Abantu baingi tibaakiza mu maramizo ahakuba ku barikuzayo tibarikuhuumurizibwa, n’ebibuuzo byabo ebikuru tibirikugarukwamu. Mbwenu shi ahabw’enki oshemereire kuza omu nteerane z’Abajurizi ba Yehova? Noija kuzigasirwamu ota?

Noija kushemererwa kuba n’abantu abaine rukundo. Omu kyasha ky’okubanza, Abakristaayo bakaba bateeranira omu bibiina byabo kuramya Ruhanga, kwega Ebyahandiikirwe n’okugumyana. (Abaheburaayo 10:24, 25) Bakaba bashemererwa kuba n’ab’eishe-emwe bagyenzi baabo abaine rukundo. (2 Abatesalonika 1:3; 3 Yohaana 14) Naitwe nitutooreza ab’eishe-emwe abo, tutunga okushemererwa.

Noija kwega oku orikubaasa kugyendera aha misingye ya Baibuli. Nk’oku kirikworekwa omu Baibuli, abashaija, abakazi n’abaana nibateeranira hamwe. Abo abahikire kwegyesa nibakoresa Baibuli kutuhwera kumanya oku twine kugyendera aha misingye ya Baibuli. (Eky’Ebiragiro 31:12; Nehemia 8:8) Twena nitubaasa kworeka ngu twine amatsiko turikwejumba omu kuhikaanisa ebiteekateeko n’okweshongora.​—Abaheburaayo 10:23.

Okwikiriza kwawe nikwija kuhama. Entumwa Paulo akagambira ab’omu kibiina kimwe ati:“Mbainiire orushusho . . . kugira ngu tugumyane, nyowe ngumibwe okwikiriza kwanyu, naimwe okwangye.” (Abarooma 1:11, 12) Okuba n’ab’eishe-emwe omu nteerane zaitu butoosha nikihamya okwikiriza kwaitu kituhiga n’okumariirira kugyendera aha misingye ya Baibuli.

Nitukweta kwija omu nteerane zaitu obaase kwereebera ebyo byona. Tihariyo kushorooza sente.

• Enteerane zaitu nizishushana zita n’ez’Abakristaayo aba ira?

• Nitugasirwa tuta twaza omu nteerane z’Ekikristaayo?

Nituza omu nteerane zaitu z’Ekikristaayo butoosha n’obu embeera y’obwire yaakuba eri mbi nari emihanda ei turikurabamu erikutiinisa. Ahabw’enki nituteeraho kuza omu nteerane n’obu obumwe turaabe nituba twine oburemeezi nari turuhire?

Okuba omu nteerane nikutugasira. Entumwa Paulo arikugamba aha kuba n’abandi omu nteerane, akagira ngu “tuteekateekye oku twakwezirikisana.” (Abaheburaayo 10:24) Ebigambo ebi nibyoreka ngu twine kufayo kumanyana. N’ahabw’ekyo, ebigambo bya Paulo nibituhiga kufayo aha bandi. Okufayo kumanya abandi omu kibiina nikituhwera kumanya oku bamwe babaasize kusingura oburemeezi nk’obu twine kandi naitwe nibabaasa kutuhwera kubusingura.

Nikituhwera kugira emikago ehami n’abagyenzi baitu. Abu turikuba turi nabo omu nteerane zaitu, n’abanywani abaabuzima. Obumwe nitwejumba hamwe omu by’okweshemeza ebirungi. Okuba n’abanywani nk’abo nikitugasira kita? Nikituhwera kwongyera kumanyana gye n’okukundana. Baaba baine oburemeezi nitubahwera ahakuba nituba twine nabo omukago guhami. (Enfumu 17:17) Twaba nitukwatanisa na buri omwe omu kibiina nitworeka ngu nitufayo aha bandi.​—1 Abakorinso 12:25, 26.

Nitukuhiga kunywana abo abarikukunda kukora ebi Ruhanga akunda. Noija kutunga abanywani nk’abo omu Bajurizi ba Yehova. Otaikiriza ekintu kyona kukuremesa kuguma nooza omu nteerane zaitu.

• Ahabw’enki okuba hamwe omu nteerane kirikutugasira?

• Ni ryari obu oraije omu nteerane zaitu okongyera kutumanya gye?

Enteerane z’Abakristaayo aba ira zikaba zibamu okweshongora, okushaba, okushoma Ebyahandiikirwe n’okubihikaanisaho ebiteekateeko. Zikaba zitabamu migyenzo. (1 Abakorinso 14:26) Nikwo n’enteerane zaitu hati ziri.

Ebi turikwegyesibwa nibiruga omu Baibuli. Aha sande, buri kibiina nikiheebwa Orubazo rwa Boona kuruga omu Baibuli. Orubazo orwo orw’edakiika 30 nirutuhwera kwetegyereza oku Ebyahandiikirwe birikutugasira n’oku birikukwata aha biro ebi turimu. Twena nituhigwa kukuratira omu Baibuli zaitu ebyahandiikirwe byaba nibishomwa. Bwanyima y’orubazo, nihabaho Okwega Omunaara gw’Omurinzi okurikumara eshaaha emwe kandi buri omwe naikirizibwa kwejumba omu kuhikaanisa ebiteekateeko aha kicweka ekirikuba kiri omu Watchtower. Eki nikituhwera kugyendera aha buhabuzi bwa Baibuli. Ebibiina ebirikurenga aha 115,000 omu nsi yoona nibyega ebirikushushana.

Nituhwerwa kwongyera kwegyesa gye. Nitugira oruteerane ahagati ya saabiiti orurimu ebicweka bishatu orwegami aha birikuba biri omu Obuheereza Bwaitu n’Oku Turikutwaza aka buri kwezi. Ekicweka eky’okubanza eky’oruteerane, ekirikwetwa Eby’omuhendo Ebiri Omu Kigambo Kya Ruhanga, nikituhwera kwetegyereza gye ebicweka eby’omu Baibuli ebi ab’omu kibiina barikuba bashomire kare. Ekirikukurataho ekirikwetwa Teeraho Kwejumba Omu Kubuurira kirimu eby’okureeberaho ebirikutuhwera kumanya oku turikubaasa kugaaniira n’abandi aha biri omu Baibuli. Orikuba naaha obuhabuzi naayetegyereza gye oku eky’okureeberaho kyaheebwa kubaasa kutuhwera kumanya ahu twine kwongyeramu amaani, kushoma gye n’omu kugamba. (1 Timoseo 4:13) Ekicweka eky’aha muheru, Ebi Abakristaayo Twine Kukora, nikitworeka oku turikubaasa kugyendera aha misingye ya Baibuli butoosha. Eki nikiba kirimu ebibuuzo n’eby’okugarukamu ekirikutuhwera kwongyera kwetegyereza gye Baibuli.

Waija omu nteerane zaitu, buzima noija kusiima omuringo ogu turikwegyesibwamu Baibuli.—Isaaya 54:13.

• Noija kwega ki omu nteerane z’Abajurizi ba Yehova?

• Ni ruuha aha nteerane zaitu ezirikubaho buri saabiiti oru waakwenzire kuzamu?