Eshuura ya Kabiri
Himbisa Yehova Ruhanga Omwe Ow’Amazima
1. Ruhanga omwe ow’amazima n’oha?
BAIBULI neegira ngu n’obu haraabe hariho baingi abarikutwarwa nka baaruhanga, “ahariitwe, hariho Ruhanga omwe Isheboona.” (1 Abakorinso 8:5, 6) “Ruhanga omwe” ogwo ni Yehova, Omuhangi wa byona. (Eky’Ebiragiro 6:4; Okushuuruurwa 4:11) Yesu akamweta “Ruhanga we, kandi Ruhanga waanyu.” (Yohaana 20:17) Akaikirizana na Musa owaagizire ati: “Yehova niwe Ruhanga ow’amazima; tihariho ondiijo kureka we wenka.” (Eky’Ebiragiro 4:35, NW) Yehova naakirira kimwe ebintu ebindi byona ebirikuramibwa, nk’ebishushani, abantu abarikutwarwa nka baaruhanga nangwa n’obu yaakuba Sitaane Omuregi, “ruhanga w’ensi egi.” (2 Abakorinso 4:3, 4) Obutashushana na baaruhanga aba, Yehova ni ‘Ruhanga omwe ow’amazima’ nk’oku Yesu yaagizire.—Yohaana 17:3.
2. Okwongyera kwega ahari Ruhanga kushemereire kutuhiga kukora ki?
2 Abantu abarikusiima ebi barikwega aha mitwarize mirungi ya Ruhanga n’aha bi akozire otaireho n’ebi ari haihi kukora, nibahurira bamukunda. Rukundo yaabo ahari Yehova ku erikugyenda neeyeyongyera, nibagira ekihika ky’okumuhimbisa. Bata shi? Omuringo gumwe n’okugambira abandi ebirikumukwataho. “Akanwa niko [omuntu] ayatuza akaheebwa okujunwa,” nikwo Abarooma 10:10 rurikugira. Omuringo ogundi n’okutooreza Yehova omu bigambo n’omu bikorwa. “Mutooreze Ruhanga nk’abaana abarikukundwa,” nikwo Abaefeso 5:1, NW, harikugira. Okubaasa kukora ebi gye, nitwetenga kumanya Yehova nk’oku ari buzima.
3. Emitwarize ya Ruhanga emikuru n’eha?
3 Omu Baibuli harimu ebyahandiikirwe bingi ebirikugamba aha mitwarize ya Ruhanga emikuru. Emitwarize ye emikuru ni obwengye, oburingaaniza, amaani na rukundo. ‘Obwengye bwinwe Ruhanga.’ (Yobu 12:13) ‘Emitwarize ye yoona n’ey’oburingaaniza.’ (Eky’Ebiragiro 32:4, NW) ‘N’ow’amaani.’ (Isaaya 40:26) ‘Ruhanga ni rukundo.’ (1 Yohaana 4:16) Kwonka shi, aha mitwarize ya Ruhanga ena emikuru, ni guuha ogurikukirayo obukuru, ogurikworeka eki ari?
“Ruhanga Ni Rukundo”
4. Ni guuha omu mitwarize ya Ruhanga ogwatumire yaahanga ebintu byona ebiine amagara n’ebitagaine?
4 Teekateeka aha kyareetaire Yehova okuhanga ensi, ebihangirwe eby’omwoyo n’abantu. Noogira ngu n’amaani ge nari n’obwengye bwe? Ngaaha! N’obu Ruhanga araabe yaabikoreise, tibyo byatumire yaahanga ebihangirwe ebyo. Oburingaaniza bwe bukaba butarikumwetengyesa kuhanga ebiine amagara. Kwonka ahabwa rukundo ye, akahanga ebiine obwengye. Rukundo ekahiga Ruhanga kugyenderera ngu abantu abahurizi batuure omu Paradiso ebiro byona. (Okutandika 1:28; 2:15) Rukundo ye ekatuma yaataho entebeekanisa y’okwiha abantu omu kibi kya Adamu.
5. Okurugiirira ahari Baibuli, Yehova n’eky’okureeberaho kikuru kya mutwarize ki, kandi n’ahabw’enki?
5 N’ahabw’ekyo, omu mitwarize ya Ruhanga yoona, ogurikukirayo obukuru ni rukundo. Okwo nikwo ari. N’obu obwengye, oburingaaniza n’amaani eraabe eri emitwarize ye mikuru, Baibuli terikugira ngu Yehova ni gumwe ahariyo. Kwonka neegira ngu Ruhanga ni rukundo. Buzima Yehova niwe ky’okureeberaho kikuru ky’okworeka rukundo. Egi ni rukundo erikugyendera aha misingye, beitu hatari aha biteekateeko. Rukundo ya Ruhanga neegyendera aha misingye y’amazima n’okuhikiirira. Nigwo muringo gwa rukundo ogurikukirayo obukuru nk’oku gurikureebekyera omuri Yehova Ruhanga we wenyine. Rukundo egyo terimu kweyendeza kwona kandi obutoosha neereebekyera omu bikorwa.
