Noija Kushoboorora Obutaikirizana Oreeteho Obusingye?

YEHOVA RUHANGA naayenda ngu abaheereza be bagire obusingye. Naayenda ngu buri omwe agire obusingye na mugyenzi we. Ku barikukora ekyo, omu kibiina Ekikristaayo nihabamu obusingye. Obusingye obu nibuha abantu baingi omuhimbo gw’okwija omu kibiina.

Nk’eky’okureeberaho, omufumu omuri Madagascar akeetegyereza ngu Abajurizi ba Yehova baine obusingye, reero yaateekateeka ati: ‘Ku naakwenda kuza omu diini, nkagiire omuri egi.’ Bwanyima, akarekyera aho kuramya baadaimoni, yaakora empindahinduka omu bushwere bwe, kandi yaatandika kuramya Yehova, Ruhanga w’obusingye.

Nk’omushaija ogwo, obukaikuru bw’abantu buri mwaka nibaija omu kibiina Ekikristaayo, kandi bashangamu obusingye obu barikwenda munonga. Kwonka nitushoma omu Baibuli ngu ‘eihari n’okweyendeza’ nibibaasa kushiisha emikago mirungi bireeteho emirabanamu. (Yakobo 3:14-16) Kwonka Baibuli neetuha obuhabuzi burungi aha ku turikubaasa kwetantara oburemeezi obwo, kandi tukagira obusingye n’ab’eishe-emwe na banyaanyazi-itwe. Ka tureebe oku obuhabuzi obu buhwereire abamwe.

OBUREMEEZI HAMWE N’OBUHWEZI

“Nkaba nyine oburemeezi n’ow’eishe-emwe ou naabaire ninkora nawe. Eizooba rimwe ku twabaire nitutongana, haija abantu babiri baatureeba.”—CHRIS.

Banyaanyazi-itwe babiri nibareebana kubi

“Munyaanyazi-itwe ou naabaire ninkira kubuurira nawe, eizooba rimwe kitaraariire akangira ngu takyenda kubuurira naanye. Bwanyima yaarekyera aho n’okugamba naanye. Nkaba ntarikumanya ahabw’enki.”—JANET.

“Nkaba ningamba n’abandi babiri aha simu. Omwe aharibo akasiibura, kandi naateekateeka ngu yaihaho esimu ye. Nkamugambaho kubi ndikugambira ondiijo owaabaire ari aha simu, kwonka oriya akaba atakaihireho esimu.”—MICHAEL.

“Omu kibiina kyaitu, baapayoniya babiri bakatandika kugira oburemeezi. Bakaguma nibagambirana kubi. Ebigambo byabo bikaba nibimaramu abandi amaani.”—GARY.

Obu nibubaasa kureebeka nk’obutari buremeezi bw’amaani. Kwonka embeera ezi nizibaasa kuba zaareeteire obusaasi abaabaire nibakwatwaho, kandi eki nikibaasa kuba kyasiisire obumwe bw’ekibiina. Ekirungi, ab’eishe-emwe na banyaanyazi-itwe aba bakagyendera aha misingye ya Baibuli, kandi bakagaruka baagira obusingye. Nooteekateeka ni misingye ki ya Baibuli eyaabahwereire?

“Mweride, mutatonganira omu muhanda.” (Okutandika 45:24) Yosefu akaha beene ishe obuhabuzi burungi obu baabaire nibagaruka owa ishe. Omuntu ku arikuba atarinzire enyehurira ye akaguma naarahuka kuguubwa kubi, embeera mbi neebaasa kweyongyera kusiisikara. Abandi nabo nibabaasa kugira ekiniga. Chris akeetegyereza ngu kikaba kimugumiire kuba omucureezi, kandi akagyendera aha buhabuzi. Akaba naayenda kukora empindahinduka, n’ahabw’ekyo akashaba ow’eishe-emwe ou yaabaire atoongaine nawe ngu amusaasire. Bwanyima Chris akateeraho munonga kurinda ekiniga kye. Ow’eishe-emwe ku yaareebire oku Chris arikuteeraho kukora empindahinduka, nawe akakora nikyo kimwe. Hati baine obusingye nibaheereza Yehova hamwe.

“Ahatari kuhanuura enaama zifa busha.” (Enfumu 15:22) Munywani wa Janet ku yaarekyeire aho kugamba nawe, Janet akacwamu kugyendera aha Kyahandiikirwe eki. Akaza kuhanuura na munyaanyazi-itwe nari kugamba nawe. Janet akamushaba kumugambira yaaba haine eki ekozire ekimugwisize kubi. Omu kubanza, bombi bakeehurira nk’abataraabaase. Kwonka ku baagumiizemu kugamba hamwe n’obumanzi, bakeeyongyera kwehurira gye. Munyaanyazi-itwe akashanga ngu akaba ateetegyereize ekyabaire kibaireho enyima, kandi ngu Janet tihaine eki yaabaire akozire kumugwisa kubi. Akashaba Janet okusaasirwa, kandi bombi hati n’abanywani abarikuheereza Yehova hamwe.

