Eshuura Ya Munaana

Rinda ab’Omu Ka Yaawe Emitwarize Erikubaasa Kubashiisha

1-3. (a) Ebirikushiisha ab’omu ka nibibaasa kuruga nkahi? (b) Abazaire bashemereire kwetantara ki omu kurinda ab’omu maka gaabo?

KA TUGIRE ngu oriyo nooza kwohereza mutabani waawe muto aha ishomero, kwonka enjura eriyo neegwa. Omu mbeera nk’egyo nookora ki? Mbwenu nomureka kugyenda ataine ky’okweshangira? Nari noomufubika ebintu bingi ebirikumuremesa kugyenda gye? Buzima, ebyo byombi torikubikora. Noomuha ebyo byonka ebirikwetengwa kumurinda kutateerwa enjura.

² Omu muringo nigwo gumwe, abazaire baine kuteeraho kurinda ab’omu maka gaabo ebirikubaasa kubashiisha nka; eby’okweshemeza, eby’amakuru, banywani baabo, n’amashomero. Abazaire abamwe tibarikufayo munonga kurinda abaana baabo. Abamwe, nibareeba embeera z’aheeru y’eka yaabo zoona nk’ez’akabi, bateeraho abaana baabo amaremesa bahika n’okwehurira nk’abataine bwikizo. Kwonka shi okutagwera rubaju nikibaasika?

³ Eego, nikibaasika. Okurinda abaana ekirengire ti kirungi kandi nikibaasa kurugamu oburemeezi. (Omubuurizi 7:16, 17) Kwonka shi abazaire Abakristaayo nibarinda bata ab’omu maka gaabo batagwereire rubaju? Yetegyereze oku barikubaasa kukikora omu bintu ebi: Eby’obwegyese, abanywani n’eby’okweshemeza.

N’OHA ORAAYEGYESE ABAANA BAAWE?

4. Abazaire Abakristaayo bashemereire kureeba bata obwegyese?

⁴ Abazaire Abakristaayo nibareeba obwegyese nk’obw’omugasho. Nibamanya ngu okuza aha ishomero kwega nikuhwera abaana baabo kumanya kushoma, kuhandiika, n’okubaasa kugamba n’abantu ab’endimi ezindi, n’okumanya kushoboorora oburemeezi. Obwegyese bushemere

ire kuhwera abaana kwega n’ebindi bintu. Emyoga ei abaana barikwega aha ishomero neebaasa kubahwera kusingura n’obu haraabe hariho oburemeezi bwingi omu nsi obunaku obu. Ekindi, obwegyese burungi nibubaasa kubahwera kukora gye emirimo.—Enfumu 22:29.

5, 6. Abaana aha ishomero nibabaasa kutunga bata obuhabuzi bubi oburikukwata aha by’okuteerana?

⁵ Kwonka, abaana ku barikuza aha ishomero nibashangayo abaana abandi—baingi omuribo abarikureeba ebintu omu muringo gutahikire. Nk’eky’okureeberaho, yetegyereze oku barikureeba ebikwatiraine n’enshonga y’okuteerana hamwe n’emicwe. Omu ishomero rimwe rya siniya omuri Nigeria, omwishiki omwe owaabaire naateerana n’abashaija baingi akaba akira kuha bagyenzi be obuhabuzi bubi aha by’okuteerana. Bakaba bamuhurikiza, n’obu obuhabuzi bwe bwabaire buri bubi munonga obu yaabaire naiha omu bitabo ebirikuga

mba aha by’obushambani. Abaishiki abamwe bakakora nk’oku yaabagambiire. Ekyarugiremu, omwe aha baishiki abo akatwara enda atari mu bushwere kandi yaafa arikugiihamu.

