ESHUURA YA KASHATU
Ruhanga Ainiire Abantu Kigyendererwa Ki?
1. Ruhanga ainiire abantu kigyendererwa ki?
RUHANGA ainiire abantu ekigyendererwa kirungi. Akahanga Adamu na Haawa kutuura omu musiri murungi. Akaba naayenda ngu bazaare abaana bahindure ensi yoona Paradiso, kandi bareeberere n’enyamaishwa—Okutandika 1:28; 2:8, 9, 15; reeba Ebirikukiraho 6.
2. (a) Nitumanya tuta ngu Ruhanga naija kuhikiiriza ekigyendererwa kye? (b) Eky’okutuuraho ebiro byona Baibuli neekigambaho ki?
2 Nooteekateeka ngu obwire nibwija kuhika tutuure omu paradiso? Yehova naagira ati: ‘Niinye naakigamba kandi ndyakikora.’ (Isaaya 46:9-11; 55:11) Eego, Ruhanga buzima naija kuhikiiriza ekigyendererwa kye, tihaine ekirikubaasa kumuremesa. Yehova naagira ngu akahanga ensi aine ekigyendererwa. Taragihangiire busha. (Isaaya 45:18) Naayenda ngu abantu batuure omu nsi yoona. Ni bantu ba muringo ki abu arikwenda ngu batuure omu nsi kandi kumara obwire burikwingana ki? Baibuli neegarukamu eti: ‘Abahikiriire (nari, abarikworobera Ruhanga) nibaija kuhungura ensi, bagituuremu ebiro byona.’—Zaaburi 37:29; Okushuuruurwa 21:3, 4.
3. Ahabw’okugira ngu abantu nibarwara kandi bafa, niki eki turikubaasa kwebuuza?
3 Kwonka hati abantu nibarwara kandi bafa. Omu myanya mingi, abantu nibarwana kandi baitana. Buzima eki tikyo Ruhanga yaabaire agyendereire. Mbwenu shi niki ekyabaireho? Kandi n’ahabw’enki? Baibuli niyo erikubaasa kutuhwera kukimanya.
OMUZIGU WA RUHANGA
4, 5. (a) N’oha owaagambire na Haawa arikukoresa enjoka omu musiri Edeni? (b) Omuntu omwesigwa naabaasa kuhinduka ata omushuma?
4 Baibuli neetugambira ngu hariho omuzigu wa Ruhanga orikwetwa “Omuregi kandi Sitaane.” Sitaane akakoresa enjoka kugamba na Haawa omu musiri Edeni. (Okushuuruurwa 12:9; Okutandika 3:1) Akareetera enjoka kureebeka nk’erikugamba.—Reeba Ebirikukiraho 7.
5 Mbwenu shi Ruhanga akahanga “Sitaane Omuregi”? Ngaaha! Maraika owaabaire ari omu iguru obu Ruhanga yaabaire naatebeekanisiza Adamu na Haawa ensi, akahinduka yaaba Omuregi. (Yobu 38:4, 7) Eki kikabaho kita? Omuntu omwesigwa naabaasa kuhinduka ata akaba omushuma? Naaba atazairwe ari omushuma. Kwonka naayetenga ekintu ekitari kye. Naaguma naakiteekateekaho, kandi ekyetengo kye nikyeyongyera kuba eky’amaani. Bwanyima ku arikutunga omugisha, naakiiba. Naaba yaahinduka omushuma.—Shoma Yakobo 1:13-15; reeba Ebirikukiraho 8.
6. Maraika akahinduka ata omuzigu wa Ruhanga?
6 Eki nikyo kyabaire ahari maraika owaabaire ari omwesigwa. Yehova ku yaaherize kuhanga Adamu na Haawa, akabagambira kuzaara abaana ‘bakaijuza ensi.’ (Okutandika 1:27, 28) Maraika ogwo naabaasa kuba yaateekateekire ati: ‘Abantu abo boona bakaabaasize kundamya omu mwanya gw’okuramya Yehova!’ Ku yaagumire naakiteekateekaho, yaayeyongyera kwetenga ekyabaire kiri ekya Yehova. Maraika ogwo akaba naayenda ngu abantu babe niwe baaramya. Ekyarugiremu, akabeiha Haawa, atyo yaamuhabya. (Shoma Okutandika 3:1-5.) Ahabw’okutwaza atyo, akahinduka Sitaane Omuregi, omuzigu wa Ruhanga.
