Eshuura Ya Mushanju
Hariho Omugomi omu Ka?
1, 2. (a) Ni ky’okureeberaho ki eki Yesu yaahaire okworeka obutesigwa obwabaire buri omu beebembezi b’ediini y’Ekiyudaaya? (b) Niki eki turikubaasa kwega omu ky’okureeberaho kya Yesu ekirikukwata aha minyeeto?
EBIRO bikye ari haihi kwitwa, Yesu akabuuza abeebembezi b’ediini y’Ekiyudaaya ekibuuzo ekyabareetaire kuteekateeka munonga. Akagira ati: “Mbwenu nimuteekateeka muta ahari ebyo? Omushaija akaba aine abatabani babiri. Yaaragiira ow’omujigaijo ati: Mwana wangye, irooko okore omu musiri gwangye ogw’emizaabibu eri izooba. Yaayanga ati: Tindikuzayo; kwonka bwanyima yaayeteisa, yaazayo. Yaaza aha murumuna nawe yaamuragiira nk’ebyo; yaamwikiriza ati: Eego Taata, ka ngyende; kwonka tiyaazayo. Ahari abo bombi n’oha owaakozire eki ishe yaabaire naakunda? Banu bati: Ow’omujigaijo.”—Matayo 21:28-31.
2 Yesu aha akaba nayoreka obutesigwa bw’abeebembezi b’ediini y’Ekiyudaaya. Bakaba bari nk’omwana owa kabiri ogwo, barikuraganisa kukora ebi Ruhanga akunda kwonka batarikukora ebi baaragaanisa. Kwonka abazaire baingi nibaija kureeba ngu eky’okureeberaho kya Yesu kikaba nikyoreka ngu naayetegyereza gye amagara g’eka. Ekindi Yesu akooreka ngu tikyorobi obutoosha kumanya ebi abaana barikuteekateeka nari ebi barikwija kukora omu biro by’omumaisho. Omwana naabaasa kureetaho oburemeezi bwingi omu myaka ye y’omushogoyo kwonka yaakura arugyemu omuntu w’omugasho kandi orikwesigwa. Tushemereire kuguma nitwijuka eki twaba nitugaaniira aha kugoma kw’abari omu myaka y’omushogoyo.
OMUGOMI NIKIMANYISA KI?
3. Ahabw’enki abazaire batashemereire kurahuka kweta omwana waabo omugomi?
3 Obumwe n’obumwe, noobaasa kuhurira eminyeeto abarikugomera abazaire baabo. Iwe nk’omuntu noobaasa kuba noomanya eka erimu omunyeeto ogomiire kimwe akaba ekihanda. Kwonka, obutoosha tikyorobi kumanya yaaba omwana n’omugomi. Kandi nabwe, nikibaasa kuguma okumanya ahabw’enki abaana abamwe ab’eka emwe nibagoma kandi abandi omu ka niyo emwe batarikugoma. Abazaire baareeba ngu omwe aha baana baabo atandikire kugira emitwarize y’obugomi, nibabaasa kukora ki? Okugarukamu ekyo, ka tubanze tugambe aha ki okuba omugomi kirikumanyisa.
4-6. (a) Omugomi nikimanyisa ki? (b) Abazaire baine kuguma nibaijuka ki omwana waabo obumwe n’obumwe yaaba ataboorobaire?
4 Omu bugufu, omugomi n’omuntu orikuguma naahenda ebiragiro akigyendereire. N’eky’amazima, ‘obushema buri omu mutima gw’omwana.’ (Enfumu 22:15) N’ahabw’ekyo abaana boona obumwe nibagomera abazaire baabo nari abandi. Eki nikikira kubaho omu bwire obu omwana arikuba naakura omu mubiri n’omu biteekateeko ekirikumanywa nk’omushogoyo. Empindahinduka ezirikuba omu magara g’omuntu nizireeta okwerarikirira, kandi omushogoyo nigureeta empindahinduka nyingi. Mutabani waawe nari muhara waawe naaba ariyo naaruga omu buto kandi nayeyongyera kukura. Ahabw’enshonga egi, abaana abamwe baaba bari omu myaka y’omushogoyo, nibagira oburemeezi bwingi n’abazaire baabo. Abazaire nibakira kureeba abaana baabo abari omu mushogoyo nk’abakiri bato, kwonka abaana abo bo barikwenda kureebwa nk’abakuzire.
