Eshuura ya Kataano

Obusingye obu Abaramya ba Yehova Baine

1, 2. (a) Ni bugabe ki obu Ruhanga yaahaire abantu babiri ab’okubanza? (b) Gamba bimwe aha biragiro ebi Adamu na Haawa baabaire baine kworobera.

OBU Yehova yaahanga omushaija n’omukazi ab’okubanza, bakaba baine obusingye oburikukirira kimwe obusingye obu abantu baine ebiro ebi. Eka yaabo ekaba eri omwanya murungi munonga omuri Edeni. Bakaba batarwara, ahakuba ebiteekateeko byabo n’emibiri yaabo bikaba bihikiriire. Bakaba batarikwija kufa nk’oku kiri hati. Kandi, bakaba batari nk’ebyoma ebitarikubaasa kwecweramu, kureka bo, bakaba baine obugabe bw’okwecweramu. Okubaasa kuguma baine obwo bugabe burungi, bakaba baine kworobera ebiragiro bya Ruhanga.

² Nk’eky’okureeberaho, teekateeka aha biragiro by’obuhangwa ebi Ruhanga yaataireho. N’eky’amazima, ebiragiro ebi tibirahandiikirwe, kwonka Adamu na Haawa bakahangwa bari ab’okubyorobera. Ku baabaire bagira enjara, bamanya ngu nibeetenga kurya; bakigira eiriho, bamanya ngu nibeetenga kunywa; eizooba rikirenga, bamanya ngu nibeetenga kubyama. Yehova kandi akabaha omurimo gw’okukora. Omurimo ogwo nagwo gukaba guri ekiragiro okwakyo ahabw’okuba gukaba nigwija kutegyeka oku baabaire nibaija kutwaza. Bakaba bari ab’okuzaara abaana, bakategyeka eby’omu nsi ebiine amagara kandi bakongyerayo ensharo za Paradiso okuhitsya yaabuga ensi yoona. (Okutandika 1:28; 2:15) Ka kyabaire kiri ekiragiro kirikugasha! Kikabaha omurimo murungi, ogwakubabaasiise kukoresa obugabe bwabo omu bwijwire omu muringo murungi. Kandi, bakaba baine obugabe bw’okwecweramu oku baabaire nibaija kukora omurimo gwabo. Mbwenu eki Yehova atarabahaire niki?

3. Adamu na Haawa bakaba nibaija kwega bata kukoresa gye obugabe bwabo obw’okucwamu?

³ Buzima, eky’okugira ngu Adamu na Haawa bakaheebwa omugisha gw’okwecweramu tikiramanyise ngu buri ki baakucwiremu kyona kikaareetsire ebirungi byonka. Omu kukoresa obugabe bwabo obw’okwecweramu, bakaba bataine kurenga aha biragiro bya Ruhanga. Ebiragiro ebyo bakaabyegire bata? Barikworobera Omuhangi waabo kandi barikwetegyereza n’ebi yaakozire. Ruhanga akaha Adamu na Haawa obwengye obwakubabaasiise kugyendera aha bi baabaire beega. Obu baabaire bahangirwe bahikiriire, bakaba nibabaasa kutwaza nka Ruhanga omu kucwamu eby’okukora. Buzima, kuri baabaire nibasiima ebi Ruhanga yaabaire abakoreire, kandi barikwenda kumushemeza, bakaba nibaija kukora ekyo.—Okutandika 1:26, 27; Yohaana 8:29.

4. (a) Ekiragiro ky’okutarya aha bijuma by’omuti gumwe ekyahairwe Adamu na Haawa kikabaihaho obugabe bwabo? (b) Ahabw’enki ekiragiro ekyo kyabaire kihikire?

