EISHOMO 15

Okugamba Oine Obuhame

1 Abatesalonika 1:5

EKY’OKUKORA: Yoreka ngu noikiririza kimwe omu bi orikugamba n’oku biri bikuru.

Tebeekanisa gye. Manya enshonga enkuru kandi yetegyereze n’oku Baibuli erikuzishagika. Teeraho kugamba enshonga enkuru omu bigambo byorobi. Reeba oku enshonga ezo zirikubaasa kuhwera abakuhurikiize. Shaba Yehova kukuha omwoyo gurikwera.

Ebi orikuza kugamba byegyezemu omu iraka ririkuhurirwa, kugira ngu obite omu biteekateeko byawe, reero kikuhwere kugamba otarikuteera entsibo.
Koresa ebigambo ebirikworeka ngu oine obuhame. Omu mwanya gw’okugarukamu ebigambo ebihandiikirwe omu bitabo, koresa ebigambo byawe. Gamba omu muringo ogurikworeka ngu noohamya ebi orikugamba.
Gamba orikuhamya kandi omu muringo gw’amazima. Koresa eiraka eririkuhurirwa gye. Reeba abakuhurikiize waaba noogamba nabo kwonka kikore omu muringo ogutarikubagwisa kubi.

Toshemereire kuteekateeka ngu okugamba oine obuhame nikyo kimwe n’okugambira eryo, okuhamira aha miteekateekyere yaawe, nari okugyemesereza abandi. Nangwa n’obu waakuba oine obuhame aha kintu, higa abakuhurikiize omu muringo gwa rukundo.