“N’ahabw’ekyo ku oraabe oreetsire empongano yaawe aha itambiro, waijukira aho eki oshobeize mugyenzi waawe, otsigye empongano yaawe omu maisho g’eitambiro, ogyende, obanze ogarukane nawe.” (Matayo 5:23, 24) Yesu akaha obuhabuzi obu omu rubazo rwe orw’aha rushozi. Bwanyima ya Michael kugamba ebigambo bibi aha w’eishe-emwe mugyenzi we, akeehurira kubi munonga. Akakora kyona ekirikubaasika kugaruraho omukago murungi. Akaza ow’ow’eishe-emwe yaamushaba okusaasirwa. Niki ekyarugiremu? Michael naagira ati: “Ow’eishe-emwe akaansaasira aihire aha mutima.” Bakagaruka baaba abanywani.

Mugume “nimugumisiririzana; kandi ku haraabe hariho oine eki arikufa na mugyenzi we, musaasirane.” (Abakolosai 3:12-14) Ijuka baapayoniya babiri abaatonganiire omu kubuurira? Omu muringo gw’embabazi omureeberezi akabahwera kwetegyereza ngu bakaba nibagwisa kubi abandi, kandi barikubareetera kubura obusingye. Akabaijutsya ngu baine kugumisirizana kandi bateereho kurinda obusingye omu kibiina. Bakaikiriza kandi baagyendera aha buhabuzi bwe. Hati nibagaaniira gye baaba nibabuurira hamwe amakuru marungi.

Obuhabuzi nibwo bumwe oburi omu Abakolosai 3:12-14, nibubaasa kukuhwera kuba omucureezi, osaasire omuntu okukozire kubi, kandi oyebwe enshonga egyo. Kwonka shi ku twakuteeraho kusaasira omuntu bikanga? Hariho omusingye gw’omu Baibuli omuri Matayo 18:15 ogurikubaasa kutuhwera. N’obu Yesu araabe yaabaire naagamba aha bibi by’amaani, akashoboorora eki turikubaasa kukora twaba twine obutaikirizana n’ow’eishe-emwe. Omu muringo gw’embabazi kandi ogw’obucureezi, nitubaasa kugyenda ow’ow’eishe-emwe ogwo tushoboorore enshonga.

Omu Baibuli harimu obuhabuzi obundi oburikubaasa kutuhwera. Bwingi aharibwo nibutuhiga kwesiga omwoyo gurikwera kubaasa kworeka “ebyana by’omwoyo.” Emitwarize egi ni: “Okukunda, okushemererwa, obusingye, okugumisiriza, embabazi, oburungi, obwesigwa, obucureezi, n’okwerinda.” (Abagalatia 5:22, 23) Teekateeka ahari eki. Ekyoma nikikora gye ebicweka byakyo byateebwamu oiro. Omu muringo nigwo gumwe, nikitworobera kushoboorora obutaikirizana bwaitu reero tukagira emikago mirungi twaba twine emitwarize egi kuruga ahari Yehova.

ABANTU B’EMITWARIZE ETARIKUSHUSHANA NIBAREETERA EKIBIINA KUBA EKIRIKUSHEMEZA

Buri omwe ahariitwe aine oku arikutwaza. Twena twine emitwarize etarikushushana n’omuringo ogu turikureebamu ebintu n’omuringo ogu turikugambamu enshonga. Eki nikibaasa kureetera emikago yaitu kuba mirungi kandi erikushemeza. Kwonka emitwarize yaitu etarikushushana neebaasa kureetaho obutaikirizana n’obuteetegyerezana. Ow’eishe-emwe omazire obwire ari omureeberezi akaha eky’okureeberaho oku eki kirikubaasa kubaho obu yaagira ati: “Omuntu oine enshoni nikibaasa kumugumira kuba n’omuntu oine ebigambo bingi. Entaaniso egi neebaasa kureebeka nk’etari y’amaani; kwonka, neebaasa kurugamu oburemeezi bw’amaani.” Noikiriza ngu abantu abaine emitwarize etarikushushana n’ey’abandi tibarikubaasa kumanyiira kuba n’abandi? Ka tureebe eky’okureeberaho ky’entumwa ibiri. Twateekateeka ahari Petero, nitubaasa kuteekateeka aha muntu owaabaire naagamba kyona ekiri omu biteekateeko bye. Twateekateeka ahari Yohaana, nitubaasa kureeba ow’eishe-emwe oine Rukundo owaabaire naabanza kuteekateeka atakagambire nari kugira eki yaakora. Petero na Yohaana bakaba baine emitwarize etarikushushana. Kwonka bakakora hamwe kuheereza Yehova. (Ebyakozirwe 8:14; Abagalatia 2:9) Nikibaasa kuba nikyo kimwe ahariitwe. Nangwa n’Abakristaayo abatarikushushanisa emitwarize nibabaasa kukora gye hamwe.

