Eshuura Ya Ikumi

Omwe aha b’Omu Ka Yaaba Arwaire

1, 2. Sitaane akakoresa ata ebihikiirizi n’endwara kuteeraho kuremesa Yobu kuguma ari omwesigwa?

OMUSHAIJA Yobu buzima n’omwe ahari abo abaabaire baine amaka agabaire garimu okushemererwa. Baibuli neemweta “omushaija rugambwa orikukira abashaija boona ab’omu nsi z’oburugwa-izooba.” Akaba aine abatabani mushanju n’abahara bashatu, boona hamwe bakaba bari abaana ikumi. Kandi akaba aine ebyabaire nibimubaasisa kureeberera gye ab’omu ka ye. Ekikuru munonga, akaba ayebembeza eby’omwoyo kandi akaba afa aha mukago gw’abaana be na Yehova. Ebyo byona bikareetera eka ye kuhama kandi ekabamu okushemererwa.—Yobu 1:1-5.

² Sitaane omuzigu mukuru wa Ruhanga Yehova akareeba embeera y’eka ya Yobu. Sitaane butoosha orikusherura emiringo y’okuhenda obwesigwa bw’abaheereza ba Ruhanga, akataahirira Yobu aine ekigyendererwa ky’okwenda kushiisha eka ye eyaabaire erimu okushemererwa. Akabanza “yaarwaza Yobu ebihuute bibi, okuruga aha mara g’ebigyere okuhika aha kazingiriro k’eishokye.” N’ahabw’ekyo Sitaane akakoresa ebihikiirizi n’endwara kubaasa kuteeraho kuremesa Yobu kuguma ari omwesigwa.—Yobu 2:6, 7.

3. Endwara ei Yobu yaabaire arwaire ekamureetaho bumanyiso ki?

³ Baibuli terikworeka eiziina ry’endwara ei Yobu yaabaire arwaire. Kwonka neetugambira aha bumanyiso bwayo. Omubiri gwe gukataahirirwa enyogori, n’oruhu rw’omubiri gwe rukaba nk’eiju rwatandika kujunda. Orwoya rw’omu kanwa ka Yobu n’omubiri gwe bikaba nibinuuka. Akaba aine obusaasi bwingi. (Yobu 7:5; 19:17; 30:17, 30) Ahabw’obusaasi bwingi Yobu akaba ashutama omu iju kandi ayeyaguza orugusyo. (Yobu 2:8) Buzima akaba aine obusaasi bwingi.

4. Buri ka neekira kuhikwaho buremeezi ki?

⁴ Okaatwaza ota ku waakurwara endwara y’akabi nk’egyo? Obunaku obu, Sitaane tarikurwaza abaheereza ba Yehova nk’oku yaarwarize Yobu. Kwonka ahabw’okutahikiirira, amaganya g’amagara aga, n’okusiisikara kw’obuhangwa, ab’omu maka gaitu obumwe nibabaasa kurwara. N’obu twakuteeraho kwerinda, twena nitubaasa kukwatwa endwara kandi bamwe nibabaasa kushaasha munonga nka Yobu. Endwara yaakwata ab’omu ka yaitu, nikibaasa kureetaho oburemeezi. Ka tureebe oku Baibuli erikutuhwera kwemera omuzigu w’abantu ogu otwireho.—Omubuurizi 9:11; 2 Timoseo 3:16.

IWE NOOKITEEKATEEKAHO KI?

5. Omuntu omu ka yaarwara endwara erikukira juba ab’omu ka egyo nibakira kutwaza bata?

⁵ Haabaho ekirikuremesa ebintu kugyenda omumaisho omu buteeka n’obu kyakuba kiri ki, nihabaho oburemeezi kandi eki nikikira kuba kityo okuremesibwa okwo kwaba kubaireho ahabw’omuntu kurwara kumara obwire buraingwa. Nangwa n’endwara erikukirira omu bwire bukye neereetaho empindahinduka n’okwefeerereza. Abandi abarikuba batarwaire obumwe nikibaasa kubetengyesa kuhunama kugira ngu omurwaire abaase kuhuumura. Nikibaasa kubetengyesa kureka emirimo emwe. Kwonka, omu maka agamwe nangwa n’abaana abato nibashaasha baareeba mutaahi waabo nari omuzaire waabo arwaire, n’obu obumwe baraabe nibeetenga kwijutsibwa kubafaho. (Abakolosai 3:12) Omuntu omu ka yaarwara endwara erikukira juba ab’omu ka egyo nibaba betebeekaniise kukora ekirikwetengyesa kubaasa kumureeberera. Kandi buri omwe omu ka egyo naaba naayenda ngu bamutwarize omu muringo nk’ogwo yaarwara.—Matayo 7:12.