7. (a) Ahabw’enki Adamu na Haawa baafiire? (b) Ahabw’enki baijukuru ba Adamu boona nibakaikura kandi bakafa?
7 Adamu na Haawa bakagomera Ruhanga kandi barya ekijuma. (Okutandika 2:17; 3:6) Bakashiisha bwanyima baafa nk’oku Yehova yaabaire agambire. (Okutandika 3:17-19) Abaana ba Adamu na Haawa bakaba bari abasiisi, n’ahabw’ekyo bakafa. (Shoma Abarooma 5:12.) Okubaasa kwetegyereza ahabw’enki baijukuru ba Adamu na Haawa baahindukire abasiisi, teekateeka aha ky’okureeberaho eki. Waateekyera emigaati omu mucebe oguhompire. Buri mugaati nigurugamu guhompire, guriho enkojo. Adamu ku yaagomiire Ruhanga, akahinduka omusiisi. Ahabw’okugira ngu turi baijukuru ba Adamu, twena turi abasiisi. Kandi ahabw’okugira ngu twena turi abasiisi, nitukaikura kandi tufa.—Abarooma 3:23; reeba Ebirikukiraho 9.
8, 9. (a) Niki eki Sitaane yaabaire naayenda ngu Adamu na Haawa baikirize? (b) Ahabw’enki Yehova ataracwekyereize abagomi aba ahonaaho?
8 Sitaane akatandikaho obugomi obu yaareetera Adamu na Haawa kugomera Yehova. Akaba naayenda ngu Adamu na Haawa baikirize ngu Yehova n’omubeihi, kandi omutegyeki mubi owaabaire atarikubendeza ebirungi. Sitaane akaba naagira ngu abantu tibarikwetenga Ruhanga kubagambira eky’okukora, kandi ngu Adamu na Haawa bakaba baine kwecweramu ekihikire n’ekigwire. Mbwenu shi, Yehova akaba aine kukora ki? Akaba naabaasa kucwekyereza abagomi abo, reero obugomi bugarukire aho. Kwonka shi ekyo kikaba nikiija kworeka ngu Sitaane n’omubeihi? Ngaaha.
9 N’ahabw’ekyo, Yehova taraacwekyereize abagomi abo ahonaaho. Akacwamu kureka abantu kwetegyeka. Eki kikaba nikiza kworeka gye ngu Sitaane n’omubeihi, kandi ngu Yehova niwe arikumanya ekirungi ekishemereire abantu. Nitwija kwega ebirikukiraho aha nshonga egyo omu Shuura ya 11. Kwonka eki Adamu na Haawa baacwiremu nookireeba ota? Mbwenu shi bakaba bahikire kwikiriza Sitaane reero bakagomera Ruhanga? Yehova akaba ahaire Adamu na Haawa buri kimwe eki baabaire baine. Bakaba bari abahikiriire, baine omwanya murungi munonga gw’okutuuramu, barikukora n’emirimo mirungi. Kwonka Sitaane tihaine ekirungi kyona eki yaabaire yaabakoreire. Ku ogire ngu okaba oriho, okaba nooza kukora ki?
10. Buri omwe ahariitwe aine kucwamu ki?
10 Omu bunaku obu, buri omwe ahariitwe aine kucwamu, kandi eki turikucwamu nikitukwataho munonga. Nitubaasa kucwamu kworobera Yehova nk’omutegyeki waitu, kandi tukooreka ngu Sitaane n’omubeihi. Nari nitubaasa kutoorana Sitaane nk’omutegyeki waitu. (Zaaburi 73:28; shoma Enfumu 27:11.) Abantu bakye omu nsi egi nibo barikworobera Ruhanga. Kandi buzima Ruhanga tiwe arikutegyeka ensi egi. Mbwenu shi ku araabe atari Ruhanga, n’oha?
N’OHA ORIKUTEGYEKA ENSI EGI?
Mbwenu shi Sitaane akaba naabaasa kuraganisa Yesu obugabe bw’omu nsi kuri bwabaire butari obwe?
11, 12. (a) Sitaane okuha Yesu obugabe nitubaasa kukyegaho ki? (b) Ni byahandiikirwe ki ebirikworeka ngu Sitaane niwe mutegyeki w’ensi egi?
