Baibuli Neegamba ki aha Ibura ry’Amaizi Marungi omu Nsi Yoona?
Twena twine kutunga amaizi marungi kubaasa kuguma tuhuriire. Kwonka “ahabw’abantu omu nsi kugumizamu nibeeyongyera kuburwa amaizi marungi,” Omuhandiiki Omukuru ow’Ekibiina ky’Amahanga Ageeteeraine António Guterres, akagira ngu “turi omu kabi k’okuburirwa kimwe amaizi.” Obuhumbi bw’abantu omu nsi yoona tibarikubaasa kutunga amaizi marungi g’okunywa.
Strdel/AFP via Getty Images
Hariho obu harikwija kubaho amaizi agarikumara abantu boona? Nari eibura ry’amaizi niriija kugumaho ebiro byona? Baibuli neegamba ki?
Eki Baibuli erikugamba aha kugira amaizi garikumara
Baibuli neegira ngu eizooba rimwe nihaija kuba hatakiriho eibura ry’amaizi. Nangwa, nihaija kubaho amaizi maingi agaboneire.
‘Amaizi nigaija kufumuka omu ihamba n’emigyera omu ihamba ry’omusheenyi. Omusheenyi gurikwotsya nigwija kuhinduka ekiyanja, n’ensi ekarangataine ehindukye ey’enshuro z’amaizi.’—Isaaya 35:6, 7.
Ahabw’enki turikubaasa kwikiriza eki Baibuli erikuraganisa? Yetegyereze akashonshorekye kamwe aku Baibuli erikugamba aha ku ensi yaitu yaatebeekanisiibwe.
Eki Baibuli erikugamba aha nsi n’omwetoorooro gw’amaizi
“[Ruhanga tarahangiire busha ensi], kureka akagihanga kutuurwamu.”—Isaaya 45:18.
Ahabw’okugira ngu Ruhanga akahanga ensi kutuurwamu ebiine amagara, akataho n’entebeekanisa erikubaasisa amaizi marungi kuguma nigakorwa.
‘[Ruhanga] ainamura amatondo g’amaizi, gaba ekicu, akihindura enjura, ehiika ahaiguru, esheesheka ahansi, eteera abantu, egwa nyingi munonga.’—Yobu 36:27, 28.
Ekyahandiikirwe eki omu muringo gworobi, nikishoboorora entebeekanisa y’omwetoorooro gw’amaizi erikwesigwa ei Ruhanga yaateireho kubaasisa amaizi kugumaho. Orwoya orurikuruga omu itaka n’amaizi, nirwekwata rukora ebicu by’enjura, enjura egwa, reero kibaasisa abantu n’enyamaishwa kutunga amaizi marungi obutwire.—Omubuurizi 1:7; Amosi 5:8.
‘Ninyija kuguma nimbagwisiza enjura omu bunaku bwayo, ensi egire omweru n’emiti y’omu misiri eyane ebyana.’—Abaleevi 26:4.
Ruhanga akaraganisa kuguma naaha enjura erikumara Abaisraeli abahingi aba ira, kubabaasisa kweza eby’okurya bingi. Naakimanya ngu kubaasa kweza eby’okurya birikumara, enjura eshemereire kugwa omu bwire obuhikire.
Eki Ruhanga yaakoreire Abaisraeli aba ira, ari haihi kukikora omu nsi yoona. (Isaaya 30:23) Kwonka eki kitakabaireho, omu bicweka bingi eby’ensi, eibura ry’amaizi niryeyongyera, kandi enjura okwanga kugwa ni kimwe aha birikureetaho oburemeezi obu. Baibuli neegamba ki ekindi aha bikwatiraine n’okugonjoora oburemeezi bw’eibura ry’amaizi?
Oku eibura ry’amaizi riraahweho
Baibuli neeyoreka ngu Ruhanga arikukoresa Obukama bwe, naija kumaraho oburemeezi oburikuteganisa ensi yaitu, otwariiremu eibura ry’amaizi. (Matayo 6:9, 10) Obukama bwa Ruhanga ni gavumenti y’omu iguru erikwija kutegyeka ensi. (Danieli 2:44; Okushuuruurwa 11:15) Kandi, Obukama bwa Ruhanga nibwija kukora eki gavumenti z’abantu zitarikubaasa kukora, okwihaho ebirikureetaho eibura ry’amaizi.