6. Omuntu omu ka ku arikurwara endwara y’amaani etarikurahuka kukira ab’omu ka egyo nibakira kuhurira bata?

⁶ Kandi shi endwara ku yaakuba eri ey’amaani ekateganisa ab’omu ka omu mirimo yaabo? Nk’eky’okureeberaho omwe aha b’omu ka ku yaakurwara endwara ekamusharaza, akarwara ekokoro nari akamugibwa endwara ezindi? Nari akarwara endwara z’omutwe? Abantu baingi nibakira kushaasha baareeba omukundwa waabo aine obusaasi bwingi. Kwonka, obumwe ab’omu ka egyo nibabaasa kutamwa kandi babure obusingye ahabw’okurwara kw’omuntu omwe. Nibabaasa kwebuuza bati: “Ahabw’enki eki nikitubaho?”

7. Omukazi wa Yobu akatwaza ata iba ku yaarwaire, kandi niki eki yaayebirwe?

⁷ Muka Yobu naabaasa kuba nikwo yaateekateekire atyo. Ijuka ngu akaba afeereirwe abaana be. Ebihikiirizi ebyo ku byagumire nibibaho yaaguma naayeyongyera kuhwamu amaani. Aha muheru, ku yaareebire iba owaabaire aine amaani yaarwara endwara y’akabi, aine kuba yaayebirwe ekintu kikuru ekyabaire nikibaasa kumwebesa ebihikiirizi ebyo byona—omukago ogu we na iba baabaire baine na Ruhanga. Baibuli neegira eti: “Bwanyima omukazi we yaamugira ati: Beitu na hati okihamiire aha kuhikiirira kwawe? Yehakane Ruhanga, ofe.”—Yobu 2:9.

8. Omuntu omwe omu ka yaaba arwaire munonga, ni kyahandiikirwe ki ekirikuhwera abari omu ka egyo okuguma baine emiteekateekyere mirungi?

⁸ Baingi nibabura obusingye, obumwe baguubwa kubi, ahabw’okurwara kw’omuntu kubateganisa omu mirimo yaabo. Kwonka, Omukristaayo aine kumanya ngu embeera nk’ezo nizimuha omugisha kworeka rukundo ye eya buzima. Okukunda okwa buzima “kugumisiriza, kugira embabazi . . . tikwesherurira byakwo . . . kwemera byona, kwikiriza byona, kugira amatsiko ahari byona, kugumisiririza byona.” (1 Abakorinso 13:4-7) Omu mwanya gw’okureka emiteekateekyere mibi ekatugumamu, ni kikuru ngu tuteereho kugyeyihamu.—Enfumu 3:21.

9. Ni kuhamizibwa ki okurikubaasa kuhwera eka omu by’omwoyo n’omu biteekateeko omwe omu ka egyo yaaba arwaire endwara y’amaani?

⁹ Niki ekirikubaasa kukorwa okurinda eka omu by’omwoyo n’omu biteekateeko omwe aha b’omu ka egyo yaaba arwaire munonga? Buzima buri ndwara neeba eine oku eshemereire kutambwa, n’ahabw’ekyo nikiba kitari ky’oburyo omu katabo aka twayoreka oku omurwaire aine kureebererwa nari kuragurirwa. Kwonka, omu muringo gw’eby’omwoyo, Yehova ‘naimutsya boona abeyinamiriire.’ (Zaaburi 145:14) Omugabe Daudi akahandiika ati: “Osaasibwa abooro aine omugisha; MUKAMA aryamujuna aha izooba ry’okureeberaho enaku. MUKAMA aryamurinda, agume ari ohuriire. . . . MUKAMA aryaamweyegamiza, arembeire aha kitabo kye; niiwe orimwarira arwaire.” (Zaaburi 41:1-3) Yehova naarinda abantu be baguma bahuriire omu by’omwoyo, nangwa n’obu bakuhikwaho okugyezibwa kw’amaani kuta. (2 Abakorinso 4:7) Baingi abaine omuntu orwaire endwara y’amaani omu ka yaabo nibaikirizana n’ebigambo ebi ebyahandiikirwe omuhandiiki wa Zaaburi owaagizire ati: “Nimbonabona munonga; Mpimbuura nk’ekigambo kyawe oku kiri, ai MUKAMA.”—Zaaburi 119:107.

