Amazima Tigarikureeta, “Busingye, Kureka Rurara”

1, 2. (a) Nitubaasa kugira busingye ki hati? (b) Ahabw’enki kitarikubaasika kugira obusingye obwabuzima hati? (Reeba ekishushani aha kutandika.)

TWENA nitukunda kugira obusingye, kandi nituba nitwenda kwetantara okwerarikirira. N’ahabw’ekyo nitushemererwa ahakuba Yehova naatuha “obusingye” bwe. Obusingye obwo n’obuteeka oburikubaasa kuturinda kuguma twine ebiteekateeko birungi n’enyehurira nungi. (Abafilipi 4:6, 7) Ahabw’okugira ngu twehaireyo ahari Yehova, twine “obusingye ahari Ruhanga.” Eki nikimanyisa ngu twine omukago murungi nawe.​—Abarooma 5:1.

² Kwonka, obwire bwa Ruhanga obw’okureeta obusingye omu nsi tibukahikire. Turi omu biro by’emperu, n’ahabw’ekyo hariho oburemeezi bwingi oburikutureetera okwerarikirira. Twetoroirwe abantu enshaarizi. (2 Timoseo 3:1-4) Kandi nituba twine kurwanisa Sitaane n’enyegyesa zigwire ezi arikwenegyeza. (2 Abakorinso 10:4, 5) Kwonka ekirikubaasa kutureetera okwerarikirira kw’amaani n’okuhiiganisibwa abanyabuzaare abatarikuheereza Yehova. Bamwe aharibo nibabaasa kujuma ebi turikwikiriza nari nibabaasa kutubeiherera ngu tubaganiisemu eka. Nibabaasa n’okugira ngu tibarikubaasa kututwara nk’ab’omu ka yaabo okwihaho twarekyera aho kuheereza Yehova. Mbwenu shi twine kureeba tuta okuhiiganisibwa okw’omu maka gaitu? Kandi nitubaasa kuguma tuta twine obusingye eki kyabaho?

TWINE KUREEBA TUTA OKUHIIGANISIBWA KW’OMU MAKA GAITU?

3, 4. (a) Ebi Yesu yaayegyeise nibikwata bita aha bantu? (b) Ni ryari na munonga obu kyakubaire kigumire kukuratira Yesu?

³ Yesu akaba naamanya ngu ti buri omwe ngu naija kwikiriza ebi yaayegyeise. Kandi akaba naamanya ngu abeegi be nikiija kubeetengyesa kugira obumanzi, ahakuba abamwe bakaba nibaija kubahiiganisa. Okuhiiganisibwa oku kukaba nikwija kuteganisa amaka gaabo. Yesu akagira ati: “Mutateekateeka ngu nkaija kureeta obusingye omu nsi; tindaizire kureeta busingye, kureka rurara. Ahabw’okuba nkaija kutaanisa omwojo na ishe, omwishiki na nyina, omukazi na nyinazaara; abazigu b’omuntu baryaba ab’omu ka ye.”​—Matayo 10:34-36.

⁴ Yesu akaba naamanyisa ki obu yaagira ngu ‘Mutateekateeka ngu nkaija kureeta obusingye’? Akaba naayenda abantu bamanye ngu haine ebiraarugyemu ku baraabe abeegi be. Buzima, ekigyendererwa kya Yesu, kikaba kiri okwegyesa abantu amazima agarikukwata ahari Ruhanga, kutari kubaganisamu amaka. (Yohaana 18:37) Abeegi be bakaba baine kumanya ngu butoosha tikirikwija kuboorobera kumukuratira, na munonga banywani baabo ab’aha mara nari ab’omu ka yaabo baayanga amazima.

5. Niki ekihikire aha bakuratsi ba Yesu?

⁵ Yesu akagira ngu okuhiiganisibwa kw’omu maka ni kimwe aha bintu ebi abeegi be baine kugumira. (Matayo 10:38) Abeegi be kubaasa kumushemeza, babaasize kwemera okujumwa n’okwangwa. Kwonka batungire bingi kukira ebi baafeereirwe.​—Shoma Mako 10:29, 30.

6. Twine kwijuka ki abanyabuzaare baatuhiiganisa?

⁶ N’obu abanyabuzaare baitu baakutuhiiganisa ahabw’okuramya Yehova, nabwo nitukibakunda. Kwonka twine kwijuka ngu, rukundo ei twiniire Ruhanga na Kristo eine kuba neekira ei twiniire omuntu ondiijo weena. (Matayo 10:37) Kandi twine n’okumanya ngu Sitaane naabaasa kukoresa rukundo ei twiniire ab’omu ka yaitu kutureetera kuruga ahari Yehova. Ka tureebe embeera ezimwe ezigumire, kandi tureebe oku turikubaasa kugumisiriza.

