Baibuli shi Neebaasa Kumpwera Naaba Niinyenda Kweita?
Eki Baibuli erikugarukamu
Eego! Baibuli neeruga ahari ‘Ruhanga orikuhuumuriza enshoberwa.’ ( 2 Abakorinso 7:6) Baibuli ti kitabo ekirikushoboorora aha ku orikubaasa kugira ebiteekateeko birungi kwonka, beitu kihweraire baingi kusingura ebiteekateeko by’okweita. Obuhabuzi bwayo naiwe nibubaasa kukugasira.
Hariho abarikugambwaho omu Baibuli abaabaire nibenda ngu bafe?
Ni Byahandiikirwe ki ebiri omu Baibuli ebirikubaasa kukuhwera waagira ebiteekateeko by’okweita?
Kandi shi munywani waawe ku yaakugira ati: “Niinyenda kufa”?
Ni buhabuzi ki oburikukora obu Baibuli erikuha?
● Gamba enyehurira zaawe
Eki Baibuli erikugamba: “Munywani w’omuntu amukunda ebiro byona, kandi ow’eishe-emwe azaarirwa okuhwera abantu omu bihikiirizi.”—Enfumu 17:17.
Amakuru: Nitwenda obushagiki bw’abandi twaba twine ebiteekateeko birikuteganisa.
Waaguma n’enyehurira zaawe wenka, nooba oine oburemeezi obutarikubaasa kwemerwa. Kwonka waabaganaho n’ondiijo aha buremeezi bwawe, noobaasa kutuubya aha busaasi bwawe.
Teeraho kukora eki: Gira ou waagaaniira nawe hati, obundi nk’omu ka yaawe nari omunywani ou orikwesiga.a Noobaasa n’okworeka oku orikwehurira orikuhandiika enyehurira zaawe.
● Tunga obuhezi bw’ekishaho.
Eki Baibuli erikugamba: “Abahuriire tibetenga [mushaho], kureka abarwaire.”—Matayo 9:12.
Amakuru: Twine kusherura obuhwezi bw’abashaho twaba turwaire.
Okugira ebiteekateeko by’okwenda kweita nikabaasa kuba kari akamanyiso ngu oine endwara y’omutwe nari omu nyehurira. Nk’endwara z’omubiri ezindi, eki tikishemereire kukureetera kuhemuka. Endwara z’omutwe n’ez’enyehurira nizibaasa kutambirwa.
Teeraho kukora eki: Sherura obuhwezi aha mushaho ohikire ahonaaho nk’oku kirikubaasika.
● Ijuka ngu Ruhanga naafayo.
Eki Baibuli erikugamba: “Ebiteera-nkumba bitaano tibigurwa sente ibiri? kwonka tihariho na kimwe aharibyo ekyeba omu maisho ga Ruhanga. . . . Mutatiina; muri ab’obuguzi okukira ebiteera-nkumba bingi.”—Luka 12:6, 7.
Amakuru: Ori ow’omuhendo ahari Ruhanga.
Noobaasa kuhurira ori wenka, kwonka Ruhanga naareeba ebi orikurabamu. Naakufaho nangwa n’obu oraabe nooyehurira ngu tokyenda kugumaho. “Omutima oguhendekire, ogweteisiize kimwe, ai Ruhanga, torigugaya,” Zaaburi 51:17 nikwo harikugira. Ruhanga naayenda ngu ogumeho ahakuba naakukunda.
Teeraho kukora eki: Shwijuma obuhame oburi omu Baibuli oburikworeka ngu Ruhanga naakukunda. Nk’eky’okureeberaho, reeba eshuura 24 ey’ekitabo Draw Close to Jehovah.
● Shaba Ruhanga.
Eki Baibuli erikugamba: ‘Yegyekyerera [Ruhanga] okushoberwa kwawe kwona, ahabw’okuba naakutaho omutima.’—1 Petero 5:7.
Amakuru: Ruhanga naakushaba ngu omugambire kyona ekirikukwerarikiriza.
Ruhanga naabaasa kukuha obusingye bw’omu mutima n’amaani. (Abafilipi 4:6, 7, 13) Omu muringo ogu, naaramira abo abarikumutakira kubaha obuhwezi.—Zaaburi 55:22.
Teeraho kukora eki: Shaba Ruhanga eizooba eri. Koresa eiziina rye, Yehova, reero omugambire enyehurira zaawe. (Zaaburi 83:18) Mushabe kukuhwera kugumizamu.
● Teekateeka aha matsiko ga Baibuli ag’ebiro by’omumaisho.
Eki Baibuli erikugamba: “Amatsiko aga tugaine nk’ekitsibo ky’amagara, n’amatsiko agahamire kandi agatarikunyiganyigibwa.”—Abaheburaayo 6:19.
Amakuru: Enyehurira zaawe nizibaasa kuzongazonga nk’emeeri eri omu ihunga, kwonka amatsiko agari omu Baibuli nigabaasa kukuhamya.
Amatsiko aga ti birooto burooto, kureka nigeegamira aha kuraganisa kwa Ruhanga ngu naija kwihaho byona ebirikureeta obusaasi.—Okushuuruurwa 21:4.
Teeraho kukora eki: Yongyera kushoma aha matsiko ga Baibuli orikushoma eshuura 5 ey’akatabo Amakuru Marungi Kuruga Ahari Ruhanga!
● Kora eki orikukira kukunda.
