Eshuura y’Ikumi na Mwenda
Guma Noobuurira Ekigambo kya Ruhanga n’Obumanzi
1. (a) Ni makuru ki amarungi agu abeegi ba Yesu baabuuriire, kwonka Abayudaaya abamwe bakabatwariza bata? (b) Ni bibuuzo ki ebi turikubaasa kwebuuza?
HAHINGWIREHO emyaka nka 2,000 okwiha obu Yesu Kristo, Omwana wa Ruhanga yaashukwaho amajuta nk’oriba Omugabe w’ensi yoona. Abazigu ba Yesu abanyadiini, nibo baatumire Yesu yaitwa kwonka Yehova akamuzoora. Amagara agatahwaho hati gakaba nigabaasika kurabira omuri Yesu. Kwonka abeegi ba Yesu bakahiigansibwa ku baabuuriire amakuru marungi aga. Bamwe aharibo bakateebwa omu bihome, baateerwa kibooko kandi baaragiirwa kurekyera aho kugamba ahari Yesu. (Ebyakozirwe 4:1-3, 17; 5:17, 18, 40) Bakaba nibaza kukora ki? Iwe okaakozire ki? Okaagumiizemu noobuurira n’obumanzi?
2. (a) Ni makuru ki amarungi agarikwetengwa kubuurirwa omu bunaku obu? (b) N’oha oine obujunaanizibwa bw’okubuurira ago makuru marungi?
2 Omu mwaka gwa 1914, Yesu Kristo Omugabe w’Obukama bwa Ruhanga, akeemekwa omu iguru kutegyeka ‘ahagati y’abazigu be.’ (Zaaburi 110:2) Ekyakuratsireho, Sitaane na baadaimoni be bakanagwa aha nsi. (Okushuuruurwa 12:1-5, 7-12) Ebiro by’emperu y’obusingye obu obubi bikatandika obwo. Ebiro ebi ku birahweyo, Ruhanga naaza kucwekyereza obusingye bwa Sitaane bwona. (Danieli 2:44; Matayo 24:21) Abarikira baryaba baine amatsiko g’okutunga amagara agatahwaho omu nsi erihindurwa paradiso. Ku oraabe waikiriize aga makuru marungi, nooza kugira ekihika ky’okugabuurira abandi. (Matayo 24:14) Kwonka shi nibaija kugaakiira?
3. (a) Abantu nibatwara bata amakuru g’Obukama? (b) Ni kibuuzo ki eki tushemereire kwebuuza?
3 Ku orikubuurira abantu amakuru g’Obukama, abamwe nibabaasa kugakunda, kwonka abaingi nibaija kuganga. (Matayo 24:37-39) Abamwe nibabaasa kukujuma nari bakuhiiganise. Yesu akagira ngu okuhiiganisibwa nikubaasa kuruga omu banyabuzaare baawe. (Luka 21:16-19) Noobaasa kuhiiganisibwa ab’orikukora nabo nari ab’orikushoma nabo. Omu mahanga agamwe, gavumenti nizizibira Abajurizi ba Yehova kubuurira. Ku waakuhikwaho okuhiiganisibwa nk’okwo, okaagumizamu noobuurira ekigambo kya Ruhanga n’obumanzi kandi oguma ‘ohamire omu kwikiriza’?—1 Abakorinso 16:13.
Tutarikwesiga Amaani Gaitu
4. (a) Okubaasa kuhamya ngu turi abaheereza ba Yehova abeesigwa, n’enki eki tushemereire kukora? (b) Ahabw’enki enteerane z’Ekikristaayo ni nkuru munonga?
