Eshuura Ya Mwenda
Eka Erimu Omuzaire Omwe Neebaasa Kusingura
1-3. N’enki ekireetsireho okweyongyera kw’amaka agarimu omuzaire omwe, kandi abagarimu nibakwatwaho bata?
AMAKA agarimu omuzaire omwe hati nikigambwa ngu nigo garikweyongyera kuba maingi omuri Amerika. Ekyo nikyo kiriyo nikibaho n’omu mahanga maingi agandi. Okweyongyera kw’okugaitururwa, okutsigaho eka, okwangana kw’abashweraine, n’okuzaara ebinyandaaro bireetaire abazaire n’abaana oburemeezi.
2 Omukazi omwe akahandiika ati: “Ndi omufaakazi w’emyaka 28 y’obukuru kandi nyine abaana babiri. Nshobeirwe munonga ahakuba tindikwenda kukuza abaana bangye bataine ishebo. Nooshusha oti tihaine orikunfaho. Abaana bangye nibakira kundeeba ndikurira, kandi ekyo nikibakwataho.” Oyihireho okurwanisa ekiniga, eihamba n’okuhurira ori nk’otaine mugasho, waaba ori omuzaire omwe omu ka obumwe noogira oburemeezi bw’okukora emirimo y’aha ka kandi obwo oine n’emirimo ey’aheeru y’eka. Omwe we akagira ati: “Okuba ori omuzaire omwe kigumire. Bwanyima y’okuteeraho munonga, nootandika kumanyiira kukora emirimo yaawe. Kwonka ku orikuba waamanyiira kukora egyo, haizaho endiijo emisya.”
3 Abaana abarikuba bari omu ka erimu omuzaire omwe emirundi mingi nibaba baine oburemeezi bwabo. Nibabaasa kuba nibateganisibwa omu biteekateeko ahabw’okufa nari okwangana kw’omwe aha bazaire. Aha minyeeto emingi, okutagira abazaire bombi nikibakwataho munonga
4. Nitumanya tuta ngu Yehova naafayo aha ka erikuba erimu omuzaire omwe?
4 Amaka agarimu omuzaire omwe gakaba gariho n’omu bwire obu Baibuli yaabaire neehandiikwa. Emirundi mingi, Ebyahandiikirwe nibigamba aha ‘fuuzi n’efaakazi.’ (Okuruga 22:22; Eky’Ebiragiro 24:19-21; Yobu 31:16-22) Yehova Ruhanga akaba naabafaho. Omuhandiiki wa Baibuli akeeta Ruhanga ‘ishe w’efuuzi kandi omucwi w’emanja w’abafaakazi.’ (Zaaburi 68:5) Buzima, n’omu bunaku obu Yehova naakifayo aha ka erikuba erimu omuzaire omwe! Ekigambo kye nikiha emisingye erikubaasa kubahwera kusingura.
OKUMANYIIRA KUKORA EMIRIMO Y’AHA KA EYA BUTOOSHA
5. Ni buremeezi ki obu omuzaire ori wenka omu ka arikubaasa kubanza kutunga?
5 Teekateeka aha murimo gw’okureeberera eka. Omukazi omwe owaabaire agaituurairwe akagira ati: “Hariho obu orikugira oti nangwa omushaija wangye kuri yaaba ariho. Ka tugire nk’enju yaawe yaaba neeyetenga kuhunduuzibwa kandi obwo otarikumanya ahu oraatandikire.” Abashaija abaherize kugaitururwa nari abafeereirwe abakazi baabo nabo nibabaasa kweshanga baine kukora emirimo mingi ey’aha ka. Abaana okuba omu ka etarimu buteeka nakyo nikibongyerera kuhurira bataine busingye.
6, 7. (a) “Omukazi w’omutima” orikugambwaho omu Enfumu akataho ky’okureeberaho ki ekirungi? (b) Okuba omweziriki omu kukora emirimo y’aha ka nikihwera kita eka erimu omuzaire omwe?
