Ni Rukundo ya Muringo ki Erikureeta Okushemererwa Okwabuzima?

1. Ahabw’enki obwire obu turimu burikutaanira kimwe n’obwa ira?

TURI omu bwire bw’omutaano kukira obw’enyima omu byafaayo by’abantu. Yehova naarundaana omutwe muhango gw’abantu kuruga “omu mahanga goona n’enganda zoona n’abantu boona n’endimi zoona,” nk’oku Baibuli yaagambire. Nibakora “eihanga ry’amaani” eririmu abantu abashemereirwe abarikurenga obukaikuru munaana kandi ‘abarikuheereza Ruhanga nyomushana na nyekiro.’ (Okushuuruurwa 7:9, 15; Isaaya 60:22) Tihakabahoga abantu nyamwingi nk’aba abarikukunda Ruhanga n’abataahi.

2. Abantu abatarikukunda Ruhanga baine rukundo ya muringo ki? (Reeba ekishushani aha kutandika.)

² Baibuli ekagamba ngu omu bunaku bwaitu, abantu abatari banywani ba Ruhanga bakaabaire baine rukundo ey’okweyendeza. Entumwa Paulo akahandiika ngu omu biro by’emperu, abantu bakaba nibaija kuba ‘abarikwekunda, abakunzi b’empiiha’ kandi ‘abarikukunda kweshemeza bonka’ omu mwanya gw’okukunda Ruhanga. (2 Timoseo 3:1-4) Rukundo y’okweyendeza neetaana n’okukunda Ruhanga. Omuntu oine ebigyendererwa by’okweyendeza tarikubaasa kushemererwa nk’oku arikuteekateeka. Kureka, naareetera n’abandi kweyendeza ekirikurugamu okubonabona.

3. Omu kicweka eki nituza kwega ki, kandi ahabw’enki?

³ Entumwa Paulo akaba naamanya ngu abantu nibaija kugira rukundo ey’okweyendeza kandi ekaabaire ey’akabi aha Bakristaayo. N’ahabw’ekyo akabahiga, ‘kwetantara’ abaine rukundo y’okweyendeza. (2 Timoseo 3:5) Kwonka titurikubaasa kwetantarira kimwe abantu nk’aba. Mbwenu shi nitubaasa kukora ki kwerinda emitwarize mibi ey’abantu b’ensi egi, kandi tukashemeza Yehova, Ruhanga owa rukundo? Ka tushwijume entaaniso eri ahagati ya rukundo ei Ruhanga arikwenda ngu tugire, na rukundo erikugambwaho omu 2 Timoseo 3:2-4. Bwanyima nituza kweshwijuma tureebe oku turikubaasa kworeka rukundo erikutureetera kutunga okumarwa n’okushemererwa.

NITUKUNDA RUHANGA NARI NITWEKUNDA?

4. Ahabw’enki kitari kibi okwekunda?

⁴ Paulo akahandiika ati: ‘Abantu nibaija kuba abarikwekunda.’ Mbwenu shi, nikimanyisa ngu titushemereire kwekunda? Ngaaha, okwekunda n’eky’obuhangwa kandi nikyetengyesa. Yehova nikwo yaatuhangire. Yesu akagira ati: ‘Okunde mutaahi waawe nk’oku oyekunda.’ (Mako 12:31) Buzima titurikubaasa kukunda abandi twaba tutarikwekunda. Baibuli neetugira eti: ‘Abashaija bashemereire kukunda abakazi baabo nk’emibiri yaabo bonka. Okunda omukazi we, biri ayekunzire, ahakuba tihariho muntu oyanga omubiri gwe, kureka aguriisa, agucuma.’ (Abaefeso 5:28, 29) Buzima eki nikyoreka ngu tushemereire kwekunda.

5. Noobaasa kushoboorora ota omuntu orikwekunda ekirenga?

⁵ Okwekunda okurikugambwaho omu 2 Timoseo 3:2 ti kwa butoosha kandi ti kurungi. N’ey’okweyendeza. Omuntu ku arikwekunda ekirenga naatandika kweteekateekaho okukira oku ari. (Shoma Abarooma 12:3.) Naayefaho okukira oku arikufa aha bandi. Haabaho enshobe, orubanja naaruta aha bandi. Ekitabo kimwe ekirikushoboorora ahari Baibuli nikigyeragyeranisa omuntu nk’ogwo nk’ekisegyesi ekirikwezinga nk’omupiira kikaguma kiine obutagatsi, kwonka kirikworeka abandi amahwa gaakyo gonka. Abantu nk’aba tibaine kushemererwa okwabuzima.