6. N’enki ekirikutubaasisa kutooreza Ruhanga n’obu araabe naatukirira kimwe?
6 Omuringo gwa rukundo ogu omurungi nigwo gurikutubaasisa kutooreza Ruhanga. Nk’abantu abatahikiriire kandi abarikushiisha, nitubaasa kuteekateeka ngu titurikubaasa kumutooreza gye. Kwonka hariho eky’okureeberaho ekindi ekya rukundo mpango ya Yehova: Naamanya obweremwa bwaitu kandi naamanya ngu titurikubaasa kuhikiiriza buri ki arikutwenza. Tarikutwenza ebi tutarikubaasa. Naamanya ngu tituhikiriire. (Zaaburi 51:5) Nikyo Zaaburi 130:3, 4 zirikugirira ziti: “MUKAMA, kuri noofa aha by’okutahikiirira, n’oha owaakubaasa kwemerera, ai MUKAMA? Kwonka ah’ori hariho okusaasirwa.” Buzima, Yehova ni ‘Ruhanga w’embabazi n’okusaasira, otarahuka kugira ekiniga, oijwire embabazi n’amazima.’ (Okuruga 34:6) “Iwe Mukama ori murungi, orahuka kusaasira.” (Zaaburi 86:5) Eki ka nikihuumuriza! Ka nikigaruramu amaani okuheereza Ruhanga ogu omurungi orikututaho omutima kandi orikutureeberera!
7. Rukundo ya Yehova neereebekyera eta omu bi yaahangire?
7 Rukundo ya Yehova kandi neebaasa kureebekyera omu bi yaahangire. Teekateeka aha bintu bingi ebirungi ebi Yehova atuhaire okutushemeza, nk’enshozi enungi, amahamba, enyanja enkye n’empango. Naatuha ebyokurya by’emiringo mingi ngu bitunurire kandi bitubaiseho. Ekindi, Yehova naatuha ebimuri birungi eby’emiringo mingi kandi ebirikuhuumura gye obwo otaireho n’enyamaishwa ezirikutushemeza. Akahanga ebintu eby’okushemeza abantu, n’obu kiraabe kyabaire kitarikumwetengyesa. N’eky’amazima, titurikubaasa kushemerererwa ebi yaahangire omu bwijwire tukiri omu nsi egi embi omu bweremwa bwaitu. (Abarooma 8:22) Kwonka teekateeka aha bi Yehova aritukorera omu nsi ensya! Omuhandiiki wa zaaburi naatuhamiza ati: “Oshashaanura engaro zaawe, ohaazya ekintu kyona ekihuriire ebi kirikwetenga.”—Zaaburi 145:16.
8. Eky’okureeberaho ekirikukirayo obukuru, ekirikworeka rukundo ya Yehova ahariitwe ni kiiha?
8 Eky’okureeberaho ekirikukirayo obukuru ekya rukundo ya Yehova aha bantu ni kiiha? Baibuli neeshoborora eti: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Tugire shi ngu Yehova akakora eki ahabw’okugira ngu omuntu akaba ari murungi? Abarooma 5:8 nirugira ruti: “Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.” Buzima, Ruhanga akoohereza Omwana we ohikiriire okuhayo amagara ge nk’ekitambo okutujuna kuruga omu kibi n’okufa. (Matayo 20:28) Eki kikaiguriraho abantu abarikukunda Ruhanga omuhanda gw’okutunga amagara agatahwaho. Rukundo ya Ruhanga neeheebwa boona abarikwenda kukora ebi akunda, ahakuba Baibuli neetugambira eti: ‘Ruhanga tashoroora mu bantu; kureka omu mahanga goona orikumutiina, akakora eby’okuhikiirira, ogwo niwe arikusiimwa.’—Ebyakozirwe 10:34, 35.
