Eshuura y’Ikumi na Ina
Yehova Naayebembera ata Ekibiina Kye?
1. Baibuli netumanyisa ki aha bikwatiraine n’ekibiina kya Yehova, kandi ahabw’enki ebi erikutumanyisa nibikuru ahariitwe?
RUHANGA aine ekibiina? Ebyahandiikirwe nibitugira ngu akiine. Omu Kigambo kye, naatworekaho kakye ekibiina kye eky’omu iguru. (Ezekieli 1:1, 4-14; Danieli 7:9, 10, 13, 14) N’obu turaabe tutarikubaasa kureeba ekibiina eki, nikikora kihango omu kuramya okw’amazima. (2 Abagabe 6:15-17) Hariho n’ekicweka ky’ekibiina kye ekirikureebeka ekiri omu nsi. Baibuli neetuhwera kukyetegyereza, n’okumanya oku Yehova arikukyebembera.
Okwetegyereza Ekicweka Ekirikureebeka
2. Ni kibiina ki ekisya eki Ruhanga yaataireho?
2 Okumara emyaka 1,545, eihanga rya Israeli rikaba riri ekibiina kya Ruhanga. (Ebyakozirwe 7:38) Kwonka Abaisraeli bakanga kworobera ebiragiro bya Ruhanga kandi baayanga n’Omwana we. Ekyarugiremu, Yehova akanga ekibiina ekyo kandi yaakitsigaho. Yesu akagambira ati Abayudaaya: “Reeba, enju yaanyu etsigirweho n’omushaka.” (Matayo 23:38) Bwanyima, Ruhanga akataho ekibiina ekisya eki yaakozire nakyo endagaano ensya. Ekibiina eki kikaba nikiija kubamu abantu 144,000 abatoorainwe Ruhanga kuba hamwe n’Omwana we omu iguru.—Okushuuruurwa 14:1-4.
3. N’enki ekyabaireho aha Pentekoote omu gwa 33 C.E. nk’obuhame ngu Ruhanga akaba atandikire kukoresa ekibiina kisya?
3 Ab’okubanza omu kibiina ekyo ekisya bakashukwaho omwoyo orikwera aha Pentekoote omu gwa 33 C.E. Aha bikwatiraine n’ekyabaireho ekyo, nitushoma tuti: “Eizooba rya Pentekoote obu ryahika, boona bakaba bateeraniire omu mwanya gumwe. Ahonaaho, okuhoorera kwaruga omu iguru, nk’omuyaga oku guhoorera n’amaani, kwaijuriza kimwe enju omu baabaire bashutami. Haareebeka endimi nk’ez’omuriro, zeebaganiisemu, nizaakira ahari buri omwe omuribo. Boona baijura [o]mwoyo [o]rikwera.” (Ebyakozirwe 2:1-4) Ekyo kikaba obuhame ngu abo nibo bantu abu Ruhanga yaabaire naaza kukoresa okuhikiiriza ekigyendererwa kye obwo barikwebemberwa Yesu Kristo omu iguru.
4. Ni baahi abari omu kibiina kya Yehova eky’omu nsi?
4 Omu bunaku obu, bakye aha 144,000 nibo bakiri omu nsi. Kwonka omu kuhikiiriza obunabi bwa Baibuli, “omutwe muhango gw’abantu” ‘ogw’entaama ezindi,’ abarikuhika omu bukaikuru nabo bari hamwe n’entsigarira z’abaashukirweho amajuta. Yesu, Omuriisa Omurungi ateeraine entaama ezi ezindi n’entsigarira kugira ngu boona babe obusyo bumwe obwine Omuriisa omwe. (Okushuuruurwa 7:9; Yohaana 10:11, 16) Boona hamwe nibakora ekicweka eky’ekibiina kya Yehova ekirikureebeka.
Ekibiina Eki Nikyebemberwa Ruhanga
5. N’oha orikwebembera ekibiina kya Ruhanga, kandi nakyebembera ata?
5 Ebigambo “ekibiina kya Ruhanga ohuriire” nibyoreka gye orikukyebembera. Ekibiina eki nikyebemberwa Ruhanga. Yehova naaha abantu be obuhabuzi kurabira omuri Yesu, ogwo Ou yaatooraine kuba Omutwe gw’ekibiina Kye otarikureebwa, kandi n’okurabira omu Kigambo Kye, Baibuli.—1 Timoseo 3:14, 15, NW; Abaefeso 1:22, 23; 2 Timoseo 3:16, 17.