⁴ Atyo, Ruhanga nk’owaabahaire amagara, akacwamu kugyeza okwehayo kwabo ahariwe n’okureeba yaaba baabaire bamaririire kumworobera. Yehova akaha Adamu ekiragiro eki: “Omuti gwona ogw’omu kibanja noikirizibwa kuryaho nk’oku orikwenda; kwonka omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima oryafa.” (Okutandika 2:16, 17) Haawa nawe akamanyisibwa ekiragiro eki yaaheza kuhangwa. (Okutandika 3:2, 3) Ekiragiro eki shi kikabaihaho obugabe bwabo? Ngaaha buzima. Bakaba baine eby’okurya birungi eby’emiringo yoona, ebi baabaire nibabaasa kuryaho kitabetengyeise kurya aha kijuma ky’omuti ogwo. (Okutandika 2:8, 9) Kikaba kihikire bo okwetegyereza ngu ensi n’eya Ruhanga, obu ariwe yaagihangire. N’ahabw’ekyo, aine obugabe kutaho ebiragiro ebirikuhikaana n’ekigyendererwa kye kandi ebirikugasira abantu.—Zaaburi 24:1, 10.

5. (a) Adamu na Haawa bakafeerwa bata obugabe obu baabaire baine? (b) N’enki ekyagiire omu mwanya gw’obugabe obu Adamu na Haawa baabaire baine, kandi eki itwe kikaturugiramu ki?

⁵ Kwonka shi n’enki ekyabaireho? Ahabw’okweyendeza, maraika omwe akakoresa kubi obugabe bwe atyo yaahinduka Sitaane, ekirikumanyisa “Omuhakanisa.” Akabeihabeiha Haawa arikumugambira ekintu ekyabaire kitarikwikirizana n’ekigyendererwa kya Ruhanga. (Okutandika 3:4, 5) Adamu akeegaita ahari Haawa omu kuhenda ekiragiro kya Ruhanga. Barikukununkirira ekyabaire kitari kyabo, bakafeerwa obugabe bwabo. Bakatandika kutegyekwa ekibi kandi bwanyima baafa, nk’oku Ruhanga yaabaire abagambiire. Bakahunguza abaana baabo ekibi—ekirikureebekyera omu kwenda kushiisha. Ekibi kandi kikareetaho endwara, okukaikura, hamwe n’okufa. Okwenda kushiisha, kurikwenegyezibwa okushendashenda kwa Sitaane, kukareetaho obwangane omu bantu, obugomi, okuhata abandi n’entaro ezirugiremu okufa kw’obukaikuru n’obukaikuru bw’abantu. Ebi ka nibitaana aha bugabe obu Ruhanga yaahaire abantu omu kutandika!—Eky’Ebiragiro 32:4, 5; Yobu 14:1, 2; Abarooma 5:12; Okushuuruurwa 12:9.

Ahu Obusingye Burikubaasa Kushangwa

6. (a) Obusingye obwa buzima nibubaasa kushangwa hi? (b) Ni busingye bwa muringo ki obu Yesu yaagambireho?

⁶ Ahabw’emituurire mibi eri buri hantu ebiro ebi, tikirikutangaaza okureeba ngu abantu nibeetenga obusingye oburikukiraho. Kwonka shi obusingye obwa buzima nibushangwa hi? Yesu akagira ati: “Ku muraahamire aha kigambo kyangye, nimuba muri abeegi bangye buzima. Kandi muryamanya amazima, n’amazima garyabahindura ab’obusingye.” (Yohaana 8:31, 32) Obusingye obwo tiburikushushana n’obwo obu abantu barikuba baine amatsiko kutunga baayanga omutegyeki nari gavumenti emwe bakashemba endiijo. Kureka obusingye obu nibuhikira kimwe aha ntangiro y’oburemeezi bw’abantu. Eki Yesu yaabaire naashobororaho n’okukomoororwa kuruga omu buhuuku bw’ekibi. (Yohaana 8:24, 34-36) N’ahabw’ekyo, omuntu ku arikuhinduka omukuratsi wa Yesu Kristo ow’amazima, naagira empindahinduka omu magara ge, agira obugwa-gye!