Oburemeezi: Empinduka y’obwire neeteganisa omwetoorooro gw’amaizi gubura kukora gye. Ebi nibitwariramu ekyanda ky’amaani, n’emyegyemure erikureetwaho enjura nyingi, n’okushandaara kw’amaizi g’enyanja.
Okugonjoora Oburemeezi: Obukama bwa Ruhanga nibwija kugarura busya obuhangwa bw’ensi, kugira ngu egarukye omu buteeka bwayo. Ruhanga naaraganisa ati: “Reeba nimpindura byona bisya.” (Okushuuruurwa 21:5) Eitaka erikarangataine niriija kugira amaizi maingi marungi, kibaasise n’emyanya etarikutuurwamu hati, kubamu ebiine amagara. (Isaaya 41:17-20) Obukama bwa Ruhanga oburaabe nitutegyekwa Yesu Kristo, nibwija kutereeza obuhangwa bw’ensi.
Obu Yesu yaabaire ari omu nsi, akacureeza eihunga ririkutiinisa, ekyayorekire amaani maingi agu Ruhanga yaamuhaire. (Mako 4:39, 41) Kristo ku araabe naategyeka omu Bukama bwa Ruhanga, ebihikiirizi tibirikwija kugaruka kubaho. Abantu nibaija kugira obusingye n’oburinzi ebyabuzima, batarikutiina ebihikiirizi eby’omuringo gwona.
Oburemeezi: Abantu abatarikuranzya hare n’ebitongore by’omururu nibishiisha emigyera, enyanja, n’amaizi g’okuzimu, ekirikutuubya aha bwingi bw’amaizi marungi.
Okugonjoora Oburemeezi: Ruhanga naija kuboneza ensi, kandi agarure emigyera, enyanja enkye n’empango, n’eitaka, omu buteeka bwabyo. Ensi neija kuba paradiso. Baibuli neegira eti: ‘Eihamba n’ensi eyomire nibiija kushemererwa, eihamba ry’omusheenyi [niriija kwesiima], rirabye ebirabyo.’—Isaaya 35:1.
Niki ekiraahikye ahari abo abatarikufayo aha buhangwa bw’ensi, nari abantu bagyenzi baabo? Ruhanga naaraganisa ‘kucwekyereza abarikucwekyereza ensi.’—Okushuuruurwa 11:18; Enfumu 2:21, 22.
Oburemeezi: Amaizi nigakoresibwa kubi, ekirikumanyisa ngu amaizi maingi nigashiishwa kukira agarikukorwa.
Okugonjoora Oburemeezi: Obukama bwa Ruhanga nibwija kureetera ‘ebi Ruhanga arikukunda kukorwa omu nsi,’ beitu bitari ebi eby’abantu abarikweyendeza. (Matayo 6:9, 10) Obukama bwa Ruhanga nibwija kuha abantu abu buraabe nibutegyeka obwegyese burungi. ‘Okumanya [Yehova nikwija] kubuga ensi yoona,’ Isaaya 11:9 nikwo harikugira.a Abantu ahabw’okugira okumanya oku, n’okukunda munonga Ruhanga n’ebihangirwe bye byona, nibaija kureeberera gye ensi n’ebigirimu byona.
Okumanya ebirikukiraho aha ki Obukama bwa Ruhanga buraakore, reeba ekicweka, “Obukama bwa Ruhanga Nibwija Kukorera ki Abantu?”
Za omu kitabo kya Baibuli ekya Isaaya, eshuura 35, oshome oreebe oku ensi erikwija kuhindurwa paradiso.
Reeba vidiyo Ahabw’enki Ruhanga Yaahangire Ensi? kwongyera kumanya ekigyendererwa eki Ruhanga ainiire ensi n’abantu.
a Yehova n’eiziina rya Ruhanga. (Zaaburi 83:18) Reeba ekicweka, “Yehova n’Oha?”