6. (a) Omu kyasha ky’okubanza, n’enki ekyayorekire ngu ekibiina kikaba nikitunga obuhabuzi kuruga omu iguru? (b) N’enki ekirikworeka ngu Yesu niwe akiri Omutwe gw’ekibiina?
6 Oku Ruhanga arikwebembera ekibiina ekyo kukareebeka gye aha izooba rya Pentekoote. (Ebyakozirwe 2:14-18, 32, 33) Kukareebeka gye obu maraika wa Yehova yaayorekyerera okubuurira amakuru marungi omuri Afrika, obu eiraka rya Yesu ryahurirwa aha kuhindurwa kwa Saulo owa Taruso, hamwe n’obu Petero yaatandika omurimo gw’okubuurira omu Banyamahanga. (Ebyakozirwe 8:26, 27; 9:3-7; 10:9-16, 19-22) Kwonka bwanyima, tihaine gandi maraka agaagarukire kuhurirwa kuruga omu iguru, tihariho baamaraika abaagarukire kureebwa, kandi n’eby’okutangaaza bikahwaho. Kwonka Yesu akaba yaaraganiise ati: “Reeba, ndi hamwe naimwe ebiro byona okuhitsya obu ensi egi erihwaho.” (Matayo 28:20; 1 Abakorinso 13:8) Omu bunaku obu, Abajurizi ba Yehova nibakimanya ngu baine obuhwezi bwa Yesu. Kuri kitari ekyo, okubuurira amakuru g’Obukama hariho okuhakanisibwa kw’amaani tikyakubaasikire.
7. (a) Ni baahi abarikwetwa ‘omwambari ow’okwesigwa kandi ow’obwengye,’ kandi n’ahabw’enki? (b) ‘Omwambari’ ogwo akaheebwa murimo ki?
7 Ari haihi kufa, Yesu akagambira abeegi be ebirikukwata aha ‘mwambari omwesigwa kandi ow’obwengye’ ou yaabaire naija kukwatsa obujunaanizibwa bw’omutaano. ‘Omwambari’ ogwo akaba naija kuba ariho Mukama arikuza omu iguru kandi akaba naija kuba akirikukora n’amaani aha kugaruka kwa Kristo omu Bukama okutarikureebwa. Okushoborora nk’okwo buzima kukaba kutarikukwata aha muntu omwe, kureka aha kibiina kya Kristo eky’abaashukirweho amajuta. Ahabw’okugira ngu akagura ekibiina ekyo n’eshagama ye, Yesu akakyeta ‘omwambari’ we. Akaha ab’ekibiina ekyo omurimo gw’okuhindura abantu abeegi ‘n’okubagaburira eby’okurya eby’omwoyo omu bwire obuhikire.’—Matayo 24:45-47; 28:19; Isaaya 43:10; Luka 12:42; 1 Petero 4:10.
8. (a) Ab’ekibiina ky’omwambari baine bujunaanizibwa ki omu bunaku obu? (b) Ahabw’enki oku turikutwara obuhabuzi obu Ruhanga arikutuha kurabira omu mwambari kuri kukuru?
8 Obu ab’ekibiina ekyo baashangirwe nibakora n’obwesigwa omurimo gwa Mukama waabo aha kugaruka kwe omuri 1914, hariho obuhame ngu bakongyerwa obundi bujunaanizibwa omuri 1919. Okuruga obwo n’okuhitsya hati, okubuurira aha Bukama kutwire nikugyenda omu maisho omu nsi yoona, kandi omutwe muhango gw’abaramya ba Yehova bariyo nibateeranirwa hamwe ngu babaase kuraba omu kubonabona kwingi. (Matayo 24:14, 21, 22; Okushuuruurwa 7:9, 10) Abo nabo nibetenga eby’okurya eby’omwoyo, haza nibibaheebwa ab’ekibiina ky’omwambari ogu. N’ahabw’ekyo, okubaasa kushemeza Yehova, nitwetenga kwikiriza obuhabuzi obu arikutuha kurabira omu mwambari ogu kandi tukabugyenderaho.
