Eshuura Ya Mukaaga

Hwera Omwana Waawe Ori omu Mushogoyo Kusingura

1, 2. Ni buremeezi ki kandi ni birungi ki ebirikubaasa kuba omu myaka y’omushogoyo?

OKUGIRA omu ka omwana ori omu mushogoyo tikurikushushana n’okugira omwana w’emyaka etaano nari ikumi. Emyaka y’omushogoyo erimu oburemeezi, kwonka neebaasa n’okubamu ebirungi n’okushemererwa. Eky’okureeberaho nk’ekya Yosefu, Daudi, Yosia, na Timoseo nibyoreka ngu eminyeeto nibabaasa kukora ebintu birungi kandi bagire omukago murungi na Yehova. (Okutandika 37:2-11; 1 Samueli 16:11-13; 2 Abagabe 22:3-7; Ebyakozirwe 16:1, 2) Abaingi abari omu myaka y’omushogoyo ebiro ebi nibakora nikyo kimwe. Noobaasa kuba oine abu orikumanya aharibo.

² Kwonka abamwe, emyaka y’omushogoyo neebateganisa. Abari omu myaka nk’egyo nibakira kugira ebiteekateeko ebirikubateganisa. Aboojo n’abaishiki nibakira kwenda kwetegyeka, kandi nibabaasa kwanga ebiragiro ebi abazaire baabo barikuba babatereireho. Kwonka, eminyeeto nk’egyo nibaba bataine bingi ebi barikumanya kandi abazaire baabo nibaba baine kubahwera na rukundo n’okugumisiriza. Buzima, emyaka y’omushogoyo neebaasa kubamu okushemererwa kwonka neebaasa kubamu n’okushoberwa—aha bazaire n’aha minyeeto. Eminyeeto nibabaasa kuhwerwa bata baaba bari omu myaka egyo?

3. Ni mu muringo ki ogu abazaire barikubaasa kuhweramu abaana baabo abari omu mushogoyo kugira obusinguzi?

³ Abazaire abarikukuratira obuhabuzi bw’omu Baibuli nibabaasa kuhwera abaana baabo abari omu mushogoyo kugira obusinguzi, n’okwija kuba ab’obujunaanizibwa baakura. Omu mahanga goona hamwe n’obwire bwona, abazaire hamwe n’eminyeeto abagyendeire aha misingye ya Baibuli babaasize kugira obusinguzi.—Zaaburi 119:1.

OKUGAANIIRA MUTARIKUSHEREKANA

4. Ahabw’enki okugaaniira n’abaana ni kukuru na munonga omu myaka yaabo y’omushogoyo?

⁴ Baibuli neegira eti: “Ahatari kuhanuura enaama zifa busha.” (Enfumu 15:22) Okuhanuura n’abaana ku kuraabe kwabaire nikwetengyesa bakiri bato, ni kikuru munonga baaba bari omu mushogoyo—obu eminyeeto barikukira kuba bari n’abu barikushoma nabo nari n’abanywani baabo abandi. Abazaire baaba batarikugaaniira n’abaana baabo—abaana abo nibabaasa kuba nk’abatari b’omu ka egyo. Mbwenu niki ekirikubaasa kukorwa okugaaniira kubaasa kuguma nikubaho?

5. Abaana abari omu myaka y’omushogoyo nibahigwa kutwara bata okugaaniira n’abazaire baabo?

⁵ Abazaire hamwe n’abaana baabo eminyeeto bashemereire kugaaniira hamwe. N’eky’amazima, nikibaasa kutoorobera abaana abari omu mushogoyo kugaaniira n’abazaire baabo nk’oku kyabaire kiri obu baabaire bakiri bato. Kwonka, mwijukye ngu “ahu abahabuzi b’obwengye batari, abantu bagwa; kwonka ahu abahi b’obwengye bari, habaho obusingye.” (Enfumu 11:14) Ebigambo ebi nibikwata ahari boona, abato n’abakuru. Eminyeeto abarikumanya ekyo nibeetegyereza ngu nibakyetenga obuhabuzi, obu barikuba boorekyeire enshonga zigumire kukira obu baabaire bari bato. Bashemereire kumanya ngu abazaire baabo abari omu kwikiriza nibabaasa kubahabura gye ahabw’okuba barabire omu bintu bingi kandi boorekire ngu nibabafaho okumara emyaka mingi. N’ahabw’ekyo omu myaka yaabo egi, eminyeeto abaine obwengye tibarikwija kwanga obuhabuzi bw’abazaire baabo.

