Ahabw’Enki Orikuhamya ngu Ebi Orikwikiriza n’Amazima?

1. Abeebembezi b’ediini za Kristendomu nibatwaza bata omu bwire bw’entaro?

MBWENU shi Ruhanga naayenda ngu Abakristaayo ab’amazima beejumbe omu ntaro kandi baite abantu ab’enganda ezindi? Omu myaka 100 ehingwire, abo abarikweyeta Abakristaayo nikyo batwire nibakora. Abashomesa b’ediini omu mahe ab’Abakaturiki nibashabira omugisha amahe n’eby’okurwanisa byabo kuza kurwanisa abari aha rubaju orundi abarimu Abakaturiki bagyenzi baabo. Nikyo kimwe n’abashomesa b’ediini omu mahe ab’Abaporotesitanti. Orutaro rw’Ensi Yoona orwa II n’eky’okureeberaho ky’okwitana nk’okwo.

2, 3. Abajurizi ba Yehova bakatwaza bata omu Rutaro rw’Ensi Yoona orwa II na bwanyima yaarwo, kandi n’ahabw’enki?

² Abajurizi ba Yehova bakakora ki obwire obwo? Ebyafaayo nibyoreka ngu tibaragizire rubaju omu rutaro orwo. Niki ekyabahwereire kutwaza batyo? Ekikuru ekyabahwereire n’ebi Yesu yaayegyeise hamwe n’eky’okureeberaho kye. Akagira ati: “Ku muriguma nimukundana, nibwo abantu boona baribamanya ku muri abeegi bangye.” (Yoh. 13:35) Kandi bakaba nibaijuka ebigambo ebi entumwa Paulo yaahandiikiire Abakristaayo b’omuri Korinso.​—Shoma 2 Abakorinso 10:3, 4.

³ N’ahabw’ekyo, Abakristaayo ab’amazima abu omuntu waabo w’omunda atendekirwe Baibuli, tibarikwega by’entaro nari kuzeejumbamu. Ahabw’okutwaza batyo, Abajurizi ba Yehova abato n’abakuru, abakazi n’abashaija nibahiiganisibwa. Baingi bateirwe omu bihome kandi abamwe baagyemeseresibwa kukora emirimo erikuhenda. Omu bunaku bwa Nazi omuri Germany, abamwe bakaitwa. N’obu haraabe haabaireho okuhiiganisibwa kw’amaani omuri Buraaya, Abajurizi ba Yehova tibarayebirwe obujunaanizibwa bwabo obw’okubuurira amakuru marungi agarikukwata aha Bukama bwa Yehova. N’obwesigwa, bakabuurira omu bihome, n’omu myanya endiijo ei baabaire bahungiiremu.a Bwanyima omu kiita bantu ekyabaireho omuri Rwanda omu 1994, Abajurizi ba Yehova tibarayejumbiremu. Kandi nabwo tibarayejumbire omu kusheesha eshagama okwabaire omu mahanga agamwe aga Buraaya obu ihanga rya Yugoslavia ryabaire niritandikaho.

4. Abajurizi ba Yehova okutejwanzya omu rwanju rw’ensi kikwatsire kita aha bandi?

⁴ Abajurizi ba Yehova okutejwanzya omu rwanju rw’ensi, kihwereire baingi abarikubareeba omu nsi yoona kumanya ngu nibakundira kimwe Ruhanga na bataahi baabo. Ekirikumanyisa ngu nibo Bakristaayo ab’amazima. Kwonka, hariho ebindi ebikwatiraine n’okuramya kwaitu ebirikuhamiza abantu ngu turi Abakristaayo ab’amazima.

OKUTENDEKWA OGURIKUKIRAYO OMU BYAFAAYO

5. Abakuratsi ba Yesu aba ira bakakora mpindahinduka ki?

⁵ Kuruga obu Yesu yaatandika obuheereza bwe omu nsi, akooreka obukuru bw’okubuurira amakuru marungi g’Obukama. Akatoorana abeegi 12 kutandika omusingi gw’okubuurira okwabaire nikwija kubuga ensi yoona kandi bwanyima akatendeka abeegi 70 abandi. (Luk. 6:13; 10:1) Omu kubanza bakatebeekanisibwa kubuurira Abayudaaya. Bwanyima abeegi ba Yesu bakaba nibaija kubuurira abanyamahanga abatashazirwe. Egi ka yaabaire eri empindahinduka y’amaani aha beegi Abayudaaya!​—Byak. 1:8.