OMWE AHA BASHWERAINE OTARI MU MAZIMA

7. Oshemereire kureeba ota embeera yaawe ou ori nawe omu bushwere yaaba atarikuheereza Yehova?

⁷ Baibuli neeturabura ngu omuntu weena orikuza omu bushwere naija kugira “obusaasi,” nari oburemeezi. (1 Abakorinso 7:28) Waaba ori omu bushwere n’otarikuheereza Yehova, eki nikibaasa kwongyera amaganya nari okwerarikirira omu bushwere bwawe. Kwonka, nikiba kiri kikuru ngu oreebe embeera yaawe nk’oku Yehova arikugireeba. Naagira ngu titurikubaasa kutaana n’omuntu nari kugaitururwa nawe yaaba atarikumuheereza. (1 Abakorinso 7:12-16) N’obu baro araabe atarikubaasa kwebembera okuramya okw’amazima ahabw’okugira ngu tarikuheereza Yehova, nabwo nooba oine kumuha ekitiinisa nk’omutwe gw’eka. Kandi omukazi waawe yaaba atarikuheereza Yehova, nabwo nooba oine kumukunda kandi okamufaaho.​—Abaefeso 5:22, 23, 28, 29.

8. Noobaasa kwebuuza bibuuzo ki ou ori nawe omu bushwere yaateeraho kukuremesa kuramya Yehova?

⁸ Oshemereire kukora ki ou ori nawe omu bushwere yaateeraho kukuremesa kuramya? Munyaanyazi-itwe, iba akamugambira amazooba agu aine kukoresa omu kubuurira. Waaba ori omu mbeera nk’egi, yebuuze oti: ‘Ibanyi nari omukazi wangye naandemeseza kimwe kuramya Yehova? Kyaba kitari kityo, nimbaasa kukora eki arikunshaba?’ Waaba omuringaaniza, noija kugira oburemeezi bukye omu bushwere bwawe.​—Abafilipi 4:5.

9. Abakristaayo nibabaasa kwegyesa bata abaana baabo kuha ekitiinisa omuzaire waabo otari mu mazima?

⁹ Nikibaasa kukugumira kutendeka abaana baawe ou ori nawe omu bushwere yaaba atarikuheereza Yehova. Nk’eky’okureeberaho, oine kwegyesa abaana baawe kworobera ekiragiro kya Baibuli ekirikugira ngu: “Tiina sho na nyoko.” (Abaefeso 6:1-3) Kwonka shi noobaasa kukora ki ou ori nawe omu bushwere yaaba atarikworobera emitindo ya Baibuli? Noobaasa kuteeraho abaana baawe eky’okureeberaho kirungi orikuha baro nari mukazi waawe ekitiinisa. Teekateeka aha mitwarize ye emirungi, kandi omugambire ngu noosiima ebintu birungi ebi arikukora. Otagamba ebintu bibi ahari baro nari omukazi waawe abaana baaba bariho. Omu mwanya gw’ekyo, bashoboororere ngu buri muntu aine kwecweramu yaaba naayenda kuheereza Yehova. Waatendeka abaana baawe kuha ekitiinisa omuzaire waabo otari mu mazima, eky’okureeberaho kirungi kyabo nikibaasa kumuhiga kwenda kwega ebirikukwata ahari Yehova.

10. Abazaire Abakristaayo nibabaasa kwegyesa bata abaana baabo kukunda Yehova?

¹⁰ Abatari mu mazima nibabaasa kwenda ngu abaana baabo bakuze ebiro bikuru by’ekikaafiire nari ngu beegye enyegyesa y’ediini egwire. Abashaija abamwe nibabaasa kuzibira omukazi Omukristaayo kwegyesa abaana baabo Baibuli. Kwonka n’omu mbeera nk’egyo, omukazi naakora kyona ekirikubaasika kwegyesa abaana be amazima. (Ebyakozirwe 16:1; 2 Timoseo 3:14, 15) Nk’eky’okureeberaho, omushaija otari mu mazima naabaasa kuba atarikwenda ngu oyegyese abaana Baibuli, nari atarikwenda ngu obatware omu nteerane. N’obu omukazi araabe naaha ekitiinisa okucwamu kwa iba, naabaasa kugamba n’abaana be aha bi arikwikiriza kyaba nikibaasika. Omu muringo ogwo, nibabaasa kwega ebirikukwata ahari Yehova n’emitindo ye erikukwata aha kihikire n’ekigwire. (Ebyakozirwe 4:19, 20) Aha muheru, abaana nibaija kwecweramu yaaba nibenda kuheereza Yehova.a (Reeba obugambo obw’ahansi.)​—Eky’Ebiragiro 30:19, 20.

