Tushemereire Kwehimbisa Ahabw’Ekintu Kyona?

OKWEHIMBISA nikimanyisa ki? Noomanya eki kirikumanyisa?— Aha hariho eky’okureeberaho. Oraateireho kukora ekintu eki otarikumanya kukora gye? Obundi oraateireho kuteera omupiira. Nari oraateireho kuvuga egaari. Haine owaakushekyereire kandi akagira ati: “Nyowe nimmanya kukukiza”?— Buzima omuntu ogwo akaba naayehimbisa.

Noohurira ota abandi baakugambira ekyo? Mbwenu nooshemererwa?— Nooteekateeka ngu abandi nibahurira bata ku orikwehimbisa?— Mbwenu ni kirungi okugambira omuntu ondiijo ngu, “Nimmanya kukukiza”?— Nooteekateeka ngu Yehova naakunda abantu abarikwehimbisa?—

Omwegyesa Mukuru akaba naamanya abantu abaabaire nibateekateeka ngu bakaba nibakira abandi. Bakaba beehimbisa kandi bagaya abandi boona. N’ahabw’ekyo eizooba rimwe Yesu akabatebeza ekitebyo kubooreka ngu kikaba kigwire bo kwehimbisa. Ka tukishomeho.

Ekitebyo ekyo nikikwata aha Mufarisaayo n’omuhooza. Abafarisaayo bakaba bari abeegyesa b’ediini, abaabaire nibeetwara nk’abahikiriire nari abarikwera okukira abantu abandi. Omufarisaayo ow’omu kitebyo kya Yesu akaza omu hekalu ya Ruhanga omuri Yerusaalemu kushaba.

Yesu akagira ngu omuhooza nawe akaza omu hekalu kushaba. Abantu baingi bakaba batarikukunda abahooza. Bakaba nibateekateeka ngu abahooza bakaba nibabaiba. Kandi n’eky’amazima abahooza baingi bakaba batari beesigwa.

Omu hekalu, Omufarisaayo akatandika kushaba Ruhanga arikugamba ati: ‘Ai Ruhanga, ninkusiima, ahakuba tindi musiisi nk’abantu abandi. Tindikwiba bantu kandi tindikukora bibi ebindi. Tindi nk’omuhooza oriya. Ndi omuntu ohikiirire. Nyesiibyakwo kabiri omu saabiiti kugira ngu ntungye obwire bw’okukuteekateekaho. Mpeereza kimwe kya ikumi kya byona ebi ntunga.’ Omufarisaayo buzima akaba naateekateeka ngu akaba ahikiriire okukira abandi, tikwo?— Kandi ekyo akakigambira na Ruhanga.

Kwonka omuhooza akaba atari nk’Omufarisaayo ogwo. Obu yaabaire naashaba tarabaasize kwimutsya maisho gye ahaiguru. Akaguma ayemereire hangahari ayinikire omutwe gwe. Omuhooza akashaasha ahabw’ebibi ebi yaakozire, kandi akeeteera omu kifuba aine amaganya. Tarateireho kugambira Ruhanga ngu akaba ari murungi. Kwonka akashaba ati: ‘Ai Ruhanga, onsaasire nyowe omusiisi.’

Nooteekateeka ngu aha bashaija aba babiri, n’oha owaashemeize Ruhanga? Noogira ngu n’Omufarisaayo owaateekateekire ngu akaba ahikiriire? Nari omuhooza owaashabire okusaasirwa ahabw’ebibi bye?—

Yesu akagira ngu omuhooza niwe yaashemeize Ruhanga. Ahabw’enki? Yesu akashoboorora ati: “Ahakuba weena orikwetunguura aryagarurwa ahansi; kandi orikwegarura ahansi, aryatunguurwa.”—Luka 18:9-14.

Niki eki Yesu yaabaire naateeraho kutwegyesa omu kitebyo ekyo?— Akaba naatwegyesa ngu tikihikire okuteekateeka ngu nitukira abandi. Nitubaasa kutagamba ngu nitukira abandi, kwonka oku turikutwaza, nikubaasa kworeka ngu nitwetwara nk’abarikukira abandi. Oraatwarizeho omu muringo nk’ogwo?— Ka tureebe eky’okureeberaho kya Petero.