6 N’enki ekirikubaasa kuhwera? Yetegyereze eky’okureeberaho ‘ky’omukazi w’omutima’ orikugambwaho omu Enfumu 31:10-31. Ebintu ebi arikukora ni bingi—naagura, aguza, aruka, ateeka, agura amataka, ahinga kandi akora eby’obushuubuzi. Ekyamubaasiise niki? Akaba ari omweziriki, arikukora akahitsya omu mwabazyo kandi arikwimuka bukiri kare munonga okutandika emirimo ye. Kandi akaba atebeekanisa gye emirimo ye, aha abandi eby’okukora kandi akoresa emikono ye okureeberera abandi. Tikirikutangaaza okureeba ngu akasiimwa!
7 Ku oraabe ori omuzaire omwe omu ka, fayo aha mirimo yaawe ey’omu ka. Marwa n’emirimo nk’egyo, ahakuba ekyo nikyongyera kureetera abaana baawe kushemererwa. Kwonka, okutebeekanisa gye ni kikuru. Baibuli neegira eti: “Ebi omweziriki ateekateeka kukora tibibura kureeta mweru.” (Enfumu 21:5) Ishe abaana omwe owaabaire ataine mukazi akagira ati: “Tindikuteekateeka aha by’okurya okwihaho naagira enjara.” Kwonka eby’okurya ebitebeekanisiibwe kare nibinura okukira ebi orikuteeka orikurahukiiriza. Nikibaasa n’okukwetengyesa kwega kukora emirimo endiijo ey’aha ka. Nyina abaana otaine mushaija yaayebuuza ahari banywani be nari abandi naabaasa kwega kwombeka enju nari okureeberera amatungo.
8. Abaana abaine omuzaire omwe nibabaasa kumuhwera bata?
8 N’eky’oburyo shi okushaba abaana kukuhweraho? Nyina abaana omwe otaine mushaija akagira ati: “Nooba nooyenda ngu okore emirimo yoona n’eya ishebo otariho kugira ngu abaana baawe batahendwa emirimo.” Ekyo n’obu kiraabe kitaine nshonga, kwonka obutoosha nikiba kitarikuhwera abaana. Eminyeeto abarikutiina Ruhanga abarikugambwaho omuri Baibuli obumwe bakaba baheebwa emirimo ebashemereire. (Okutandika 37:2; Ekyeshongoro kya Sulemaani 1:6) N’ahabw’ekyo n’obu oraabe oshemereire kwetantara kuhenza abaana baawe emirimo, n’eky’obwengye okubaha eby’okukora nk’okwozya ebintu n’okuboneza ekishengye kyabo. Nimubaasa n’okugira emirimo ei mwakorera hamwe. Ekyo nikibaasa kwongyera kureeta okushemererwa.
OKUBAISAHO EKA TIKYOROBI
9. Ahabw’enki baanyina abaana abataine baibabo barikukira kugira oburemeezi omu by’entaasya?
9 Abazaire baingi abataine bakazi nari baibabo nikibagumira okutunga empiiha z’okugura ebi barikwetenga, kandi abakazi abaazaire abaana batari mu bushwere nibakira kutunga oburemeezi bwingi.a Omu mahanga ei gavumenti erikuha abantu obuhwezi, nikibaasa kuba eky’obwengye kwikiriza obuhwezi obwo, okuhitsya baatunga omurimo. Baibuli terikuzibira Abakristaayo kwikiriza obuhwezi nk’obwo kyaba nikyetengyesa. (Abarooma 13:1, 6) Abafaakazi n’abakazi abagaiturairwe nabo nikibagumira kwebaisaho. Baingi abarikugyemeserezibwa kugaruka kukora emirimo y’aheeru y’eka bwanyima y’emyaka mingi, nibakira kutunga emirimo ey’empiiha nkye. Abamwe nibashoboorora oburemeezi obu barikuza omu matendekyero agarikutendeka abantu omu mirimo emwe.