5 Omunyeeto omugomi naayanga obuhabuzi bw’abazaire be. Kwonka ijuka ngu, ebikorwa bikye by’obugomi tibirikumanyisa ngu omuntu n’omugomi. Kandi aha bikwatiraine n’eby’omwoyo, omu kubanza abaana abamwe nibabaasa kutafayo aha mazima g’omuri Baibuli, kwonka ekyo tikirikumanyisa ngu n’abagomi. Iwe nk’omuzaire, otarahuka kweta omwana waawe omugomi
6 Mbwenu, abaana boona abari omu myaka y’omushogoyo nibagomera abazaire baabo? Ngaaha buzima. Ebibaireho nibyoreka ngu bakye aha minyeeto nibo barikuba ebihanda aha bazaire baabo. Kandi shi, omwana orikugumizamu ari ekihanda? Niki ekirikubaasa kuba nikimureetera kuba ekihanda?
EBIRIKUREETA OKUGOMA
7. Embeera mbi ezirikureetwaho Sitaane nizireetera zita omwana kugoma?
7 Ekirikukira kureetaho obugomi n’embeera mbi ezirikureetwaho Sitaane. ‘Ensi yoona eri omu butegyeki bw’Omubi ogwo.’ (1 Yohaana 5:19) Ensi eri omu butegyeki bwa Sitaane eretsireho emitwarize mibi munonga ei Abakristaayo baine kwerinda. (Yohaana 17:15) Emitwarize nk’egi n’eyakabi kandi hariho bingi ebirikutushendashenda okugira emitwarize nk’egyo okukira oku kyabaire kiri kare. (2 Timoseo 3:1-5, 13) Abazaire baaba bateegyeise abaana baabo, bakabarabura kandi bakabarinda, nibabaasa kurahuka kutwarwatwarwa ‘omwoyo ogurikukorera hati omu batarikuhurira.’ (Abaefeso 2:2) Ekirikushushana n’eki n’okugyemwa bagyenzi baabo kutwaza nk’oku barikutwaza. Baibuli neegira eti: “Ogyenda n’abanyabwengye, nawe ahinduka omunyabwengye, kwonka mugyenzi w’abashema aryakizira.” (Enfumu 13:20) Nikyo kimwe, orikunywana abo abaine emitwarize erikworeka omwoyo gw’ensi egi nawe naabaasa kugira emitwarize nk’egyo. Abaana nibeetenga kuhaburwa obutoosha baaba bari ab’okwetegyereza ngu okworobera emisingye ya Ruhanga nikubahwera kugira amagara marungi.—Isaaya 48:17, 18.
8. Ni nshonga ki ezirikubaasa kureetera omwana kugoma?
8 Ekindi ekirikubaasa kureetaho obugomi n’embeera y’omu ka. Nk’eky’okureeberaho, omuzaire omwe yaaba ari omusinzi, arikukoresa emibazi y’ekitabura bwonko nari ari enshaarizi, ekyo nikibaasa kukwata aha munyeeto. N’obu omu ka haakuba harimu obusingye, omwana naabaasa kugoma yaareeba ngu abazaire be tibarikumufaho. Kwonka, obugomi omu minyeeto obwire obwingi tiburikuruga aha bantu abandi. Abaana abamwe nibanga kwikiriza obuhabuzi bw’abazaire baabo n’obu abazaire baakuba nibagyendera aha misingye ya Ruhanga kandi barikuteeraho munonga kubarinda emitwarize mibi eri omu nsi egi. Ahabw’enki? Ahabw’obundi burugo bw’oburemeezi—okutahikiirira kw’omuntu. Paulo akagira ati: ‘Ekibi kikaija omu nsi ahabw’okushiisha kw’omuntu omwe [Adamu], kandi kikarugamu okufa, nikwo n’okufa kwabugire omu bantu boona, ahakuba boona bakashiisha.’ (Abarooma 5:12) Adamu akaba ari omugomi orikweyendeza, kandi akahunguza baijukuru be boona ekibi. Eminyeeto emwe neecwamu kugoma, nk’oku ishenkurubo Adamu yaakozire.