9, 10. (a) Omu kyasha ky’okubanza, ni ntebeekanisa ki eyaabaire eriho ey’okuha obuhabuzi aha kubuurira amakuru marungi n’okugarukamu ebibuuzo ebirikukwata aha nyegyesa? (b) Ni baahi abarikureeberera omurimo gw’abantu ba Yehova?
9 Obumwe, nihabaho ebibuuzo ebirikukwata aha nyegyesa n’entebeekanisa eine kukuratirwa. N’enki ekirikukorwa? Ebyakozirwe eshuura 15 neegamba aha ku enshonga erikukwata aha Banyamahanga abaikiriize yaashoboroirwe. Enshonga egyo bakagitwarira entumwa n’ab’eishe-emwe abakuru omuri Yerusaalemu abaabaire bari aha kakiiko akareeberezi. Abashaija abo nabo bakaba nibabaasa kushobya, kwonka Ruhanga akabakoresa. Bakashwijuma ebyahandiikirwe ebirikukwata aha nshonga egyo kandi baareebera n’aha buhame obwabaire nibworeka obuhwezi bw’omwoyo wa Ruhanga omu kubuurira Abanyamahanga. Batyo baabaasa kucwamu. Ruhanga akaha omugisha entebeekanisa egyo. (Ebyakozirwe 15:1-29; 16:4, 5) Bamwe kuruga omu kakiiko ako bakooherezibwa kubuurira ahandi Obukama.
10 Omu bunaku obu, Akakiiko Akareeberezi ak’ekibiina kya Yehova eky’omu nsi karimu ab’eishe-emwe abaashukirweho amajuta kuruga omu mahanga maingi kandi nikashangwa aha ofiisi ey’Abajurizi ba Yehova enkuru. Barikwebemberwa Yesu Kristo, abari aha Kakiiko Akareeberezi nibongyera omu maisho okuramya okw’amazima omuri buri nsi, bareeberera emirimo y’Abajurizi ba Yehova ey’okubuurira, omu bukumi n’obukumi bw’ebibiina. Abo abari aha Kakiiko Akareeberezi nibaikirizana n’ebigambo ebi entumwa Paulo yaahandiikiire Abakristaayo bataahi be: “Ti habw’okubategyeka omu kwikiriza kwanyu, kureka nitukorera hamwe naimwe ahabw’okubareetera okushemererwa; ahabw’okuba mwemereziibwe okwikiriza [kwanyu].”—2 Abakorinso 1:24.
11. (a) Abareeberezi n’abaheereza nibatooranwa bata? (b) Ahabw’enki tushemereire kukwatanisa n’abo abatoorainwe?
11 Abajurizi ba Yehova omu nsi yoona nibahanga Akakiiko Akareeberezi amaisho okutoorana ab’eishe-emwe abahikire. Kandi n’abo abarikutooranwa nibaikirizibwa kutoorana abareeberezi hamwe n’abaheereza okureeberera ebibiina. Ebi ab’eishe-emwe abo bashemereire kuhikiiriza batakatoorainwe nibyorekwa omu Baibuli, kwonka tibirikubetengyesa kuba abantu abatarikushobyaho na kakye. Abareeberezi abarikushemba abo ab’okutooranwa hamwe n’abo abarikutoorana baine obujunaanizibwa buhango omu maisho ga Ruhanga. (1 Timoseo 3:1-10, 12, 13; Tito 1:5-9) N’ahabw’ekyo, nibashaba Ruhanga obuhwezi bw’omwoyo we, kandi basherura n’obuhabuzi omu Kigambo kye. (Ebyakozirwe 6:2-4, 6; 14:23) Ka tworekye okusiima kwaitu ‘ahabw’abashaija abari nk’ebiconco’ abarikutuhwera twena kuhika aha kugira “obumwe bw’okwikiriza.”—Abaefeso 4:8, 11-16.
12. Yehova naakoresa ata abakazi omu ntebeekanisa ye?
12 Ebyahandiikirwe nibigira ngu obureeberezi omu kibiina n’obw’abashaija. Eki tikirikumanyisa ngu abakazi nibatwarwa nk’ab’ahansi, ahakuba bamwe aharibo n’abahunguzi b’Obukama bw’omu iguru, kandi nibakora munonga omu murimo gw’okubuurira. (Zaaburi 68:11) Ekindi, abakazi nibongyera kuhaisa ekibiina eiziina rirungi ku barikuguma nibahikiiriza obujunaanizibwa bwabo. (Tito 2:3-5) Kwonka okwegyesa omu kibiina n’obujunaanizibwa bw’abashaija abatooraniirwe ekyo.—1 Timoseo 2:12, 13.
