EISHOMO 11
Emisingye ya Baibuli Neetugasira Eta?
1. Ahabw’enki twine kuhaburwa?
Emisingye ya Baibuli neetuhwera eta kwetantara kuta amagara omu kabi?—ZAABURI 36:9.
Omuhangi waitu naamanya bingi munonga okutukira. Nka Tataitwe oine rukundo, naatufaho. Kandi taratuhangire twine obushoboorozi bw’okwehabura. (Yeremia 10:23) N’ahabw’ekyo, nk’oku omwana arikwetenga obuhabuzi bw’abazaire be, nikwo naitwe twena turikwetenga obuhabuzi bwa Ruhanga. (Isaaya 48:17, 18) Emisingye ya Baibuli erimu obuhabuzi oburikuruga ahari Ruhanga.—Shoma 2 Timoseo 3:16.
Ebiragiro bya Yehova n’emisingye ye nibitwegyesa oku tushemereire kutwaza hati, n’oku turikubaasa kutunga ebirungi eby’obutwire omu biro by’omumaisho. Ni kikuru okukunda kugyendera aha buhabuzi bwa Ruhanga ahakuba niwe yaatuhangire.—Shoma Zaaburi 19:7, 11; Okushuuruurwa 4:11.
2. Emisingye ya Baibuli niki?
Emisingye ya Baibuli n’enyegyesa za Baibuli ezirikukwata aha mbeera zitari zimwe. Ebiragiro byo bitairweho kugyenderwaho omu nshonga ez’amaani. (Eky’Ebiragiro 22:8) Twine kuteeraho kwetegyereza oku emisingye ya Baibuli eine kugyenderwaho omu mbeera zitari zimwe. (Enfumu 2:10-12) Nk’eky’okureeberaho, Baibuli neeyegyesa ngu amagara n’ekiconco kuruga ahari Ruhanga. Omusingye ogwo nitubaasa kugugyenderaho twaba nitukora, turi omuka nari aha rugyendo. Nigutuhwera kwerinda okuta amagara gaitu nari ag’abandi omu kabi.—Shoma Zaaburi 100:3.
3. Ebiragiro bibiri ebikuru ni biiha?
Yesu akooreka ebiragiro bibiri ebikuru. Eky’okubanza nikyoreka ngu ekigyendererwa ekikuru n’okumanya Ruhanga, okamukunda kandi okamuheereza. Omu bi turikucwamu byona twine kugyendera aha kiragiro ekyo. (Enfumu 3:6) Abarikugyendera aha kiragiro ekyo nibagira okushemererwa n’omukago murungi na Ruhanga, nibaija n’okutunga amagara agatahwaho.—Shoma Matayo 22:36-38.
Ekiragiro kya kabiri nikituhwera kukwatanisa gye n’abandi. (1 Abakorinso 13:4-7) Okugyendera aha kiragiro kya kabiri nikitwariramu okutwariza gye abandi, nk’oku Ruhanga arikubatwariza.—Shoma Matayo 7:12; 22:39, 40.
4. Emisingye ya Baibuli neetugasira eta?
Emisingye ya Baibuli neehwera ab’omu ka kuguma nibakundana. (Abakolosai 3:12-14) Omusingye gwa Baibuli ogurikugira ngu abarikutaaha omu bushwere baine kubugumamu, nigurinda amaka.—Shoma Okutandika 2:24.
Okugyendera aha misingye ya Baibuli nikiturinda omu biteekateeko, kituhwera n’okutunga ebi turikwetenga. Nk’eky’okureeberaho, abarikusherura abakozi nibaba nibenda abo abarikugyendera aha misingye ya Baibuli erikukwata aha kukora n’amaani n’obwesigwa. (Enfumu 10:4, 26; Abaheburaayo 13:18) Kandi Ekigambo kya Ruhanga nikitwegyesa kumarwa na bikye ebi twine n’okuta omutima aha kugira omukago murungi na Ruhanga okukira okusherura eby’obutungi.—Shoma Matayo 6:24, 25, 33; 1 Timoseo 6:8-10.
Okugyendera aha misingye ya Baibuli nikibaasa kurinda amagara gaitu. (Enfumu 14:30; 22:24, 25) Nk’eky’okureeberaho, okworobera ekiragiro kya Ruhanga ekirikuzibira obusinzi nikiturinda endwara na zaabutandu. (Enfumu 23:20) Yehova tarikwanga okunywa amaarwa kureka naayanga obusinzi. (Zaaburi 104:15; 1 Abakorinso 6:10) Emisingye ya Baibuli neetuhwera ahakuba neetwegyesa oku turikubaasa kwetantara emiteekateekyere mibi n’emitwarize mibi. (Zaaburi 119:97-100) Kandi Abakristaayo ab’amazima nibahimbisisa Ruhanga baagyendera aha mitindo ye.—Shoma Matayo 5:14-16.