10. Omukazi otaine iba naabaasa kushoboororera ata abaana be ahabw’enki aine kutunga omurimo akakora?
10 Kitakakutangaaza waareeba abaana baawe bataashemererwa waatunga omurimo, kandi naiwe otakayehurira kubi. Kureka bashoboororere enshonga ahabw’enki oine kukora, kandi bahwere kwetegyereza ngu Yehova naayenda ngu obareeberere. (1 Timoseo 5:8) Bwanyima, abaana abaingi nibeetegyereza enshonga egyo. Kwonka teeraho kugira obwire kuba nabo n’obu oraabe oine bingi eby’okukora. Okubafaho nk’okwo nikutuubya aha kwerarikirira oku baakuba baine ahabw’entaasya nkye.—Enfumu 15:16, 17.
N’OHA OINE KUREEBERERA MUTAAHI WE?
11, 12. N’enki eki omuzaire ori omwe omu ka aine kwetantara, kandi ekyo naabaasa kukikora ata?
11 N’ekya butoosha kushanga abazaire abataine bakazi nari baibabo baine omukago guhamire n’abaana baabo, kwonka baine kwegyendesereza kureeba ngu tibayeyihaho obujunaanizibwa obu Ruhanga yaabahaire aha baana. Nk’eky’okureeberaho, oburemeezi bw’amaani nibubaasa kubaho omukazi otaine iba yaateekateeka ngu omutabani hati abe niwe yaaba omutwe gw’eka nari yaaguma naatuurira omuhara oburemeezi bwe. Okukora atyo tiky’oburyo kandi nikibuza omwana obusingye.
12 Hamiza abaana baawe ngu iwe nk’omuzaire, noija kubareeberera—batari bo okukureeberera. (Gyeragyeranisa 2 Abakorinso 12:14.) Obumwe noobaasa kwetenga obuhwezi nari obuhabuzi. Busherure kuruga aha bareeberezi b’ekibiina nari aha bakazi Abakristaayo abakuzire omu by’omwoyo beitu hatari aha baana baawe abato.—Tito 2:3.
GUMA NOOBAHANA
13. Ni buremeezi ki aha bikwatiraine n’okuhana omwana obu omukazi otaine iba arikubaasa kugira?
13 Abaana butoosha nibarahuka kuhurira ishebo yaabahabura okukira nyinabo. Omukazi omwe otaine iba akagira ati: “Batabani bangye bari nk’abashaija bakuru omu kugamba n’omu kyemerero. Obumwe nikingumira kubahana.” Kandi noobaasa kuba okiine amaganya ahabw’okufeerwa omukundwa waawe nari otashemereirwe ahabw’okushenyuka kw’obushwere bwanyu. Mwembi mwaba mwine kureeberera omwana waanyu, noobaasa kutiina ngu omwana naabaasa kwenda kutuura n’ou obaire ori nawe omu bushwere. Embeera nk’ezo nizibaasa kutuma otayoroberwa kuhana omwana ogwo.
14. Omuzaire ori omwe omu ka naabaasa kuba ow’oburyo ata aha bikwatiraine n’okuhana abaana?
14 Baibuli neegira eti: “Omwana ou bahugaho, ahemura nyina.” (Enfumu 29:15) Yehova Ruhanga naakuhwera omu kutaho ebiragiro omu ka n’omu kuhamya ngu byakuratirwa, n’ahabw’ekyo otatiina. (Enfumu 1:8) Guma ohamiire aha misingye ya Baibuli. (Enfumu 13:24) Teeraho kuba ow’oburyo kandi ohamire aha ki oraateho. Abaana abaingi nibaija kubikuratira. Kwonka, teeraho kuta omutima aha bi abaana baawe baraakugambire. Nyineeka omwe otaine mukazi naagira ati: “Omu kuhana abaana bangye, nkaba nteeraho kworeka okwetegyereza ahabw’okugira ngu bakaba baine enaku y’okufeerwa nyinabo. Niinteeraho kugamba nabo obwire bwona. Twaba nitutebeekanisa kyakiro nitutunga obwire bw’okugaaniira hamwe. Obwo nibwo barikungambira buri kimwe.”
