Obuhwezi bw’Abarikutwarizibwa Kubi omu Maka

“Abakazi okutwarizibwa omu muringo gw’obushaarizi kujanjaire munonga nk’endwara erikuturira munonga, haine kugira ekyakorwa ahonaaho,” bikagambwa Ekitongore ky’Eby’amagara omu Nsi Yoona. Ekitongore eki nikiteebereza ngu ebicweka nka 30 ahari igana “eby’abakazi, abashaija baabo nibabateera nari babatwariza kubi omu nshonga y’okuteerana.” Kandi ripoota y’Ekibiina ky’Amahanga Ageeteeraine neeyoreka ngu omu myaka egi, abakazi 137 nibafa buri izooba omu nsi yoona, barikwitwa abashaija baabo nari ab’amaka gaabo.a

Okucondooza nikworeka oku emihondano omu maka eri ey’amaani, kwonka tikurikworeka obusaasi n’enyehurira mbi ebirikuhika ahari buri muntu orikutwarizibwa kubi.

Nootwarizibwa kubi omu ka yaawe? Nari noomanya orikutwarizibwa kubi? Kyaba nikwo kiri, yetegyereze enshonga ezi kuruga omu Baibuli ezirikubaasa kuhwera.

Okutwarizibwa kubi baro ti rubanja rwawe

Hariho obuhwezi

Tori wenka

Emihondano y’amaka neija kuhwaho

Oku orikubaasa kuhwera orikutwarizibwa kubi

Okutwarizibwa kubi baro ti rubanja rwawe

Eki Baibuli erikugamba: ‘Buri omwe omuriitwe naija kwetonganira ahari Ruhanga.’—Abarooma 14:12.

Ijuka eki: Orikukutwariza kubi naajunaanwa ahabw’ebikorwa bye.

Baro ku araabe naakutaho orubanja ahabw’okukutwariza kubi, agwire. Abakazi baine kukundwa, beitu kutari kutwarizibwa kubi.—Abakolosai 3:19.

Obumwe, omuntu naabaasa kuba enshaarizi ahabw’emitwarize ye mibi, obukomooko bwe, nari ahabw’okukoresa kubi amaarwa. Kyaba nikwo kiri, naajunaanwa ahari Ruhanga oku arikukutwariza. Kandi niwe aine obujunaanizibwa bw’okuhindura ebikorwa bye.

Hariho obuhwezi

Eki Baibuli erikugamba: ‘Ahu abahi b’obwengye baingi bari, [haine ekirikukorwa].’—Enfumu 15:22.

Ijuka eki: Waaba noohurira otaine burinzi nari otarikumanya eky’okukora, abandi nibabaasa kukuhwera.

Ahabw’enki oine kuhwerwa abandi? Okutwarizibwa kubi nikutwariramu ebintu bingi. Waaba noocwamu oku oraatwaze, noobaasa kugumirwa kushwijuma enshonga ezimwe nk’ezi:

• Oburinzi bwawe

• Oburungi bw’abaana baawe

• Embeera yaawe y’eby’entaatsya

• Rukundo ei oiniire omukundwa waawe

• N’okwenda kugaruraho enkoragana yaanyu, baro yaahindura ebikorwa bye

N’ekya butoosha kutamanya eky’okukora n’okushoberwa. N’oha ou orikubaasa kushaba obuhwezi?

Omunywani ou orikwesiga nari ow’eka yaawe naabaasa kukuhwera omu nyehurira. Okugamba n’omuntu orikukufaho nikibaasa kukuhwera munonga.

Abahuumuriza b’abarikutwarizibwa kubi nibabaasa kuha obuhwezi obw’ahonaaho. Abahuumuriza aba nibabaasa kukuhwera kumanya oku orikubaasa kwerinda. Baro yaamanya oburemeezi bwe, kandi akenda kuhinduraho ayihire aha mutima, omuhuumuriza naabaasa kumuhwera kumanya ebi aine kubandizaho kukora.

Abandi abarikuhwera ahonaaho nibabaasa kukuhwera waaba ori omu kabi. Aba nibabaasa kutwariramu abashaho, nari abandi bantu abatendekirwe.

Tori wenka

Baibuli neegira eti: ‘[Yehova]b naaba ari haihi ab’emitima ehendekire, naajuna [abarikwehurira kubi].’—Zaaburi 34:18.

Ijuka eki: Ruhanga naaraganisa kukuhwera.

Yehova naakufaho munonga. (1 Petero 5:7) Naayetegyereza gye ebiteekateeko byawe byona n’enyehurira zaawe. Naabaasa kukuhuumuriza kurabira omu Kigambo kye Baibuli. Kandi naayenda ngu omushabe. Waamushaba, naabaasa kukuha obwengye n’amaani ebirikwetengyesa kwemera embeera.—Isaaya 41:10.

Emihondano y’amaka neija kuhwaho

Eki Baibuli erikugamba: ‘Buri muntu [naija kutuura] ahansi y’omuzaabibu gwe, n’ahansi y’omutiini gwe, kandi tihaine orikwija [kubatiinisa].’—Miika 4:4.

Ijuka eki: Baibuli neeraganisa nyentsya obu eka eraabe omwanya gw’obusingye ogwa buri omwe.

Yehova Ruhanga wenka niwe arikwija kugonjoorera kimwe oburemeezi bwaitu okutagaruka kubaho. Baibuli neeraganisa eti: ‘Naija kuragaza amarira goona aha maisho gaabo, tiharikwija kubaho kufa bundi, n’obu kwakuba okucura, nari okurira, nari obusaasi.’ (Okushuuruurwa 21:4) Omu bwire obwo, n’ebiteekateeko bibi nibiija kuhweraho kimwe, omu mwanya gwabyo hazemu ebirungi byona. (Isaaya 65:17) Egi ni nyentsya y’obusingye ei Baibuli erikukuraganisa.