Ruhanga Noobaasa Kumwirira Haihi Ota?

1. Ruhanga naagarukamu okushaba kwona?

Ruhanga naayenda ngu abantu b’emiringo yoona bamwirire haihi kurabira omu kushaba. (Zaaburi 65:2) Kwonka tarikugarukamu okushaba kwona. Nk’eky’okureeberaho, omushaija yaaba naatwariza kubi omukazi we, okushaba kwe nikubaasa kutagarukwamu. (1 Petero 3:7) Kandi Abaisraeli ku baabaire banga kweteisa, Ruhanga akaba atagarukamu okushaba kwabo. Buzima okushaba n’omugisha ogu tutashemereire kuzaanisa. Kwonka omuntu orikuba akozire ekibi ky’amaani, ku arikweteisa Ruhanga naahurira okushaba kwe.​—Shoma Isaaya 1:15; 55:7.

2. Tushemereire kushaba tuta?

Okushaba ni kimwe aha birikutwarirwa omu kuramya, n’ahabw’ekyo tushemereire kushaba Omuhangi waitu wenka, Yehova. (Matayo 4:10; 6:9) Kandi obu turi abatahikiriire, tushemereire kushaba turikurabira omu iziina rya Yesu ahakuba akafa ahabw’ebibi byaitu. (Yohaana 14:6) Yehova tarikwenda ngu tushabe eshaara ezihandiikirwe nari ezi tukwatsire omu mutwe. Naayenda ngu tumushabe twihire aha mutima.​—Shoma Matayo 6:7; Abafilipi 4:6, 7.

Na twashabira aha mutima, Omuhangi waitu naatuhurira. (1 Samueli 1:12, 13) Nitubaasa kumushaba ahu turikwendera hoona, nk’omu kasheeshe nari nyekiro, twaba nituza kurya nari twahikwaho oburemeezi.​—Shoma Zaaburi 55:22; Matayo 15:36.

3. Ahabw’enki Abakristaayo ab’amazima nibaza omu nteerane?

Okwirira haihi Yehova tikyorobi ahakuba nitutuura n’abantu abatarikumworobera, n’abatarikwikiriza ngu naaza kureeta obusingye omu nsi. (2 Timoseo 3:1, 4; 2 Petero 3:3, 13) N’ahabw’ekyo, nitwetenga kuteeranira hamwe n’ab’eishe-emwe tukagumyana.​—Shoma Abaheburaayo 10:24, 25.

Okuba n’abantu abarikukunda Ruhanga, nikituhwera kumwirira haihi. Enteerane z’Abajurizi ba Yehova nizihwera abarikuzibamu kugasirwa omu kwikiriza kw’abandi.​—Shoma Abarooma 1:11, 12.

4. Ruhanga noobaasa kumwirira haihi ota?

Noobaasa kwirira haihi Yehova orikuteekateeka munonga aha bi oyegire omu Kigambo kye. Teekateeka aha ki orikubaasa kwega aha bi yaakozire, omu buhabuzi bwe n’ebi arikuraganisa. Okushaba n’okuteekateeka nk’okwo nibituhwera kwetegyereza rukundo ya Ruhanga n’obwengye bwe.​—Shoma Yoshua 1:8; Zaaburi 1:1-3.

Waayesiga Ruhanga kandi okaikiriza ebi yaaraganiise, nikikuhwera kumwirira haihi. Kwonka okwikiriza ni nk’ekintu ekiine amagara ekirikuba kiine kuriisibwa. Butoosha oine kukwombeka orikuteekateeka munonga aha bi oyegire.​—Shoma Matayo 4:4; Abaheburaayo 11:1, 6.

5. Okwirira haihi Ruhanga nikikugasira kita?

Yehova naahwera abo abarikumukunda. Naabarinda ebirikubaasa kushiisha okwikiriza kwabo, bikabaremesa kutunga amagara agatahwaho. (Zaaburi 91:1, 2, 7-10) Naaturabura aha mitwarize ey’akabi aha magara erikubaasa kuturemesa kushemererwa. Yehova naatwegyesa ngu okumuheereza nikyo kirikukirayo oburungi.​—Shoma Zaaburi 73:27, 28; Yakobo 4:4, 8.