15. Omuzaire ogaiturairwe aine kwetantara ki yaaba naagamba aha u abaire ari nawe omu bushwere?
15 Ku oraabe ogaiturairwe, ti kirungi okugamba kubi aha ou obaire ori nawe omu bushwere. Okumugambaho kubi nikikora kubi abaana kandi nikishiisha omukago gwanyu n’abaana. N’ahabw’ekyo yetantare okugambira abaana ebigambo ebirikusaasa nka: “Ori nka sho!” N’obu ou obaire ori nawe omu bushwere yaakuba yaakukozire kubi munonga, naaba akiri omuzaire w’omwana waawe, orikwetenga kukundwa, kuhanwa n’okufibwaho abazaire bombi.b
16. Ni ntebeekanisa ki ez’eby’omwoyo ezi omuzaire ori omwe omu ka ashemereire kugira omu kuhana abaana butoosha?
16 Nk’oku kigambirweho omu shuura ez’enyima, okuhana nikutwariramu okutendeka n’okuhabura, kutari okufubira kwonka. Oburemeezi bwingi nibubaasa kwetantarwa waataho entebeekanisa nungi ey’okutendeka abaana omu by’omwoyo. (Abafilipi 3:16) Okuza omu nteerane z’Ekikristaayo butoosha ni kikuru. (Abaheburaayo 10:24, 25) N’okugira okwega Baibuli okw’eka buri saabiiti ni kukuru. N’eky’amazima, tikyorobi okwebembera okwega nk’okwo obutoosha. Omuzaire omwe omukazi orikufayo akagira ati: “Bwanyima y’okukora eizooba ryona, buzima nooba nooyenda kuhumuuraho. Kwonka nintebeekanisa ebiteekateeko byangye kwega na muhara wangye, ndikukimanya ngu n’ekintu eki nshemereire kukora. Buzima naakunda ngu twege.”
17. N’enki eki turikubaasa kwega aha muringo murungi ogu Timoseo yaakuziibwemu?
17 Timoseo munywani w’entumwa Paulo, nyina na nyineenkuru bakamutendeka emisingye ya Baibuli—beitu atari eishe. Kwonka nabwe Timoseo akaba Omukristaayo murungi! (Ebyakozirwe 16:1, 2; 2 Timoseo 1:5; 3:14, 15) Naiwe noobaasa kugira amatsiko ngu nihaija kurugamu ebirungi waateraho kukuza abaana baawe ‘omu kuhana kwa Yehova kandi orikubatamu emiteekateekyere ye.’—Abaefeso 6:4, NW.
OKUSINGURA EIHAMBA
18, 19. (a) Ni ryari obu omuzaire ori omwe omu ka arikugira eihamba? (b) Ni buhabuzi ki oburikuhwera omu kwetantara ebyetengo by’omubiri?
18 Omuzaire ori omwe omu ka akagira ati: “Ku ndikwija omuka nkeeshanga ndi nyenka na munonga bwanyima y’abaana kubyama, nimpurira buzima eihamba ryanyita.” Eihamba obutoosha nibwo buremeezi bw’amaani obu omuzaire ori omwe omu ka arikukira kugira. N’ekya butoosha omuntu kwenda kuba n’omukundwa kandi bakagira omukago guhamire omu bushwere. Kwonka shi omuntu ashemereire kwemaraho eihamba arikuhenda ebiragiro bya Yehova? Omu bwire bwa Paulo, abafaakazi bato abamwe bakaremwa “kwerinda n’okworobera Kristo.” (1 Timoseo 5:11, 12) Okwikiriza okwetenga kw’omubiri kukuremesa kworobera eby’omwoyo n’eky’akabi—1 Timoseo 5:6.
19 Omushaija omwe Omukristaayo akagira ati: “Ekyetengo ky’okwenda kuteerana nikibaasa kuba eky’amaani, kwonka noobaasa kwezibira. Waagira ekiteekateeko nk’ekyo, toshemereire kukireka kikakuguma omu biteekateeko. Oine kukyeihamu. Kandi nikikuhwera waateekateeka aha mwana waawe.” Ekigambo kya Ruhanga nikyehanangiriza kiti: ‘Mwite engingo zaanyu aha bikwatiraine n’okurigira okubi.’ (Abakolosai 3:5) Ku waakuba nooteeraho kucwa amaarwa, okaguma nooza omu myanya ei barikuganyweramu, nari kukunda kuba n’abantu abarikukira kugamba aha maarwa? Ngaaha buzima! Nikyo kimwe n’aha byetengo by’omubiri.