7. (a) Ni mu muringo ki ogu omuntu arikubaasa kwanga kuba omuhuuku w’ekibi? (b) N’enki eki tushemereire kukora okubaasa kuruga omu buhuuku obwo?

⁷ Eki tikirikumanyisa ngu omu bunaku obu Abakristaayo ab’amazima tibarikuteganisibwa kibi. Obu baahungwire ekibi, nibakirwana nakyo. (Abarooma 7:21-25) Omuntu yaaba buzima naagyendera aha bi Yesu yaayegyeise, naaba atakiri muhuuku w’ekibi. Ekibi nikiba kitakimutegyeka. Tarikwija kugira amagara agatarimu kigyendererwa, haza agarikumureetera omutima ogurikweshinja. Naija kugira omutima ogutarikweshinja omu maisho ga Ruhanga ahabw’okuba naasaasirwa ebibi bye eby’enyima ahabw’okwikiririza omu kitambo kya Kristo. Omuntu naabaasa kugira ekyetengo ky’okukora ekibi. Kwonka ku arikwanga kukora nk’oku ekibi kirikuragiira ahabw’okwijuka enyegyesa za Kristo ez’amazima, naayoreka ngu takitegyekwa kibi.—Abarooma 6:12-17.

8. (a) Ku turikuhinduka Abakristaayo ab’amazima, nitukira ki? (b) Tushemereire kutwariza tuta ab’obushoboorozi abarikutegyeka?

⁸ Teekateeka aha busingye obu twine nk’Abakristaayo. Tukakira okutiina okurikureetwa enyegyesa z’ebishuba, okuba abahuuku b’ekibi n’okutiina nari kwikiririza omu bitariho. Amazima agarikukwata aha mbeera y’abafu n’aha kuzooka gatukomoroire kuruga omu kutiina okufa. Okumanya ngu juba Obukama bwa Ruhanga nibuza kwihaho gavumenti z’abantu abatahikiriire, nikituha amatsiko. (Danieli 2:44; Matayo 6:10) Kwonka, okugira amatsiko ago tikirikumanyisa ngu tugomere ab’obushoboorozi hamwe n’ebiragiro byabo.—Tito 3:1, 2; 1 Petero 2:16, 17.

9. (a) Yehova naatuhwera ata okugira obusingye oburikukirayo obu abantu barikubaasa kutunga ebiro ebi? (b) Nitubaasa tuta kucwamu kurungi?

⁹ Yehova tarikutureka kwezoorera omuringo murungi ogu tushemereire kutwazamu amagara gaitu. Naamanya oku tuhangirwe, ebirikubaasa kutureetera okumarwa kandi n’ebirikubaasa kutugasira ebiro byona. Naamanya ebiteekateeko n’emitwarize ebirikubaasa kushiisha omukago gw’omuntu Nawe hamwe n’ogu omuntu ogwo aine na bataahi be, nangwa n’ekirikubaasa kuzibira ogwo muntu kutaaha omu nsi ensya. Na rukundo, Yehova naatumanyisa ebi byona kurabira omu Baibuli n’omu kibiina kye. (Mako 13:10; Abagalatia 5:19-23; 1 Timoseo 1:12, 13) N’ahabw’ekyo, kiri ahariitwe okukoresa obugabe obu Ruhanga yaatuhaire okucwamu ebi turikwenda kukora. Obutashushana na Adamu, twata omutima aha bi Baibuli erikutugambira, nitwija kucwamu kurungi. Nitwija kworeka ngu okugira omukago murungi na Yehova nikyo kikuru omu magara gaitu.