6. Ni miteekateekyere ki ei abazaire abaine obwengye na rukundo barikwija kworeka omu kugaaniira n’abaana baabo?

⁶ Abazaire nibaija kuteeraho munonga kuha obwire abaana baabo, abaana abo baaba nibenda kugaaniira nabo. Ku oraabe ori omuzaire, yoreka ngu abaana baawe obainiire obwire bw’okugaaniira nabo. Ekyo nikibaasa kutooroba. Baibuli neegira ngu hariho “obunaku bw’okuhunama n’obunaku bw’okugamba.” (Omubuurizi 3:7) Omwana waawe yaaba naayenda kugamba naiwe, nibubaasa kuba obwire bwawe kuhunama. Obundi noobaasa kuba waaba nooyenda kukoresa obwire obwo kweshomesa Baibuli, kuhuumuraho nari kugira ebi waakora aha ka. Kwonka, omwana waawe yaaba naayenda kugamba naiwe, teeraho kuhindahindura omu bi waaba nooza kukora obaase kumuhurikiza. Waaba otakikozire, naabaasa kutagaruka kwenda kugaaniira naiwe. Ijuka eky’okureeberaho kya Yesu. Eizooba rimwe, akaba naayenda kuza kuhuumuraho. Kwonka abantu baingi ku baizire kumuhurikiza, akareka kuza kuhuumuraho, reero yaatandika kubeegyesa. (Mako 6:30-34) Eminyeeto abarikukira obwingi nibamanya ngu abazaire baabo nibakira kuba baine bingi eby’okukora, kwonka baine kuhamizibwa ngu abazaire baabo babainiire obwire bw’okugaaniira nabo. N’ahabw’ekyo, bahe obwire kandi yoreka okwetegyereza.

7. Niki eki abazaire baine kwetantara?

⁷ Teeraho kwijuka oku waabaire nootwaza obu waabaire ori omu myaka nk’egyo, kandi otaguubwa kubi! Abazaire baine kukunda kuba n’abaana baabo. Mbwenu abazaire obwire bw’okweshemeza nibabukoresa ki? Abazaire butoosha baaba nibenda kukoresa obwire obwo kukora ebyabo batari hamwe n’ab’omu maka gaabo, abaana baabo nibaija kurahuka kukireeba. Eminyeeto baareeba ngu banywani baabo aha ishomero nibabafaho munonga okukira abazaire baabo, nibaija kugira oburemeezi.

EBY’OKUGAANIIRAHO

8. Abaana nibabaasa kumanya bata obukuru bw’okuba abeesigwa, okukora n’obweziriki hamwe n’okugira emitwarize mirungi?

⁸ Abazaire ku baraabe batakeegyeise abaana baabo obukuru bw’okuba abeesigwa nari kukora n’amaani, bashemereire kuteeraho kubeegyesa bakiri omu myaka y’omushogoyo. (1 Abatesalonika 4:11; 2 Abatesalonika 3:10) Ni kirungi bo okuteeraho kureeba ngu abaana baabo bayetegyereza gye ngu okugira emitwarize mirungi ni kikuru. (Enfumu 20:11) Omuzaire naabeegyesa gye ebyo arikubateeraho eky’okureeberaho. Nk’oku abashaija abatari mu nyikiriza y’abakazi baabo barikubaasa ‘kuhindurwa emitwarize y’abakazi baabo,’ n’eminyeeto neebaasa kwega emisingye ehikire kurabira omu mitwarize mirungi y’abazaire baabo. (1 Petero 3:1) Kwonka nabwe, eky’okureeberaho kyonka tikirikumara obu abaana nabo barikureeba eby’okureeberaho ebindi bibi kandi bakatunga n’ebiteekateeko bibi ebirikuruga aheeru y’eka. Abazaire abarikufayo, baine kumanya ebi abaana baabo barikuteekateeka aha bi barikureeba n’ebi barikuhurira, kandi ekyo nikyetengyesa okugaaniira nabo.—Enfumu 20:5.

9, 10. Ahabw’enki abazaire bashemereire kuteeraho kwegyesa abaana baabo aha nshonga z’eby’okuteerana, kandi eki nibabaasa kukikora bata?