⁶ Eky’obusaasi, aha ishomero obuhabuzi bubi oburikukwata aha by’okuteerana, obumwe tiburikuruga mu baana, beitu n’omu bashomesa baabo. Abazaire baingi nibeerarikirira, abashomesa ku barikwegyesa abaana baabo aha by’okuteerana byonka kwonka bakabura kubeegyesa ebirikukwata aha micwe mirungi n’obujunaanizibwa bwabo nk’abaana. Nyina w’omwishiki w’emyaka 12 akagira ati: “Nitutuura omu kicweka ekirimu abanyadiini baingi, kwonka omu mashomero ga siniya agari omu kicweka eki, nibaha abaana zaakondomu!” Omukazi ogwo hamwe na iba kikabashaasha kukimanya ngu muhara waabo aboojo b’emyaka ye bakaba nibamushaba kubyama nawe. Abazaire nibabaasa kurinda bata ab’omu maka gaabo kutashiishwa emicwe nk’egyo?

7. Obuhabuzi bubi oburikukwata aha by’okuteerana nibubaasa kwetantarwa buta?

⁷ Kwonka shi ni kirungi kuzibira abaana kumanya ebimwe ebirikukwata aha by’okuteerana? Ngaaha. Ni kirungi iwe kweyegyeseza abaana baawe aha bikwatiraine n’eby’okuteerana. (Enfumu 5:1) N’amazima, omu bicweka ebimwe omuri Buraaya na Amerika, abazaire baingi nibagira enshoni kwegyesa abaana baabo aha nshonga egyo. Nikyo kimwe, n’omu bicweka bimwe omuri Afrika abazaire tibarikukira kugaaniira n’abaana baabo aha nshonga egyo. Omuzaire omwe omuri Sierra Leone akagira ati: “Ti ky’obuhangwa omuri Afrika kwegyesa abaana aha by’okuteerana.” Abazaire abamwe nibateekateeka ngu okwegyesa abaana aha by’okuteerana nikibareetera kutandika kushambana! Kwonka shi Ruhanga naagamba ki aha nshonga egyo?

OKU RUHANGA ARIKUREEBA EBY’OKUTEERANA

8, 9. Ni buhabuzi ki oburikukwata aha nshonga eziine akakwate n’eby’okuteerana oburikushangwa omu Baibuli?

⁸ Baibuli neeyoreka gye ngu ti kintu ky’okuhemurana kugamba aha by’okuteerana omu buryo obuhikire. Omuri Israeli, abantu ba Ruhanga bakaba nibaragiirwa kwerundanira hamwe “n’abaana” baabo kuhurikiza ebyabaire biba nibibashomerwa kuruga omu Biragiro bya Musa. (Eky’Ebiragiro 31:10-12; Yoshua 8:35) Ebiragiro bikaba nibigamba butunu aha shonga ezi: Omukazi kuza omu kwezi, okurugwamu amaizi agarikuzaara, obushambani, okubyama n’ou otari nawe omu bushwere, obutingwa, okubyama n’omunyabuzaare, n’okubyama n’enyamaishwa. (Abaleevi 15:16, 19; 18:6, 22, 23; Eky’Ebiragiro 22:22) Bwanyima y’okushomerwa ebyo hatariho kubanganisa abazaire bakaba baba baine bingi eby’okushoboororera abaana baabo.

⁹ Omu shuura ya kataano, eya mukaga n’eya mushanju ez’omu kitabo kya Baibuli ekya Enfumu, harimu bingi ebirikugamba aha ku abazaire abaine rukundo baine kuhabura abaana baabo aha kabi akari omu bushambani. Ebyahandiikirwe ebi nibyoreka ngu hariho ebirikubaasa kureetera omuntu kugwa omu bushambani. (Enfumu 5:3; 6:24, 25; 7:14-21) Kwonka nibyegyesa ngu obushambani ni bubi n’ebirikurugamu ni bibi munonga, kandi nibiha n’obuhabuzi kuhwera eminyeeto kwetantara emicwe mibi. (Enfumu 5:1-14, 21-23; 6:27-35; 7:22-27) Kwonka, okuteerana okuhikire kwine kuba ahagati y’abashweraine bonka. (Enfumu 5:15-20) Ogwo ka n’omuringo murungi gw’okwegyesamu ogu abazaire baine kukuratira!

10. Ahabw’enki okukoresa eby’omuri Baibuli okwegyesa abaana baawe aha nshonga eziine akakwate n’okuteerana kutarikubareetera kwejumba omu by’obushambani?

