Noohamya Ota ngu Abafu​—Nibaija Kuzooka?

Mbwenu shi nituba nitwikiririza eryo kuteekateeka ngu abafu nibaija kuzooka? Entumwa Paulo akaba atarikuteekateeka atyo. Akahwerwa Ruhanga kuhandiika ati: “Ku turaabe twine amatsiko omuri Kristo omu biro by’amagara aga gonka, nituba turi ab’okusaasirwa okukira abandi boona. Kwonka omu mazima Kristo akazoorwa omu bafu, niwe muganuro gw’abaagwejegyeire.” (1 Abakorinso 15:19, 20) Paulo akareeba okuzooka nk’okwabuzima. Ekyo kihamibwa okuzooka kwa Yesu.a (Ebyakozirwe 17:31) Egi niyo nshonga ahabw’enki Paulo yaayetsire Yesu ‘omuganuro,’ ahakuba niwe yaabandize kuzooka kutunga amagara agatahwaho. Yesu ku araabe niwe yaabandize kuzooka, nikimanyisa ngu hakaba nihaija kuzooka n’abandi.

Egi n’enshonga endiijo ahabw’enki turikubaasa kuhamya ngu nihaija kubaho okuzooka. Yehova ni Ruhanga ow’amazima. ‘Ruhanga tabaasa kubeiha.’ (Tito 1:2) Yehova takabeihaga, kandi taribaasa kukikora. Mbwenu shi akaaraganiise kuzoora abantu, ayorekye ngu naabaasa kubazoora, reero abure kukora nk’oku yaaragaaniise? Ekyo kikaabaire eky’obusaasi munonga!

Ahabw’enki Yehova yaataireho okuzooka okw’ebiro by’omumaisho? N’ahabwa rukundo ye. ‘Omuntu yaafa, naija kugaruka kubaho?’ Yobu nikwo yaabuurize. Akagarukamu ati: ‘Oryanyeta, naanye nkwetabe; kandi naiwe oine ekihika ky’okureeba eki emikono yaawe yaakozire.’ (Yobu 14:14, 15) Yobu akaba naahamya ngu Ishe ow’omu iguru oine rukundo aine ekihika ky’okumuzoora. Mbwenu shi Ruhanga akahinduka? Niinye Yehova “timpinduka,” nikwo arikugira. (Malaki 3:6) Ruhanga akiine ekihika ky’okureeba abaafiire barikugaruka kugira amagara baine n’okushemererwa. Ekyetengo eki ni nk’eky’omuzaire oine rukundo yaafeerwa omwana. Entaaniso eri ngu, Ruhanga we aine amaani g’okukora nk’oku arikwenda.—Zaaburi 135:6.

Yehova naija kuha Omwana we amaani g’okushemeza abarikucura abarikuba bafeereirwe abakundwa baabo. Yesu aine miteekateekyere ki aha kuzooka? Yesu atakazoire Laazaaro, akareeba obusaasi obu banyaanya Laazaaro na banywani baabo baabaire baine, nawe “yaarira.” (Yohaana 11:35) Eizooba erindi, Yesu akabugana omufaakazi wa Naini owaabaire afeereirwe omwana omwe wenka ou yaabaire aine. Yesu akagira “esaasi, yaamugira” ngu arekye kurira. Ahonaaho akazoora omwana we. (Luka 7:13) N’ahabw’ekyo, naakwatwaho munonga amaganya n’okufa. Ka naija kushemererwa kureetera abantu amashemererwa omu mwanya gw’amaganya!

Oragizireho amaganya? Noobaasa kuteekateeka ngu okufa n’oburemeezi obutarikubaasa kurugaho. Kwonka haine ekirikubaasa kukorwa. Ruhanga naija kuzoora abantu arikukoresa Omwana we. Ijuka ngu Ruhanga naayenda kureeba ekyo nikibaho. Naayenda ngu obe oriho orikugaruka kubumbatira abakundwa baawe. Teera akashushani murikutebeekanisa hamwe kutuuraho ebiro byona, mutakisiiburana!

Lionel, owaaba yaagambirweho, naijuka ati: “Nkarugaho naayega ebirikukwata aha kuzooka. Omu kubanza kikaba kigumire kukiikiriza, kandi nkaba ntarikwesiga omuntu owaambuuriire. Kwonka nkashwijuma ebiri omu Baibuli naashanga bihikire! Nyine ekihika ky’okugaruka kureeba tatenkuru.”

Nooyenda kumanya ebirikukiraho? Abajurizi ba Yehova nibaija kushemererwa kukworeka omu Baibuli yaawe, ahabw’enki nibahamya ngu nihaija kubaho okuzooka omu biro by’omumaisho.b