Obukama Oburaategyekye Ensi Yoona

Obukama oburikugambwaho noobumanya?— N’Obukama bwa Ruhanga, oburaahindure ensi paradiso. Okaayenzire kwongyera kwega ebirikukwata aha Bukama obu?—

Buri bukama nibuba bwine omugabe. Kandi omugabe naategyeka abantu b’omu ihanga eri arikutuuramu. Noomanya Omugabe w’Obukama bwa Ruhanga?— Ni Yesu Kristo. Kandi naatuura omu iguru. Naija kuba Omugabe wa buri omwe omu nsi. Nooteekateeka ngu nitwija kutunga okushemererwa Yesu ku araatandikye kutegyeka ensi yoona?—

Nitwija kushemererwa munonga. Omu Paradiso, abantu tibarikwija kuza omu ntaro nari kurwana. Buri omwe naija kuba naakunda mutaahi we. Tihaine oraije kugaruka kurwara nari kufa. Abahumire nibaija kureeba, abafiire amatu nibaija kuhuurira, kandi abarema nibaija kubaasa kugyenda kandi bagurukye. Buri omwe naija kutunga eby’okurya birikumara. Enyamaishwa zoona tiziraagarukye kuryana kandi tiziraije kukora kubi abantu. Abantu abaafiire nibaija kuzooka. Baingi aha bashaija n’abakazi obu oyeegireho omu katabo aka, nka Rebeka, Rahabu, Daudi, na Eliya nabo nibaija kuzooka. Okaayenzire kubareeba ku baraazookye?—

Yehova naakukunda kandi naayenda ngu otungye okushemererwa. Waaguma nooyega ebirikukwata ahari Yehova kandi noomworobera, noija kutunga amagara agatahwaho omu Paradiso. Naiwe nikyo orikwenda?—