EISHOMO 4

Okwanjura Gye Ebyahandiikirwe

Matayo 22:41-45

EKY’OKUKORA: Tebeekanisa ebiteekateeko by’abakuhurikiize otakashomire ekyahandiikirwe.

Yoreka ahabw’enki nooza kushoma ekyahandiikirwe. Yanjura ekyahandiikirwe omu muringo oguraahwere abakuhurikiize kureeba ahabw’enki waakishoma.

Yetegyereze ebyetooroire ekyahandiikirwe ekyo. Waacwamu kugamba owaagambire ebigambo ebyo nari owaabihandiikire, gamba ohikire.
Juriza Baibuli eine amaani. Waaba noogamba n’abantu abarikwikiririza omuri Ruhanga, koresa Baibuli ‘Ekigambo kya Ruhanga,’ ahakuba nikyo bukomooko bw’obwengye.
Reeteera Abakuhurikiize Kukunda ebyahandiikirwe. Buuza ekibuuzo ekirikugarukwamu omu kyahandiikirwe eki orikuza kushoma, gamba oburemeezi obu ekyahandiikirwe ekyo kirikushoboorora, nari gamba omusingye ogu ekyahandiikirwe kiraahwere abahurikiize kwetegyereza.

Teekateeka aha ki abakuhurikiize barikumanya aha nshonga n’ekyahandiikirwe ekyo. Nangwa n’ekyahandiikirwe ekirikumanywa munonga, kyanjure omu muringo gurikushemeza, kandi hwera abakuhurikiize kukyetegyereza omu muringo musya.