Orutaro rwa Haramagedoni Niki?

Eki Baibuli erikugarukamu

Haramagedoni n’orutaro orw’aha muheru orurikwija kuba aha gati ya gavumenti z’abantu na Ruhanga. Gavumenti ezo n’abashagiki baazo nibahakanisa Ruhanga barikwanga kweta ahansi y’obutegyeki bwe. (Zaaburi 2:2) Orutaro rwa Haramagedoni nirwija kumariraho kimwe obutegyeki bw’abantu.—Danieli 2:44.

Omu Baibuli, ekigambo “Haramagedoni” kirimu omurundi gumwe gwonka, omu Okushuuruurwa 16:16. Omu muringo gw’obunabi Okushuuruurwa nihooreka ngu “abagabe b’ensi zoona” nibaza kuteeranirwa ‘hamwe kuza omu rugamba orw’ekiro kikuru kya Ruhanga ow’obushoboorozi bwona omu mwanya ogurikwetwa Haramagedoni omu Ruheburaayo.’—Okushuuruurwa 16:14.

Ni baahi abaraayejumbe omu rutaro rwa Haramagedoni? Yesu Kristo naija kwebembera eihe ry’omu iguru kusingura abazigu ba Ruhanga. (Okushuuruurwa 19:11-16, 19-21) Abazigu aba nibatwariramu abarikuhakanisa obushoboorozi bwa Ruhanga n’abarikumujuma.—Ezekieli 39:7.

Orutaro Haramagedoni niruza kuba omuri Asia? Ngaaha. Orutaro oru tirurikwija kuba omu mwanya gumwe, kureka niruza kuba omu nsi yoona.—Yeremia 25:32-34; Ezekieli 39:17-20.

Haramagedoni (omu Ruheburaayo Har Meghiddohnʹ), nikimanyisa “Orushozi rwa Megido.” Megido rukaba ruri orurembo omu Israeli eya ira. Ebyafaayo nibyoreka ngu entaro nyingi zikaba nizirwanirwa omu kicweka ekyo, nangwa zimwe ziri n’omu Baibuli. (Abaramuzi 5:19, 20; 2 Abagabe 9:27; 23:29) Kwonka, Haramagedoni ti mwanya oguri haihi na Megido eya ira. Hati tihariyo orushozi ruhango nk’orwo, kandi oruhanga rwa Yezereeli tirurikubaasa kuhikamu abantu boona abarikuza kurwanisa Ruhanga. Kureka, Haramagedoni n’embeera eraabe eri omu nsi yoona obu amahanga garaayeteerane hamwe ogw’aha muheru kurwanisa obutegyeki bwa Ruhanga.

Nihaija kubaho mbeera ki omu rutaro rwa Haramagedoni? N’obu turaabe tutarikumanya oku Ruhanga araakorese amaani ge, naabaasa kukoresa bimwe aha birwaniso ebi yaakoreiseho ira nk’orubaare, omutsitsa, omwegyemure, omuriro n’obuganga, emirabyo, n’endwara. (Yobu 38:22, 23; Ezekieli 38:19, 22; Habakuuki 3:10, 11; Zekaria 14:12) Ahabw’okubuzabuzibwa, bamwe aha bazigu ba Ruhanga nibaza kwitana, kandi nibaija kukireeba butunu ngu bariyo nibarwanisa Ruhanga.—Ezekieli 38:21, 23; Zekaria 14:13.

Haramagedoni shi niyo eraabe muheru y’ensi? Haramagedoni terikwija kucwekyereza ensi, ahakuba ensi n’obutaaho bw’abantu obw’obutwire. (Zaaburi 37:29; 96:10; Omubuurizi 1:4) Haramagedoni omu mwanya gw’okumaraho abantu, neija kubajuna ahakuba “omutwe muhango” gw’abaheereza ba Ruhanga nibaija kuhonokaho.—Okushuuruura 7:9, 14; Zaaburi 37:34.

Omu Baibuli, obumwe ekigambo “ensi” nikikoresibwa kumanyisa abantu ababi abarikuhakanisa Ruhanga. (1 Yohaana 2:15-17) Haramagedoni neija ‘kucwekyereza ensi’ omu muringo ogu.—Matayo 24:3, Baibuli eya King James.

Haramagedoni neija kubaho ryari? Obu Yesu yaabaire naagamba aha ‘kubonabona kwingi’ okuraahendere n’orutaro rwa Haramagedoni akagira ati: “Kwonka eby’ekyo kiro n’obwo bunaku tihaine orikubimanya, n’obu baakuba baamaraika b’omu iguru, n’obu yaakuba Omwana, kureka Isheboona wenka.” (Matayo 24:21, 36) Kwonka nabwo, Baibuli neeyoreka ngu Haramagedoni neija kubaho omu bwire bw’okubaho kwa Yesu okwatandikire omuri 1914.—Matayo 24:37-39.