4 Ekintu kikuru ekirikubaasa kutuhwera kuba abaheereza ba Yehova abeesigwa, n’okukoresa eby’omwoyo ebi arikutuha. Kimwe ahari ebi n’enteerane z’ekibiina. Ebyahandiikirwe nibitwehanangiriza okutoosha mu nteerane z’ekibiina. (Abaheburaayo 10:23-25) Abo abakiri abeesigwa ahari Yehova nibafayo munonga kuba hamwe n’abaramya bataahi baabo omu nteerane. Omu nteerane ezi, nitweyongyera kumanya Ebyahandiikirwe. Kandi nitweyongyera kwetegyereza gye amazima, n’oku twakubaasa kugagyenderaho. Nitweyongyera kugira obumwe n’ab’eishe-emwe bataahi baitu omu kuramya kandi kitubaasisa kumariirira kukora ebi Ruhanga akunda. Omwoyo wa Yehova naatuha obuhabuzi kurabira omu kibiina, kandi kurabira omu mwoyo we, Yesu ari naitwe.—Matayo 18:20; Okushuuruurwa 3:6.
5. Abajurizi ba Yehova ku barikuzibirwa kubuurira, nibakora ki aha bikwatiraine n’enteerane?
5 Nooza omu nteerane zoona kandi ogyendera aha bi orikwegayo? Obumwe, Abajurizi ba Yehova ku barikuzibirwa kubuurira, nikiba nikyetengyesa okugira enteerane z’abantu bakye omu maka g’abantu. Emyanya n’obwire bw’enteerane ezi nibibaasa kuguma nibihindahiduka, haza nikibaasa kutoorobera bamwe ahabw’okugira ngu ezimwe nizibaho nyekiro obwire bwagyenzire. Kwonka n’obu kirikuba kigumire kandi kiri eky’akabi, ab’eishe-emwe abeesigwa nibataho agaabo goona kubaho omuri buri ruteerane.
6. Nitworeka tuta ngu nitwesiga Yehova, kandi eki nikituhwera kita kuguma nitubuurira n’obumanzi?
6 Nitwega kwesiga Yehova butoosha twamushaba twihire aha mutima, turikumanya ngu nitwetenga obuhwezi bwe. Iwe nookora ekyo? Omu buheereza bwe obw’omu nsi, Yesu akaba ashaba obutoosha. (Luka 3:21; 6:12, 13; 22:39-44) Omu kiro kyasheeshire naahanikwa, Yesu akeehanangiriza abeegi be ati: “Mureebe mushabe, murekye kugwa omu kwohibwa.” (Mako 14:38) Abantu ku barikwanga kwikiriza amazima g’Obukama, nitubaasa kuhurira twahwamu amaani omu kubuurira kwaitu. Abantu ku barikutushungisa nari bakatuhiiganisa, nitubaasa kuhurira twayenda kurekyera aho kubuurira ngu tubaase kwetantara oburemeezi. Kwonka buzima twashaba Yehova kutuha omwoyo orikwera kutuhwera kuguma nitubuurira n’obumanzi, titurikwija kwikiriza ebyo kutumara amaani.—Luka 11:13; Abaefeso 6:18-20.
Oku Baabuuriire n’Obumanzi
7. (a) Ahabw’enki ebyahandiikirwe ebiri omu kitabo kya Ebyakozirwe birikutukwataho twena? (b) Garukamu ebibuuzo ebyayorekwa aha muheru gw’akacweka aka, oyorekye oku ebiri omu byahandiikirwe ebyo birikubaasa kutugasira.
7 Ebyahandiikirwe ebiri omu kitabo kya Ebyakozirwe nibitukwataho twena. Nibitugambira oku entumwa hamwe n’abeegi abaabandize—abantu abaabaire bari nkaitwe—baasingwire kandi bakagumizamu bari abajurizi ba Yehova abeesigwa kandi amamanzi. Ka tushwijume bimwe aha byahandiikirwe ebyo turikukoresa ebibuuzo ebyayorekwa. Omu kubishwijuma teekateeka aha ku ebi orikushoma birikubaasa kukugasira iwe nk’omuntu.