¹⁰ Mbwenu okwegyesa nk’okwo nikureetera abaana kushambana? Ngaaha, Baibuli neeyegyesa eti: “Abahikiriire baryatambirwa okumanya.” (Enfumu 11:9) Mbwenu torikwenda kucungura abaana baawe kuruga omu mitwarize mibi y’ensi egi? Ishe abaana omwe akagira ati: “Okwiha omu buto bwabo, abaana baitu tutwire nituteeraho kugamba nabo butunu aha nshonga eziine akakwate n’okuteerana. N’ahabw’ekyo, ku barikuhurira abandi baana nibagamba aha nshonga ezo, nibaba bataine kyetengo ky’okwenda kubimanya. Nibiba bitari bisya aharibo.”

11. Abaana nibabaasa kwegyesibwa bata aha by’omubonano nk’oku baragyende nibakura?

¹¹ Nk’oku kigambirweho omu shuura ez’enyima, oine kutandika kare kwegyesa abaana baawe aha nshonga ezo. Waaba nobeegyesa amaziina g’ebicweka by’omubiri, otagira enshoni kubeegyesa n’amaziina genyine ag’ebicweka by’omubonano. Baagyenda nibakura, baine kwegyesibwa ebicweka ebi baine kutwara nk’eby’omubonano. Abazaire bombi nibo baine kwegyesa abaana baabo ngu ebicweka ebyo tiby’okukwatwaho abandi, kworekwa abandi nari kugaaniirwaho omu muringo mubi. Baakura, baine kumanyisibwa ngu omushaija n’omukazi nibateerana kubaasa kuzaara omwana. Baaza kuhika omu mushogoyo, baine kuba nibamanya empindahinduka eziraabe aha mibiri yaabo. Nk’oku kigambirweho omu Shuura ya kataano, okwegyesa nk’okwo nikubaasa kurinda omwana kutatorobozibwa.—Enfumu 2:10-14.

OMURIMO OGU ABAZAIRE BAINE

12. Ni nyegyesa ki ezitahikire ezirikukira kwegyesibwa omu mashomero?

¹² Abazaire baine kuba beteekateekire kworeka abaana baabo enyegyesa z’ensi ezigwire ezi barikubaasa kwegyesibwa aha ishomero nka—okugira ngu ebintu bikabaho birikuruga omu bindi, okuhimbisiriza eihanga, nari ngu tihariho mazima genyine. (1 Abakorinso 3:19; gyeragyeranisa Okutandika 1:27; Abaleevi 26:1; Yohaana 4:24; 17:17.) Abeegyesa baingi omu mashomero nibakira kuhiga abeegi kutunga obwegyese bw’ahaiguru. N’obu kiraabe kiri ekya buri omwe kwecweramu aha nshonga egyo, abashomesa abamwe nibagira ngu nigwo muhanda gwonka ogurikubaasisa omuntu kusingura.a—Zaaburi 146:3-6.

13. Abaana abarikushoma nibabaasa kurindwa bata enyegyesa ezigwire?

¹³ Abazaire baaba bari ab’okuhwera abaana baabo kwetantara enyegyesa ezigwire, baine kubanza kumanya ebi barikwegyesibwa aha ishomero. Abazaire mumanye ngu naimwe mwine eby’okwegyesa abaana baanyu omuka. Fayo munonga kumanya ebi omwana waawe arikwega aha ishomero. Gaaniira nabo baaruga aha ishomero. Babuuze ebi barikwega, ebi barikukunda omu kwega, n’ebi barikushanga bibagumiire. Manya ebibahairwe kukorera omuka, ebi barikuhandiika omu bitabo byabo, n’oku barikukora omu bigyezo. Teeraho kumanya abashomesa baabo. Manyisa abashomesa ngu noosiima ebi barikukora kandi ngu naiwe nooyenda kuhwera nk’oku orikubaasa.