6. Niki ekyahwereire Petero kumanya ngu Ruhanga tarikushoroora mu bantu?

⁶ Entumwa Petero akatumwa omu ka ya Korunerio owaabaire atashazirwe. Eki kikahwera Petero kumanya ngu Ruhanga tarikushoroora mu bantu. Korunerio n’ab’omu ka ye bakabatizibwa. Amakuru gakeeyongyera kujanjaara n’omu bicweka ebindi, kugira ngu abantu b’amahanga goona babaase kugahurira kandi bagaikirize. (Byak. 10:9-48) Hati ekicweka ky’okubuuriramu kikaba kiri ensi yoona.

7, 8. Ekibiina kya Yehova kikozire ki kuhika aha bantu baingi? (Reeba ekishushani aha kutandika.)

⁷ Ebyafaayo by’Abajurizi ba Yehova obunaku obu nibyoreka ngu abo abaine obujunaanizibwa bw’okwebembera omurimo gw’okubuurira n’okwegyesa abantu amakuru marungi omu nsi yoona baine omujinya. Abajurizi ba Yehova nk’obukaikuru munaana, n’obweziriki nibajanjaaza amakuru agarikukwata ahari Kristo omu ndimi ezirikurenga 600, kandi nizeeyongyera kukanya! Abajurizi ba Yehova nibamanywa ahabw’okubuurira enju aha nju, aha nguuto, obumwe barikukoresa emeeza eziriho ebitabo n’obugaari.

⁸ Abavunuuzi abarikurenga 2,900 batendekirwe kubaasa kuvunuura Baibuli n’ebitabo ebirikushoboorora ahari Baibuli. Tibarikuvunuura omu ndimi ezirikumanywa munonga zonka. Nibavunuura n’omu ndimi nyingi ezitarikumanywa munonga, kwonka ezirikugambwa abantu baingi. Nk’eky’okureeberaho, omuri Spain abantu baingi ab’omu kicweka kya Catalonia nibakoresa munonga orurimi rwabo orurikwetwa Catalan. Omu myaka egi, rutandikire kukoresibwa munonga n’omu bicweka ebindi nka Andorra, Alicante, omu bizinga bya Balearic, na Valencia. Abajurizi ba Yehova nibashohoza ebitabo ebirikushoboorora ahari Baibuli omu rurimi rwa Catalon, kandi nibagira n’enteerane omu rurimi orwo.

9, 10. Niki ekirikworeka ngu ekibiina kya Yehova nikifayo aha byetengo by’abantu boona eby’omwoyo?

⁹ Omurimo gw’okuvunuura n’okwegyesa nigukorwa n’omu bicweka ebindi. Mexico n’eihanga erikukoresa Oruspania kwonka ririmu n’abantu abandi abarikugamba endimi z’enzaarwa. Harimu abantu abarikugamba orurimu orurikwetwa Maya. Ofiisi y’eitaagi omuri Mexico ekoohereza abavunuuzi b’orurimi rwa Maya omu kicweka ahu baabaire nibabaasa kuhurira kandi bakakoresa orurimi orwo buri izooba. Orurimi orundi ni Nepali, rumwe aha zirikukoresibwa omu ihanga rya Nepal, eririmu abantu abarikurenga obukaikuru 29. Endimi nka 120 nizo zirikukoresibwa omu ihanga eryo, kwonka abantu nk’obukaikuru ikumi nibagamba Nepali kandi abandi baingi nibarukoresa nk’orurimi rwabo rwa kabiri. Ebitabo byaitu nibishohozibwa n’omu rurimi orwo.

¹⁰ Okugira abavunuuzi baingi, nikyoreka gye oku Abajurizi ba Yehova barikutwara ekiragiro ky’okubuurira amakuru marungi g’Obukama omu nsi yoona. Obukaikuru n’obukaikuru bwa turakiti, obutabo, na magaziini nitubiha abantu tutarikubibaguza twaba nitwejumba omuri kampeyini omu nsi yoona. Esente ezirikukoresibwa omu kuteera ebitabo ebi niziheebwayo Abajurizi ba Yehova abarikuhayo beekundiire barikukuratira obuhabuzi bwa Yesu obu: “Mukaheerwa busha, naimwe muheere busha.”​—Mat. 10:8.

11, 12. Omurimo gw’okubuurira ogurikukorwa Abajurizi ba Yehova omu nsi yoona guhwereire abantu kuhamya ki?