Eki Baibuli erikugamba: “Omutima ogushemereirwe n’omubazi murungi.”—Enfumu 17:22.
Amakuru: Twakora ebintu ebirikureeta okushemererwa, nitubaasa kuba gye omu biteekateeko n’enyehurira.
Teeraho kukora eki: Kora ekintu eki orikukira kukunda. Nk’eky’okureeberaho, hurikiza ebyeshongoro birungi, shoma ebintu ebirikuhuumuriza, nari kora ekintu eki orikukunda. Noija n’okwongyera aha kushemererwa kwawe waakora ekintu ekirikuhwera abandi, nangwa n’omu miringo mikye.—Ebyakozirwe 20:35.
● Reeberera amagara gaawe.
Eki Baibuli erikugamba: “Okwemanyiiza eby’omubiri nikugasha.”—1 Timoseo 4:8.
Amakuru: Nitugasirwa twamanyiiza omubiri, tukabyama ekirikumara, kandi tukarya eby’okurya by’ekiriisa.
Teeraho kukora eki: Gyendesa obwira orikwehuuta, kurama edakiika 15.
● Ijuka ngu enyehurira n’ebindi bintu nibihinduka.
Eki Baibuli erikugamba: ‘Torikumanya ekiraabeho nyencakare.’—Yakobo 4:14.
Amakuru: Oburemeezi oburikukureetera amaganya nangwa n’agu orikuhurira otarikubaasa kwemera, nigabaasa kuba gari ag’akaanya kakye.
Embeera yaawe n’obu yaakuba eri mbi eta hati, neebaasa kuhinduka nyencakare. Mbwenu nu sheruera oburyo bw’okugumisiriza. (2 Abakorinso 4:8) Embeera erikukureetera amaganya neebaasa kwija kurugaho bwanyima y’obwire, kwonka waaba waayeitsire, ekyo torikubaasa kukihindura.
Teeraho kukora eki: Shoma aha bantu abarikugambwaho omu Baibuli abaayehuriire kubi bakenda kufa, kandi oreebe oku embeera zaabo zaahindukire zikaba nungi omu miringo ei baabaire batarikuteekateeka. Yetegyereze bamwe aharibo.
Baibuli shi neetugambira aha bantu abaabaire nibenda kufa?
Eego. Baibuli neetugambira ahari bamwe ababaaire nibenda kufa. Ruhanga tarabatwariize kubi, kureka akaba naayenda kubahwera. Naiwe naabaasa kukuhwera.
Eliya
● Akaba ari oha? Eliya akaba ari nabi otarikutiina. Kwonka nawe akeehurira kubi. “Eliya akaba ari omuntu nkaitwe,” Yakobo 5:17 nikwo harikugira.
● Ahabw’enki yaabaire naayenda kufa? Hariho obu Eliya yaayehurira nk’ori wenka, akatiina, kandi akeehurira nk’otaine mugasho. N’ahabw’ekyo akashaba ati: “Ai [Yehova], nyita.”—1 Abagabe 19:4.
● Niki ekyamuhweraire? Eliya akagambira Ruhanga enyehurira ze. Ruhanga akamugumya ata? Akooreka ngu naamufaho, kandi yaamworeka amaani ge. Kandi akahamiza Eliya ngu naakyetengwa, kandi yaamuha omuhwezi orikubaasa kumuhwera.
▸ Shoma ahari Eliya: 1 Abagabe 19:2-18.
Yobu
● Akaba ari oha? Yobu akaba ari omushaija omugaiga owaabaire naaramya Ruhanga ow’amazima.
● Ahabw’enki yaabaire naayenda kufa? Yobu akagwerwa obugwe bukurataine. Akafeerwa ebintu bye byona. Abaana be boona bakafeera omu ihunga. Akarwara endwara erikureeta obusaasi bwingi. Kandi empereruka, abantu bakamucwera orubanja ngu niwe yaayereeteire oburemeezi obu bwona. Yobu akagira ati: “Amagara gangye ngatamirwe, tinkyenda kugumaho.”—Yobu 7:16.
● Niki ekyamuhweraire? Yobu akashaba Ruhanga, kandi yaagaaniira n’abandi. (Yobu 10:1-3) Munywani we omunyambabazi Elihu akamugaruramu amaani, yaamuhwera kugira emiteekateekyere mirungi aha mbeera ye. Kandi okukira byona, Yobu akaikiriza okuhana kwa Ruhanga n’obuhwezi bwe.
▸ Shoma ahari Yobu: Yobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Musa
● Akaba ari oha? Musa akaba ari omwebembezi w’Abaisraeli aba ira kandi ari nabi omwesigwa.
● Ahabw’enki yaabaire naayenda kufa? Musa akaba aine obujunaanizibwa bwingi, bakaba nibakira kumucwera orubanja, n’ekyarugiremu akahitsya obwire yaaruha. N’ahabw’ekyo akatakira Ruhanga ati: “Ninkweshengyereza, nyita ndugyeho.”—Okubara 11:11, 15.
● Niki ekyamuhweraire? Musa akagambira Ruhanga oku arikwehurira. Ruhanga akahwera Musa yaatuubya aha bujunaanizibwa bwe kumwihaho amaganya.
▸ Shoma ahari Musa: Okubara 11:4-6, 10-17.
a Waaba oine ebiteekateeko by’amaani eby’okwenda kweita kandi otaine bakundwa abu orikubaasa kugambira, teerera esimu abarikuhwera abaine oburemeezi omu ihanga ryawe.