BANYWANI B’ABAANA BAAWE

14. Ahabw’enki ni kikuru ngu abaana abarikutiina Ruhanga batoorane abanywani barungi?

¹⁴ “Iwe ebyo n’oha obikwegyeise?” N’abazaire bangahi abarabuurize abaana baabo ekibuuzo nk’ekyo, barikutaangarira eki omwana yaaheza kugamba nari kukora ekitashemeire? Kandi n’emirundi engahi ei abaana barikugarukamu ngu banywani baabo aha ishomero nari abataahi nibo babitwegyeise? Buzima, abanywani babi nibatushiisha, yaaba turi bakuru nari bato. Entumwa Paulo akarabura ati: “Mutabeihwabeihwa; ekigombe kibi kishiisha emicwe mirungi.” (1 Abakorinso 15:33; Enfumu 13:20) Eminyeeto nibabaasa kushiishwa ab’orwingano rwabo. Nibakira kwetiina kandi obumwe benda kushemeza banywani baabo. Mbwenu ka ni kikuru ngu batoorane abanywani barungi!

15. Abazaire nibabaasa kuhwera bata abaana baabo omu kutoorana abanywani?

¹⁵ Nk’oku buri muzaire arikukimanya, abaana butoosha tibarikukira kutoorana gye; nibeetenga obuhabuzi. Tikirikumanyisa ngu oine kubatooranira abanywani. Kureka, baagyenda nibakura, bahwere kugira okwetegyereza n’okumanya emitwarize mirungi ei baine kureeba omu bu baine kunywana. Omutwarize omukuru n’okukunda Yehova n’okukunda kukora ebirikumushemeza. (Mako 12:28-30) Beegyese okukunda n’okuha ekitiinisa abantu abeesigwa, abaine embabazi, obufura, n’obweziriki. Omu kuramya okw’eka, hwera abaana kwetegyereza emitwarize nk’egyo aha bantu abarikugambwaho omu Baibuli kandi basherure emitwarize niyo emwe omu bandi omu kibiina. Bateereho eky’okureeberaho kirungi orikukuratira obuhabuzi obwo omu kutoorana abanywani abaawe.

16. Abazaire nibabaasa kumanya gye bata abanywani abu abaana baabo baine?

¹⁶ Noomanya banywani b’abaana baawe? Ahabw’enki otarikugambira abaana baawe kureeta banywani baabo omuka okabamanya gye? Noobaasa kubuuza abaana baawe oku abaana abandi barikureeba banywani baabo abo. Nibamanywa nk’abeesigwa nari nk’endyarya? Baaba bari endyarya, hwera abaana baawe kwetegyereza ahabw’enki abanywani babi nk’abo barikubaasa kubashiisha. (Zaaburi 26:4, 5, 9-12) Waareeba empindahinduka ezitari nungi omu micwe y’omwana waawe, emijwarire, emitwarize n’emigambire ye, nikibaasa kwetengyesa ngu ogambe nawe aha bikwatiraine n’abanywani be. Omwana waawe naabaasa kuba naamara obwire n’omunywani orikumureetera kutwaza atyo.—Gyeragyeranisa Okutandika 34:1, 2.

17, 18. Ni buhwezi ki obu abazaire barikubaasa kuha abaana baabo, oyihireho okubarabura aha banywani babi?

¹⁷ Kwonka okwegyesa abaana baawe kwetantara abanywani babi tikirikumara. Bahwere kusherura abanywani abarungi. Omushaija omwe omuzaire naagira ati: “Butoosha tukaba tuteeraho omwana waitu eky’okukora eky’omutaano. Eishomero rikaba niryenda ngu omwana waitu abe omwe aha barazaniire eishomero omupiira gw’ebigyere, nyowe n’omukazi wangye tukakigaaniiraho n’omwana waitu kumworeka ahabw’enki ekyo nikibaasa kutaba kirungi—ahabw’abaana abandi abu baabaire nibaza kuzaana n’abo. Kwonka tukacwamu ngu tweete bamwe aha baana omu kibiina Ekikristaayo tubatware omu kishaayi bazaane hamwe omupiira gw’ebigyere. Kandi ekyo kikahwera omu kushoboorora enshonga egyo.”

¹⁸ Abazaire abarikufayo nibahwera abaana baabo kusherura abanywani barungi kandi bakejumba nabo omu by’okweshemeza ebirungi. Kwonka abazaire baingi nibashanga ngu eby’okweshemeza nk’ebyo nabyo birimu oburemeezi obwabyo.

EBY’OKWESHEMEZA BYA MURINGO KI?