6. Twakunda Ruhanga nitutunga birungi ki?

⁶ Abacondooza ba Baibuli abamwe nibaikiriza ngu Paulo akabanza kugamba aha rukundo ey’okweyendeza, ahakuba neereetera abantu kugira emitwarize mibi ei yaakuratsizeho. Kwonka rukundo ei Ruhanga arikwenda ngu tugire neetuhwera kugira emitwarize mirungi. Eine akakwate n’okushemererwa, obusingye, okugumisiriza, embabazi, oburungi, obwesigwa, obucureezi, n’okwerinda. (Abagalatia 5:22, 23) Omuhandiiki wa Zaaburi akahandiika ati: “Eihanga eri Ruhanga waaryo aba Yehova rihiiriirwe!” (Zaaburi 144:15) Yehova ni Ruhanga w’okushemererwa, kandi abaheereza be nabo baine okushemererwa. Kandi okutashushana n’abo abarikwekunda ekirenga reero bakateekateeka aha kuheebwa kyonka, abaheereza ba Yehova nibashemererwa ahabw’okuha abandi.​—Ebyakozirwe 20:35.

7. Ni bibuuzo ki ebi turikubaasa kwebuuza kumanya yaaba nitukunda Ruhanga?

⁷ Nitumanya tuta ngu oku turikwekunda nikukira oku turikukunda Ruhanga? Teekateeka aha buhabuzi obu: “Mutarikora ekintu kyona ahabw’okurwanira orubaju nari okwekuza, kureka omu bucureezi omuntu weena asiime mugyenzi we okukira oku arikwesiima. Omuntu weena omuriimwe arekye kweta aha bye wenka, kureka ayete n’aha by’abandi.” (Abafilipi 2:3, 4) Nitubaasa kwebuuza tuti: ‘Niinyorobera obuhabuzi obu? Niinteeraho kukora ebi Ruhanga arikwenda ngu nkore? Niinsherura emiringo y’okuhweramu abandi omu kibiina n’omu buheereza?’ Tikyorobi kuha abandi obwire bwaitu n’amaani gaitu. Obumwe eki nikibaasa kutwariramu okukoresa amaani n’okwefeerereza ebi turikukunda. Kwonka tihaine ekirikubaasa kutureetera kugira okushemererwa okukira okumanya ngu omutegyeki w’ebintu byona ashemereirwe ahabw’ebi turikukora!

8. Abakristaayo abamwe bakozire ki ahabw’okukunda Ruhanga?

⁸ Abakristaayo abamwe ahabw’okukunda Ruhanga n’okwenda kumuheereza bataine ebirikubateganisa, batsigireho emirimo yaabo eyaabaire neebaasa kubareetera kuba abagaiga. Omushaho Ericka, akacwamu kuba payoniya omu mwanya gw’okwebembeza omurimo gwe. We na iba babaasize kuheereza omu mahanga maingi. Naagira ati: “Eby’okureeberaho ebi tureebire omu kuhwera abantu abarikugamba orurimi orundi, n’abanywani abu tutungire nibitushemeza munonga.” Ericka akiri omushaho, kwonka naakoresa obwire bwe obwingi kwegyesa abantu ebirikukwata ahari Yehova n’okuhwera ab’eishe-emwe. Naagira ngu eki nikimureetera kugira “okushemererwa okwabuzima n’okumarwa.”

OBUTUNGI OMU IGURU NARI OMU NSI?

9. Ahabw’enki omuntu orikukunda esente atarikubaasa kutunga okushemererwa?

⁹ Paulo akahandiika ngu abantu nibaija kuba ‘abakunzi b’empiiha.’ Omu myaka ehingwire, payoniya omwe akabuurira omushaija omuri Ireland. Omushaija ogwo akaihayo esente omu kashaho ke yaamugarukamu ati: “Ogu niwe ruhanga wangye!” N’obu baingi baraabe batarikubaasa kukigamba butunu beitu nikwo bari. Nibakunda sente n’ebi zirikugura. Kwonka Baibuli neeturabura eti: “Okunda efeeza tahaaga feeza; kandi n’okunda obutungi tahaaga magoba.” (Omubuurizi 5:10) Omuntu orikukunda esente naateekateeka ngu ezi aine tizirikumara. Naaba naayenda kwongyera kutunga ezindi, kandi omu magara ge goona nizo arikusherura. Eki nikireeta “enaku nyingi.”​—1 Timoseo 6:9, 10.