Kwonka shi omuntu omu kibiina ku yaakugamba nari akakora ekintu ekirikukukora kubi? Kikaabaire kirungi kwijuka ngu Kristo akafeera ow’eishe-emwe ogwo nk’oku naiwe yaakufeereire, kandi oine kukunda ow’eishe-emwe. (Yohaana 13:34, 35; Abarooma 5:6-8) Nikiba kitahikire okugira ngu torikubaasa kunywana omuntu ogwo, nari ngu noija kuguma noomwetantara. Omu mwanya gw’ekyo, yebuuze oti: ‘Ow’eishe-emwe naakora ebirikuhenda ebiragiro bya Yehova? Naankora kubi akigyendereire? Nari shi twine emitwarize etarikushushana kwonka? Mbwenu shi, aine emitwarize ei naakwenzire kugira?’

Nk’eky’okureeberaho, omuntu yaaba naakunda kugamba kwonka iwe ohunami, ahabw’enki mutarikukora hamwe omu kubuurira okareeba eki orikubaasa kumwegaho? Nari shi ku yaakuba naakunda kukunira abagyenyi okukukira? Waareebire okushemererwa okurikuruga omu kuha abakuzire omu myaka, abarwaire, nari abaine eki bakyenire? Noobaasa kwegyera aha muntu ogwo oku orikubaasa kwongyera kuba efura? Enshonga eri ngu n’obu iwe n’ow’eishe-emwe mutarikushushana, noobaasa kuta omutima aha mitwarize mirungi. N’obu mutarikubaasa kuba abanywani ab’aha mara, nimwija kwirirana haihi. Eki nikiija kuhwera kureetaho obusingye, ahagati yaanyu n’ekibiina.

Omu kyasha ky’okubanza, hakaba hariho banyaanyazi-itwe babiri abarikwetwa Eodia na Suntuke. Nikireebeka bakaba baine emitwarize etarikushushana, kwonka entumwa Paulo akabahiga ngu “baikirizane omuri Mukama.” (Abafilipi 4:2) Naitwe nitwenda kuramya Yehova turi hamwe n’ab’eishe-emwe na banyaanyazi-itwe kubaasa kurinda obusingye omu kibiina.

OTAREKA OBUTAIKIRIZANA BUKAGUMAHO

Ahabw’enki twine kweihamu ahonaaho enyehurira mbi ezi twiniire abandi? Enyehurira ezo nitubaasa kuzigyeragyeranisa n’omwata mubi omu musiri gw’ebimuri. Twaba tutagwihiremu, nigubaasa kubuga omusiri gwona. Omu muringo nigwo gumwe, enyehurira zaitu mbi aha bandi zaayeyongyera, nizibaasa kuteganisa ekibiina kyona. Kwonka twaba nitukunda Yehova n’ab’eishe-emwe, nitwija kukora kyona eki turikubaasa kurinda obusingye omu kibiina.

Banyaanyazi-itwe nibagaaniira kugaruraho obusingye — Waacureera okagira obusingye n’abandi, ebirungi ebiraarugyemu nibiija kukutangaaza

Twateeraho kurinda obusingye n’abandi, ebirungi ebirikurugamu nibibaasa kututangaaza. Omujurizi wa Yehova omwe kikamubaho. Naagira ati: “Nkaba ninteekateeka ngu munyaanyazi-itwe omwe naantwariza nk’omwana. Buzima kikanteganisa munonga. Ku naayeyongyeire kugira ekiniga, naatandika kuguma nimugambira kubi. Nkateekateeka nti: ‘Tarikumpa kitiinisa ekinshemereire, naanye tindikwija kumuha kitiinisa.’”

Bwanyima munyaanyazi-itwe akateekateeka aha miteekateekyere ye. Naagira ati: “Nkatandika kureeba emitwarize yangye mibi, kandi nkareeba ngu buzima nyereebize. Nketegyereza ngu nkaba nyine kuhindura omu miteekateekyere yangye. Bwanyima y’okushaba Yehova aha nshonga egyo, nkagurira munyaanyazi-itwe akaconco kakye kandi naamuhandiikira n’akabaruha k’okumushaba okusaasirwa ahabw’emiteekateekyere yangye mibi. Nkamugwa omu kifuba kandi twaikirizana kwebwa enshonga egyo. Kuruga obwo titukatungire obutaikirizana obundi.”