19. Ni by’okureeberaho ki kuruga omuri Baibuli ebirikworeka ngu ti kibi amaka kwejumba omu by’okweshemeza?

¹⁹ Baibuli neyanga eby’okweshemeza? Ngaaha buzima! Baibuli neegira ngu hariho ‘obunaku bw’okusheka . . . n’obunaku bw’okuzina.’b (Omubuurizi 3:4) Abantu ba Ruhanga omuri Israeli eya ira bakaba nibakunda ebyeshongoro n’okuzina, emizaano hamwe n’ebishaakuzo. Yesu Kristo akaza omu bugyenyi bw’okushwera hamwe n’obundi ‘bugyenyi buhango’ obu Matayo Leevi yaamuteekyeire. (Luka 5:29; Yohaana 2:1, 2) Buzima, Yesu akaba atarikuremesa abandi kushemererwa. Eby’okweshemeza n’okusheka tibiine kureebwa nka bibi omu ka yaawe.

20. Abazaire baine kuguma nibaijuka ki aha bikwatiraine n’okuteeraho eka eby’okweshemeza?

²⁰ Yehova ni ‘Ruhanga w’okushemererwa.’ (1 Timoseo 1:11) N’ahabw’ekyo okuramya Yehova kushemereire kutureetera kushemererwa, beitu kutari kuturemesa kushemererwa. (Gyeragyeranisa Eky’Ebiragiro 16:15.) Abaana omu buhangwa nibaba baine amashemererwa n’amaani agu barikubaasa kworekyera omu kuzaana n’eby’okweshemeza. Eby’okweshemeza ebitoorainwe gye nibikira aha kushemererwa kwonka. N’omuringo ogu omwana arikubaasa kwegyeramu kandi akakura omu biteekateeko. Omutwe gw’eka aine obujunaanizibwa bw’okureeberera eka ye omuri byona otwariiremu n’eby’okweshemeza. Kwonka aine kutagwerwa rubaju.

21. Ni bintu ki ebibi ebiri omu by’okweshemeza obunaku obu?

²¹ Omu biro ‘by’emperu’ ebi eby’akabi kaingi, omu nsi harimu abantu “abarikukunda kweshemeza bonka okukira Ruhanga” nk’oku kyagambirweho ira omuri Baibuli. (2 Timoseo 3:1-5) Aha bantu baingi, eby’okweshemeza nikyo kintu kikuru omu magara gaabo. Hariho eby’okweshemeza bingi n’ahabw’ekyo nibibaasa kukuremesa kwebembeza ebirikukira obukuru. Kandi, eby’okweshemeza bingi ebiriho obunaku obu birimu eby’obushambani, ebikorwa by’obushaarizi, abarikukoresa emibazi y’ekitabura bwonko, n’ebikorwa ebindi ebibi munonga. (Enfumu 3:31) Niki ekirikubaasa kukorwa kuhwera eminyeeto kwetantara eby’okweshemeza ebibi?

22. Abazaire nibabaasa kutendeka bata abaana baabo kucwamu gye aha bikwatiraine n’eby’okweshemeza?

²² Abazaire nibeetenga kuteeraho abaana baabo obugarukiro omu by’okweshemeza. Kwonka ekikuru, baine kwegyesa abaana baabo kumanya eby’okweshemeza eby’akabi n’okumanya ahu baine kugarukira. Okutendeka nk’okwo nikwetengyesa obwire n’amaani. Nk’eky’okureeberaho, ishe w’aboojo babiri aketegyereza ngu omutabani omukuru akaba nakira kuhurikiza omukura gwa radiyo omusya. Eizooba rimwe ku yaabaire ari omu motoka ye arikuza kukora, nawe akahurikiza omukura gwa radiyo ogwo. Obumwe akaba ayemereza motoka, ahandiika ebigambo by’ebyeshongoro ebimwe. Bwanyima akashutama n’abatabani baagaaniira aha bi yaahuriire aha mukura gwa radiyo ogwo. Okubaasa kumanya eki barikuteekateeka akababuuza ati: “Nimuteekateeka ki aha nshonga egi?” kandi akahurikiza gye barikugarukamu. Bwanyima y’okugaaniira nabo aha nshonga egyo arikukoresa Baibuli, abatabani bakaikiriza kutagaruka kuhurikiza omukura gwa radiyo ogwo.