ELI OTARAFIREYO KUHANA ABAANA BE NA REHOBOAMU OWAATAIREHO AMAREMESA
9. Abazaire nibabaasa kureetera bata abaana baabo kugoma?
9 Ekindi ekireetaire eminyeeto okugoma n’abazaire okugwera orubaju omu kworora abaana baabo. (Abakolosai 3:21) Abazaire abamwe nibateeraho abaana baabo amaremesa omu kubahana. Abazaire abandi tibarikufayo, tibarikuha abaana baabo ebiragiro ebirikubaasa kubarinda. Tikyorobi obutoosha okworora abaana otagwereire rubaju. Kandi buri mwana nayetenga kuhanwa omu muringo ogwe. Omwe nikibaasa kwetengyesa ngu omuhane munonga okukira abandi. Kwonka nabwe, eby’okureeberaho bibiri by’omuri Baibuli nibibaasa kutuhwera kureeba oburemeezi oburi omu kutaho amaremesa nari okutafayo kuhana abaana.
10. Ahabw’enki Eli n’obu araabe yaabaire ari omunyamurwa omukuru omwesigwa, yaabaire omuzaire mubi?
10 Omunyamurwa mukuru owa Israeli eya ira Eli akaba aine abaana. Akaheereza kumara emyaka 40, hatariho kubanganisa akaba naamanya gye Ebiragiro bya Ruhanga. Butoosha Eli aine kuba yaabaire naakora emirimo ye y’obunyamurwa omu bwesigwa kandi naabaasa kuba yaayegyeise gye abatabani Hofuni na Finehaasi Ebiragiro bya Ruhanga. Kwonka, Eli akaba naatetsa abatabani. Hofuni na Finehaasi n’obu baraabe baheereize nk’abanyamurwa, kwonka bakaba bari “abantu abataine mugasho,” abaabaire nibakunda kuhikiiriza ebyetengo byabo bibi. Kandi, ku baakoreire ebihagaro omu mwanya ogurikwera, Eli tarabaasize kubabinga omu murimo gw’obunyamurwa. Akabahanisa ebigambo byonka. Ahabw’okutafayo kwe, Eli akaha abatabani ekitiinisa okukira Ruhanga. Ekyarugiremu, batabani be bakagomera Yehova bashiisha okuramya kwe okurikwera kandi eka ya Eli yoona ekahikwaho akabi.—1 Samueli 2:12-17, 22-25, 29; 3:13, 14; 4:11-22.
11. Eky’okureeberaho kibi kya Eli abazaire nibabaasa kukyegaho ki?
11 Abaana ba Eli bakaba bari bakuru obu ebi byabaho, kwonka ebi byona ebyabaireho nibyoreka akabi akari omu kutahana abaana. (Gyeragyeranisa Enfumu 29:21.) Abazaire abamwe nibateekateeka ngu okukunda abaana nikimanyisa okubareka bakakora eki barikwenda, baremwa kubateeraho ebiragiro by’okukuratira kandi bakabihamiraho. Tibarikuhana baana abo, baahenda emisingye ya Ruhanga. Ahabw’okutafayo nk’okwo, abaana nibabaasa kutoorobera abazaire baabo nari kutoorobera abeebembezi abandi.—Gyeragyeranisa Omubuurizi 8:11.
12. Ni nshobe ki ei Rehoboamu yaakozire omu kukoresa obushoboorozi bwe?
12 Eky’okureeberaho kya Rehoboamu nikyoreka akabi akari omu kutaho amaremesa. Akaba ari omugabe owaahererukireyo omu bugabe bwa Israeli, kwonka akaba atari mugabe murungi. Rehoboamu akaba ahungwire obugabe obwabaire burimu abantu abaabaire batashemereirwe ahabw’ebiragiro ebi eishe, Sulemaani yaabaire abateeraireho. Kwonka shi Rehoboamu akooreka okwetegyereza? Ngaaha. Abu baamutumireho ku bamushabire kubatuubiza aha mirimo eyaabaire neebarusya, akanga obuhabuzi burungi obwamuhairwe abahabuzi bakuru kandi yaaragiira ngu emirimo egyo eyongyerweho endiijo. Amaryo ge gakareetera abantu b’enganda ikumi z’omu matemba kugoma, kandi kyareetera obukama kubaganisibwamu kabiri.—1 Abagabe 12:1-21; 2 Obusingye 10:19.
