Nitubaasa Kuzooka!

MBWENU shi twafa, Ruhanga naija kutuzoora, tugarukye tube abahuriire?— Omushaija murungi Yobu akaba naikiriza ngu Ruhanga akaba naija kumuzoora. N’ahabw’ekyo Yobu ku yaateekateekire ngu ari haihi kufa, akagira Ruhanga ati: ‘Oryanyeta, naanye ndyakwetaba.’ Yobu akagira ngu Yehova Ruhanga akaba naija kugira ekihika, nari ayende munonga, kuzoora Yobu.​—Yobu 14:14, 15.

Yesu ari nk’Ishe Yehova Ruhanga. Yesu naakunda kutuhwera. Omushaija owaabaire arwaire ebibembe ku yaagizire Yesu ati, “ku oraabe nookunda, noobaasa kunshemeza,” Yesu akamugarukamu ati: “Ninkunda.” Kandi akakiza omushaija ogwo owaabaire arwaire ebibembe.​—Mako 1:40-42.

Yesu akeegyera ahari Ishe okukunda abaana. Emirundi ebiri ira, Yehova akakoresa abaheereza be kuzoora abaana bato. Eliya akashaba Yehova kuzoora mutabani w’omukazi owaabaire akoreire Eliya eby’obufura. Kandi Yehova akakikora. Yehova ogundi omurundi akakoresa omuheereza we Elisa kuzoora omwana muto w’omwojo.​—1 Abagabe 17:17-24; 2 Abagabe 4:32-37.

Ti kirungi munonga kumanya ngu Yehova naatukunda munonga?— Tarikututeekateekaho tukiri abahuriire bwonka. N’obu twakufa naaguma naatwijuka. Yesu akagira ngu abo abu Ishe arikukunda n’obu baakufa Ishe naabareeba nk’abahuriire! (Luka 20:38) Baibuli neegira ngu ‘n’obu kwakuba okufa, nari amagara, nari ebiriho, nari ebiribaho, tihaine kiribaasa kututaanisa n’okukunda kwa Ruhanga.’​—Abarooma 8:38, 39.

Obu Yesu yaabaire ari omu nsi, akooreka ngu Yehova naafa aha baana bato. Ijuka ngu Yesu akagira obwire bw’okwegyesa abaana ebirikukwata ahari Ruhanga. Kwonka shi noomanya ngu Ruhanga niwe yaahaire Yesu amaani g’okuzoora abaana?— Ka tugambe aha bwire obu Yesu yaazoora omwishiki w’emyaka 12 muhara w’omushaija orikwetwa Yairo.

Yairo akaba naatuura n’omukazi we n’omwana waabo omwe haihi n’enyanja ya Galilaaya. Eizooba rimwe ogwo mwishiki muto akarwara munonga, kandi Yairo yaareeba ngu naaza kufa. Yairo yaatandika kuteekateeka ahari Yesu, omushaija w’amaani ou yaahuriire ngu naabaasa kukiza abantu. Atyo Yairo agyenda kumusherura. Ashanga Yesu aha nkungu y’Enyanja ya Galilaaya, arikwegyesa abantu baingi.

Yairo araba omu bantu baingi ahika ahari Yesu atsimba amaju omu maisho ge. Agira Yesu ati: ‘Kahara kangye naatsiga kari kubi munonga. Nakweshengyereza ija okakize.’ Ahonaaho Yesu agyenda na Yairo. Abantu baingi abaabaire baizire kureeba Omwegyesa Mukuru nabo babakurata. Kwonka ku baabaire nibakigyenda, abashaija baija kuruga omu ka ya Yairo baamugira bati: “Muhara waawe yaakaba; nooruhiza ki omwegyesa?”

Yesu ahurira eki abashaija abo baagamba. Naamanya obusaasi obu Yairo aine ahabw’okufeerwa omwana we omwe wenka. Yesu amugira ati: ‘Otatiina; gira okwikiriza omuri Ruhanga, muhara waawe naija kuba gye.’ Bagumizamu nibagyenda okuhitsya obu bahikire omu ka ya Yairo. Banywani b’eka bariyo nibacura. Baine obusaasi ahakuba kanywani kaabo kaafa. Kwonka, Yesu abagira ati: ‘Murekye kuriira; omwana tafiire, kwonka agwejegyeire.’