Entumwa shi bakaba bari abashaija abaabaire beegire munonga? Bakaba bari abantu abaabaire batatiina, n’obu haakubaho ki? (Yohaana 18:17, 25-27; 20:19; Ebyakozirwe 4:13)
N’enki ekyahwereire Petero kugamba n’obumanzi omu ishengyero ry’Abayudaaya eryacwereire Omwana wa Ruhanga orw’okufa? (Matayo 10:19, 20; Ebyakozirwe 4:8)
N’enki eki entumwa zaabaire nizikora omu saabiiti nkye batakaresirwe omu ishengyero? (Ebyakozirwe 1:14; 2:1, 42)
Abategyeki ku baaragiire entumwa kurekyera aho kubuurira omu iziina rya Yesu, Petero na Yohaana bakagarukamu bata? (Ebyakozirwe 4:19, 20)
N’oha ou abeegi baashabire obuhwezi ku baarekwirwe? Bakashaba ngu okuhiiganisibwa kurekyere aho, nari bakashaba ekindi? (Ebyakozirwe 4:24-31)
Yehova akahwera ata entumwa obu abaabaire nibahakanisa omurimo gw’okubuurira baateeraho kugwemereza? (Ebyakozirwe 5:17-20)
Entumwa zikooreka zita ngu zikeetegyereza enshonga ahabw’enki zaacungwirwe? (Ebyakozirwe 5:21, 41, 42)
N’obu abeegi baingi baraabe baataataine ahabw’okuhiiganisibwa, n’enki eki baagumiizemu nibakora? (Ebyakozirwe 8:3, 4; 11:19-21)
8. Okubuurira kw’abeegi b’okubanza kukarugamu ki, kandi itwe tukaija kuba omu murimo ogwo tuta?
8 Omurimo gw’okubuurira gukaba gutari gwa busha. Abeegi nka 3,000 bakabatizibwa ahari Pentekoote ey’omu gwa 33 C.E. ‘Abaikiriize baingi, abashaija n’abakazi, bakeyongyera munonga kukanya.’ (Ebyakozirwe 2:41; 4:4; 5:14) Obwire ku bwahingwireho, na Saulo owa Taruso owaabaire naahiiganisiza kimwe abantu ba Ruhanga akahinduka Omukristaayo kandi n’obumanzi, yaatandika kubuurira amazima. Akaija kwetwa entumwa Paulo. (Abagalatia 1:22-24) Omurimo ogwatandikire omu kyasha ky’okubanza tigukemerezibwaga. Nigweyongyera omu maisho na munonga omu biro ebi eby’emperu kandi guhikire omu bicweka by’ensi byona. Twine omugisha gw’okwejumba omu murimo ogwo, kandi omu kugukora, nitubaasa kugira eki twayegyera aha ky’okureeberaho ky’abajurizi abeesigwa aba ira.
9. (a) Paulo akaba abuurira nkahi na nkahi? (b) Ni miringo ki ei orikubuuriramu abandi amakuru marungi?
9 Paulo akakora ki ku yaayegire amazima agarikukwata ahari Yesu Kristo? “Ahonaaho yaatandika kugamba [ahari] Yesu . . . ku ari Omwana wa Ruhanga.” (Ebyakozirwe 9:20) Akasiima embabazi ezi Ruhanga yaamworekire, kandi yaayetegyereza ngu buri omwe akaba naayetenga kutunga amakuru marungi agu yaatungire. Paulo akaba ari Omuyudaaya kandi nk’oku omucwe gwabo omu biro ebyo gwabaire guri, akaba aza omuri za sinagogi kubuurira. Akaba abuurira enju aha ndiijo kandi abuurira n’abu yaabaire ashanga omu katare. Kandi akaba aikiriza kuza omu bicweka bisya kubuurirayo amakuru marungi.—Ebyakozirwe 17:17; 20:20; Abarooma 15:23, 24.
10. (a) Paulo akooreka ata ngu n’obu araabe yaabaire ari emanzi akaba akoresa obwengye omu kubuurira kwe? (b) Nitubaasa kworeka tuta emitwarize nk’eya Paulo twaba nitubuurira abanyabuzaare, abu turikukora nabo nari abu turikushoma nabo?
