Ebi Abaana Barikwetenga Kuruga Aha Bazaire

ABAZAIRE bombi nibejumba omu murimo mukuru ogu omuntu ondiijo weena atarikubaasa kwetegyereza gye. Buri omwe aharibo haine eki arikuhayo kuruga omu mubiri gwe. Ekirikurugamu, omwana naatandika kukura omunda ya nyina. N’ahabw’ekyo tikirikutangaaza, kureeba ngu omwana ku arikuzaarwa, abantu nibagamba aha “kuzaarwa nk’ekirikutangaaza.”

Buzima, abazaire ku barikuzaara omwana obujunaanizibwa bw’okumureeberera nibwo burikuba bwatandika. Omu kubanza, omwereere naaba naatunga buri kimwe kuruga aha bazaire be, kwonka ku arikuguma naakura naaba naayetenga ebirikukira aha byetengo by’omubiri. Naayetenga obuhwezi kubaasa kukura omu biteekateeko, omu kugira emicwe mirungi n’omu by’omwoyo.

Abaana kubaasa kukura gye baine kuba nibakundwa abazaire baabo. N’obu ebigambo ebirikworeka rukundo biraabe biri bikuru, biine kukuratirwa ebikorwa. Buzima, abazaire baine kuba eky’okureeberaho kirungi aha baana baabo. Nibeetenga obuhabuzi aha bikwatiraine n’emicwe mirungi n’emisingye ei baine kugyenderaho. Kandi ebyo byona nibabyetenga kuruga omu buto. Nihabaasa kubaho oburemeezi baaba batahairwe buhwezi omu myaka yaabo y’obuto.

Emisingye mirungi erikubaasa kubahwera n’egyo erikushangwa omuri Baibuli. Obuhabuzi oburikuruga omu Baibuli n’obw’omugasho omu muringo gw’omutaano. Kurabira omu kwegyesibwa nk’okwo, abaana nibamanya ngu ebi barikugambirwa ti bigambo by’abantu kureka n’ebi Omuhangi waabo, Ishebo ow’omu iguru arikugamba. Baibuli neebaha obuhabuzi obutarikubaasa kwinganisibwa n’obundi bwona.

Baibuli neehiga abazaire kuteeraho n’amaani kuhwera abaana baabo kwetegyereza emisingye egyo kandi bakagigyenderaho. Kwonka, nk’oku abaana barikugyenda nibakura, abazaire nibashanga kitoorobi kugaaniira nabo aha bintu ebirikukira obukuru. Ekitabo eki, Yegyera aha Mwegyesa Mukuru, kihandiikirwe kuhwera kuzibira embeera nk’egyo kubaho. Nikiija kuhwera abazaire n’abaana baabo baaba nibashoma hamwe ebintu ebirikukwata aha by’omwoyo. Okwongyera ahari ekyo, nikiija kuhiga abaana kugaaniira n’abantu abakuru abarikukishoma nabo.

Noija kwetegyereza ngu ekitabo eki nikihiga abaana kugira eki baagarukamu. Omu kitabo eki harimu ebibuuzo bingi ebirikwija kubahwera omuri ekyo. Ahu ebibuuzo biri noija kushanga hariho dashi (—). Ekyo nikikwijutsya ngu oine kutegyerezaho omwana akagamba eki arikuteekateeka. Abaana ekyo nibakikunda. Omwana waaba otamwikiriize kukora ekyo, naija kurahuka kutamwa.

Ekikuru munonga, ebibuuzo ebyo nibiija kukuhwera kumanya eki omwana arikuteekateeka. Omwana naabaasa kugarukamu ekitahikire. Kwonka eky’okugarukamu ekiri omu maisho ga buri kibuuzo nikibaasa kuhwera omwana kutunguura emiteekateekyere ye.

Ekintu ky’omutaano ekiri omu kitabo eki, n’ebishushani birikurenga omuri 230. Ebishushani ebingi biriho ebibuuzo ebirikuhiga omwana kugira eki yaagamba, kurugiirira aha bi arikureeba n’ebi yaashoma. N’ahabw’ekyo iwe n’omwana mushwijume ebishushani ebyo. Nibibaasa kuhwera munonga omu kwegyesa omwana n’okuhamiiriza enshonga enkuru.

Omwana yaayega okushoma, muhige kukushomera omu kitabo eki kandi nawe akyeshomere ahabwe. Oku omwana araayeyongyere kukishoma, nikwo n’obuhabuzi bwakyo burungi buraahame omu biteekateeko n’omu mutima gwe. Okubaasa kuhamya omukago n’omwana waawe, oine kuteeraho kukishoma nawe butoosha.

Okukira oku kyabaire kiri, hati hariho ebintu bibi bingi ebi abaana barikubaasa kwohibwa kwejumbamu nk’eby’obushambani, eby’obufumu n’ebindi bikorwa bibi. N’ahabw’ekyo, nibeetenga kurindwa kandi ekitabo eki nikiha obuhabuzi burungi omu kukora ekyo. Kwonka, abaana baine kuhwerwa kumanya Oburugo bw’obwengye bwona, Tataitwe ow’omu iguru Yehova Ruhanga. Ekyo nikyo Omwegyesa Mukuru Yesu, yaabaire akora butoosha. Twine amatsiko ngu ekitabo eki nikiija kukuhwera n’ab’omu ka yaanyu kutwaza amagara gaanyu omu muringo ogurikushemeza Yehova, kugira ngu agume abahe emigisha.