9. Eky’okugira ngu Yehova akahayo Omwana we nk’ekitambo ahabwaitu kishemereire kutuhiga kukora ki?
9 Okumanya ngu Yehova akahayo Omwana we nk’ekitambo ahabwaitu, atyo akatwiguriraho omuhanda gw’okutunga amagara agatahwaho, kishemereire kutuhiga kukora ki? Kishemereire kutuhiga kukundira kimwe Yehova, Ruhanga ow’amazima. Kandi ekindi, ekyo kishemereire kutuhiga kworobera Yesu, orikujwekyera Ruhanga. “[Yesu] akafa ngu abariho barekye kuguma bariho ahabwabo bonka, kureka ahabw’Ogwo owaabafeereire.” (2 Abakorinso 5:15) Ka n’omugisha okugyendera omu bigyere bya Yesu, ahakuba akaba ari eky’okureeberaho kirungi omu kworeka rukundo n’embabazi za Yehova! Eki nikireeberekyera omu bi Yesu yaagambiire abacureezi obu yaagira ati: “Imwe mwena abaruhire n’abaremereirwe, mwije ahariinye, mbaruhuure. Mwekorere omugamba gwangye, muunyegyereho; ahabw’okuba nintwaza gye, kandi ndi omucureezi omu mutima; naimwe muryatunga okuhuumura omu mitima yaanyu, ahakuba omugamba gwangye tigurikuremeera, n’omutwaro gwangye gwanguhi.”—Matayo 11:28-30.
Okworeka Abandi Rukundo
10. Ni miringo ki emwe ei turikubaasa kworekamu ngu twiniire Abakristaayo bataahi baitu rukundo?
10 Nitworeka tuta ngu twiniire Ab’eishe-emwe rukundo nk’ei Yehova na Yesu batwiniire? Yetegyereze emiringo mingi ei turikubaasa kworekamu ekyo: “Okukunda kugumisiriza, kugira embabazi; okukunda tikugira ihari; okukunda tikwehimbisa, tikwetunguura; tikukora birikwitsa enshoni, tikwesherurira byakwo; tikurahuka kuguubwa kubi, tikuteekateeka kibi aha muntu; tikushemerererwa kutahikiirira, kureka kushemerererwa amazima. Okukunda kwemera byona, kwikiriza byona, kugira amatsiko ahari byona, kugumisiririza byona. Okukunda tikuhwaho ebiro byona.”—1 Abakorinso 13:4-8; 1 Yohaana 3:14-18; 4:7-12.
11. Ni baahi abandi abu tushemereire kworeka rukundo, kandi n’ahabw’enki?
11 Ni baahi abandi abu tushemereire kworeka rukundo, kandi nitugibooreka tuta? Yesu akagira ati: “N’ahabw’ekyo mugyende omu mahanga goona, muhindure abantu abeegi nimubabatiza omu iziina rya Isheboona n’ery’Omwana n’ery’[o]mwoyo [o]rikwera, nimubeegyesa kworobera byona ebi naabaragiire.” (Matayo 28:19, 20) Eki nikitwariramu okubuurira abatakahindukire Bakristaayo amakuru marungi agarikukwata aha nsi ya Ruhanga ensya ey’okwesiima eri haihi. Yesu akooreka gye ngu rukundo yaitu teshemereire kugarukira ahari abo bonka abu turi nabo omu kwikiriza, ahakuba akagira ati: “Mbwenu ku muraabe nimukunda abarikubakunda [bonka], muryaheebwa bihembo ki? N’abahooza tikwo bakora batyo? Kandi ku muraabe nimuramutsya beene waanyu bonka, abandi nimubakiza ki? N’abanyamahanga tikwo bakora batyo?”—Matayo 5:46, 47; 24:14; Abagalatia 6:10.
‘Gyendera omu Iziina rya Yehova’
12. Ahabw’enki eiziina Yehova rishemereire kugirwa Ruhanga omwe ow’amazima?
12 Ekindi kintu kikuru omu kuhimbisa Ruhanga ow’amazima n’okumanya iziina rye ery’omutaano, Yehova, okarikoresa kandi okaryegyesa abandi. Omuhandiiki wa zaaburi akooreka ekyetengo kye ati: “Bamanye ngu niiwe wenka orikwetwa Yehova, okira boona, kandi otegyeka ensi yoona.” (Zaaburi 83:18) Eiziina Yehova nirimanyisa ngu “Naabaisaho nk’Oku Arikwenda.” Niwe Mukuru orikutaho kandi butoosha akahikiiriza ebigyendererwa bye. Kwo buzima, Ruhanga ow’amazima wenka niwe aine eiziina eryo ahakuba abantu tibarikubaasa kuhamya yaaba ebi baraakore biraarabemu. (Yakobo 4:13, 14) Yehova niwe wenka orikubaasa kugira ngu ekigambo kye “buzimazima nikihikiiriza” ebyo ebi akitumiire. (Isaaya 55:11, NW) Baingi nibatangaara ku barikureeba eiziina rya Ruhanga omurundi gw’okubanza omuri Baibuli zaabo kandi bakeega n’eki ririkumanyisa. (Okuruga 6:3) Kwonka nibaija kugasirwa okumanya oku, “baagyendera omu iziina rya Yehova . . . ebiro byona.”—Miika 4:5, NW.