Yesu ku yaagambiire entumwa ze ngu boona bakaba nibaija kumutsigaho yaaheza kukwatwa, Petero akeehimbisa arikugira ati: ‘N’obu abandi boona baraakutsigyeho, nyowe tindikwija kukutsigaho na kakye.’ Kwonka Petero akaba atahikire. Akeeyesiga munonga. Akaija yaatsigaho Yesu. Kwonka akagaruka, nk’oku turikwija kureeba omu Shuura 30 ey’ekitabo eki.​—Matayo 26:31-33.

Ka tureebe eky’okureeberaho eky’omu bwire obu. Obundi iwe n’ou orikushoma nawe ah’eishomero nibabaasa kubabuuza ebibuuzo. Okaakora ki ku waakuba noobaasa kuha eky’okugarukamu ahonaaho kwonka omwegi mugyenzi waawe ogwo atarikubaasa? N’eky’amazima noohurira gye waaba noomanya eky’okugarukamu. Kwonka shi nikiba kiri kirungi okwegyeragyeranisa n’ondiijo otarikurahuka kugarukamu?— Mbwenu kihikire okuteeraho okwetwara nk’omuntu w’ahaiguru orikutwara abandi nk’ab’ahansi?—

Ekyo nikyo Omufarisaayo yaakozire. Akeehimbisa arikugira ngu naakira omuhooza. Kwonka Omwegyesa Mukuru akagira ngu Omufarisaayo akaba atahikire. N’eky’amazima ngu omuntu naabaasa kukora gye ekintu okukira ondiijo. Kwonka ekyo tikirikumanyisa ngu omuntu ogwo buzima naakira abandi.

Twaba nitumanya bingi okukira omuntu ondiijo, ekyo kishemereire kutureetera kwehimbisa?— Kiteekateekeho. Mbwenu naitwe twayehaire obwonko obu twine?— Ngaaha, Ruhanga niiwe yaahaire buri omwe obwonko. Kandi ebintu bingi ebi turikumanya, tukabyega kuruga aha muntu ondiijo. Obundi tukabishoma omu kitabo, nari omuntu akabitugambira. N’obu twakweshoboororera oburemeezi, nituba tukikozire tuta?— Buzima, nitukikora turikukoresa obwonko obu Ruhanga yaatuhaire.

Omuntu yaateeraho kukora ekintu, nikiba kiri kirungi iwe okumugambira ekirikumuhiga kweyongyera kukora gye. Mugambire ngu eki akozire nikikushemeza. Nangwa noobaasa n’okumuhwera kweyongyera kukikora gye. Ekyo naiwe nikyo waakwenzire abantu bakukorere, tikwo?—

Abantu abamwe baine amaani agarikukira ag’abandi. Mbwenu shi ku waakuba nookiza mwene sho nari munyaayoko amaani? Ekyo kishemereire kukureetera kwehimbisa?— Ngaaha buzima. Ahakuba eby’okurya ebi turikurya nibyo birikutureetera kugira amaani. Kandi Ruhanga naareeta enjura, omushana, hamwe n’ebindi ebirikureetera ebimera kukura, tikwo?— N’ahabw’ekyo, ni Ruhanga ou tushemereire kusiima twagira amaani mingi.​—Ebyakozirwe 14:16, 17.

Tihariho n’omwe ahariitwe orikwenda kuhuurira omuntu naayehimbisa, tikwo?— Ka tugume nitwijuka ebigambo bya Yesu ebi: “Nk’oku mwenda abantu kubagirira, naimwe mube nikwo mwabagirira.” Twakora ekyo, titurikwija kuba nk’Omufarisaayo owaayehimbisize, omu kitebyo eki Omwegyesa Mukuru yaatebize.—Luka 6:31.

Omurundi gumwe omuntu akeeta Yesu omwegyesa murungi. Mbwenu Omwegyesa Mukuru akagira ngu ‘Eego ndi murungi’?— Ngaaha. Omu mwanya gw’ekyo akagira ati: “Tihariho murungi, kureka Ruhanga wenka.” (Mako 10:18) N’obu Omwegyesa Mukuru yaabaire ahikiriire, tarayehimbiise. Kureka akahimbisa Ishe, Yehova.

Mbwenu hariho ou tushemereire kwesiimisa?— Eego buzima ariho. Nitubaasa kwesiimisa Omuhangi waitu, Yehova Ruhanga. Twareeba eizooba nirirenga nari ebindi bihangwa ebirikutangaaza, nitubaasa kugambira omuntu tuti, ‘Ruhanga Waitu omurungi, Yehova, niwe yaahangire ebi!’ Butoosha ka tube tweteekateekire kugamba aha bintu birungi ebi Yehova akozire n’ebi arikwija kukora omu biro by’omumaisho.