13. Abazaire nibabaasa kwetantara bata kukora enshobi nk’eya Rehoboamu?
13 Abazaire nibabaasa kugira ebi baayega kuruga omu bihandiikirwe omu Baibuli ebirikukwata ahari Rehoboamu. Baine ‘kusherura Yehova’ kurabira omu kushaba kandi bakashwijuma emiringo ei barikwororamu abaana baabo barikukuratira emisingye ya Baibuli. (Zaaburi 105:4) Omubuurizi 7:7 nihagira hati: “Buzimazima okuhata kuhindura omunyabwengye omushema.” Abazaire baaha abaana baabo eby’okugyenderaho ebiringaniire, nibibahwera kukura gye kandi nibibarinda n’akabi. Kwonka abaana tibashemereire kuba nk’abazitiriirwe ekirikubaasa kubaremesa kwecweramu n’okwegiramu obwesigye. Abazaire baateeraho kutagwera rubaju omu kuteeraho abaana ebi baine kugyenderaho n’okubaha obugabe bwabo bw’okwecweramu, abaana abarikukira obwingi tibarikwija kugoma.
OKUHA ABAANA EBI BARIKWETENGA NIKIBAASA KUTUMA HATABAHO OBUGOMI
14, 15. Abazaire baine kureeba bata empindahinduka ezirikubaho omu kukura kw’abaana baabo?
14 N’obu abazaire baraabe nibashemererwa kureeba abaana baabo barikuruga omu buto bakaba bakuru, nibabaasa kwerarikirira abaana baabo batandika kuruga ahansi y’obushoboorozi bwabo bakatandika kwereeberera. Omu bwire obwo, kitakakutangaaza omwana waawe obumwe yaaba engaangazi nari otarikwenda kukwatanisa n’abandi. Guma noomanya ngu ekigyendererwa ky’abazaire Abakristaayo n’okworora omwana akakura gye kandi akaba Omukristaayo ow’omugasho.—Gyeragyeranisa 1 Abakorinso 13:11; Abaefeso 4:13, 14.
15 N’obu kyakuba kigumire kita, abazaire baine kwetantara okwangira abaana baabo kugira obugabe buringaniire. Omu muringo oguhikire, omwana ashemereire kukura arikuheebwa obugabe buringaniire bw’okwecweramu. N’eky’amazima, omu myaka y’obuto, eminyeeto emwe neerahuka kukura omu biteekateeko. Nk’eky’okureeberaho, Baibuli negamba ahari Yosia Omugabe omuto: “Akiri muto [aine emyaka nka 15], akatandika kusherura Ruhanga wa Daudi.” Omunyeeto ogwo akaba ari omuntu w’omugasho munonga.—2 Obusingye 34:1-3.
16. Abaana bayeyongyera kuheebwa obugabe bw’okwecweramu, baine kumanya ki?
16 Kwonka, obugabe bw’okwecweramu nibureeta obujunaanizibwa. N’ahabw’ekyo, reka omwana waawe okuzire areebe ebiraarugye omu bi arikucwamu n’ebi arikukora. Omusingye, “ebi omuntu abiba nibyo agyesha,” nigukwata aha minyeeto n’aha bakuru. (Abagalatia 6:7) Abaana tibarikuguma omu burinzi bw’abazaire baabo ebiro byona. Kwonka shi, omwana waawe ku yaakwenda kukora ekitarikwikirizibwa na kakye? Nk’omuzaire ow’obujunaanizibwa, oine kumugira oti, “Ngaaha.” Kandi waaba nomushoboororera ahabw’enki waagira ngu ngaaha, tihariho ekishemereire kuhindura ngaaha yaawe Eego. (Gyeragyeranisa Matayo 5:37.) N’ahabw’ekyo, teeraho kumugira ngu “Ngaaha” omu muringo gw’obucureezi, nk’oku kirikugambwa ngu “okugarukamu gye kwikaikanisa ekiniga; kwonka ekigambo ekirikusaasa kiimutsya ekiniga.”—Enfumu 15:1.
17. Ni byetengo ki ebimwe eby’eminyeeto ebi abazaire baine kuhikiiriza?
17 Abaana nibeetenga kuhanwa butoosha n’obu baakuba batarikwikirizana n’ebiragiro ebi bahairwe. Nikigwisa kubi abaana, ebiragiro byaguma nibihindahindurwa nk’oku omuzaire arikweyendera. Ekindi, eminyeeto baahigwa kandi bakahwerwa kusingura enshoni nari okuteyesiga nk’oku kirikwetengyesa, nibabaasa kukura babe abantu bahamire. Kandi eminyeeto nikibashemeza baareeba ngu abazaire baabo nibabeesiga.—Gyeragyeranisa Isaaya 35:3, 4; Luka 16:10; 19:17.
