Ahabw’enki Abantu Batarikureetaho Obusingye?—Baibuli Neegamba Ki?

Abategyeki b’amahanga n’ebibiina by’ensi yoona tibibaasize kureetaho obusingye. Hati, hariho emihondano mingi y’obushaarizi kukira obundi bwona kuruga obu habaho Orutaro rw’Ensi Yoona II. Abantu nk’obuhumbi bubiri, nari kimwe kya kashatu ky’abantu boona abari omu nsi, nibatuura omu bicweka ebirimu emihondano.

Ahabw’enki abantu batarikubaasa kureetaho obusingye? Baibuli neegamba ki?

Enshonga ishatu ahabw’enki abantu batarikubaasa kureetaho obusingye

1. 1. Abantu baine emiteekateekyere erikubaremesa nangwa n’okuteeraho kugarukana omu busingye. Baibuli ekagamba kare ngu omu bwire bwaitu, ‘abantu bakaba nibaija kuba abarikwekunda, abakunzi b’empiiha, abanyamaryo, abarikwemanya, abarikugoma, abatarikwenda kugarukana n’abandi, [abatarikwerinda], enshaarizi, engangaazi, abarikwekuza.’—2 Timoseo 3:2-4.

2. 2. Buri muntu nari abantu baingi hamwe, tibaine obushoboorozi bw’okugonjoora oburemeezi baaba batahwerairwe Omuhangi waabo Yehovaa Ruhanga. Baibuli neeyoreka ngu ‘omuntu weena orikugyenda tarikubaasa kuhabura [nangwa n’orutambwe rwe].’—Yeremia 10:23.

3. 3. Ensi eri omu kugyemeserezibwa nk’omutegyeki mubi w’amaani, Sitaane Omuregi, orikuhabisa “ensi yoona.” (Okushuuruurwa 12:9) Obu ‘ensi yoona eri omu butegyeki bw’omubi ogwo,’ nihaija kuguma nihabaho entaro n’emihondano.—1 Yohaana 5:19.

N’oha orikubaasa kureetaho obusingye?

Baibuli neetuhamiza ngu obusingye nibwija kureetwaho Ruhanga, beitu batari bantu.

• “Ahakuba niimanya ebi ndikubateekateekyera, eby’oburungi bitari by’obubi, ngu mbone [kubaha amatsiko na nyentsya, nikwo Yehova] arikugira.”—Yeremia 29:11.

Ruhanga naija kuhikiiriza ata okuraganisa oku? ‘Ruhanga mukama w’obusingye naija kusingyeera Sitaane.’ (Abarooma 16:20) Ruhanga naija kukoresa gavumenti ye ey’omu iguru, ei Baibuli erikweta “Obukama bwa Ruhanga,” kureetaho obusingye omu nsi yoona. (Luka 4:43) Yesu Kristo Omugabe w’Obukama obwo, ku araabe naategyeka, abantu nibaija kwegyesibwa oku baine kutuura omu busingye.—Isaaya 9:6, 7.

• Okwega ebirikukiraho, shoma ekicweka “Obukama bwa Ruhanga Nibwija Kukorera ki Abantu?”