Ebaruha Kuruga aha Kakiiko Akareeberezi

Ahari Abajurizi ba Yehova Bataahi Baitu Abakundwa:

Entumwa Paulo akakoresa buri mugisha ogu yaabaire atunga okworeka okusiima kwe ahabw’ab’eishe-emwe bataahi be. Akahandiikira Abakristaayo omuri Rooma ati: “Okubanza ninsiima Ruhanga wangye omuri Yesu Kristo ahabwanyu mwena, ahabwokuba okwikiriza kwanyu nikugambwa omu nsi zoona.” (Rom. 1:8) Buzima, Abakristaayo ab’omu kyasha ky’okubanza abaabaire bari omu mahanga goona agaabaire nigategyekwa Rooma, bakaba nibamanywa ahabw’okwikiriza kwabo okuhamire n’ahabw’omujinya gwabo omu kubuurira. (1 Tes. 1:8) Tikirikutangaaza okureeba ngu Paulo akaba naakunda munonga ab’eishe-emwe bataahi be!

Nka Paulo, nitusiima Yehova buri kubateekateekaho. Nitubakunda munonga mwena! Kandi nimubaasa kugira obwesigye ngu Yehova naakunda buri omwe ahariimwe. Bamwe omuriimwe nimuhakanisibwa munonga, kwonka nimugumizamu nimubuurira. Buzima, okubuurira kwanyu mutarikutiina ka nikushemeza omutima gwa Yehova!​—Enf. 27:11.

Omu kushoma n’okucumitiriza aha “Bikorwa by’Abajurizi ba Yehova omu Bunaku Obu” ebiri omu katabo 2008 Yearbook akarikushemeza kandi akarikugumya okwikiriza kwaitu, noija kureeba obuhame ngu Mukama waitu Yesu Kristo naagyenda ‘naasingura kandi ngu naaza kusingurira kimwe’ kandi ngu eky’okurwanisa kyona ekiraakorwe kurwanisa abakuratsi ba Kristo tikiribaasa kusingura.​—Kush. 6:2; Isa. 54:17.

Paulo akahandiikira Abakristaayo ab’omuri Filipi ati: “Nsiima Ruhanga wangye . . . ahabw’okuba mukwatanisa naanye omu kubuzya engiri.” (Fil. 1:3-5) Naitwe abari aha Kakiiko Akareeberezi nikwo turikubatwara tutyo imwe ab’eishe-emwe. Omu mwaka gw’obuheereza ogwa 2007, ababuurizi 6,691,790 boona hamwe bakamara eshaaha 1,431,761,554 nibabuurira amakuru marungi omu mahanga 236 omu nsi yoona. Ka nimukora kihango omu kubuzya amakuru murungi! Teekateeka aha busiriira n’obusiriira bw’abantu abaahwereirwe okuteeraho kwaitu twena, byona ahabw’okuhimbisa Yehova!

Ogundi murundi, Paulo akooreka ngu akaba naasaasira hamwe n’ab’eishe-emwe bataahi be. Akahandiikira ab’omuri Tesalonika ati: ‘Nitwijuka obutoosha . . . okugumisiriza kwanyu okurikuruga omu matsiko agu mwine omuri Mukama waitu Yesu Kristo na Tataitwe.’ (1 Tes. 1:2, 3) Buzima, nituhikwaho oburemeezi bwingi omu magara. Oburemeezi nibubaho, kwonka ni kikuru ngu tubwemere. Ni buremeezi ki iwe obu oine? Ohweiremu amaani ahabw’okugira endwara y’amaani erikutuma otaakora eki waakwenzire kukora omu buheereza bwa Yehova? Ofeereirwe omukundwa waawe ou obaire otwire nawe emyaka mingi? (Enf. 30:15, 16) Noosherura ow’okushwer[w]a orikukunda Yehova nka iwe kwonka akibuzire, beitu nabwe okihamiire aha buhabuzi bw’omu Byahandiikirwe okushwer[w]a omuri Mukama? (1 Kor. 7:39) Nooteeraho kureeberera abaana baawe kwonka oine oburemeezi omu by’entaatsya? Oku embeera yaawe eraabe eri kwona, ku oraagume orikwebembeza eby’Obukama, noobaasa kugira obwesigye ngu Yehova tarikwija ‘kwebwa emirimo yaawe n’okukunda oku oyorekire ahabwa iziina rye.’ Ab’eishe-emwe na banyaanyaziitwe, ‘mutakaaruha omu kukora gye.’​—Heb. 6:10; Gal. 6:9.

N’enki ekiraabahwere kugumisiriza? Nk’Abatesalonika, ‘n’amatsiko agu mwine omuri Mukama waitu Yesu Kristo.’ Ahabw’enshonga nungi, Paulo bwanyima akagyeragyeranisa ‘amatsiko g’okujunwa’ n’enkofiira y’ekyoma egumire erikubaasa kurinda Omukristaayo kutagira okubangaanisa n’okwehwa amatsiko.​—1 Tes. 5:8.

Buzimazima, mwagumisiriza mwine okushemererwa, nimuba nimugarukamu Sitaane omu nshonga nkuru erikukwata aha butegyeki. Sitaane naagira ngu abaheereza ba Ruhanga omu buhangwa bwabo nibeyendeza kandi ngu n’obu baraabe nibabaasa kuheereza Ruhanga kumara obwire bukye, tibarikwija kuguma baine omujinya oburemeezi bwayeyongyera nari emperu yaakyerererwa kwija. Mwine omugisha gw’okworeka ngu Omuregi buzima n’omubeihi! Buri izooba eri orikumara nirikwiriza haihi kutunga emigisha ei oineho amatsiko.

Nk’oku Paulo yaasiimire ab’eishe-emwe bataahi be ahabw’okwikiriza kwabo okuhamire, ahabw’okwejumba omu murimo gw’okubuurira n’ahabw’okugumisiriza kwabo, naitwe ka tukorese omugisha ogu okubeebaza n’okubasiima n’okubahamiza ngu nitubakunda. Mugumizemu nimukora mutyo!

Nitushaba ngu omwaka ogu gubemu emigisha ya Yehova. Nitubendeza emigisha ya Yehova.

Niitwe ab’eishe-emwe bataahi baanyu,

Akakiiko Akareeberezi ak’Abajurizi ba Yehova