Eki Waaba Nookimanya?

Ahabw’enki Yesu yaabaire naayangira kimwe omuze gw’okurahira?

Ebiragiro bya Musa bikaba nibiikiriza abantu kurahira barikugamba ebigambo nk’ebi: “Ninkurahirira omuri Ruhanga,” nari “Nindahira omu iziina Yehova.” Kwonka, obu Yesu yaabaire ari omu nsi, baingi bakaba nibakunda kurahira aha buri kintu eki baabaire bagamba. Eki bakaba bakikora kworeka ngu nibagamba amazima, kwonka Yesu akooreka emirundi ebiri ngu omuze ogu tiguhikire. Akabeegyesa ati: “Kwonka ebigambo byanyu bibe, Eego, Eego nari Ngaaha, Ngaaha.”​—Matayo 5:33-37; 23:16-22.

Kurugiirira aha kitabo Theological Dictionary of the New Testament, ebiragiro nibituhwera kureeba oku Abayudaaya baabaire nibakunda kukora endahiro, nari kurahira kuhamya ngu ebi baagamba n’amazima. Ahakuba Ebiragiro ebi nibyoreka gye endahiro ezaabaire ziine kuhikiirizibwa n’ezaabaire zitaine kuhikiirizibwa.

Yesu tiwe wenka owaabaire naayanga omuze gw’okurahira. Nk’eky’okureeberaho, Omuyudaaya ow’ebyafaayo orikwetwa Flavius Josephus akahandiika aha Bayudaaya abamwe abaabaire nibeetantara okurahira. Abayudaaya aba bakaba baine enyikiriza ngu okurahira ni kubi kukira n’okubeiha. Bakaba nibateekateeka ngu omuntu yaaba aine kurahira kugira ngu abandi baikirize ebi arikugamba, nikimanyisa ngu omuntu ogwo n’omubeihi. Ekitabo kimwe eky’Abayudaaya eky’apokurufa ekirikwetwa Obwengye bwa Siraki nari Omubuurizi, (23:11) nihagira hati: “Omuntu orahira endahiro nyingi, aryabeera kimwe otahikiriire.” Yesu akaba naayangira kimwe okurahira aha nshonga ezitari nkuru. Twaba nitugamba amazima tikirikwetengyesa kurahira kureetera abandi kutwikiriza.