitiinisa ky’amaani arikutwikiriza kushagika obutegyeki bwe. Kuruga omu bunaku bwa Adamu na Haawa, Omuregi atwire naayenda ngu abantu baze aha rubaju rwe bangye Yehova. Kwonka ku turikushagika obutegyeki bwa Yehova, nitworeka gye Sitaane orubaju oru turiho. Okwikiriza kwaitu n’okuhamira ahari Yehova kwaitu nibituhiga kwehayo twekundiire omu buheereza bwa Yehova, kandi eki nikimushemeza munonga. (Enfumu 23:15, 16) Yehova naabaasa kwihirira aha bushagiki bwaitu n’okumuhamiraho kwaitu kugarukamu Sitaane orikumujuma. (Enfumu 27:11) Twayorobera Yehova ekyo n’eky’omuhendo kandi nikimureetera okushemererwa kwingi.

17. Abaramuzi 5:31 nihatwegyesa ki aha kirikwija kubaho omu biro by’omumaisho?

¹⁷ Juba buri omwe omu nsi naija kuba naakunda munonga obutegyeki bwa Yehova okukira ekindi kyona. Ka twine ekihika ky’okubaho obwire obwo! Nitwehurira nk’oku Debora na Baraka baayehuriire, obu baayeshongora bati: “Abazigu baawe boona bacwekyerere batyo, kwonka abarikukukunda babe nk’oku eizooba rituruka n’amaani.” (Abaramuzi 5:31) Eki nikiija kubaho Yehova ku araamareho ensi ya Sitaane embi. Orutaro rwa Haramagedoni ku ruraatandikye, Yehova tarikwija kwetenga abantu kumuhwera kucwekyereza omuzigu we. Omu mwanya gw’ekyo, nitwija ‘kwemerera kwonka’ kandi okujuna kwa Yehova. (2 Obusingye 20:17) Ekyo kitakabaireho, twine emigisha mingi y’okushagika obutegyeki bwa Yehova twine obumanzi n’omujinya.

18. Okwehayo kwawe oyekundiire kuheereza nikugasira kuta abandi?

¹⁸ Debora na Baraka bakatandika ekyeshongoro kyabo barikuhimbisa Yehova, beitu batari bantu. Bakeeshongora bati: ‘Muhimbise Mukama, ahabw’okuba abantu baayehayo beekundiire!’ (Abaramuzi 5:1, 2) Omu muringo nigwo gumwe, naitwe twaheereza Yehova omu muringo ogurikwetengyesa, ekyo nikibaasa kuhiga abandi kuhimbisa Yehova.