Yesu ku yaagambire ekyo, abantu baatandika kusheka, ahakuba bakaba nibamanya ngu omwishiki afiire. Nooteekateeka ngu n’ahabw’enki Yesu yaagizire ngu omwishiki ogwo agwejegyeire?— Noogira ngu niki eki yaabaire naayenda kwegyesa abantu?— Akaba naayenda bamanye ngu okufa kuri nk’okugwejegyerera kimwe. Akaba naayenda bamanye ngu arikukoresa amaani ga Ruhanga, naabaasa kuzoora omuntu ofiire nk’oku turikubaasa kusisiimura omuntu ogwejegyeire.

Yesu akagambira abantu boona kushohora yaaguma na Petero, Yakobo, Yohaana n’ishe na nyina w’omwishiki. Reero yaaza ahu omwana yaabaire ari. Yaamukwata aha mukono, yaamugira ati: ‘Mwishiki ’we, imuka.’ Ahonaaho omwishiki yaimuka yaatandika kugyenda! Ishe na nyina baagira okushemererwa kwingi.​—Mako 5:21-24, 35-43; Luka 8:40-42, 49-56.

Hati teekateeka ahari eki. Yesu ku araabe yaabaasize kuzoora omwishiki ogwo, naabaasa kuzoora n’abandi?— Nooteekateeka ngu buzima naija kukikora?— Eego. Yesu we wenka akagira ati: “Obunaku nibwija, abari omu bituuro boona abarikwijukwa obu barihurira eiraka [ryangye] bakarugamu.”​—Yohaana 5:28, 29, NW.

Nooteekateeka ngu Yesu naakunda kuzoora abantu?— Eky’okureeberaho ekindi omuri Baibuli nikituhwera kugarukamu ekibuuzo ekyo. Ekyabaireho eizooba rimwe haihi n’orurembo rwa Naini nikyoreeka oku Yesu arikukwatwaho abantu baaba baine obusaasi ahabw’okufeerwa abantu baabo.

Hakaba hariho omukazi owaabaire ari n’abantu baingi barikuruga omu rurembo Naini barikuza kuziika omutabani. Enyimaho akaba afeereirwe iba, kandi hati omwana we omwe wenka yaafa. N’ahabw’ekyo akaba aine obusaasi bwingi. Abantu baingi omuri Naini baamukuratira barikutwara omutumbi gw’omutabani aheeru y’orurembo kuguziika. Omukazi akaba ariyo naarira, kandi abantu bakaba bataine eki baabaire nibabaasa kukora kumugumya.

Aha eizooba eryo, Yesu n’abeegi be bakaba nibaza omu rurembo Naini. Baabugana abantu baingi haihi n’omuryango gw’orurembo barikuza kuziika mutabani w’omukazi ogwo. Yesu ku yaareebire omukazi ogwo naarira, yaamugirira esaasi. Akakwatwaho munonga ahabw’obusaasi bwingi obu omukazi ogwo yaabaire aine. Akenda kumuhwera.

N’ahabw’ekyo n’embabazi akagira omukazi ati: ‘Reka kurira.’ Emitwarize n’eki yaakozire bikareetera buri omwe kumutaho amaisho. Yesu ku yairiire haihi n’omutumbi, boona baakebuuza eki yaabaire naaza kukora. Yesu yaagira ati: “Mwojo ’we, ninkugira nti: Imuka!” Ahonaaho, yaashutama yaatandika kugamba.​—Luka 7:11-17.

Teekateeka aha ku omukazi yaahuriire. Okaahurira ota waaba nooyakiira omukundwa waawe owaakuba afiire kwonka akazooka?— Eki tikirikworeka buzima ngu Yesu naakunda abantu kandi ngu naayenda kubahwera?— Teekateeka aha kushemererwa okuribaho omu nsi ya Ruhanga ensya, abantu barikwakiira abarizooka.​—2 Petero 3:13; Okushuuruurwa 21:3, 4.

Omu bwire obwo bamwe aha barizooka baryaba bari abantu abu twabaire nitumanya, otwariiremu n’abaana. Nitwija kubamanya nk’oku Yairo yaamanyire omuhara obu Yesu yaamuzoora. Abamwe nibaija kuba bari abantu abaafiire omu myaka ya ira munonga. N’obu baraabe baafiire ira munonga Ruhanga tarikwija kubeebwa.

Tikirikukushemeza kumanya ngu Yehova Ruhanga n’Omwana we, Yesu, nibatukunda munonga batyo?— Tibarikwenda ngu tugumeho ebiro bikye byonka, kwonka nibenda ngu tugumeho ebiro byona.