10. Baibuli neegamba ki aha bugaiga n’obworo?

¹⁰ Buzima, twena nitwetenga esente. Nizituhwera kugira oburinzi. (Omubuurizi 7:12) Kwonka shi nitubaasa kushemererwa twaba twine esente z’ebyetengo ebikuru byonka? Eego! (Shoma Omubuurizi 5:12.) Aguri mutabani wa Yaake akahandiika ati: “Otampindura omworo nari omutungi, kureka ogume ompe eby’okurya ebinshemereire.” Kyorobi kwetegyereza ahabw’enki omushaija ogu yaabaire atarikwenda kuba omworo. Akagira ngu ahakuba tarikwenda kwohibwa kwiba, ahakuba okwiba tikurikuhaisa Ruhanga ekitiinisa. Kwonka ahabw’enki yaabaire atarikwenda kuba omugaiga? Akahandiika ati: “Ntakaiguta munonga, nkakwehakana, nkagira nti: Mukama niki?” (Enfumu 30:8, 9) Obundi naiwe noomanya abantu abarikwesiga obutungi bwabo kukira Ruhanga.

11. Yesu akagamba ki aha sente?

¹¹ Omuntu orikukunda esente tarikubaasa kushemeza Ruhanga. Yesu akagira ati: “Tihariho omuntu orikubaasa kuheereza abakama babiri; ahakuba aryayangaho omwe akunde ondi; nari aryagumira kyarimwe ahari omwe, agaye ondi. Timurikubaasa kuheereza Ruhanga na Mamona.” Kandi akagira: “Mutaryebiikira eitungo omu nsi, ahi ebiyenje n’omukyereenyo birisiisira, n’abashuma ahu barima bakariiba. Kwonka mwebiikire eitungo omu iguru, ahi ebiyenje n’omukyereenyo bitarisiisira, n’abashuma ahu abataririma bakariiba.”​—Matayo 6:19, 20, 24.

12. Okutuubya aha bintu ebirikubaasa kutuhuzya nikituhwera kita okuheereza Ruhanga? Ha eky’okureeberaho.

¹² Abaheereza ba Yehova baingi nibeetantara kuhugibwa ebintu by’ensi kubaasa kwongyera aha buheereza bwabo. Eki nikibabaasisa kutunga obwire bwingi bw’okuheereza Yehova kandi nibatunga n’okushemererwa. Jack, orikutuura omu United States, akaguza enju ye mpango ei yaabaire aine na bizinesi ye kugira ngu abe payoniya n’omukazi we. Naagira ati: “Kikangumira munonga okuguza enju yaitu nungi n’ekibanja kyaitu.” Kwonka akaba atwire naagaruka omu ka atashemereirwe ahabw’oburemeezi aha murimo gwe. Naayongyeraho ati: “Omukazi wangye, ori payoniya, butoosha akaba aba ashemereirwe. Akaba angira ati: ‘Ou ndikukorera n’orikukirayo!’ Hati obu ndi payoniya, twembi nitukorera Yehova.”

13. Niki ekiraatuhwere kushwijuma emiteekateekyere ei twine aha sente?

¹³ Twaba nitushwijuma emiteekateekyere yaitu aha sente, twine kuba ab’amazima twebuuze tuti: ‘Ebi ndikukora nibyoreka ngu niinyikiriza eki Baibuli erikugamba aha sente? Okukora esente nikyo ndikwebembeza? Ninfayo munonga aha by’obutungi kukira omukago gwangye na Yehova n’abaheereza be? Niinyikiriza ngu buzima Yehova naija kumpa ebirikwetengyesa?’ Nitubaasa kuhamya ngu abarikumwesigira kimwe tarikubaasa kubahemukaho!​—Matayo 6:33.

NITUKUNDA YEHOVA NARI OKWESHEMEZA?

14. Emiteekateekyere eringaniire aha by’okweshemeza n’eha?

¹⁴ Kandi Baibuli ekagira ngu omu biro by’emperu, abantu nibaija kuba ‘abarikukunda kweshemeza.’ Nk’oku turikumanya ngu okugira emiteekateekyere eringaniire aha bikwatiraine n’esente n’okwekunda ti kibi, n’okwejumba omu by’okweshemeza omu muringo oguringaniire ti kibi. Abamwe nibaikiriza ngu tibashemereire kwejumba omu by’okweshemeza na kakye, beitu tikyo Yehova arikutwendeza. Baibuli neehiga abaheereza ba Ruhanga eti: “Irooko oyeriire eby’okurya byawe n’okushemererwa, kandi oyenywere viinyo yaawe n’okweruhuura.”​—Omubuurizi 9:7.

15. ‘Okukunda eby’okweshemeza’ nikimanyisa ki?