OMUTIMA OGURIKUKIZA

10, 11. (a) Niki ekikuru ekirikubaasa kuhwera eka kugumisiriza omwe aharibo yaaba arwaire? (b) Omukazi omwe akagumisiriza ata iba obu yaabaire arwaire?

¹⁰ Ekitabo kya Enfumu nikigira kiti: “Omutima guhamire gugumya omuntu omu ndwara ye, kwonka oguhahaire n’oha owaakubaasa kugwemera?” (Enfumu 18:14) Endwara neebaasa kureetera ab’omu ka hamwe n’omuntu orwaire ‘kuhahaara omutima.’ Kwonka “omutima ogutuurize gureetera omubiri amagara.” (Enfumu 14:30) Ab’omu ka okwemera endwara y’amaani nikurugiirira aha miteekateekyere ei baine.—Gyeragyeranisa Enfumu 17:22.

¹¹ Omukazi Omukristaayo omwe akabaasa kugumisiriza bwanyima ya iba ou yaabaire aherize nawe emyaka mukaaga yonka omu bushwere kurwara endwara y’okusharara. Omukazi ogwo akagira ati: “Omushaija wangye akaba atakibaasa kugamba gye kandi kikaba kitoorobi kugaaniira nawe. Okuteeraho munonga kwetegyereza ebi yaabaire aba naateeraho kugamba kukaba kundetera kuhwa amaani.” Teekateeka n’aha maganya n’okwehwa amatsiko oku iba yaakubaasa kuba yaabaire aine. Omukazi ogwo na iba bakakora ki? N’obu baraabe baabaire nibatuura hare n’ekibiina, munyaanyaziitwe ogwo akakora kyona ekirikubaasika okuguma ahamire omu by’omwoyo arikutunga eby’okurya eby’omwoyo ebi ekibiina Ekikristaayo kirikuha kurabira omuri zaamagaziini Watchtower na Awake! Ekyo kikamuhwera kuguma ahamire omu by’omwoyo kandi akareeberera iba okuhitsya obu iba yaafa bwanyima y’emyaka ena.

12. Nk’oku kyabaire ahari Yobu, ni mu muringo ki ogu omuntu orikuba arwaire obumwe arikuhweramu ab’omu ka?

¹² Yobu we obu yaabaire arwaire niwe yaabaasize kuguma ahamire. Akabuuza omukazi we ati: “Noogira ngu turyaheebwa ebirungi byonka omu mikono ya Ruhanga, tituriheebwa n’ebibi?” (Yobu 2:10) Tikirikutangaaza okureeba ngu Yakobo bwanyima akagamba ahari Yobu nk’eky’okureeberaho kirungi omu kugumisiriza. Yakobo 5:11 nihagira hati: “Mukahurira aha kugumisiriza kwa Yobu, kandi mwareeba eki Mukama [yaamukoreire bwanyima], oku aine embabazi nyingi n’okusaasira.” N’omu bwire obu, omuntu orikuba arwaire omu ka ku arikuguma ahamire, akooreka obumanzi naahwera abandi omu ka egyo kuguma baine emiteekateekyere mirungi.

13. Ab’eka erikuba erimu orwaire munonga bashemereire kwetantara okugyeragyeranisa kwa muringo ki?

¹³ Baingi abaine abantu omu ka yaabo abarwaire nibaikiriza ngu omu kubanza nikiba kitoorobi kwemera embeera erikuba eriho omu ka. Kandi nibagira ngu omuringo ogu omuntu arikutwaramu embeera ezirikuba ziriho nikikuru munonga. Okukora empindahinduka omu mirimo y’eka nikibaasa kutooroba. Kwonka omuntu ku arikuteeraho munonga, naabaasa kwemera embeera ezirikubaho. Omu kukora ekyo, ni kikuru okutagyeragyeranisa embeera zaitu n’ezaabo abataine barwaire omu ka yaabo, turikuteekateeka ngu embeera eyaabo ni nungi. Buzima tihariho orikumanya oburemeezi obu abandi barikuba baine. Abakristaayo boona nibahuumurizibwa ebigambo bya Yesu ebi: “Imwe mwena abaruhire n’abaremereirwe, mwije ahariinye, mbaruhuure.”—Matayo 11:28.