11 Yesu akaba naamanya orikutegyeka ensi egi. Eizooba rimwe Sitaane akooreka Yesu ‘obugabe bwona obw’omu nsi yoona n’ekitiinisa kyabwo.’ Sitaane akaraganisa Yesu ati: “Ku orainame, wandamya, biriya byona niinyija kubikuha.” (Matayo 4:8, 9; Luka 4:5, 6) Yebuuze oti: ‘Ku ogire ngu Obugabe obwo bukaba butari bwa Sitaane, akaba naija kubuha Yesu?’ Ngaaha. Eby’obutegyeki byona biri ahansi y’obutegyeki bwa Sitaane.
12 Kwonka noobaasa kwebuuza: ‘Nikibaasika kita kugira ngu Sitaane niwe mutegyeki w’ensi egi? Yehova Ruhanga ow’Obushoboorozi Bwona tiwe yaahangire ebintu byona?’ (Okushuuruurwa 4:11) Eego buzima niwe yaabihangire kwonka Yesu akagira ngu Sitaane niwe ‘mutegyeki w’ensi egi.’ (Yohaana 12:31; 14:30; 16:11) Entumwa Paulo akagira ngu Sitaane Omuregi ni “ruhanga w’ensi egi.” (2 Abakorinso 4:3, 4) Kandi, entumwa Yohaana akahandiika ati: “Ensi yoona eri omu butegyeki bw’Omubi ogwo.”—1 Yohaana 5:19.
ENSI YA SITAANE NEIJA KUCWEKYEREZIBWA ETA?
13. Ahabw’enki nitwetenga ensi ensya?
13 Ensi neeguma neeyeyongyera kuba mbi. Nitureeba ensi eijwiremu entaro, obushomankuzi, oburyarya, n’obushaarizi. Abantu tibarikubaasa kumaraho oburemeezi obu, n’obu baakuteeraho munonga. Kwonka Ruhanga naija kucwekyereza ensi egi embi omu rutaro rwa Haramagedoni, reero areeteho ensi ensya eraabe erimu okuhikiirira.—Okushuuruurwa 16:14-16; reeba Ebirikukiraho 10.
14. N’oha ou Ruhanga yaatooraine kuba Omutegyeki w’Obukama Bwe, kandi Baibuli ekagamba ki ahari Yesu?
14 Yehova Ruhanga akatoorana Yesu Kristo kuba Omutegyeki w’Obukama nari gavumenti Ye ey’omu iguru. Ira munonga, Baibuli ekagira ngu Yesu naija kutegyeka nka “Mukama w’obusingye” kandi ngu gavumenti ye neija kugumaho. (Isaaya 9:6, 7) Yesu akagambira abakuratsi be kushaba ngu gavumenti egi eije obu yaagira ati: “Obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:10) Omu Shuura ya 8, nitwija kwega oku Obukama bwa Ruhanga buraiheho gavumenti z’omu nsi zoona. (Shoma Danieli 2:44.) Obwo, Obukama bwa Ruhanga nibwija kuhindura ensi egi paradiso.—Reeba Ebirikukiraho 11.
ENSI ENSYA ERI HAIHI!
15. “Ensi ensya” niki?
15 Baibuli neetuhamiza eti: “Itwe nitutegyereza eiguru erisya n’ensi ensya ebituurwamu okuhikiirira.” (2 Petero 3:13; Isaaya 65:17) Obumwe Baibuli ku erikukoresa ekigambo “ensi,” neeba neemanyisa abantu abarikutuura omu nsi. (Okutandika 11:1) N’ahabw’ekyo “ensi ensya” ey’okuhikiirira nibo abantu boona abarikworobera Ruhanga kandi abu araahe omugisha.
16. Ni kiconco ki eky’omuhendo eki Ruhanga arikwija kuha abaraatuure omu nsi ensya, kandi twine kukora ki kukitunga?
16 Yesu akaraganisa ngu abaraatuure omu nsi ensya nibaija kutunga “amagara agatahwaho.” (Mako 10:30) Mbwenu shi twine kukora ki kubaasa kutunga amagara agatahwaho? Nyabura ‘we, shoma Yohaana 3:16 na Yohaana 17:3 kutunga eky’okugarukamu. Ka tureebe eki Baibuli erikugamba aha ku embeera ziraabe ziri omu Paradiso.