20. (a) Ni kabi ki akarikubaho omuntu yaariima otari Mukristaayo? (b) Abantu abaabaire bataine baibabo omu kyasha ky’okubanza n’ab’omu bunaku obu basingwire bata eihamba?
20 Abakristaayo abamwe bariimire abatari Bakristaayo. (1 Abakorinso 7:39) Ekyo shi kishobooroire oburemeezi bwabo? Ngaaha. Omukazi omwe owaagaiturairwe akagira ati: “Hariho ekintu kimwe ekibi munonga ekirikukira okuguma ori wenka otaine mushaija. N’okushwerwa omuntu ou otashemereire kushwerwa.” Hatariho kubangaanisa, abafaakazi Abakristaayo ab’omu kyasha ky’okubanza obumwe bakaba bagira eihamba, kwonka abaabaire nibafayo bakaba bagira bingi eby’okukora nka ‘okukunira abagyenyi, okunaabisa ebigyere by’abarikwera, n’okuhwera abarikushaasha.’ (1 Timoseo 5:10) Abakristaayo abeesigwa abategyereize kumara emyaka mingi kutunga omuntu orikutiina Ruhanga ow’okutaaha nawe omu bushwere nabo nibateeraho kugira bingi eby’okukora. Omufaakazi w’emyaka 68 akaba ataayaayira abandi bafaakazi ku yaabaire agira eihamba. Akagira ati: “Omu kutaayaayira abandi, n’okugira eby’okukora aha ka n’okwefaho omu by’omwoyo nibituma ntaagira eihamba.” Okwegyesa abandi aha Bukama bwa Ruhanga buzima nikwo kurikukira kuhwera munonga.—Matayo 28:19, 20.
21. Ni mu muringo eki ogu okushaba n’emikago mirungi birikubaasa kuhwera omuntu kusingura eihamba?
21 Tihariho ekirikwihaho eihamba ahonaaho kwonka omuntu naabaasa kugumisiriza arikuhwerwa Yehova. Omukristaayo naagumisiriza ‘yaaguma naashaba naayeshengyereza nyomushana na nyekiro.’ (1 Timoseo 5:5) Okweshengyereza nikwo kushaba n’obweziriki, n’okushaba obuhwezi obundi okurikubaasa kutwariramu n’okurira. (Gyeragyeranisa Abaheburaayo 5:7.) Okweshengyereza Yehova “nyomushana na nyekiro” buzima nikubaasa kukuhwera. Ekindi, okugira emikago mirungi nikukuhwera okusingura eihamba. Kurabira omu kugira emikago mirungi, omuntu naabaasa kutunga ‘ebigambo birungi’ ebirikugaruramu amaani nk’oku kirikugambwaho omu Enfumu 12:25.
22. Niki ebiraije kukuhwera obumwe waagira eihamba?
22 Obumwe waagira eihamba, ijuka ngu tihaine otaine buremeezi. Buzima, “ab’eishe-emwe abari omu nsi yoona” nibabonabona omu miringo etari emwe n’emwe. (1 Petero 5:9) Yetantare okuguma nooteekateeka munonga aha by’enyima. (Omubuurizi 7:10) Teekateeka aha birungi ebi orikutunga. Okukira byona, mariirira kuguma ori omwesigwa kandi guma nooshemeza omutima gwa Yehova.—Enfumu 27:11.