10 Paulo akaba ari emanzi kandi omunyabwengye, nk’oku naitwe tushemereire kuba. Abayudaaya akaba aganiira nabo aha bi Ruhanga yaaraganiise baishenkurubo. Abagriika akaba ababuurira arikwihirira aha bintu ebi baabaire nibamanya. Omu kubuurira, obumwe akaba akoresa ebyamubaireho obu yaabaire naayega amazima. Akagira ati: ‘Ebyo byona mbikora ahabw’engiri, kugira ngu mbaase kugigambira abandi.’—1 Abakorinso 9:20-23, NW; Ebyakozirwe 22:3-21.
11. (a) Paulo akaba akora ki okwetantara abaabaire nibamuhiiganisa? (b) Ni ryari obu turikubaasa kutooreza Paulo, kandi nitumutooreza tuta? (c) Ni twiha nkahi amaani g’okugumizamu nitubuurira n’obumanzi?
11 Paulo ku yaabaire aremesibwa kubuurira omu kicweka kimwe ahabw’okuhiiganisibwa, akaba aza kubuurira ahandi omu mwanya gw’okuguma naabugana abaabaire nibamuhiiganisa. (Ebyakozirwe 14:5-7; 18:5-7; Abarooma 12:18) Kwonka akaba atakwatwa nshoni kubuurira abandi amakuru marungi. (Abarooma 1:16) Paulo “akagira obumanzi omuri Ruhanga waitu” kugumizamu naabuurira n’obu araabe yaabaire aguubwa kubi ahabw’okubonabonesibwa abaabaire bamuhiiganisa. Akagira ati: “Mukama waitu akanyemerera haihi, yangumya, ngu mbone kugambira kimwe ekigambo kya Ruhanga.” (1 Abatesalonika 2:2; 2 Timoseo 4:17) Yesu, Omutwe gw’ekibiina Ekikristaayo, naagumizamu kutuha amaani agu turikwetenga kukora omurimo ogu yaagizire ngu n’ogw’okukorwa omu bunaku obu.—Mako 13:10.
12. N’enki ekirikworeka ngu Abakristaayo baine obumanzi, kandi n’enki ekirikubabaasisa kugira obumanzi obwo?
12 Twine enshonga nungi ahabw’enki tushemereire kugumizamu nitubuurira ekigambo kya Ruhanga n’obumanzi, nk’oku Yesu n’abandi baheereza ba Ruhanga baakozire omu kyasha ky’okubanza. Kwonka eki tikirikumanyisa ngu tushemereire kutwarira abantu boona aha rurengo rumwe nari ngu twine kugyema abantu amakuru g’obukama. Kandi titurikuhwa maani ahabw’okugira ngu abantu nibanga kutuhurikiza n’obu kwakuba okurekyera aho ahabw’okuhakanisibwa. Nka Yesu, nitworeka abantu ngu Obukama bwa Ruhanga niyo gavumenti ehikire kutegyeka ensi yoona. Nitubuurira n’obwesigye ahabw’okuba nitujwekyera Yehova Omutegyeki wa Byona, kandi n’amakuru agu turikubuurira ti gaitu, kureka n’age. Rukundo ei twiniire Yehova niyo nshonga nkuru eshemereire kutuhiga kumuhimbisa.—Abafilipi 1:27, 28; 1 Abatesalonika 2:13.
Eby’Okweijutsya
• Ahabw’enki nikikuru okubuurira buri omwe amakuru marungi, kwonka shi abantu nibabaasa kugatwara bata?
• Nitubaasa kworeka tuta ngu titurikwesiga maani gaitu omu kuhereza Yehova?
• Nitwega ki omu kitabo kya Ebyakozirwe?
[Ekishushani ekiri aha rupapura 173]
Nka ira, Abaheereza ba Yehova ebiro ebi nibabuurira ekigambo kye n’obumanzi