OKWEBEMBEZA EBIRIKUKIRA OBUKURU

14. Ebintu ebikuru nibibaasa kuteebwaho bita omutima?

¹⁴ Ab’omu ka baaba baine omuntu oine endwara y’amaani, bashemereire kwijuka ebigambo ebi: ‘Ahu abahi b’obwengye baingi bari, enaama zihikiirizibwa.’ (Enfumu 15:22) Ab’eka erimu orwaire nibabaasa kushutama hamwe bagaaniire aha mbeera eretsirweho okurwara kw’omuntu? Nikiba kiri kirungi kushaba kandi bakasherura obuhabuzi omu Kigambo kya Ruhanga. (Zaaburi 25:4) Niki eki murikubaasa kugambaho omu kugaaniira nk’okwo? Okutwarira hamwe nimubaasa kugaaniira aha by’obujanjabi, eby’empiiha n’ebindi ebi eka erikwenda kucwamu. N’oha oraatware obujunaanizibwa bw’okureeberera omurwaire? Ab’eka egyo nibabaasa kukora ki okumuhwera? Kandi entebeekanisa eziraakorwe niziija kukwata zita ahari buri omwe omu ka egyo? Kandi ogwo oraamureberere naaza kuba naatunga ata eby’omwoyo n’ebindi eby’omubiri?

15. Eka erikuba erimu omuntu orwaire endwara y’amaani Yehova naagiha buhwezi ki?

¹⁵ Okushaba Yehova obutoosha kubaha obuhabuzi, okuteekateeka munonga aha Kigambo kye, n’okugyendera aha buhabuzi bwa Baibuli nikirugamu emigisha n’ei tutarikuteekateekaho. Omuntu orikuba arwaire omu ka naabaasa kutarahuka kukira. Kwonka okwesiga Yehova butoosha nikirugamu ebirungi omuri buri mbeera. (Zaaburi 55:22) Omuhandiiki wa zaaburi akagira ati: ‘Embabazi zaawe, MUKAMA, zindamira. Ku nteekateeka bingi, naayemereza omutima, okuhuumuriza kwawe kugwisa gye amagara gangye.’—Zaaburi 94:18, 19; reeba na Zaaburi 63:6-8.

OKUHWERA ABAANA

16, 17. Ni nshonga ki ezirikubaasa kugambwaho waaba noogaaniira n’abaana aha birikukwata ahari mutaahi waabo orwaire?

¹⁶ Okurwara endwara y’amaani omu ka nikubaasa kureetera abaana oburemeezi. Ni kikuru abazaire kuhwera abaana kwetegyereza ebibaireho n’eki abaana abo barikwetenga kukora okubaasa kuhwera. Orwaire yaaba ari omwana, abu arikuzaarwa nabo baine kuhwerwa kwetegyereza ngu okureeberera ogwo orwaire tikirikumanyisa ngu bo tibarikukundwa nari ngu nibakundwa kakye. Omu mwanya gw’okureka abaana abo bakaguubwa kubi nari kutongana, abazaire nibabaasa kubahwera kukundana n’okugumizamu nibakwatanisa omu kwemera oburemeezi oburetsirweho endwara.

¹⁷ Abaana nibaija kwetegyereza enshonga na munonga abazaire baagamba aha birikukwata aha biteekateeko byabo omu mwanya gw’okugamba aha nshonga nyingi nari kuteeraho kubashoboororera ebigumire ebirikukwata aha ndwara ei omwe aha b’omu ka aine. N’ahabw’ekyo nibabaasa kubagambira aha busaasi obu orwaire omu ka yaabo aine. Abaana abo baareeba oku endwara erikuremesa ogwo orwaire kukora n’ebitagumire munonga, nibabaasa kwongyera kumworeka ‘rukundo n’embabazi.’—1 Petero 3:8.

18. Abaana abakuru nibahwerwa bata kumanya oburemeezi oburikuba bureetsirweho endwara, kandi ekyo nikibaasa kubahwera kukora ki?