⁹ Okugaaniira n’abaana nikwetengyesa na munonga aha bikwatiraine n’eby’okuteerana. Abazaire, nimugira enshoni kugaaniira n’abaana baanyu aha bikwatiraine n’eby’okuteerana? N’obu kyakuba nikikukwatsa enshoni, teeraho kubigaaniiraho nabo ahakuba nibabaasa kubyega kuruga aha muntu ondiijo. Waaba otabibeegyeiseho, abandi nibabaasa kubibeegyesa omu muringo mubi. Omuri Baibuli, Yehova tarikugamba naatsintsiina enshonga z’eby’okuteerana, n’abazaire nabo tibashemereire kubitsintsiina.—Enfumu 4:1-4; 5:1-21.

¹⁰ Ekirungi, Baibuli erimu obuhabuzi burungi oburikukwata aha nshonga z’eby’okuteerana, kandi n’ekibiina ky’Abajurizi ba Yehova kihandiikire ebirikworeka ngu obuhabuzi bw’omu Baibuli nibukora na hati. Ahabw’enki otarikukoresa obuhabuzi obwo? Nk’eky’okureeberaho, iwe na mutabani waawe nari muhara waawe ahabw’enki mutarikweijutsya ebiri omu kicweka “eby’Okuteerana Hamwe n’Emicwe” ekiri omu katabo Questions Young People Ask—Answers That Work? Nihabaasa kurugamu ebirungi bingi.

11. Ni muringo ki omurungi ogu abazaire baine kwegyesamu abaana baabo oku baine kuheereza Yehova?

¹¹ Niki ekikuru eki abazaire n’abaana baine kugaaniiraho? Entumwa Paulo akakigambaho obu yaahandiika ati: ‘Mugumizemu nimurera [abaana baanyu] omu kuhana kwa Yehova kandi murikubatamu emiteekateekyere ye.’ (Abaefeso 6:4, NW) Abaana nibeetenga kuguma nibeega ahari Yehova. Okukira munonga nibeetenga kwega kukunda Yehova, kandi baine kuhurira nibenda kumuheereza. Ekyo nakyo nibabaasa kukyegyera omu ky’okureeberaho. Eminyeeto baareeba ngu abazaire baabo nibakunda Ruhanga ‘n’omutima gwabo gwona, n’amagara gaabo goona’ kandi ngu ekyo kireetaire abazaire baabo ebirungi, nabo nibaija kuhigwa kukora nikyo kimwe. (Matayo 22:37) Kandi baareeba ngu abazaire baabo tibarikwemarira aha kusherura eby’obutungi, kandi ngu nibata Obukama bwa Ruhanga omu mwanya gw’okubanza, nikiija kubahwera kugira emiteekateekyere nk’eyaabo.—Omubuurizi 7:12; Matayo 6:31-33.

12, 13. Ni bintu ki ebi omuntu ashemereire kwijuka okwega Baibuli nk’eka kwaba kuri okw’okubamu obusinguzi?

¹² Okwega Baibuli okw’eka okwa buri saabiiti nikuhwera munonga omu kwegyesa eminyeeto eby’omwoyo. (Zaaburi 119:33, 34; Enfumu 4:20-23) Okwega Baibuli butoosha nk’okwo ni kukuru. (Zaaburi 1:1-3) Abazaire n’abaana baabo baine kwetegyereza ngu okwega Baibuli okw’eka nikwo bashemereire kwebembeza okukira ebindi byona. Ekindi, okukunda okwega Baibuli okw’eka ni kikuru kwaba kuri okw’okurugamu ebirungi. Omuzaire omwe omushaija akagira ati: “Omu kwega Baibuli nk’eka, ni kikuru orikwebembera okureeba ngu yaareetera buri omwe kukwejumbamu. Ekyo obumwe nikiba kitoorobi, kandi eminyeeto emirundi mingi nibaija kwetenga kukora empindahinduka omu miteekateekyere yaabo. Ebintu byaba bitagyenzire gye omurundi gumwe nari ebiri, gumisiriza obundi nibibaasa kuba gye omu kwega okuraakurateho.” Omuzaire ogwo akongyera yaagira ngu omu shaara ye batakatandikire kwega, naashaba Yehova ngu ahwere boona abariho kuta omutima aha biraayegweho.—Zaaburi 119:66.