ABANYABUZAARE ABARIKUHAKANISA OKURAMYA OKW’AMAZIMA

11. Niki ekirikubaasa kutureetera kugira oburemeezi n’abanyabuzaare abatarikuheereza Yehova?

¹¹ Obu Abajurizi ba Yehova baatandika kutwegyesa Baibuli, nitubaasa kuba tutaragambiire ab’omu ka yaitu. Kwonka okwikiriza kwaitu ku kwakuzire, tukamanya ngu twine kubagambira ngu nitwenda kuheereza Yehova. (Mako 8:38) Okuhamira ahari Ruhanga nikubaasa kuba kwareetsire oburemeezi ahagati yaawe n’ab’omu ka yaawe. Ka tureebe ebintu ebimwe ebi orikubaasa kukora kuguma oine obusingye kandi orikuheereza Yehova.

12. Ahabw’enki abanyabuzaare baitu barikubaasa kutuhakanisa, kwonka nitubaasa kworeka tuta ngu nitubafaho?

¹² Teeraho kwetegyereza oku abanyabuzaare baawe barikwehurira. Nitushemererwa ahabw’okumanya amazima kuruga omu Baibuli. Kwonka, abanyabuzaare baitu nibabaasa kuteekateeka ngu tubeihirwe nari ngu tugiire omu kadiini katarikwetegyerezibwa. Nibabaasa kuteekateeka ngu titwakibakunda ahabw’okugira ngu titurikukuza biro bikuru nabo. Nibabaasa n’okutiina ngu nitwija kuhikwaho ekintu kibi twaheza kufa. Twine kuteeraho kwetegyereza oku barikwehurira kandi tuhurikize n’obwegyendesereza ebi barikugamba, kumanya ekirikubeerarikiriza. (Enfumu 20:5) Entumwa Paulo akateeraho kwetegyereza ‘abantu b’omuringo gwona’ kugira ngu abeegyese amazima. Twateeraho kwetegyereza ab’omu maka gaitu, eki nikibaasa kutuhwera kubeegyesa amazima.​—1 Abakorinso 9:19-23.

13. Nitubaasa kugaaniira tuta n’abanyabuzaare baitu abatari mu mazima?

¹³ Gamba omu muringo gw’embabazi. “Ebigambo byanyu bigume biri eby’embabazi,” Baibuli nikwo erikugira. (Abakolosai 4:6) Ekyo nikibaasa kutooroba. Nitubaasa kushaba Yehova omwoyo gurikwera kutuhwera kugambira abanyabuzaare baitu omu muringo gw’embabazi. Titushemereire kuhakana nabo aha buri nyikiriza yaabo egwire. Baagamba nari baakora ekintu kikatugwisa kubi, nitubaasa kutooreza entumwa Paulo. Akagira ati: “Batukyeena, tubashabira omugisha; ku batuhiiga tugumisiriza; ku tubeihererwa, tugarukamu gye.”​—1 Abakorinso 4:12, 13.

14. Okutwaza gye kurimu birungi ki?

¹⁴ Guma oine emicwe mirungi. Ahabw’enki ekyo ni kikuru? N’obu twakugamba omu muringo gw’embabazi n’abanyabuzaare, okugira emicwe mirungi kyo ni kikuru munonga. (Shoma 1 Petero 3:1, 2, 16.) Abanyabuzaare baawe bashemereire kureebera ahariiwe ngu Abajurizi ba Yehova baine obushwere burungi, nibareeberera gye abaana baabo, nibagyendera aha misingye ya Baibuli, kandi ngu baine ekigyendererwa n’okushemererwa. Nangwa n’obu abanyabuzaare baitu baakuba bataikiriize mazima, nitushemererwa kumanya ngu emitwarize yaitu murungi neeshemeza Yehova.

15. Nitubaasa kutebeekanisa kare tuta kugira ngu twetantare kutongana n’abanyabuzaare baitu?

¹⁵ Tebeekanisa kare. Teekateeka aha mbeera erikubaasa kurugamu okutongana n’abanyabuzaare baawe. Reero cwamu eki oraakore. (Enfumu 12:16, 23) Eki nikyo munyaanyazi-itwe omuri Australia yaakozire. Ishezaara akaba naahakanisa amazima munonga, kandi obumwe akaba agira ekiniga kingi. N’ahabw’ekyo ku yaabaire aza kumuteerera esimu, we na iba bakaba babanza bashaba Yehova kubahwera kutamugarukamu n’ekiniga. Bakaba bateekateeka aha nshonga nungi ezi barikubaasa kugaaniiraho. Kandi okwetantara okugaaniira okurikubaasa kurugamu okutongana aha by’ediini, bakaba beetantara kumutaayaayira emirundi mingi.