18. Ni mazima ki agarikukwata aha minyeeto agarikugaruramu amaani?
18 Abazaire nibahurira gye ku barikumanya ngu abaana baabo bashemereirwe ahabw’obusingye, obuteeka na rukundo ebiri omu ka. (Abaefeso 4:31, 32; Yakobo 3:17, 18) Eminyeeto emingi ebaasize kukurira gye omu maka agarimu embeera mbi, nk’obusinzi, obushaarizi nari emitwarize mibi endiijo. N’ahabw’ekyo, abaana baareeba ngu nobakunda, nobafaho kandi nobarebeerera—n’obu waakuba nobahana omu muringo ogutarikuhenda emisingye ya Baibuli kandi orikubateeraho ebiragiro ebiringaniire—nibabaasa kukura baine emicwe mirungi.—Gyeragyeranisa Enfumu 27:11.
ABAANA BAATUNGA OBUREMEEZI
19. N’obu abazaire baine kumanyiiza omwana omuhanda ogu ashemereire kutoora, omwana we aine bujunaanizibwa ki?
19 Okworora gye abaana nikurugamu ebirungi. Enfumu 22:6 nihagira hati: “Manyiiza omwana omuhanda ogu ashemereire kutoora; kandi n’obu arikura, tarigurugamu.” Kandi shi abaana abaine oburemeezi bw’amaani n’obu baraabe baine abazaire barungi? Ekyo nikibaasa kubaho? Eego. Ebigambo bya enfumu baine kwetegyerezibwa birikugyeragyeranisibwa n’ebyahandiikirwe ebindi ebirikworeka obujunaanizibwa bw’omwana ‘bw’okuhurira’ abazaire be kandi akaborobera. (Enfumu 1:8) Abazaire n’abaana baine kukwatanisa omu kugyendera aha misingye ya Baibuli baaba bari ab’okugira obumwe omu ka. Abazaire n’abaana baaba batakwataniise hamwe, nihaija kubaho oburemeezi.
20. Abaana baashobya ahabw’obutamanya, abazaire nibabaasa kubahwera bata omu muringo gw’obwengye?
20 Abazaire baine kutwariza bata omunyeeto yaakora ebitahikire kandi akatunga oburemeezi? Omu mbeera nk’egyo, omunyeeto naaba naayetenga kuhwerwa. Abazaire baamanya ngu nibahabura omunyeeto otaine bingi ebi arikumanya, nibaija kuteeraho munonga kwerinda okutamugambira kubi. Paulo akahabura abakuzire omu by’omwoyo omu kibiina ati: “Omuntu weena ku araagwe omu kibi kyona, imwe ab’[o]mwoyo mumugarure n’omutima gw’obucureezi.” (Abagalatia 6:1) Abazaire nibabaasa kukuratira obuhabuzi obwo baaba nibahana omwana oraakore ekibi ahabw’obutamanya. Abazaire baaba nibashoboororera omwana ahabw’enki eki yaakora kyaba kigwire kandi n’oku yaakubaasa kwerinda kutagaruka kukikora, bashemereire kukyoreka gye ngu omwana ti mubi beitu eki yakora nikyo kibi.—Gyeragyeranisa Yuda 22, 23.
21. Barikukuratira eky’okureeberaho ky’ekibiina Ekikristaayo, abazaire baine kutwaza bata abaana baabo baakora ekibi ky’amaani?
21 Kwonka shi omunyeeto yaakora ekibi ky’amaani? Obwo omwana naaba nayetenga kuhwerwa omu muringo gw’omutaano n’omu buryo obuhikire. Omwe omu kibiina yaakora ekibi ky’amaani, naahigwa kweteisa kandi akahikirira abareeberezi b’ekibiina ngu bamuhwere. (Yakobo 5:14-16) Yaayeteisa, abareeberezi nibamuhwera kugaruka busya omu by’omwoyo. Omu ka obujunaanizibwa bw’okuhwera omunyeeto okozire ekibi n’obw’abazaire be, n’obu baraabe baine kugaaniira aha nshonga egyo n’abareeberezi. Tibaine kuteeraho kushereka abareeberezi ebibi by’amaani ebi abaana baabo bakozire.
