EISHOMO 2

Okugamba nk’Orikugaaniira

2 Abakorinso 2:17

EKY’OKUKORA: Gamba omu muringo gwawe ogwa butoosha, kworeka oku orikutwara ebi orikugambaho n’abakuhurikiize.

Tebeekanisa gye kandi oshabe. Shaba Yehova kukuhwera kuta omutima aha butumwa, beitu kutari kweteekateekaho munonga. Ta omutima aha nshonga enkuru ezi orikwenda kugamba. Gamba enshonga omu bigambo ebyawe, otashoma bushoma ebigambo nk’oku bihandiikirwe.

Waaba nooyenda kushoma omu Baibuli nari omu kitabo, yetegyereze gye obutumwa kugira ngu obushome gye. Ebigambo by’abandi byaba bijuriziibwe, bishome orikworeka enyehurira kwonka otarengyesereza.
Gamba kuruga aha mutima. Manya ahabw’enki obutumwa buri bukuru aha bakuhurikiize. Bateho omutima. Kandi enyemerera yaawe, oku orikukoresa ebicweka by’omubiri, n’endeebeka y’aha maisho, bishemereire kworeka omuhimbo n’okufayo.

Toshemereire kuteekateeka ngu okugamba omu muringo ogwa butoosha nikyo kimwe n’okugamba otarikwefeerayo. Gamba omu muringo ogurikuhaisa ekitiinisa orikukoresa engamba nungi kandi ehikire.
Reeba abakuhurikiize. Guma nooreeba abakuhurikiize kyaba kitarikubagwisa kubi. Waaba nooha orubazo, reeba buri muntu okwe omu mwanya gw’okureeba abantu baingi omurundi gumwe.