Okwenda Obusingye obw’Omuringo Ogundi

10. Ni busingye bwa muringo ki obu bamwe aha Bajurizi ba Yehova barikusherura?

¹⁰ Obumwe eminyeeto emwe omu Bajurizi ba Yehova—hamwe n’abandi abakuzire omuribo—nibabaasa kuhurira bayetenga obusingye obw’omuringo ogundi. Nibabaasa kureeba eby’ensi nka birungi, haza oku barikwongyera kubiteekateekaho, nikwo n’ekyetengo kyabo eky’okukora ebintu ebitari by’ekikristaayo ebiijwire omu nsi kirikweyongyera. Abantu nk’abo nibabaasa kuba batarikwenda kukoresa emibazi y’ekitabura bwonko, kusinda nari kukora ebikorwa by’obushambani. Kwonka ahabw’okwenda kukundwa abatari Bakristaayo ab’amazima, nibatandika kukungika nabo. Nibabaasa kutandika kugamba n’okutwaza nkabo.—3 Yohaana 11.

11. Okushendashendwa kushiisha obumwe nikureetwa baahi?

¹¹ Obumwe okushendashendwa kwejumba omu bikorwa ebitari by’ekikristaayo nikuruga aha muntu orikweyeta omuheereza wa Yehova. Kikaba kiri kityo n’omu Bakristaayo abamwe abaabandize, kandi nikibaasa kubaho n’omu bunaku obu. Abantu nk’abo emirundi mingi nibaba nibenda kukora ebintu ebi barikuteekateeka ngu nibiza kubareetera okushemererwa, kwonka ebikorwa ebyo nibihenda ebiragiro bya Ruhanga. Nibahiga n’abandi “kweshemeza,” ‘babaraganisa obusingye kunu obwo bo bari abahuuku b’ekibi.’—2 Petero 2:19.

12. Ni bintu ki ebibi ebirikuruga omu bikorwa ebitarikwikirizana n’ebiragiro bya Ruhanga?

¹² Butoosha ebirikuruga omu busingye obw’omuringo ogwo ni bibi, ahabw’okugira ngu niburugamu okuhenda ebiragiro bya Ruhanga. Nk’eky’okureeberaho, okushambana nikureetera omuntu omutima ogurikweshinja, endwara, okufa, enda z’endaaro, kandi obundi n’okushenyuka kw’amaka. (1 Abakorinso 6:18; 1 Abatesalonika 4:3-8) Okukoresa emibazi y’ekitabura bwonko nikubaasa kurugamu okurahuka kuguubwa kubi, okuremwa kugamba gye, okutahweza gye, oruzengyerera, okwitsyakubi, okwanjukanariokufa. Okukoresa emibazi egyo nikubaasa kuhinduka omuze ogugumire eicwa kandi kureetere omuntu kuba omushuma runkunku okubaasa kwemerezaho omuze gwe. N’okunywa amaarwa maingi nikurugamu ebiri nk’ebyo. (Enfumu 23:29-35) Abo abarikwejumba omu bikorwa nk’ebyo nibabaasa kuteekateeka ngu baine obusingye, kwonka nibaija bakimanya bwanyima ngu bahindukire abahuuku b’ekibi. Ekibi ka n’omutegyeki mubi! Okuteekateeka ahari ekyo hati nikubaasa kuturinda ebintu bibi ebyo.—Abagalatia 6:7, 8.

Ahu Oburemeezi Burikutandikira

13. (a) Ebyetengo ebirikurugamu oburemeezi, emirundi emingi nibitandika bita? (b) Okubaasa kwetegyereza gye ‘ebigombe ebibi,’ n’emiteekateekyere y’oha ei tushemereire kugira? (c) Ku oraabe noogarukamu ebibuuzo ebiri omu kacweka ka 13, yoreka namunonga oku Yehova arikureeba enshonga ezo.