16. Noobaasa kusingura ota enyehurira zaawe ez’okutenda kugwisa kubi abanyabuzaare?

¹⁶ Buzima, torikubaasa kwetantarira kimwe okugira okutaikirizana n’abanyabuzaare abatari mu mazima. N’ahabw’ekyo haabaho obutaikirizana, noohurira waayeshiinja ahabw’okugira ngu nookunda abanyabuzaare baawe, kandi nooyenda kubashemeza. Kwonka ijuka ngu okuhamira ahari Yehova nikikira rukundo ei oyiniire ab’eka yaawe. Abanyabuzaare baawe eki bakimanya, nibabaasa kwetegyereza oku kiri kikuru kuheereza Yehova. Torikubaasa kugyema omuntu weena kwikiriza amazima. Kwonka noobaasa kuhwera abandi kureeba oku okugyendera aha misingye ya Yehova kikuhwereire. Kandi buzima, Yehova naayenda ngu bamuheereze, nk’oku naitwe atuhaire omugisha ogu.​—Isaaya 48:17, 18.

OMWE OMU KA YAAREKA KUHEEREZA YEHOVA

17, 18. Niki ekirikubaasa kukuhwera omwe aha b’omu ka yaanyu yaareka kuheereza Yehova?

¹⁷ Ow’omu ka yaitu yaabingwa nari akeecwa aha kibiina, nikibaasa kuguma munonga. Nikibaasa kukushaasha munonga oshushe ngu haine oriyo naakucumita n’omusyo. Noobaasa kugumira ota obusaasi obu?

¹⁸ Guma otaire omutima aha kuheereza Yehova. Waagira obusaasi obw’omuringo nk’ogu, nooba oine kuhamya okwikiriza kwawe. Shoma Baibuli obutoosha, tebeekanisiza enteerane kandi ozizemu, gumizamu orikubuurira, kandi shaba Yehova kukuha amaani g’okugumisiriza. (Yuda 20, 21) Kandi shi ku waakukora ebi byona kwonka obusaasi bukagumaho? Otahwa amaani! Guma otaire omutima aha kuheereza Yehova. Haahinguraho obwire, eki nikiija kukuhwera kurinda ebiteekateeko byawe n’enyehurira zaawe. Ekyo nikyo kyahikire aha muhandiiki wa Zaaburi 73. Haine obu yaagira enyehurira n’ebiteekateeko ebyabaire bigumire kurinda. Kwonka okuramya Yehova kikamuhwera kureeba ebintu omu muringo oguhikire. (Zaaburi 73:16, 17) Naiwe nikubaasa kukuhwera.

19. Nitubaasa kworeka tuta ngu nituha ekitiinisa omuringo ogu Yehova arikuhanamu abantu?

¹⁹ Okuhana kwa Yehova kuhe ekitiinisa. Ruhanga naamanya ngu okuhana kwe nikugasira buri omwe ou kurikuheebwa, otwariiremu n’omuntu orikuba abingirwe. N’obu kiraabe nikireeta obusaasi omuntu ou turikukunda yaahanwa, kwonka nikibaasa kumuhwera kugarukira Yehova omu biro by’omumaisho. (Shoma Abaheburaayo 12:11.) N’ahabw’ekyo, twine kuha ekitiinisa obuhabuzi bwa Yehova, ‘obw’okutakwatanisa’ n’omuntu weena obingirwe. (1 Abakorinso 5:11-13) Eki tikyorobi. Kwonka twine kwetantara kuhurizana nabo kurabira aha simu, okwohereza obutumwa, okuhandiika ebaruha, okwohereza obutumwa aha mukura, n’endiijo miringo.

20. Tushemereire kuguma twine matsiko ki?

²⁰ Toine kuhwa amatsiko! Okukunda “kugira amatsiko ahari byona,” n’ahabw’ekyo nituguma twine amatsiko ngu abakundwa baitu nibaija kugaruka nibaheereza Yehova. (1 Abakorinso 13:7) Waareeba obuhame ngu ow’omu ka yaawe ahindwire aha miteekateekyere ye, noobaasa kumushabira kutunga amaani kwikiriza okweta kwa Yehova ngu: “Ngarukira.”​—Isaaya 44:22.

21. Oshemereire kukora ki ab’eka yaawe baakuhakanisa ahabw’okukuratira Yesu?

²¹ Yesu akagira ngu twine kumukunda kukira oku turikukunda omuntu ondiijo weena. Kandi Yesu akaba aine obuhame ngu abeegi be nibaija kugira obumanzi bw’okumuhamiraho n’obu ab’omu maka gaabo bakubahakanisa. N’ahabw’ekyo ab’eka yaawe baakuhakanisa ahabw’okukuratira Yesu, yesigye Yehova. Mushabe kukuhwera kusingura. (Isaaya 41:10, 13) Shemererwa ahabw’okumanya ngu Yehova na Yesu nibakusiima kandi ngu nibaija kukuha emigisha ahabw’obwesigwa bwawe.