Babulooni Orukuru Niki?

Eki Baibuli erikugarukamu

Ekitabo ky’okushuuruurwa nikigamba aha “mukazi maraaya omukuru” ou eiziina rye “erisherekirwe, Babulooni Orurembo Orukuru.” (Okushuuruurwa 17:1, 3, 5) Omukazi ogu naajwekyera ediini z’ebishuba omu nsi yoona, ezihindwire “amazima ga Ruhanga ebishuba.”a (Abarooma 1:25) N’obu ediini ezo ziraabe zitarikushushana omu miringo mingi, zoona niziremesa abantu kuramya Yehova Ruhanga ow’amazima.—Eky’Ebiragiro 4:35.

Oku turikubaasa kumanya Babulooni Orukuru

1. Babulooni Orukuru n’akamanyiso. Ekitabo ky’okushuuruurwa kihandiikirwe omu muringo gw’obumanyiso, n’ahabw’ekyo kihikire kugira ngu Babulooni Orukuru ti mukazi owaabuzima kureka n’akamanyiso. (Okushuuruurwa 1:1) Okwongyera ahari ekyo, ‘ashutami aha maizi maingi,’ agarikujwekyera “abantu b’emiringo mingi n’emitwe mingi n’amahanga n’endimi.” (Okushuuruurwa 17:1, 15) Ekyo omukazi owaabuzima tarikubaasa kukikora.

2. Babulooni Orukuru nirujwekyera ekibiina kihango omu nsi yoona. Nirwetwa “orurembo orukuru orurikutegyeka abagabe b’ensi.” (Okushuuruurwa 17:18) N’ahabw’ekyo rwine obushoboorozi aha bantu baingi omu nsi yoona.

3. Babulooni Orukuru ti kibiina ky’eby’obutegyeki nari obushuubuzi kureka n’eky’amadiini. Babulooni eya ira rukaba ruri orurembo rw’ediini munonga orwabaire nirumanywa ahabw’okukoresa eby’obufumu otwariiremu “okubandwa” “n’oburogo.” (Isaaya 47:1, 12, 13; Yeremia 50:1, 2, 38) Abatuuzi b’omu rurembo orwo bakaba nibeejumba omu kuramya kw’ebishuba okurikuhakanisa Ruhanga ow’amazima Yehova. (Okutandika 10:8, 9; 11:2-4, 8) Abategyeki ba Babulooni bakaba baine amaryo kandi barikwetunguura ahari Yehova n’okuramya okw’amazima. (Isaaya 14:4, 13, 14; Danieli 5:2-4, 23) Ahabw’okugira ngu Babulooni Orukuru nirumanywa, ahabw’ebikorwa by’obufumu, ekyo nikyoreka ngu n’ekibiina ky’amadiini.—Okushuuruurwa 18:23.

   Ekindi, Babulooni Orukuru tirukaaba ekibiina ky’eby’obutegyeki ahabw’okuba “abagabe b’ensi” nibacura ahabw’okuhwerekyerera kwarwo. (Okushuuruurwa 17:1, 2; 18:9) Kandi ti kibiina ky’eby’obushuubuzi ahabw’okuba Baibuli neerutaanisa ‘n’abashuubuzi b’ensi.’—Okushuuruurwa 18:11, 15.



Photograph taken by courtesy of the British Museum

4. Babulooni Orukuru nirujwekyera gye ediini z’ebishuba. Omu mwanya gw’okwegyesa abantu oku barikubaasa kwirira haihi Yehova Ruhanga ow’amazima, ediini z’ebishuba nizireetera abantu kuramya baaruhanga abandi. Ekyo Baibuli neekyeta ‘okuraaya’ omu by’omwoyo. (Abaleevi 20:6; Okuruga 34:15, 16) Amadiini maingi g’ebishuba nigagumizamu kwegyesa enyegyesa nari enyikiriza eziine akakwate na Babulooni eya ira nk’obushatu, omwoyo ogutarikufa, n’okukoresa ebishushani omu kuramya. Nigajwanzya okuramya kwago n’okukunda eby’ensi. Ekyo Baibuli nikigyeragyeranisa n’okushambana omu by’omwoyo.—Yakobo 4:4.

   Obutungi bw’ediini z’ebishuba n’okweyoreka nibihikaana gye n’eki Baibuli erikugamba ahari Babulooni Orukuru omukazi maraaya ahakuba akaba “ajwaire emyenda ya bujwa n’erikutukura” kandi “ayehunzire eby’ezaabu n’amabaare ag’obuguzi bwingi n’eruuru.” (Okushuuruurwa 17:4) Babulooni Orukuru nirwo bukomooko ‘bw’ebihagaro by’ensi,’ nari enyegyesa n’ebikorwa ebitarikuhaisa Ruhanga ekitiinisa. (Okushuuruurwa 17:5) ‘Abantu b’emiringo mingi n’emitwe mingi n’amahanga n’endimi’ bari omu diini z’ebishuba n’ahabw’ekyo nibashagika Babulooni Orukuru.—Okushuuruurwa 17:15.

Babulooni Orukuru rwine obujunaanizibwa bwingi aha kufa kwa “boona abaitsirwe omu nsi.” (Okushuuruurwa 18:24) Kumara obwire buraingwa ediini z’ebishuba zishagikire entaro n’ebikorwa by’obuzahambuki, kandi ziremirwe kwegyesa abantu amazima agarikukwata ahari Yehova Ruhanga owa rukundo. (1 Yohaana 4:8) Kandi ekyo kirugiremu okusheesha eshagama.

Ruhanga Naareeba ata Babulooni Orukuru?

Ruhanga naareeba ebibi bya Babulooni Orukuru ‘bituumire kuhika ahaiguru munonga.’ (Okushuuruurwa 18:4, 5) Ainiire ediini z’ebishuba ekiniga kingi ahabw’okushiisha eiziina rye n’okutuuntuza abakuratsi baazo.

Niki ekirahike ahari Babulooni Orukuru?

Baibuli neegira ngu Ruhanga acwereire Babulooni Orukuru orubanja. (Okushuuruurwa 18:20) Baibuli neeyoreka omu muringo gw’akamanyiso ngu Ruhanga naija kumariraho kimwe ediini z’ebishuba. (Okushuuruurwa 18:8) Naija kukoresa enyamaishwa erikutukura erikujwekyera ekibiina ky’amaani eky’eby’obutegyeki, kwehindukana ediini z’ebishuba kandi kizicwekyerereze kimwe. (Okushuuruurwa 17:16, 17) “Oku nikwo orurembo orukuru Babulooni rurinagwa aha nsi n’amaani maingi, kandi tirurireebwa bundi.” (Okushuuruurwa 18:21) N’ahabw’ekyo abarikwenda kushemeza Ruhanga baine ‘kururugamu’ bakeetantara kugira akakwate koona n’ediini z’ebishuba.—2 Abakorinso 6:14-17.