13. Okumanya n’okugyendera omu iziina rya Yehova nikimanyisa ki?
13 Aha bikwatiraine n’eiziina rya Ruhanga, Zaaburi 9:10 nirugira ruti: “Abo abarikumanya eiziina ryawe baryakwesiga.” Eki tikirikumanyisa okumanya eiziina rya Yehova kwonka, ahakuba ekyo kyonka tikirikutuma twamwesiga. Okumanya eiziina rya Ruhanga nikimanyisa okwetegyereza n’okusiima mukama w’eiziina eryo, okworobera obushoboorozi bwe n’ebiragiro bye, hamwe n’okumwesiga omuri byona. (Enfumu 3:5, 6) Nikyo kimwe, okugyendera omu iziina rya Yehova nikimanyisa okwehayo ahari Ruhanga, okamujwekyera nk’omwe aha baramya be, kandi buzima okahikaanisa amagara gaawe n’ebi akunda. (Luka 10:27) Iwe nookora ekyo?
14. Twaba turi ab’okuheereza Yehova obutwire bwona, n’enki eki tushemereire kwemanyiiza kukora?
14 Twaba turi ab’okuheereza Yehova obutwire bwona, titushemereire kumuheereza ahabw’okuhikiiriza omukoro. Entumwa Paulo akeehanangiriza Timoseo, owaabaire aheereize Yehova okumara emyaka mingi arikugira ati: “Yemanyiize okwemarira ahari Ruhanga.” (1 Timoseo 4:7, NW) Okwemarira aha muntu nikuruga aha mutima ogurikusiimira kimwe ogwo muntu. ‘Okwemarira ahari Ruhanga’ nikureebekyera omu kutiina Yehova. Nikureebekyera omu kumukunda munonga ahabw’okumuha ekitiinisa. Nikutureetera okwenda kureeba buri omwe naaha eiziina rye ekitiinisa. Tushemereire kwemanyiiza kwemarira ahari Ruhanga twaba turi ab’okugyendera omu iziina rya Yehova, Ruhanga omwe ow’amazima ebiro byona.—Zaaburi 37:4; 2 Petero 3:11.
15. Twaba turi ab’okuheereza Ruhanga, n’enki eki tutashemereire kukora?
15 Okubaasa kuheereza Ruhanga omu muringo ogu arikusiima, twine kuramya we wenka, ahakuba ni “Ruhanga ow’eihato.” (Okuruga 20:5) Titurikubaasa kukunda Ruhanga kandi tukakunda n’ensi egi embi ei Sitaane ari ruhanga waayo. (Yakobo 4:4; 1 Yohaana 2:15-17) Yehova naamanya gye eki buri omwe arikuteeraho kuba. (Yeremia 17:10) Buzima twaba nitukunda okuhikiirira, ekyo Yehova naakireeba kandi naija kutuhwera kwemera oburemeezi bwaitu buri izooba. Arikutuhwera n’omwoyo we orikwera ow’amaani, naija kutubaasisa kusingura obubi obukanyire omu nsi egi. (2 Abakorinso 4:7) Naija kandi kutuhwera okugumya amatsiko gaitu ag’amagara agatahwaho omu paradiso omu nsi gahamire. Ago ka n’amatsiko g’omutaano! Tushemereire kusiima ekyo kandi twekundiire tukaheereza Yehova, Ruhanga ow’amazima, orikutubaasisa kutunga amagara agatahwaho.
16. N’enki eki waakwenzire kukora ori hamwe n’obukaikuru bw’abantu?
16 Obukaikuru bw’abantu omu nsi yoona n’okushemererwa nibaikiriza okweta kw’omuhandiiki wa zaaburi oku: “Mukwatanise naanye okuha MUKAMA ekitiinisa. Tuhimbise kumwe eiziina rye.” (Zaaburi 34:3) Yehova naakweta okuba omwe ahari nyamwingi w’abantu kuruga omu nsi zoona abarikumuhaisa ekitiinisa.
Eby’Okweijutsya
• Yehova ni muntu wa muringo ki? Nitugasirwa tuta twayetegyereza gye emitwarize ye?
• Tukaahwera tuta abandi okwega amazima agarikukwata ahari Ruhanga?
• Nikimanyisa ki okumanya n’okugyendera omu iziina rya Yehova?
[Ekishushani ekiri aha rupapura 14]
Yehova, omuri rukundo ye mpango, ‘aryashashaanura omukono gwe ahaazye ekyetengo kya buri kintu kyona ekihuriire’