¹⁵ Omu 2 Timoseo 3:4 nihagamba aha kwejumba omu by’okweshemeza kuhika n’aha kwebwa Ruhanga. Yetegyereze ngu ekyahandiikirwe eki nikyoreka ngu abantu nibakunda kweshemeza bonka ‘okukira Ruhanga,’ kwonka eki tikirikumanyisa ngu haine rukundo ei bamwiniire. Omucondooza omwe aha Baibuli akahandiika ati: “Omushororongo ogu tigurikumanyisa ngu Ruhanga bamwiniire rukundo. Nigumanyisa ngu Ruhanga tibarikumukunda na kakye.” Oku n’okurabura kukuru ahari abo abarikukunda eby’okweshemeza. Baibuli neeyoreka ngu abarikukunda eby’okweshemeza n’abo abarikutwarwa eby’okweshemeza by’ensi egi.​—Luka 8:14.

16, 17. Yesu akatuteeraho ky’okureeberaho ki aha bikwatiraine n’okwejumba omu by’okweshemeza?

¹⁶ Yesu akatworeka eki kirikumanyisa okugira emiteekateekyere eringaniire aha by’okweshemeza. Akataaha “obugyenyi bw’okushwera” n’obundi ‘bugyenyi buhango.’ (Yohaana 2:1-10; Luka 5:29) Aha bugyenyi bw’okushwera, viinyo ku yaahweire, Yesu akakora eky’okutangaaza, amaizi yaagahindura viinyo. Aha murundi ogundi, abantu ku baacwereire Yesu orubanja ahabw’okurya n’okunywa, akabooreka butunu ngu emiteekateekyere yaabo ekaba etaringaniire.​—Luka 7:33-36.

¹⁷ Kwonka Yesu akaba atarikwebembeza eby’okweshemeza. Akeebembeza okukora ebi Yehova arikukunda n’okuhwera abandi. Akaba ayeteekateekire kufeera aha muti omu busaasi bwingi kucungura abantu. Akagambira abaabaire nibenda kuba abakuratsi be ati: “Imwe mwine omugisha ku baribajuma, ku baribahiiga, ku baribabeiherera ekigambo kyona ekibi nibabantura. Mushemererwe, mwesiime munonga; ahabw’okuba ebihembo byanyu biryaba bingi omu iguru; kandi nikwo baahiigire batyo baanabi abaabandize imwe.”​—Matayo 5:11, 12.

18. Ni bibuuzo ki ebiraatuhwere kweshwijuma yaaba nitukunda munonga eby’okweshemeza?

¹⁸ Niki ekiraatuhwere kweshwijuma kureeba yaaba nitukunda eby’okweshemeza ekirenga? Nitubaasa kwebuuza tuti: ‘Niintwara eby’okweshemeza kuba bikuru kukira okuza omu nteerane nari omu kubuurira? Nyeteekateekire kwefeerereza ebi ndikukunda kubaasa kuheereza Ruhanga? Naaba nintoorana eby’okweshemeza, ninteekateeka aha ku Yehova arikubireeba?’ Ahabw’okugira ngu nitukunda Ruhanga kandi nitwenda kumushemeza, nitwetantara ekintu kyona eki turikumanya ngu tikihikire na kyona ekirikubaasa kumugwisa kubi.​—Shoma Matayo 22:37, 38.

OKU ORIKUBAASA KUTUNGA OKUSHEMERERWA

19. Ni baahi abatarikubaasa kutunga okushemererwa okwabuzima?

¹⁹ Ensi ya Sitaane ereeteire abantu kubonabona kumara emyaka nka 6,000. Hati omu biro ebi eby’emperu, ensi eijwire abantu abarikwekunda, abakunzi b’empiiha, n’eby’okweshemeza. Nibata omutima aha bi barikwenda kutunga kandi nibeebembeza ebyetengo byabo byonka. Kwonka abantu nk’abo tibarikubaasa kutunga okushemererwa okwabuzima! Okutaana n’ekyo, Baibuli neegira eti: “Omuntu ahiiriirwe, ou Ruhanga wa Yakobo aba omuhwezi we, kandi ota amatsiko” ahari Yehova Ruhanga we.​—Zaaburi 146:5.

20. Okukunda Ruhanga kukureeteire kuta okushemererwa?

²⁰ Abaheereza ba Yehova buzima nibamukunda, kandi buri mwaka abandi baingi nibeeyongyera kumumanya n’okumukunda. Eki nikyoreka ngu Obukama bwa Ruhanga nibutegyeka, juba nibwija kureeta emigisha mingi ei tutarikubaasa n’okuteekateeka! Twakora ebi Yehova arikwenda, nitumureetera okushemererwa, naitwe nitutunga okushemererwa okwabuzima. Abo abarikukunda Yehova nibaija kushemererwa ebiro byona! Omu kicweka ekirikukurataho, nituza kushwijuma emwe aha mitwarize mibi erikureetwa rukundo ey’okweyendeza. Bwanyima nitwija kureeba oku erikutaanira kimwe n’emitwarize mirungi ey’abaheereza ba Yehova.