¹¹ Abajurizi ba Yehova n’ababuurizi kandi abeegyesa abarikuhamya ngu ebi barikwikiriza n’amazima ekirikubareetera kwefeerereza kubaasa kwejumba omu kubuurira abantu b’amahanga goona n’enganda zoona. Baingi babaasize kweihaho ebintu ebitarikwetengyesa munonga, kwega endimi ezindi, nari kuza omu kicweka ekindi kubaasa kwejumba omu murimo mukuru. Omurimo gw’Okubuurira n’okwegyesa abantu omu nsi yoona nagwo niguhamiza abantu ngu Abajurizi ba Yehova nibo bakuratsi ba Yesu ab’amazima.

¹² Abajurizi ba Yehova nibakora ebi byona ahabw’okuba nibamanya ngu ebi barikwikiriza n’amazima. Kwonka shi niki ebindi ebirikureetera abantu baingi kuhamya ngu Abajurizi ba Yehova baine amazima?​—Shoma Abarooma 14:17, 18.

ENSHONGA AHABW’ENKI NIBAHAMYA NGU BAINE AMAZIMA

13. Abajurizi ba Yehova babaasize bata kurinda ekibiina kyabo kuguma kicumire omu by’omwoyo?

¹³ Nitubaasa kugasirwa omu bi Abakristaayo ab’obunaku obu bagambire, barikuhamya ngu ebi barikwikiriza n’amazima. Omwe aha baheereza ba Yehova omazire obwire arikuheereza Yehova akagira ati: “Ekibiina kya Yehova nikikora buri kimwe kuhamya ngu kyaguma kicumire, kandi nikiha obuhabuzi kihana na weena orikukora enshobe.” Eki nikibaasika kita? Nikikuratira emitindo eri omu Kigambo kya Ruhanga n’eky’okureeberaho kya Yesu hamwe n’entumwa ze. Bamwe omu kibiina Ekikristaayo abatarikworobera emitindo ya Ruhanga babingirwe. Kandi baingi ahari abo abaabaire nibakora ebi Ruhanga atarikusiima, babaasize kuhindura emitwarize yaabo baatandika kutwaza gye.​—Shoma 1 Abakorinso 6:9-11.

14. Baingi ahari abo abarikubingwa omu kibiina bakozire ki, kandi eki kirugiremu ki?

¹⁴ Kandi shi abo abarikubingwa omu kibiina kurugiirira aha misingye ya Baibuli? Baingi aharibo babaasize kweteisa baareka emitwarize yaabo mibi baagaruka omu kibiina. (Shoma 2 Abakorinso 2:6-8.) Okuhamira aha mitindo ya Baibuli kireeteire ekibiina Ekikristaayo kuguma kicumire gye, ekirikutubaasisa kukyesiga n’okukihamiraho. Okutashushana n’amakanisa maingi agarikushwekyerera ebibi, Abajurizi ba Yehova nibahamira aha mitindo ya Ruhanga, kandi eki kireeteire abantu baingi kuhamya ngu Abajurizi ba Yehova baine amazima.

15. Niki ekitwire nikihwera ow’eishe-emwe omwe kuhamya ngu aine amazima?

¹⁵ Ahabw’enki Abajurizi ba Yehova abamazire obwire buraingwa nibaheereza, barikuhamya ngu ebi barikwikiriza n’amazima? Ow’eishe-emwe oine emyaka 54 akashoboorora ati: “Ntwire ninkimanya kuruga omu bunyeeto ngu okwikiriza kwangye nikwegamira aha nyomyo ishatu ezi: (1) ngu Ruhanga ariho; (2) ngu niwe yaahandiikiise Baibuli; kandi (3) ngu naakoresa ekibiina Ekikristaayo eky’Abajurizi ba Yehova obunaku obu, kandi akiha n’omugisha. Kurabira omu kweyegyesa Baibuli, ntwire ningyeza enyomyo ezo kandi ndikwebuuza yaaba nizeegamira aha musingi guhami. Buri mwaka ninyeyongyera kuhamya okwikiriza kwangye ngu buzima ebi turikwikiriza n’amazima.”