¹³ Abazaire abari omu kwikiriza nibo baine obujunaanizibwa bw’okwebembera okwega Baibuli okw’eka. N’eky’amazima abazaire abamwe nibabaasa kuba batari beegyesa barungi, kandi nikibaasa kutaboorobera kureetera buri omwe omu ka kukunda okwega okwo. Kwonka nabwe, waaba nookunda abaana baawe ‘omu bikorwa n’omu mazima,’ noija kugira ekihika ky’okubahwera omu bucureezi kandi otarikushwekyerera kugira ngu bakure omu by’omwoyo. (1 Yohaana 3:18) Obumwe nibabaasa kwetomboita, kwonka nibabaasa kureeba oku orikubataho munonga omutima.

14. Abazaire baaba nibagaaniira n’eminyeeto aha by’omwoyo bashemereire kugyendera bata aha biri omu Eky’Ebiragiro 11:18, 19?

¹⁴ Okwega Baibuli nk’eka tibwo bwire bwonka obw’okugaaniiriramu eby’omwoyo. Noijuka ekiragiro eki Yehova arikuha abazaire? Naagira ati: “Mute ebigambo byangye ebi aha mitima yaanyu n’omu magara gaanyu, mubikome aha mikono yaanyu, bibe akamanyiso, mubite aha buso bwanyu ahagati y’amaisho gaanyu. Mugume mubyegyese abaana baanyu, mubigaaniireho mushutami omu maka gaanyu, nimugyenda omu muhanda, nimuza kubyama, kandi nimwimuka.” (Eky’Ebiragiro 11:18, 19; reeba na Eky’Ebiragiro 6:6, 7.) Eki tikirikumanyisa ngu abazaire butoosha baine kuba nk’abarikubuurira abaana baabo. Kwonka nyineeka oine rukundo butoosha ashemereire kuteeraho kureeba oku araayombeke ab’omu ka ye omu by’omwoyo.

OKUHANA N’OKWIKIRIZA KUHANWA

15, 16. Okuhana nikimanyisa ki? (b) N’oha oine obujunaanizibwa bw’okuhana, kandi n’oha oine obujunaanizibwa bw’okukwikiriza?

¹⁵ Okuhana n’okutendeka okurikuhabura, kandi nikutwariramu okugaaniira. Okuhana nikimanyisa okuhabura beitu kutari okufubira—kwonka obumwe okufubira nikubaasa kwetengyesa. Abaana baawe bakaba nibeetenga kuhanwa obu baabaire bakiri bato. Mbwenu hati obu bari eminyeeto, tibarikukwetenga n’okukiraho? Eminyeeto abanyabwengye nibamanya ngu nikwo kiri.

¹⁶ Baibuli neegira eti: “Omushema agaya okuhabura kwa ishe, kwonka ota omutima aha kuhanwa, niwe aba omwerinzi.” (Enfumu 15:5) Ni bingi ebi turikwega omu kyahandiikirwe eki. Nikyoreka ngu okuhana kushemereire kuheebwa. Omunyeeto tarikubaasa ‘kuta omutima aha kuhanwa’ kwaba kutamuhairwe. Yehova naaha abazaire okukira munonga omushaija, obujunaanizibwa bw’okuhana abaana. Kwonka, abaine obujunaanizibwa bw’okwikiriza kuhanwa n’abaana. Omunyeeto yaikiriza kuhanwa ishe na nyina, naayega bingi kandi naakora enshobe nkye. (Enfumu 1:8) Baibuli neegira eti: “Oyanga kuhaburwa, omugabo gwe guba obworo n’okuhemuka, kwonka okunda kuhanwa aryaheebwa ekitiinisa.”—Enfumu 13:18.

17. Abazaire baine kuteeraho kwetantara ki baaba nibahana abaana baabo?

¹⁷ Abazaire baaba nibahana eminyeeto, nibeetenga kukikora batarikugwera rubaju. Baine kwetantara kuteeraho abaana baabo amaremesa bakabagwisa kubi, obundi kikareetera abaana abo okuteyesiga. (Abakolosai 3:21) Kwonka abazaire tibashemereire kwehuzya okuhana abaana baabo bakafeerwa omugisha gw’okutendekwa. Ekyo nikibaasa kuba eky’akabi aha baana baabo. Enfumu 29:17 nihagira hati: “Hana omwana waawe, aryakuruhuura, ashemeze omutima gwawe.” Kwonka, orunyiriri rwa 21 nirugira ruti: “Omuhuuku orikwiha omu buto naatetsibwa mukama we,” aha muheru aryashangwa yaabaire omushema. N’obu orunyiriri oru ruraabe nirugamba aha muhuuku, nirukwata n’aha munyeeto weena ari omu ka.