OKU ABANDI BARIKUBAASA KUHWERA
23. Abakristaayo baine bujunaanizibwa ki aha muzaire ori omwe omu ka ori omu kibiina Ekikristaayo?
23 Obuhwezi bw’ab’eishe-emwe bagyenzi baitu nibuhwera munonga. Yakobo 1:27 nihagira hati: “Ediini eshemeire etaine kamogo omu maisho ga Ruhanga Isheboona niyo egi: okutayayira efuuzi n’abafaakazi omu busaasi bwabo.” Buzima, Abakristaayo baine obujunaanizibwa bw’okuhwera eka erimu omuzaire omwe. Ni mu miringo ki ei eki kirikubaasa kukorwamu?
24. Ni mu miringo ki ei eka erimu omuzaire omwe erikubaasa kuhwerwamu?
24 Nibabaasa kuheebwa obuhwezi bw’ebintu. Baibuli neegira eti: “Omuntu weena otungire ebintu by’ensi egi, ku yaakureeba mugyenzi we abikyenire, yamwehuzya, okukunda kwa Ruhanga kukaaguma kuta omuriwe?” (1 Yohaana 3:17) Ekigambo ky’Orugriika ekirivunuurwa nka “ku yaakureeba” tikirikumanyisa okumureeba kwonka, kureka okufayo. Eki nikyoreka ngu Omukristaayo orikufayo naabaasa kubanza yaamanya embeera y’omu ka egyo n’ebi barikwetenga. Obundi nibabaasa kuba nibeetenga empiiha. Abandi nibabaasa kwetenga obuhwezi omu kuhunduuza eby’omu nju yaabo. Obundi okubeeta okarya nabo ekiihuro nikibaasa kubahwera.
25. Abakristaayo nibabaasa kworeka bata ngu nibafa aha muzaire ori omwe omu ka?
25 Okwongyera ahari ekyo, 1 Petero 3:8 nihagira hati: “Mwena mukwatanise omu mwoyo, musaasirane, mukundane nk’eishe-emwe, mugirirane embabazi n’omutima omucureezi.” Omukazi omwe otaine iba oine abaana mukaaga akagira ati: “Ebintu bitwire nibingumira kandi obumwe ningira amaganya. Kwonka obumwe, ab’eishe-emwe nibangira bati: Joan, yebare emirimo mirungi ei orikukora. Noija kutungamu ebihembo. Okumanya kwonka ngu abandi nibakuteekateekaho kandi ngu nibakufaho nikuhwera.” Abakazi Abakristaayo abakuzire nibabaasa kuhwera abakazi abazaire abakiri bato abataine baibabo, barikubahurikiza baaba nibabagambira oburemeezi obu batarikubaasa kugaaniiraho n’omushaija.
26. Abakristaayo abashaija abakuzire omu by’omwoyo nibabaasa kuhwera bata abaana efuuzi?
26 Abakristaayo abashaija nibabaasa kuhwera omu miringo endiijo. Yobu omushaija owaabaire ahikiriire akagira ati: “Nkaba njuna omworo owaabaire ataka, n’efuuzi etaine kihwera.” (Yobu 29:12) Abashaija Abakristaayo abamwe nibafayo aha baana efuuzi kandi babooreka ‘rukundo erikuruga aha mutima ogushemeire,’ bataine bigyendererwa bibi. (1 Timoseo 1:5) Batarikuhuga aha maka gaabo, obumwe nibabaasa kutebeekanisa kubuurira n’abato nk’abo abari omu kibiina Ekikristaayo nangwa n’okubeeta kubeegaitaho omu kwega kw’eka nari kwejumba nabo omu by’okweshemeza. Okufayo nk’okwo nikubaasa kuhwera omwana efuuzi kutejumba omu bintu bibi.
27. Omuzaire ori omwe omu ka naabaasa kugira obwesigye kutunga buhwezi ki?
27 Kwonka, omuzaire ori omwe omu ka aine ‘kwekorera omutwaro gwe wenka.’ (Abagalatia 6:5) Kwonka nabwe, ab’eishe-emwe na Yehova Ruhanga nibamworeka rukundo. Baibuli neegamba ahari Yehova eti: “Aramira abafaakazi n’efuuzi.” (Zaaburi 146:9) Ahabw’obuhwezi bwa Yehova, eka erimu omuzaire omwe neebaasa kusingura.