22. Omu kutooreza Yehova, abazaire nibaija kutwaza bata abaana baabo ku baraakore ekibi ky’amaani?
22 Omwana waawe yaakora ekibi n’ekintu kirikushaasha munonga. Ahabw’omwana kukora ekibi, omuzaire naabaasa kwerarikirira; kandi eki nikibaasa kugwisiza kimwe kubi omwana ogwo. Guma noijuka ngu ebiro by’omumaisho eby’omunyeeto ogwo nibibaasa kwegamira munonga aha ku orikumutwariza yaaba ari omu mbeera nk’egyo. Ijuka ngu, na Yehova akaba aba ayeteekateekire kusaasira abantu be abateishukire aha bihikire—ku baabaire beteisa. Reeba ebigambo bye ebya rukundo: “Mbwenu nu nimwije tuhanuure hamwe; ebibi byanyu n’obu biraabe nibitukura nka karari, biryayera nk’orubaare; n’obu biraabe nibitukura tuku-tuku, biryaba nk’ebyoya by’entaama ebirikwera.” (Isaaya 1:18) Ka n’eky’okureeberaho kirungi aha bazaire!
23. Abazaire baine kutwaza bata omwe aha baana baabo yaakora ekibi ky’amaani, kandi niki eki baine kwetantara?
23 N’ahabw’ekyo, teeraho kuhiga ogwo okozire ekibi kureka emihanda mibi. Sherura obuhabuzi kuruga aha bazaire abakuzire omu by’omwoyo n’aha bareeberezi b’ekibiina. (Enfumu 11:14) Yetantare kutwaza omu muringo nari kugamba ebirikubaasa kureetera omwana waawe kutiina kukusheruraho obuhwezi. Yetantare okugira ekiniga kirengire n’okuba enshaarizi. (Abakolosai 3:8) Otarahuka kuhwa amaani. (1 Abakorinso 13:4, 7) N’obu oraabe nooyanga ebibi, otanga kugaaniira n’omwana waawe kandi otamutwariza kubi. Ekikuru munonga, abazaire baine kuteeraho kutaho eky’okureeberaho kirungi kandi bakaguma bahamire omu kwikiriza kwabo.
OKU OINE KUTWARIZA OMUGOMI OMARIRIIRE
24. Ni buremeezi ki obumwe oburikuba omu ka Enkuristaayo, kandi omuzaire aine kutwaza ata?
24 Obumwe nikireebeka gye ngu omunyeeto acwiremu kugoma kandi ngu ayangiire kimwe emitindo y’Ekikristaayo. Obwo abazaire bashemereire kuta omutima aha baana abandi abakitsigaire omuka. Teeraho kutata omutima gwawe gwona aha mwana ogomire, kandi okabura kureeberera abaana abandi. Omu mwanya gw’okuteeraho kushereka ab’omu ka oburemeezi oburiho, bugaaniireho nabo omu muringo murungi kandi ogurikugaruramu amaani.—Gyeragyeranisa Enfumu 20:18.
25. (a) Barikutooreza eky’okureeberaho ky’ekibiina Ekikristaayo, abazaire nibabaasa kutwaza bata omwana yaacwamu kugomera kimwe? (b) Abazaire baine kwijuka ki omwe aha baana baabo yaagoma?
25 Entumwa Yohaana akagamba aha muntu ogomiire kimwe omu kibiina ati: “Mutarimutaasya omu nju, n’obu kwakuba okumuramutsya.” (2 Yohaana 10) Abazaire nibabaasa kucwamu kukora batyo omwana waabo yaaba ahikize emyaka y’okwecweramu kwonka akaba omugomi otarikwenda kweteisa. N’obu kiraabe kigumire kandi kirikushaasha, okutwaza otyo nikibaasa kurinda abaana abandi omu ka. Eka yaawe obwire bwona neyetenga oburinzi n’obureeberezi bwawe. N’ahabw’ekyo, hamira aha biragiro ebi otaireho ebirikukwata aha mitwarize. Gaaniira n’abaana abandi omu ka yaawe. Teeraho kumanya oku barikukora aha ishomero n’omu kibiina Ekikristaayo. Kandi, bamanyise ngu n’obu oraabe otarikusiima ebikorwa by’omwana omugomi torikumwanga. Jumiirira emicwe mibi y’omwana ogwo beitu kutari kujumiirira omwana. Obu batabani ba Yakobo babiri bareeta akabi aha ka yoona ahabw’ekikorwa ky’obushaarizi, Yakobo tarakyeenire batabani be kureka akakyeena ekikorwa kyabo ky’obushaarizi.—Okutandika 34:1-31; 49:5-7.