18. Okuhana omwana nikyoreka ki kandi abazaire nibetantara ki baaguma nibahana abaana baabo?

¹⁸ Omu mazima, okuhana okurungi nikuba nikworeka rukundo ei omuzaire ainiire omwana we. (Abaheburaayo 12:6, 11) Ku oraabe ori omuzaire, noomanya ngu tikyorobi okuguma noohana abaana nk’oku kishemereire. Ahabw’okwenda kurinda obusingye, omuzaire naabaasa kureka omwana omugomi kukora eki arikwenda. Kwonka omuzaire orikukora ekyo naija kushaaruura ebibi; nikwo kugira eka etarimu buteeka.—Enfumu 29:15; Abagalatia 6:9.

OBWIRE BW’OKUKORA HAMWE N’OBW’OKUZAANA

19, 20. Abazaire nibabaasa kutwaza bata aha nshonga ekwatiraine n’eby’okweshemeza ebi eminyeeto yaabo erikutoorana?

¹⁹ Omu bwire bwa ira abaana bakaba baine kuhwera omu kukora emirimo y’aha ka nari omu misiri. Omu bunaku obu eminyeeto baine obwire bwingi bw’okwejumba omu by’okweshemeza. Okwenda ngu bakorese obwire bwabo obwo, ab’eby’obushuubuzi nibataho eby’okweshemeza bingi ebi eminyeeto barikubaasa kwejumbamu. Okwongyera ahari ekyo, abantu b’ensi nibafayo kakye aha mitindo ya Baibuli erikukwata aha micwe, kandi ekyo nikikira kurugamu akabi.

²⁰ N’ahabw’ekyo, omuzaire ow’obwengye naaguma aine obujunaanizibwa bw’okucweramu abaana aha bikwatiraine n’eby’okweshemeza. Otakaayebwa ngu omunyeeto naaba akiriyo naakura. Buri mwaka, naaba naayeyongyera kwenda kutwarizibwa nk’omuntu mukuru. N’ahabw’ekyo, n’eky’obwengye omuzaire kuguma naaha omunyeeto obugabe omu kutoorana eby’okweshemeza nk’oku omwana araagyende naakura—beitu obwo ebi arikutoorana byaba nibyoreka ngu ariyo naakura omu by’omwoyo. Obumwe, omunyeeto naabaasa kucwamu kubi aha bikwatiraine n’okutoorana ebyeshongoro, abanywani, n’ebindi nk’ebyo. Eki kyabaho, omuzaire ashemereire kukigaaniiraho n’omunyeeto ogwo kugira ngu omurundi ogundi akaabaasa kucwamu gye.

21. Okutamarira obwire bwingi omu by’okweshemeza nikurinda kuta omunyeeto?

²¹ Eby’okweshemeza bishemereire kutwara obwire burikwingana ki? Omu mahanga agamwe eminyeeto nibateekateeka ngu baine kwejumba omu by’okweshemeza ebiraabeho byona. N’ahabw’ekyo, omunyeeto naabaasa kutebeekanisa kugira ngu atungye obwire bw’okuguma nabyejumbamu. N’ahabw’ekyo abazaire baine kwegyesa abaana baabo ngu obwire bashemereire kubumarira n’aha bintu ebindi, nk’okwega Baibuli nk’eka, okweyegyesa Baibuli, okuba n’abantu abakuzire omu by’omwoyo, okuza omu nteerane z’Ekikristaayo hamwe n’okukora emirimo y’aha ka. Eki nikiija kubahwera kutareka “amaganya g’ensi” kubaremesa Ekigambo kya Ruhanga—Luka 8:11-15.