13. (a) Baibuli neyehanangiriza abareeberezi kutwara bata obujunaanizibwa bwabo? (b) Twena twine omugisha gw’okukora ki?
13 Omu nsi, omuntu oine omwanya gw’ekitiinisa naatwarwa nk’ow’ahaiguru, kwonka omu kibiina kya Ruhanga ekirikugyenderwaho n’eki: ‘Orikwecureeza munonga omuriimwe niwe mukuru.’ (Luka 9:46-48; 22:24-26) Ebyahandiikirwe nibyehanangiriza abareeberezi okwerinda kutegyekyesa eikama obusyo bwa Ruhanga obu baakwatsiibwe, kureka bo okuba eky’okureeberaho aharibwo. (1 Petero 5:2, 3) Abajurizi ba Yehova boona abashaija n’abakazi baine omugisha gw’okujwekyera Omutegyeki wa byona, okugamba omu iziina rye n’okubuurira abantu boona aha Bukama bwe.
14. Orikwejunisa ebyahandiikirwe ebyayorekwa, garukamu ebibuuzo ebiri aha muheru gw’akacweka aka.
14 Buri omwe ashemereire kwebuuza: ‘Buzima ninsiima oku Yehova arikwebembera ekibiina kye? Emiteekateekyere, emigambire hamwe n’ebikorwa byangye nibyoreka ekyo?’ Okucumitiriza aha birikukurataho nikiza kuhwera buri omwe omuriitwe kweshwijuma.
Ku ndaabe buzima ninyorobera Kristo nk’Omutwe gw’ekibiina, n’enki eki nshemereire kuba ninkora nk’oku ebyahandiikirwe ebi ebirikukurataho birikworeka? (Matayo 24:14; 28:19, 20; Yohaana 13:34, 35)
Ku ndikwikiriza eby’omwoyo ebirikutuheebwa kurabira omu mwambari n’Akakiiko kaabo Akareeberezi, n’oha ou ndikuba nimpa ekitiinisa? (Luka 10:16)
Ab’omu kibiina boona namunonga abareeberezi, bashemereire kutwarizana bata? (Abarooma 12:10)
15. (a) Oku turikutwara ekibiina kya Yehova eky’omu nsi nikworeka ki? (b) Nitubaasa kworeka tuta ngu Sitaane n’omubeihi, tutyo tukashemeza Yehova?
15 Yehova naatuha obuhabuzi arikurabira omu kibiina kye ekirikwebemberwa Kristo. Oku turikutwara entebeekanisa egi nikworeka orubaju oru turiho omu nshonga y’obutegyeki. (Abaheburaayo 13:17) Sitaane naagira ngu okwefaho nikyo kikuru munonga ahariitwe. Kwonka ku turikuheereza nk’oku kirikwetengyesa, kandi tuketantara ebintu ebirikutuhaisa ekitiinisa ekitatushemereire, nitworeka ngu Sitaane n’omubeihi. Ku turikukunda kandi tukaha abaine obwebembezi ekitiinisa, kwonka tukanga ‘kuha abantu ekitiinisa ahabw’okugira ngu haine eki turikubendamu,’ nitushemeza Yehova. (Yuda 16; Abaheburaayo 13:7) Ku turikuhamira aha kibiina kya Yehova, nitworeka ngu Yehova niwe Ruhanga waitu kandi ngu twine obumwe omu kumuramya.—1 Abakorinso 15:58.
Eby’Okweijutsya
• Ekibiina kya Yehova eky’omu nsi kirimu baahi, kandi kiine murimo ki?
• N’oha otoorainwe kwebembera ekibiina, kandi naarabira omuri baahi okutuha obuhabuzi?
• Ni miteekateekyere ki emirungi ei tushemereire kugira ahari abo ab’omu kibiina kya Yehova?
[Ekishushani ekiri aha rupapura 133]
Yehova naatuha obuhabuzi kurabira omu kibiina kye ekirikwebemberwa Kristo