¹⁸ Abaana abakuru bashemereire kuhwerwa kumanya ngu hariho embeera egumire omu ka kandi ngu buri omwe aine kwefeerereza. Ahabw’okugira ngu nibaba baine kushohoza empiiha omu kuraguriza orwaire, abazaire nibabaasa kutaha abaana abandi buri kimwe eki barikwetenga. Abaana nibaija kuguubwa kubi ahabw’ekyo bagire ngu tibarikubataho mutima? Nari nibaija kwetegyereza embeera kandi babe beeteekateekire kugira ebi bayefeerereza? Ebyo byona nibirugiirira aha ku enshonga ezo zirikugaaniirwaho n’aha kukwatanisa okurikuba kuri omu ka. Buzima, okurwara kw’omwe aha b’omu ka kuhwereire abaana kukuratira obuhabuzi bwa Paulo obu: “Mutarikora ekintu kyona ahabw’okurwanira orubaju nari okwekuza, kureka omu bucureezi omuntu weena asiime mugyenzi we okukira oku arikwesiima. Omuntu weena omuriimwe arekye kweta aha bye wenka, kureka ayete n’aha by’abandi.”—Abafilipi 2:3, 4.

OKU TWINE KUREEBA EBY’OBUJANJABI

19, 20. (a) Ni bujunaanizibwa ki obu banyineeka barikuba baine haagira owaarwara omu ka yaabo? (b) N’obu Baibuli araabe etari kitabo ky’eby’obushaho, ni mu muringo ki ogu erikuhamu obuhabuzi aha ku twine kutwaza omuntu yaaba arwaire?

¹⁹ Omukristaayo tarikwanga eby’obujanjabi byaba bitarikuhenda ebiragiro bya Ruhanga. Omuntu omwe omu ka yaarwara, ab’omu ka egyo nibateeraho kusherura omubazi ogwakumutambira. Kwonka obumwe, abashaho nibabaasa kukugambira ebitarikushushana beitu oine kubanza kubiteekateekaho. Ekindi omu myaka egi nihaguma nihaija endwara nsya, kandi nyingi ahari ezo, tihariho emibazi yonyine erikuzitamba. Tikyorobi obumwe kutunga ebihikire omu kucebeza endwara. Mbwenu Omukristaayo ashemereire kukora ki?

²⁰ N’obu omwe aha bahandiiki ba Baibuli yaabaire ari omushaho kandi na Paulo yaahaire munywani we Timoseo obuhabuzi aha kyabaire nikibaasa kumutambira, Baibuli n’ey’okutuhabura omu by’emicwe n’eby’omwoyo beitu ti kitabo ky’eby’obushaho. (Abakolosai 4:14; 1 Timoseo 5:23) N’ahabw’ekyo, omu nshonga z’eby’obujanjabi, orikuba ari omutwe omu ka ey’Abakristaayo aine kucwamu gye. Obundi naabaasa kureeba ngu nikyetengyesa kureeba abashaho abarengire ahari omwe. (Gyeragyeranisa Enfumu 18:17.) Buzima banyineeka baine kusherura obuhwezi oburungi oburiho kubaasa kutambira orikuba arwaire, kandi baingi obuhwezi obwo nibabusherura omu bashaho. Abamwe nibakunda kusherura obujanjabi aha bantu abandi batari bashaho abatendekirwe. Omu nshonga egyo omuntu aine kwecweramu. Kwonka omu by’obujanjabi, Abakristaayo bashemereire kureka ‘ekigambo kya Ruhanga kikaba etabaaza emurikira ebigyere byabo n’omushana ogujwera omuhanda gwabo.’ (Zaaburi 119:105) Nibagumizamu kukuratira obuhabuzi oburi omu Baibuli. (Isaaya 55:8, 9) N’ahabw’ekyo, nibetantara okuragurirwa kwona okurikutwariramu eby’obufumu nari okurikuhenda emisingye ya Baibuli.—Zaaburi 36:9; Ebyakozirwe 15:28, 29; Okushuuruurwa 21:8.

21, 22. Omukazi omwe w’omuri Asia akagyendera ata aha musingye gwa Baibuli, kandi niki ekyayorekire ngu akacwamu gye omu mbeera ezi yaabaire arimu?