22. Eminyeeto bashemereire kuringaaniza eby’okweshemeza naki?

²² Omugabe Sulemaani akagira ati: “Nimmanya ku hatariho kirikubakirira okushemererwa n’okukora gye ebiro byona ebi bariba bakiriho; kandi ku kiri ekiconco kya Ruhanga aha muntu weena okurya n’okunywa n’okushemerererwa ebi arikufeera kubi byona.” (Omubuurizi 3:12, 13) Buzima, okushemererwa nakwo n’ekicweka ky’amagara againe ekigyendererwa. Nikyo kimwe n’okukora n’amaani. Eminyeeto maingi hati terikwegyesibwa kumanya okumarwa okurikuruga omu kukora n’amaani nari okwegiramu obwesigye okurikuruga omu kugira oburemeezi kwonka okabusingura. Eminyeeto bashemereire kwegyesibwa kukora n’amaani, nk’eky’okureeberaho okukora omu musiri, okwombeka amaju n’endiijo mirimo nk’egyo. Abazaire baine obujunaanizibwa kwegyesa abaana baabo kukunda kukora n’amaani. Baaba batabegyeise nibabaasa kuba abagara kandi nibabaasa kutebeisaho. Waayegyesa abaana baawe kumanya omugasho gw’okukora n’amaani n’okukunda kukora, nibaija kugira emiteekateekyere mirungi aha kukora kandi ekyo kiije kibabeere eky’omugasho.

OKWIHA OMU MUSHOGOYO OKUHITSYA YAAKURA

23. Abazaire nibabaasa kuhiga bata abaana baabo abari omu mushogoyo?

²³ Nangwa n’obu waakuba oine oburemeezi n’omwana waawe ori omu mushogoyo, ekyahandiikirwe nikigira kiti: ‘Okukunda tikuremwa.’ (1 Abakorinso 13:8, NW) Otarireka kworeka rukundo ei oine buzima. Yebuuze, ‘Ninsiima buri mwana wangye ku arikusingura omu kushoboorora oburemeezi? Ninkoresa buri kagisha kworeka abaana bangye rukundo kandi mbasiima ahabw’ebirungi ebi barikukora?’ N’obu obumwe haakuba hariho okutaikirizana, abaana baareeba ngu noobakunda, nabo nibaija kukukunda.

24. Ni musingye ki ogw’omu Byahandiikirwe ogurikworeka obukuru bw’okutendeka abaana, kwonka niki eki twine kuguma nitwijuka?

²⁴ N’eky’amazima abaana ku barikukura, nibeecweramu omu nshonga zitari zimwe na zimwe. Obumwe abazaire nibabaasa kutakunda ebi abaana baabo barikucwamu. Kwonka shi abaana ku baakucwamu kutagumizamu nibaheereza Yehova Ruhanga? Ekyo nikibaasa kubaho. Nangwa n’abaana ba Ruhanga ab’omwoyo abamwe bakanga obuhabuzi bwe kandi baaba abagomi. (Okutandika 6:2; Yuda 6) Abaana tibari nka kompyuta, erikubaasa kutebeekanisibwa kukora ebi itwe turikuba nitwenda. Nabo n’ebihangirwe abaine obugabe, abashemereire kumanya ngu ebi barikucwamu biine akakwate n’omukago gwabo na Yehova. Kandi ebiri omu Enfumu 22:6 nibihabura biti: “Manyiiza omwana omuhanda ogu ashemereire kutoora; kandi n’obu arikura, tarigurugamu.”

25. Ni muringo ki omurungi ogu abazaire barikubaasa kworeka okusiima kwabo ahari Yehova ahabw’okubaha omugisha gw’okuba abazaire?

²⁵ N’ahabw’ekyo, abaana baawe boorekye rukundo mpango. Kora kyona eki orikubaasa, ogyendere aha misingye ya Baibuli omu kukuza abaana baawe. Bateereho eky’okureeberaho kirungi omu mitwarize erikworeka okutiina Ruhanga. Obwo noija kuha abaana baawe omugisha gw’okukura gye bakaba abantu b’obujunaanizibwa, abarikutiina Ruhanga. Ogu nigwo muringo murungi ogu abazaire barikubaasa kworeka okusiima kwabo ahari Yehova ahabw’okubaha omugisha bakaba abazaire.

EMISINGYE YA BAIBULI EGI NEEBAASA KUHWERA ETA . . . ABAZAIRE KUKUZA ABAANA BAABO?

Okugaaniira nikyetengyesa.—Enfumu 15:22.

Tushemereire kushoma Ekigambo kya Ruhanga butoosha.—Zaaburi 1:1, 2.

Omunyabwengye aikiriza okuhanwa.—Enfumu 15:5.

Okukora n’okuzaana byombi biine obwire bwabyo.—Omubuurizi 3:12, 13.

[Ekishushani ekiri aha rupapura 67]

Ha omwana waawe obwire yaaba naayenda kugamba naiwe

[Ekishushani ekiri aha rupapura 69]

Okwega Baibuli nk’eka butoosha nikihwera eka

[Ekishushani ekiri aha rupapura 70]

Yoreka abaana baawe rukundo kandi obasiime