17, 18. Nituhamya tuta ngu omu nsi yoona nihaija kubamu obusingye n’oburinzi?
17 Obubi, entaro, obugomi n’obushaarizi nibiija kuhwaho. Abantu ababi nibaija kuba batakiriho omu nsi. (Zaaburi 37:10, 11) Ruhanga ‘naija kumaraho engamba okuhika aha muheru gw’ensi.’ (Zaaburi 46:9; Isaaya 2:4) Obwo ensi neija kwijura abantu abarikukunda Ruhanga kandi abarikumworobera. Nihaija kubaho obusingye ebiro byona.—Zaaburi 72:7.
18 Abaheereza ba Yehova nibaija kuba baine oburinzi. Obu Baibuli yaabaire neehandiikwa, Abaisraeli ku baabaire boorobera Ruhanga, bakaba bagira obusingye ahakuba akaba abarinda. (Abaleevi 25:18, 19) Omu Paradiso, titurikwija kutiina ekintu kyona nari omuntu weena. Nitwija kuba twine oburinzi.—Shoma Isaaya 32:18; Miika 4:4.
19. Ahabw’enki turikubaasa kuhamya ngu omu nsi ensya nihaija kuba harimu eby’okurya bingi?
19 Nihaija kubaho eby’okurya bingi. “Haryabaho omweru mwingi omu nsi, emyaka eryakondakonda omu misiri omu bibungo.” (Zaaburi 72:16) Yehova ‘Ruhanga waitu, naija kutuha omugisha,’ kandi ‘ensi neija kureeta omweru gwayo.’—Zaaburi 67:6.
20. Nitumanya tuta ngu ensi neija kuba paradiso?
20 Ensi yoona neija kuba paradiso. Abantu nibaija kugira amaju marungi n’emisiri. (Shoma Isaaya 65:21-24; Okushuuruurwa 11:18.) Ensi yoona neija kuba nungi munonga nk’oku omusiri Edeni gwabaire guri. Yehova naija kuba naatuha byona ebi turikwetenga butoosha. Baibuli neegira eti: “Oshashaanura engaro zaawe, ohaazya ekintu kyona ekihuriire ebi kirikwetenga.”—Zaaburi 145:16.
21. Nitumanya tuta ngu abantu nibaija kugira obusingye n’enyamaishwa?
21 Nihaija kubaho obusingye ahagati y’abantu n’enyamaishwa. Enyamaishwa tizirikwija kugaruka kukora kubi abantu. Nangwa n’abaana bato nibaija kuba batarikutiina nyamaishwa eziri ez’akabi omu bunaku obu.—Shoma Isaaya 11:6-9; 65:25.
22. Yesu naija kukorera ki abarwaire?
22 Tihaine orikwija kugaruka kurwara. Obu Yesu yaabaire ari omu nsi, akakiza abantu baingi. (Matayo 9:35; Mako 1:40-42; Yohaana 5:5-9) Kandi Yesu Omugabe w’Obukama bwa Ruhanga, naija kukiza buri omwe. Tihaine origaruka kugira ati: “Ndwaire.”—Isaaya 33:24; 35:5, 6.
23. Ruhanga naija kukorera ki abaafiire?
23 Abaafiire nibaija kuzooka. Ruhanga naaraganisa ngu naija kuzoora abantu baingi abaafiire. Nihaija kubaho “okuzooka kw’abahikiriire n’abatahikiriire.”—Shoma Yohaana 5:28, 29; Ebyakozirwe 24:15.
24. Nooyehurira ota ku orikuteekateeka aha kutuura omu Paradiso?
24 Twena twine eki turikubaasa kucwamu. Nitubaasa kucwamu kwega ahari Yehova kandi tukamuheereza, nari nitubaasa kukora eki turikwenda. Twacwamu kuheereza Yehova, nitwija kugira ebiro birungi by’omumaisho. Omushaija ku yaashabire Yesu ngu amwijukye yaaheza kufa, Yesu akamugarukamu ati: “Noija kuguma naanye omuri Paradiso.” (Luka 23:43) Ka tweyongyere kwega ebirikukwata ahari Yesu Kristo n’oku Ruhanga arikwija kuhikiiriza ebi yaaraganiise.