Koresa ‘Ebirikwanjura Ebiri omu Kigambo kya Ruhanga’—Kutandika Kugaaniira n’Abantu
1. Niki eki tutungire ekisya ekirikubaasa kutuhwera omu kubuurira?
1 Baibuli eya New World Translation ensya erimu ekicweka aha kutandika ekirikwetwa ‘Ebirikwanjura Ebiri omu Kigambo kya Ruhanga’ Nitubaasa kukoresa tuta ekicweka eki twaba nitutebeekanisa enyanjura z’okukoresa omu kubuurira? Ni kirungi kukoresa ekicweka eki omu kutandika kugaaniira n’abantu ahabw’okuba nikyoreka ebyahandiikirwe ahansi y’emitwe etari emwe nk’akatabo Reasoning.
2. Nitubaasa kukoresa tuta ‘Ebirikwanjura Ebiri omu Kigambo kya Ruhanga’ omu kubuurira?
2 Noobaasa kukoresa ekibuuzo 8 kandi ogire oti: “Twabataayaayiraho kakye ahakuba abantu baingi nibeebuuza, ‘Ruhanga ashemereire kujunaanwa ahabw’okubonabona okuriho?’ [Omu bicweka ebimwe, nikikora gye waayoreka ou orikubuurira ekibuuzo.] Nookiteekateekaho ki? [Tegyereza agarukyemu.] Baibuli neegarukamu gye ekibuuzo eki.” Mushome omu Baibuli kimwe nari bimwe aha byahandiikirwe ebyorekirwe kandi mubihikaaniseho ebiteekateeko. Ou orikubuurira yaayoreka ngu naayenda kumanya ebirikukiraho, noobaasa kumworeka ebibuuzo 20 ebiri omu kicweka eki kandi omushabe kutooranamu kimwe eki muraahikaaniseho ebiteekateeko ku oraagarukeyo. Nari noobaasa kumuha kimwe aha bitabo ebi turikukoresa kwegyesa abantu Baibuli ekirimu ebirikukiraho ebirikushoboorora enshonga ei mwaba nimugaaniiraho.
3. Nitubaasa kukoresa tuta ‘Ebirikwanjura Ebiri omu Kigambo kya Ruhanga’ kutandika kugaaniira n’abantu twaba nitubuurira omu bicweka ebirimu abatarikwikiririza omuri Kristo?
3 Ekibuuzo 4 na 13 kuhika 17 nibibaasa kutuhwera twaba nitubuurira omu bicweka ebirimu abatarikwikiririza omuri Kristo. Nk’eky’okureeberaho, noobaasa kukoresa obuhabuzi oburi omu kibuuzo 17 reero ogire oti: “Twaba nitugaaniira n’abantu aha buhabuzi oburikubaasa kuhwera amaka. Noikiriza ngu hariho oburemeezi bwingi omu maka obunaku obu? [Tegyereza agarukyemu.] Baingi abari omu bushwere bahwereirwe ebigambo by’obwengye ebi: ‘Omukazi ashemereire kutiina iba.’ [Noobaasa kutagamba ngu nibiruga omu Abaefeso 5:33. Waaba noogamba n’omukazi, noobaasa kumugambira ebigambo ebiri omu Abaefeso 5:28.] Nooteekateeka ngu okugyendera aha buhabuzi obu nikibaasa kugasira abari omu bushwere?”
4. Noobaasa kukora ki bwanyima y’okugaaniira n’omuntu otarikwikiririza omuri Kristo?
4 Waaheza kugaaniira n’omuntu, kora nawe entebeekanisa aha ki muraije kugaaniiraho waagarukayo. Noobaasa kutebeekanisa kugamba aha kyahandiikirwe ekindi aha biri ahansi y’ekibuuzo eki waakoresa. Bwanyima, omu bwire obuhikire mumanyise ngu ebigambo by’obwengye ebi nibiruga omu Baibuli. Kurugiirira aha bi mutwire nimuhikaanisaho ebiteekateeko n’oku omuntu arikutwara Baibuli, muhe ekitabo eki orikuteekateeka ngu nikiija kumuhwera.—Reeba ebiri aha rupapura orw’omunda omu Obuheereza Bwaitu obw’Obukama aka Desemba 2013.