Omuriro gw’Okuzimu n’Ogwabuzima? Okuzimu Niki Kurugiirira Ahari Baibuli?
Eki Baibuli erikugarukamu
Envunuura za Baibuli ezimwe, nk’eya King James, nizikoresa “okuzimu” omu Byahandiikirwe ebimwe. (Zaaburi 16:10; Ebyakozirwe 2:27a) Nk’oku ebishushani by’ediini birikworeka omu kicweka eki, abantu baingi nibaikiriza ngu okuzimu n’omwanya ogurimu omuriro ogutarikuraara, ogw’okufubiriramu ababi. Kwonka shi ekyo nikyo Baibuli erikwegyesa?
Omu kicweka eki
Okuzimu shi n’omwanya gw’omuriro ogutarikuraara?
Ngaaha. Ekigambo ekirikuvunuurwa “okuzimu” omu nvunuura za Baibuli enkuru (omu Ruheburaayo, ni “Sheol”; omu Rugriika ni, “Hades”) okutwarira hamwe ekirikumanyisa “Ekituuro.” Baibuli neeyoreka ngu abari omu “Kituuro” bari omu mbeera y’okutabaho.
Abafu tihaine eki barikumanya n’ahabw’ekyo tibarikuhurira busaasi. ‘Okuzimu tihabayo murimo, nari enaama, nari okumanya, n’obu bwakuba obwengye.’ (Omubuurizi 9:10) Okuzimu tihariyo amaraka g’abantu abarikutaaga baine obusaasi. Kureka, Baibuli neegira eti: “Ababi ka babe nibo baitwa enshoni, bashuume okuzimu bahunami.”—Zaaburi 31:17; Zaaburi 115:17.
Ruhanga akagira ngu okufa nikyo kifubiro ky’ekibi, beitu kutari kwokibwa omu muriro. Ruhanga akagambira omushaija w’okubanza, Adamu ngu ekifubiro ky’okutoorobera ekiragiro kya Ruhanga nikiija kuba okufa. (Okutandika 2:17) Tihaine eki yaagambire aha kwokibwa ebiro byona okuzimu. Bwanyima y’Adamu kushiisha, Ruhanga akamugambira ekifubiro kye arikugira ngu, “ori omucuucu, n’omu mucuucu nimwo origaruka.” (Okutandika 3:19) Akaba naija kurekyera aho kubaho. Ku ogire ngu Ruhanga akaba naija kuta Adamu omu muriro gw’okuzimu, buzima akaba naija kukimugambira. Na hati Ruhanga takahindwire ekifubiro ky’abo abarikuhenda ebiragiro bye. Bwanyima y’obwire bwingi Adamu aherize kushiisha, Ruhanga akahwera omuhandiiki wa Baibuli kuhandiika ati: “Ebihembo by’ekibi n’okufa.” (Abarooma 6:23) Tihariho kindi kifubiro ekirikwetengyesa, ‘ahakuba orikufa naaba atakitegyekwa kibi.’—Abarooma 6:7.
Okwotsya omuntu ebiro byona n’ekirikunugwa ahari Ruhanga. (Yeremia 32:35) Eki nikitaanira kimwe n’eki Baibuli erikwegyesa ngu ‘Ruhanga ni rukundo.’ (1 Yohaana 4:8) Naayenda ngu tumuramye ahabw’okumukunda, beitu kutari kutiina okwokibwa ebiro byona.—Matayo 22:36-38.
Abantu barungi bakaza okuzimu. Baibuli neekoresa ekigambo “okuzimu” kworeka ngu abantu abeesigwa nka Yakobo na Yobu, bakaba nibaija kuza okuzimu. (Okutandika 37:35; Yobu 14:13) Nangwa Baibuli neeyoreka ngu na Yesu Kristo obu yaabaire atakazookire, akaba ari okuzimu. (Ebyakozirwe 2:31, 32) N’ahabw’ekyo, ekigambo “okuzimu” nikikoresibwa omu Baibuli kumanyisa Ekituuro.b
Enfumu ya Yesu ey’omugaiga na Laazaaro eine makuru ki?
Enfumu ya Yesu egi eri omuri Luka 16:19-31. Enfumu nizikoresibwa nk’eby’okureeberaho ebirikwegyesa emicwe nari amazima omu by’omwoyo. Enfumu erikukwata aha mushaija omugaiga na Laazaaro ti kintu ekyabuzima ekyabaireho. (Matayo 13:34) Okumanya ebirikukiraho aha nfumu egi, reeba ekicweka, “Omushaija Omugaiga na Laazaaro Bakaba Bari Baahi?”
Okuzimu shi nikujwekyera okutaana na Ruhanga?
Ngaaha. Enyegyesa erikugira ngu abafu nibabaasa kumanya ngu bataanire na Ruhanga, terikuhikaana n’eki Baibuli erikwegyesa, ngu abafu tihaine eki barikumanya.—Zaaburi 146:3, 4; Omubuurizi 9:5.
Haine orarugire okuzimu?
Eego. Baibuli neegamba omu bwijwire aha bantu mwenda abaafiire bakaza “okuzimu” nari omu kituuro kandi bakazoorwa.c Ku ogire ngu bakaba baine eki barikumanya, bakaba nibaija kugamba ebi baarabiremu. Kwonka buzima, tihaine n’omwe aharibo owaagambire aha kwokibwa ebiro byona, nari ngu haine eki yaabaire naamanya na kakye. Ahabw’enki? Nk’oku Baibuli erikwegyesa, bakaba bataine kateezo, bari nk’abagwejegyereire kimwe “omu turo.”—Yohaana 11:11-14; 1 Abakorinso 15:3-6.
a Envunuura za Baibuli ez’Orungyereza ez’ebiro ebi tizirikukoresa ekigambo “okuzimu” omu Ebyakozirwe 2:27. Kureka, ezimwe nizikoresa ekigambo “ekituuro,” (New Century Version); “omwanya gw’abafu,” (New International Version); “omu bafu” (The Passion Translation). Ezindi nizikoresa ekigambo ky’Orugriika “Hades.”—Holman Christian Standard Bible, NET Bible, New American Standard Bible, English Standard Version.
b Reeba akabokusi “Ebigambo bya Baibuli eby’Okubanza.”
c Reeba 1 Abagabe 17:17-24; 2 Abagabe 4:32-37; 13:20, 21; Matayo 28:5, 6; Luka 7:11-17; 8:40-56; Yohaana 11:38-44; Ebyakozirwe 9:36-42; Ebyakozirwe 20:7-12.