23. Abazaire nibabaasa kurinda bata abaana baabo kutejumba omu by’okweshemeza ebibi?

²³ Abazaire Abakristaayo abarikufayo nibateeraho kumanya ebyeshongoro, puroguramu z’aha tiivi, zaavidiyo, emizaano y’aha vidiyo n’ebitabo by’okushoma ebi abaana baabo barikukira kukunda. Nibareeba ebishushani ebiri aha mutwe gw’ebintu nk’ebyo, hamwe n’ebigambo by’ebyeshongoro. Baingi nibatangazibwa “eby’okweshemeza” ebirikuteebwaho ahabw’abaana obunaku obu. Abo abarikwenda kurinda abaana baabo ebyo ebirikubaasa kubashiisha nibagaaniira n’abo aha nshonga egyo, barikukoresa Baibuli n’ebitabo ebirikushoboorora ahari Baibuli, nk’akatabo Questions Young People Ask—Answers That Work n’emitwe emwe erikwizira omuri zaamagaziini Watchtower na Awake!c Abazaire ku barikutaho obugarukiro omu by’okweshemeza kandi bakahamira aha bi bataireho, butoosha ebirikurugamu nibiba birungi.—Matayo 5:37; Abafilipi 4:5.

24, 25. Ni by’okweshemeza ki ebirungi ebi amaka garikubaasa kwejumbamu hamwe?

²⁴ Okuzibira abaana okwejumba omu by’okweshemeza ebibi, n’ekicweka kimwe aha birikuhwera omu kurinda abaana baawe. Waazibira abaana ekibi oine kubooreka ekirungi, kitari ekyo abaana nibabaasa kutandika kwejumba omu bibi. Ab’omu maka maingi Amakristaayo nibaijuka okushemererwa oku baatungire ahabw’okwejumba hamwe omu by’okweshemeza nka—okuba hamwe n’abandi, okurambura, okuzaana emizaano n’okutaayaayira abanyabuzaare nari abanywani. Abandi bashangire ngu okushomerwa omu iraka ririkuhurirwa bari n’abandi nikihuumuriza kandi nikireeta okushemererwa. Abandi nibakunda kutebya ebitebyo ebirikushemeza. Abandi nibakunda kukorera hamwe emirimo, nk’okukora eby’emikono, okuteera ebyeshongoro, okuhuuga ebishushani, nari okwegyera hamwe aha byahangirwe bya Ruhanga. Abaana abarikwega kukunda ebintu nk’ebyo nibarindwa okutejumba omuri ebyo ebibi, kandi nibeega ngu okwejumba omu mirimo nk’egyo nikukira okushutama kushemezibwa abandi. Emirundi mingi okwejumba omu kintu nikushemeza okukira okukireeba kwonka.

²⁵ Okugira emikoro hamwe n’abandi nikubaasa kuba omuringo gumwe ogw’okweshemeza. Yaaba etebeekanisiibwe gye kandi etarimu bantu baingi munonga nari etarikutwara bwire bwingi, neebaasa kushemeza abaana baawe. Neebaasa kuhwera omu kuhamya okukundana kw’abari omu kibiina.—Gyeragyeranisa Luka 14:13, 14; Yuda 12.