16. Niki ekyakizireyo kushemeza munyaanyazi-itwe omwe?

¹⁶ Munyaanyazi-itwe omwe oshweirwe orikuheereza aha ofiisi yaitu enkuru omuri New York akagamba aha kibiina kya Yehova ati: “Nikyo kyonka ekirikubuurira aha iziina rya Ruhanga. Ka nikishemeza kukimanya ngu eiziina rya Ruhanga riri omu Baibuli emirundi nka 7,000! Ninkunda okuhigwa okuri omu 2 Obusingye 16:9 ngu amaisho ga MUKAMA gairuka oku n’oku nigabuga ensi yoona, okweyoreka ku ari ow’amaani kuhwera abaine emitima eshugaine ahariwe.” Naagumizamu ati: “Amazima gaambasiise kumanya oku ndikubaasa kugira omutima ogwemariire ahari Yehova kugira ngu abaase kumpa amaani. Omukago gwangye na Yehova nigwo ndikukirayo kutwara nk’ogw’omuhendo. Kandi ninsiima ebi Yesu arikutumanyisa ahari Ruhanga ebirikumpwera kuhama.”

17. Omushaija omwe owaabaire atarikwikiriza ngu hariho Ruhanga naahamya ki, kandi n’ahabw’enki?

¹⁷ Omushaija omwe owaabaire atarikwikiriza ngu hariho Ruhanga omu kubanza, akagira ati: “Ebihangirwe nibimpamiza ngu Ruhanga naayenda ngu abantu batuureho bashemereirwe, n’ahabw’ekyo tarikubaasa kurekaho okubonabona ebiro byona. Kandi nk’oku ensi erikweyongyera kubamu ebikorwa bibi, abaheereza ba Yehova nibeeyongyera kugira okwikiriza, omujinya, n’okukunda. Omwoyo gurikwera ogwa Yehova nigwo gurikubaasisa eky’okutangaaza eki kubaho.”​—Shoma 1 Petero 4:1-4.

18. Ebi ab’eishe-emwe babiri baagambire nibikukwataho bita?

¹⁸ Omujurizi wa Yehova ondiijo oheereize kumara obwire bwingi naagamba ekyamureeteire kwikiriza amazima agu turikubuurira ati: “Okweyegyesa kumara obwire buraingwa kimpwereire kuhamya ngu Abajurizi ba Yehova bataireho munonga kukuratira eky’okureeberaho ky’Abakristaayo ab’omu kyasha ky’okubanza. Nindeeba obumwe bw’Abajurizi ba Yehova omu nsi yoona ku ndikuba nintaayaaya omu mahanga gatari gamwe na gamwe. Amazima kuruga omu Baibuli gandeteire okumarwa n’okushemererwa.” Ow’eishe-emwe omwe oine emyaka erengire omuri 60 ku baamubuurize ahabw’enki naahamya ngu ebi arikwikiriza n’amazima, akata omutima aha ky’okureeberaho kya Yesu Kristo arikugira ati: “N’obwegyendesereza nitushwijuma ebi Yesu yaakozire hamwe n’obuheereza bwe reero tukuratira eky’okureeberaho kye. Tukozire empindahinduka omu mitwarize yaitu twabaasa kwirira haihi Ruhanga kurabira omuri Kristo Yesu. Nitumanya ngu ekitambo kya Kristo nikyo kiraatubaasise kwija kujunwa. Kandi nitumanya ngu akazooka omu bafu. Twine obuhame oburikwesigwa obw’abo abaabaire bariho.”​—Shoma 1 Abakorinso 15:3-8.

AMAZIMA TWINE KUGAKORESA KI?

19, 20. (a) Paulo akooreka ngu ab’omu kibiina kya Rooma baine bujunaanizibwa ki? (b) Ahabw’okugira ngu turi Abakristaayo abeehaireyo, twine bujunaanizibwa ki?

¹⁹ Ahabw’okugira ngu nitukunda bataahi baitu, titurikubaasa kuhunamira amazima agu turikumanya. Paulo akagambira ab’eishe-emwe omu kibiina kya Rooma ati: “Ku oryatura n’akanwa kaawe oti: Yesu niwe Mukama, waikiriza n’omutima gwawe ku Ruhanga yaamuzoire omu bafu, oryajunwa; ahakuba omutima nigwo omuntu aikiririsa akaheebwa okuhikiirira, kandi akanwa niko ayatuza akaheebwa okujunwa.”​—Rom. 10:9, 10.

²⁰ Ahabw’okugira ngu turi Abajurizi ba Yehova abehaireyo ahariwe, twine obuhame ngu ebi turikwikiriza n’amazima, kandi nitumanya ngu twine obujunaanizibwa bw’okwegyesa abandi amakuru marungi g’Obukama bwa Ruhanga oburikwija kutegyeka. Twaba turi omu kubuurira, ka tuteereho kuhwera abantu kureeba ngu ebi turikwegyesa nibiruga omu Baibuli, kandi bareebe ngu titwine kubangaanisa kwona aha bi turikubeegyesa.