[Obugambo obw’Ahansi]
a Omwishiki Omukristaayo yaatwara enda ahabw’emicwe mibi y’obushambani, omu muringo gwona ekibiina Ekikristaayo tikirikwehuzya eki arikuba akozire. Kwonka yaayeteisa, abareeberezi n’abandi omu kibiina nibabaasa kucwamu kumuhwera.
b Titurikugamba aha mbeera erikubaasa kwetengyesa okurinda omwana ahabw’omuzaire orikuba namutwariza kubi. Kandi omuzaire ondiijo yaateeraho kutaahirira obushoboorozi bwawe, obundi arikubeihabeiha abaana ngu bakutsigeho, nikibaasa kuba eky’obwengye kukigambaho n’ab’eishe-emwe abakuzire omu by’omwoyo nk’abareeberezi omu kibiina Ekikristaayo, okukuhabura aha ku oraatwaze omu mbeera nk’egyo.
EMISINGYE YA BAIBULI EGI NEEBAASA KUHWERA ETA . . . AB’OMU KA ERIMU OMUZAIRE OMWE OKUSHOBOORORA OBUREMEEZI?
Yehova Ruhanga “n’ishe w’efuuzi kandi omucwi w’emanja w’abafaakazi.”—Zaaburi 68:5.
Okutebeekanisa gye ni kikuru okubaasa kusingura.—Enfumu 21:5.
Yehova naashagika abazaire omu kuhana gye abaana baabo.—Enfumu 1:8.
Abafaakazi Abakristaayo abarikufayo nibagira bingi by’okukora omu mirimo mirungi kandi bashaba obutoosha.—1 Timoseo 5:5, 10.
Okufayo aha ‘fuuzi n’abafaakazi’ ni kimwe aha birikukorwa ediini ey’amazima.—Yakobo 1:27.
[Akabokisi aha rupapura 112]
EBI ABAANA BARIKUBAASA KUKORA
Nootuura n’omuzaire ori omwe omu ka? Ku kiraabe nikwo kiri, noobaasa kukora ki okumuhwera? Ekikuru eki oine kukora n’okumworobera. Ekyemerero ky’omwana nari obuhangwa bwe tiburikumuha bugabe ‘bw’okwanga ebi nyina arikumwegyesa.’ (Enfumu 1:8) Yehova naakuragiira kworobera omuzaire waawe, kandi waakora ekyo nikikureetera okushemererwa.—Enfumu 23:22; Abaefeso 6:1-3.
Yoreka okusiima kandi okore oyekundiire. Omwojo orikwetwa Tony naagira ati: “Maawe naakora omu irwariro, kandi yunifoomu ye neeba eine kugororwa. N’ahabw’ekyo ningimugororera. Eki niinkikora ahabw’okuba nikimuhwera.” Nyina abaana omwe otaine iba akagira ati: “Emirundi mingi obu ndikuruga aha murimo nduhire—ninshanga muhara wangye yaatereerize ebintu aha meeza kandi arikutebeekanisa na kyakiro.”
Guma noijuka ngu okukwatanisa kwawe n’abandi ni kikuru. Omuzaire waawe yaaba aruhire ahabw’okukora emirimo mingi omu eizooba, nikibaasa kumugumira kwebembera okwega Baibuli okw’eka. Waaba otetebeekanisiize okwega okwo, ebintu nibyeyongyera kuguma. Teeraho kuba oriho obwire bw’okwega bwahika. Tebeekanisa ebi murikuza kwegaho bukiri kare. Waaba noosiima, okakwatanisa n’omuzaire waawe kandi okamworobera, noija kumushemeza kandi okukira munonga noija kushemeza Ruhanga.
[Ekishushani ekiri aha rupapura 107]
Ha abaana baawe obwire burikumara
[Ekishushani ekiri aha rupapura 109]
Abaana mukwatanise n’omuzaire waanyu ori omwe omu ka
[Ekishushani ekiri aha rupapura 110]
Ekibiina tikirikwehuzya “abafaakazi n’efuuzi”