¹³ Teekateeka ahu oburemeezi emirundi emingi burikutandikira. Baibuli neeshoborora eti: “Omuntu weena ayohibwa yaabeihwabeihwa okwetenga kwe, kwamwosyosya. Bwanyima okwetenga okwo, ku kuheza kutwara enda, kuzaara ekibi; n’ekibi ku kikura, kizaara okufa.” (Yakobo 1:14, 15) Ekyetengo kibi nikitandika kita? Nikitandikira omu biteekateeko. Emirundi emingi, eki nikiruga omu kunywana n’abantu abatarikugyendera aha misingye ya Baibuli. Buzima nitumanya ngu tushemereire kwetantara “ekigombe kibi.” (1 Abakorinso 15:33) Kwonka shi ebigombe ebibi nibyo biiha? Yehova we naabigambaho ki? Okuteekateeka munonga aha bibuuzo ebi ahaifo n’okushwijuma ebyahandiikirwe ebyayorekwa kishemereire kutuhwera okuhika aha kuhendera okuhikire.

Eky’okugira ngu abantu abamwe nibareebeka nk’abarikutwaza gye nikimanyisa shi ngu ni barungi b’okunywana? (Okutandika 34:1, 2, 18, 19)

Ebi barikuganiiraho, ka tugire nk’okugaaniizana kwabo, nibyoreka shi ngu tushemereire kuba banywani baabo? (Abaefeso 5:3, 4)

Yehova naahurira ata twacwamu kunywana n’abantu abatarikumukunda? (2 Obusingye 19:1, 2)

Ahabw’enki tushemereire kwegyendesereza twaba nitukora nari nitushomera omu ishomero rimwe n’abantu abatari b’enyikiriza yaitu? (1 Petero 4:3, 4)

Okureeba Tiivi, vidiyo, okukoresa Intaneeti, n’okushoma ebitabo n’empapura z’amakuru n’emwe aha mihanda ey’okunywanamu n’abandi. Omu kukoresa ebintu ebyo tushemereire kwerinda ki? (Enfumu 3:31; Isaaya 8:19; Abaefeso 4:17-19)

Abu turikucwamu kunywana nibooreka Yehova ngu turi bantu ba muringo ki? (Zaaburi 26:1, 4, 5; 97:10)

14. Ni busingye bwa muringo ki obu abo abarikugyendera aha buhabuzi oburi omu Kigambo kya Ruhanga barikwija kutunga?

¹⁴ Turi haihi kutaaha omu nsi ya Ruhanga ensya. Kurabira omu butegyeki bw’Obukama bwa Ruhanga obw’omu iguru, abantu nibaija kujunwa kuruga omu butegyeki bwa Sitaane n’omu busingye bwe obubi. Mporampora, byona ebyareetsirweho ekibi nibiija kwihwaho, abantu bagarukye bagire emibiri n’ebiteekateeko ebihikiriire, tubaase kutunga amagara agatahwaho omuri Paradiso. Ebihangirwe byona nibaija kugira obusingye oburikwikirizana ‘n’omwoyo gwa Yehova.’ (2 Abakorinso 3:17) Nikiba kiri eky’oburyo okufeerwa ebyo byona ahabw’okwanga kugyendera aha buhabuzi oburi omu Kigambo kya Ruhanga hati? Turikukoresa gye obugabe bwaitu bw’Ekikristaayo, twena ka tworekye ngu buzima nitwenda “obusingye bw’abaana ba Ruhanga obw’ekitiinisa.”—Abarooma 8:21.

Eby’Okweijutsya

• Abantu ab’okubanza bakaba baine busingye bwa muringo ki? Obusingye obwo nibugyeragyeranisibwa buta n’obusingye obu abantu baine hati?

• Abakristaayo ab’amazima baine obusingye bwa muringo ki? Obu nibutaana buta n’eki ensi yo erikweta obusingye?

• Ahabw’enki nikikuru okwerinda ebigombe bibi? Obutashushana na Adamu, ni kucwamu kw’oha oku tushemereire kukuratira omu kucwamu ekirungi n’ekibi?

[Ekishushani ekiri aha rupapura 46]

Ekigambo kya Ruhanga nikihabura kiti: “Mutabeihwabeihwa; ekigombe kibi kishiisha emicwe mirungi”