26. Niki ekirikureetera abazaire abarikufayo aha baana baabo kuhama omwe aharibo yaaba omugomi?
26 Noobaasa kuhurira orikujunaanizibwa ahabw’ekibaireho omu ka yaawe. Kwonka nk’omuzaire ku oraabe waakozire kyona ekirikubaasika, okakuratira obuhabuzi bwa Yehova toshemereire kwecwera orubanja. Ijuka ngu okateeraho kuba omuzaire murungi n’obu haraabe hatariho omuzaire ohikiriire. (Gyeragyeranisa Ebyakozirwe 20:26.) Okugira omwana ogomiire kimwe omu ka ni kireeta okwehurira kubi, kwonka eki kyabaho, guma noomanya ngu Ruhanga naamanya oburemeezi bwawe kandi ngu tarireka baheereza be abeesigwa. (Zaaburi 27:10) Guma omaririire kurinda eka yaawe omu by’omwoyo ahabw’abaana baawe abatari bagomi.
27. Barikwijuka enfumu y’omwana owaarazire, abazaire b’omwana omugomi nibaguma baine matsiko ki?
27 Kwonka nabwe, toshemereire kuhwa amatsiko. Okuteeraho kare kutendeka abaana nikubaasa kukwata aha mutima gw’omwana owaakuba naatandika kugoma abaase kwegarukamu. (Omubuurizi 11:6) Abazaire baingi Abakristaayo bahikirweho oburemeezi obwo nkaiwe, kandi abamwe bareebire abaana baabo abagomi barikwegarukamu nk’oku omwana owaarazire omu ky’okureeberaho kya Yesu yaakozire. (Luka 15:11-32) Ekintu nk’ekyo nikibaasa kubaho omu ka yaawe.
EMISINGYE YA BAIBULI EGI NEEBAASA KUHWERA ETA . . . OMUZAIRE KUZIBIRA OBUGOMI BW’AMAANI OMU KA YE?
Omwana yaaba atahwereirwe, naabaasa kutooreza emitwarize y’ensi.—Enfumu 13:20; Abaefeso 2:2.
Abazaire nibeetenga kutagwera rubaju omu kuteeraho abaana ebiragiro hamwe n’okuha abaana obugabe bw’okwecweramu.—Omubuurizi 7:7; 8:11.
Orikugira emitwarize mibi ashemereire kuhanwa, kwonka omu bucureezi.—Abagalatia 6:1.
Abo abarikukora ebibi by’amaani nibabaasa “kukira” bayeteisa kandi bakaikiriza kuhwerwa.—Yakobo 5:14-16.
[Akabokisi aha rupapura 82]
KIGAANIIREHO N’ABAZAIRE BAAWE
Eminyeeto neija kugira okwerarikirira n’okuteeyesiga ahabw’okuheebwa obugabe bwingi bw’okwecweramu. Nibabaasa kutiina aha bikwatiraine n’oku baine kutwaza omu nsi egi bari bonka. Nibaba nibahurira bari nk’abarikugyenda aha ruguto rw’obuterezi. Imwe eminyeeto, mugaaniire n’abazaire baanyu aha birikuberarikiriza n’aha buremeezi obu mwine. (Enfumu 23:22) Nari waateekateeka ngu abazaire baawe nibakuteeraho amaremesa, gamba nabo aha kyetengo kyawe ky’okwenda kwecweramu. Tebeekanisa kugamba nabo waaba noohurira gye kandi nabo baaba baine obwire. (Enfumu 15:23) Muteereho kuhurizana mwaba nimugaaniira hamwe.
[Ekishushani ekiri aha rupapura 83]
Abaana nibabaasa kukura babe abantu bahamire, abazaire baabo baateeraho kubahwera kugumisiriza oburemeezi bwabo nk’eminyeeto