Okugira Amagara Kiine Mugasho Ki?

Eki Baibuli erikugarukamu

Ekibuuzo ekirikukwata aha magara nikibaasa kubuuzibwa omu miringo mingi, nka ahabw’enki turi aha? nari nyowe okugira amagara kwine omugasho gwona? Baibuli neeyoreka ngu omugasho gw’okugira amagara n’okwombeka omukago murungi na Ruhanga. Yetegyereze amazima makuru aga agari omu Baibuli.

• Ruhanga n’Omuhangi waitu. Baibuli neegira ngu: “Niwe yaatuhangire, kandi turi abe.”—Zaaburi 100:3; Okushuuruurwa 4:11.

• Buri kimwe eki Ruhanga yaahangire akiiniire ekigyendererwa, otwariiremu naitwe.—Isaaya 45:18.

• Ruhanga akatuhanga n’ekyetengo ky’eby’omwoyo, ekirikutwariramu okwenda kumanya ekigyendererwa ky’okubaho. (Matayo 5:3) Naayenda ngu tuhaazye ekyetengo ekyo.—Zaaburi 145:16.

• Nitwigutsya ekyetengo kyaitu eky’eby’omwoyo turikuba banywani ba Ruhanga. N’obu okuba banywani ba Ruhanga abamwe barikukireeba nk’ekintu kigumire, Baibuli neetuhiga eti: ‘Yirira haihi Ruhanga, nawe abone kukwirira haihi.’—Yakobo 4:8; 2:23.

• Kubaasa kuba banywani ba Ruhanga, twine kukora ebirikuhikaana n’ekigyendererwa eki atwiniire. Baibuli neegamba aha kigyendererwa kya Ruhanga eki omu Omubuurizi 12:13: “Tiina Ruhanga, oyorobere ebiragiro bye, ahakuba ekyo kyonka nikyo omuntu ashemereire kukora.”

• Omu biro by’omumaisho, nitwija kureeba ekigyendererwa kya Ruhanga nikihikiirira omu bwijwire, ku araiheho okubonabona, kandi akaha amagara agatahwaho banywani be abarikumuramya.—Zaaburi 37:10, 11.