EKA YAAWE NEEBAASA KUSINGURA ENSI

26. Aha bikwatiraine n’okurinda eka ebirikubaasa kugishiisha, ni mutwarize ki omukuru ogurikwetengwa?

²⁶ Buzima, okurinda eka yaawe ebirikubaasa kugishiisha nikyetengyesa okukora n’amaani. Kwonka hariho ekintu kimwe ekirikukira ebindi, ekiraakubaasise kusingura. Niyo rukundo! Okukundana kw’abari omu ka emwe nikwija kureetera eka kuba omwanya murungi gw’okutuuramu n’okubamu okukwatanisa, ekirikugirindira kimwe ebirikubaasa kugishiisha. Kandi, okuteeraho kugira rukundo ey’omuringo ogundi ni kikuru munonga—okukunda Yehova. Rukundo nk’egyo yaaba einwe boona omu ka, abaana nibabaasa kukura barikwanga okwejumba omu bintu by’ensi ebitarikushemeza Ruhanga. Kandi abazaire abarikukundira kimwe Yehova nibaija kuteeraho kumutooreza omu mitwarize nka rukundo, okutwaza gye n’omu mitwarize mirungi endiijo. (Abaefeso 5:1; Yakobo 3:17) Abazaire baakora batyo, abaana tibarikwija kureeba okuramya Yehova nka kimwe aha bintu ebi batashemereire kukora nari nk’ekirikubahemura eki bashemereire kwetantara juba. Kureka, nibaija kureeba okuramya Ruhanga, nk’ekirikureeta okushemererwa n’okumarwa omu magara.

27. Eka neebaasa kusingura eta ensi?

²⁷ Amaka agarikuguma gaine obumwe n’okushemererwa omu kuheereza Ruhanga, gakateeraho kuguma ‘gataine mabara mabi n’obu kaakuba akamogo’ ebirikureetwa emitwarize mibi y’ensi egi, buzima nigashemeza Yehova. (2 Petero 3:14; Enfumu 27:11) Amaka nk’ago nigatooreza Yesu Kristo, otaraikirize ensi ya Sitaane kumushiisha. Ari haihi kufa, Yesu akabaasa kugira ati: “Nyowe nsingwire ensi.” (Yohaana 16:33) Eka yaawe nayo neebaasa kusingura ensi kandi ebemu okushemererwa ebiro byona.

[Obugambo obw’Ahansi]

EMISINGYE YA BAIBULI EGI NEEBAASA KUKUHWERA ETA . . . OKURINDA EKA YAAWE?

Okumanya nikureeta obwengye, oburikubaasa kurinda amagara g’omuntu.—Omubuurizi 7:12.

“Obwengye bw’ensi egi n’obushema ahari Ruhanga.”—1 Abakorinso 3:19.

Abanywani babi bashemereire kwetantarwa.—1 Abakorinso 15:33.

Eby’okweshemeza n’obu biraabe nibyetengwa, bishemereire kugira obugarukiro.—Omubuurizi 3:4.

[Akabokisi aha rupapura 97]

TARAHUREIRE AINE EKI ARIKUFEERWA

Abazaire Abakristaayo Paulo n’omukazi we Lu-Ann, nibakira kweta abantu omu ka yaabo. Nibateeraho kureeba ngu tibayeta bantu baingi kandi ngu babareeberera gye. Nibakora ekyo kugira ngu abaana baabo bagasirwe.

Lu-Ann naagira ati: “Nyina w’omwana ou mutabani wangye Eric ow’emyaka mukaaga arikushoma nawe, akaija kungambira ngu tarashemereirwe ahakuba Eric akashutama wenka kandi tarayegaitsire aha b’omu kibiina kye omu kukuza ebiro by’amazaarwa. Nkamugira nti: Ninkusiima okureeba ngu noofayo ahari mutabani wangye. Nikyoreka eki buzima ori. Kandi buzima tihariho eki ndikubaasa kugamba ekirikubaasa kukuhamiza ngu Eric tarikuhurira ngu aine eki yaafeereirwe. Akaikiriza. Reero naamugira nti: Mbwenu okwenda kuhamya ekyo gyenda, oyeebuurize Eric oku arikuhurira. Ku naabaire ntariho omukazi ogwo akabuuza Eric ati: Torikuhuurira oine eki orikufeerwa waaba otagiire omu bugyenyi obw’okukuza amazaarwa nk’obwo? Eric akamureeba aha maisho reero yaamugira ati: Nooteekateeka ngu obwire bukye, n’obugaati bukye, n’ekyeshongoro obwo n’obugyenyi? Oshemereire kwija omu ka yaitu okareeba oku obugyenyi bwenyine buri!” Ebigambo by’omwojo ogwo bikakyoreka gye ngu tihaine eki yaabaire afeereirwe.

[Ekishushani ekiri aha rupapura 99]

Eby’okweshemeza ebirungi nk’okurambura hamwe nk’eka, nibibaasa kuhwera abaana kwega n’okukura omu by’omwoyo