²¹ Teekateeka aha ky’okureeberaho ky’omukazi muto omuri Asia. Ku yaabaire aherize kutandika kwega Baibuli n’omwe aha Bajurizi ba Yehova, akazaara omwana w’omwishiki otakahikire kuzaarwa kandi akaba naaremeera guramu 1470. Omukazi akashaasha munonga, omushaho ku yaamugambiire ngu omwana we naija kuzingama abure obwengye kandi ngu taribaasa kugyenda. Akamuhabura kutwara omwana ogwo omu myanya ei barikureebereramu abazingami. Iba akaba atarikumanya eki aine kukora omu nshonga egyo. Bakaba nibabaasa kwiha nkahi obuhabuzi?

²² Omukazi ogwo naagira ati: “Ninyijuka ndikushoma omu Baibuli ngu abaana ‘n’obuhunguzi oburuga ahari MUKAMA, n’enda ezizaarwa n’ebiconco ebi agaba.’” (Zaaburi 127:3) Akacwamu kutwara ‘eky’obuhunguzi’ ekyo omuka kandi akamureeberera. Omu kubanza ebintu bikaba bitoorobi, kwonka arikuhwerwa Abakristaayo banywani be omu kibiina ky’Abajurizi ba Yehova, omukazi ogwo akabaasa kureeberera gye omwana we. Bwanyima y’emyaka ikumi n’ebiri, omwana akaba naabaasa kuza omu nteerane aha Kyombeko ky’Obukama kandi arikushemererwa hamwe n’eminyeeto bagyenzi be. Kandi nyina naagira ati: “Nyine okushemererwa okureeba ngu emisingye ya Baibuli ekampwera kukora ekihikire. Baibuli ekampwera kuguma nyine omutima ogutarikweshinja omu maisho ga Yehova Ruhanga beitu kutari kwefuuza oku naakugizire ebiro by’amagara gangye byona.”

23. Ni kuhuumurizibwa ki oku Baibuli erikuha abarwaire n’abo abarikubareeberera?

²³ Okurwara tikurikwija kugumaho ebiro byona. Nabi Isaaya akagamba aha bwire obu hataribaho “mutuuzi waayo origira ati: Ndwaire.” (Isaaya 33:24) Ekiraganiso ekyo nikiija kuhikiirizibwa omu nsi ensya erihakye kubaho. Kwonka obwire obwo butakahikire, okurwara n’okufa nibiija kuguma nibibaho. Ekirikushemeza, Ekigambo kya Ruhanga nikituha obuhabuzi n’obuhwezi. Emitindo erikukwata aha micwe eri omu Baibuli n’ey’obutwire, neekirira kimwe ebiteekateeko by’abantu abatahikiriire ebirikukira kuhindahinduka. N’ahabw’ekyo omunyabwengye aine kwikirizana n’omuhandiiki wa zaaburi owaagizire ati: “Ekiragiro kya MUKAMA kihikire, kigarura omutima omunda; ebi MUKAMA yaahamize n’eby’okwesigwa, biha obwengye otabwine. . . . Ebi MUKAMA aragiira n’eby’amazima, kandi n’eby’okuhikiirira buzima. . . . N’omu kubyorobera harimu ebihembo bingi.”—Zaaburi 19:7, 9, 11.

EMISINGYE YA BAIBULI EGI NEEBAASA KUHWERA ETA . . . AB’OMU KA KUREEBERERA ORWAIRE ENDWARA Y’AMAANI N’OKWEMERA OKUTEGANISIBWA OKURIKUBAHO?

Rukundo neegumisiriza kandi neeyemera ebintu byona.—1 Abakorinso 13:4-7.

Ni kikuru kugira emiteekateekyere mirungi.—Enfumu 18:14.

Ni kirungi kusherura obuhabuzi otakacwiremu aha nshonga nkuru.—Enfumu 15:22.

Twaba twine oburemeezi omu magara Yehova naatuha obuhwezi.—Zaaburi 55:22.

Ekigambo kya Yehova nikituhabura omu mbeera zoona.—Zaaburi 119:105

[Ekishushani ekiri aha rupapura 118]

Abakristaayo nibooreka rukundo yaabo eya buzima abakundwa baabo baaba barwaire

[Ekishushani ekiri aha rupapura 125]

Ab’omu ka baakwatanisa, oburemeezi nibubaasa kushoboororwa