Buri omwe naayenda obusingye. Kwonka abamwe bareeba ngu omuntu yaabagaya nari ahabw’okugira amaryo nari omwehuriro nikibareetera kutwaza omu muringo gutari gw’obusingye. Omu nsi, eki n’ekya butoosha, kwonka Yehova naamanya ngu abaheereza be baine kuba ab’omutaano. Abajurizi ba Yehova baine kugira obusingye n’obumwe. Yehova akahwera Paulo kuhandiikira Abakristaayo ati: “Mugyende omu buryo obushemeire okwetwa” oku mwayetsirwe. Akabahiga kukora eki ‘beebundaarize n’obucureezi bwona, nibeetwara, nibagumisiririzana omuri rukundo, nibeezirika kurinda obumwe bw’omwoyo, bateerainwe omurunga gw’obusingye.’ (Abaefeso 4:1-3) “Omurunga gw’obusingye” ogu abaheereza ba Yehova baine n’ogw’omuhendo munonga. N’ahabw’ekyo twena ka tukore kyona eki turikubaasa kuguhamya, kandi tushoboorore obutaikirizana bwona obu turikubaasa kuba twine na b’eishe-emwe na banyaanyazi-itwe.

Paulo na Barunaba Bakaba Nibataana Kwonka Bari Ab’eishe-emwe

Paulo akaba atarikutiina kugamba eki yareeba. Atakabaire Mukristaayo, akaba agamba “eby’okukangisa n’eby’okwita abeegi ba Mukama.” (Ebyakozirwe 9:1) Bwanyima Paulo akashoboorora oku yaabaire naatwariza Abakristaayo. Akagira ati: ‘Nkaba mbagirira ekiniga kinshaza.’—Ebyakozirwe 26:11.

Paulo ku yaabatiziibwe, akahinduka. Kwonka abantu bakaba nibaijuka oku yaabaire naatwaza enyima. Nangwa na bwanyima y’okuba Omukristaayo kumara obwire, ab’eishe-emwe bakaba ‘nibamutiina, batarikwikiriza ku ari omwegi.’—Ebyakozirwe 9:26.

Obu Paulo yaaza Yerusaalemu, ab’eishe-emwe b’okwo bakanga kumwesiga. Kwonka ow’eishe-emwe kuruga Kupuro orikwetwa Yosefu akamuhwera. Yosefu akaba ari ow’eishe-emwe oine embabazi owaabaire naakundwa ab’omu kibiina, kandi barikumuha ekitiinisa. Nangwa ab’eishe-emwe bakamweta Barunaba, ekirikumanyisa “Omwana w’Okwezirikisa” nari ow’okuhuumuriza. (Ebyakozirwe 4:36, 37) Barunaba akahwera ata Paulo? Nitushoma tuti: “Barunaba yaamutwara, yaamuhitsya entumwa, yaabashoboororera oku yaareebire Mukama akiri omu muhanda, Mukama akagamba nawe, kandi n’oku yaabuuriire n’obumanzi omu iziina rya Yesu omuri Damasiko.” (Ebyakozirwe 9:26-28) Ab’eishe-emwe omuri Yerusaalemu bakahurira eki Barunaba yaagambire, baatandika kwesiga Paulo baamutwariza nk’ow’eishe-emwe. Ahonaaho, Paulo na Barunaba bakatandika kukora hamwe omu murimo gw’okubuurira bari abamiisani.—Ebyakozirwe 13:2, 3.

Barunaba ashemereire kuba yaatwire obweziriki bwa Paulo n’okuba ow’amazima kwe nka kikuru, ahakuba Paulo akaba atarikutiina kugamba nari kukora ekihikire. Paulo ashemereire kuba yaabaire naayesiima kukora n’omuntu nka Barunaba, owaabaire aine embabazi kandi arikufayo aha bandi.

Kwonka shi Baibuli terikugira ngu Paulo na Barunaba eizooba rimwe bakagira “empaka nyingi”? Ahabw’enki baagizire obutaikirizana? Tibaragizire obutaikirizana ahabw’okugira ngu entwaza yaabo ekaba etarikushushana. Bakaremwa kwikirizana yaaba Yohaana Mako yaabaire ahikire kuheereza nabo nk’omumiisani.—Ebyakozirwe 15:36-40.

N’obu Paulo na Barunaba baraabe baabaire baine emitwarize etarikushushana, bakabaasa kukora gye hamwe. Kandi buzima bashemereire kuba baashobooroire obutaikirizana bwabo, ahakuba Yohaana Mako bwanyima akaheereza hamwe na Paulo. (Abakolosai 4:10) Nka Paulo na Barunaba, twena twine emitwarize etarikushushana. Kwonka n’obu kiraabe kiri kityo, nitubaasa kushemererwa turikuheereza Yehova hamwe.