EKICWEKA EKY’OKWEGA 6
Nooyesiga Omuringo Ogu Yehova Arikukoramu Ebintu?
“Rukiri, omurimo gwe guhikire, ahakuba emitwarize ye yoona n’ey’oburyo, ni Ruhanga ow’okwesigwa, otagira kutahikiirira, n’ow’amazima, kandi ohikiriire.”—BIR. 32:4.
EKYESHONGORO 3 Amaani Gaitu, Amatsiko Gaitu, Obwesigye Bwaitu
EBIRAAGAMBWEHOa
1-2. (a) Ahabw’enki baingi obunaku obu nibagumirwa kwesiga abaine obushoboorozi? (b) Nituza kushwijuma ki omu kicweka eki?
BAINGI obunaku obu nibagumirwa kwesiga weena oine obushoboorozi. Nibareeba ngu ab’ebiragiro n’abategyeki nibakwatsiza abagaiga n’ab’amaani, kwonka abooro tibarikutunga buringaaniza. Eki Baibuli ekakyoreka gye erikugira eti: “Omuntu naayekuriza ahari mugyenzi we kumukora kubi.” (Mub. 8:9) Kandi, abeebembezi b’ediini abamwe nibakora ebihagaro, ekireeteire abantu baingi kurekyera aho kwesiga Ruhanga. N’ahabw’ekyo omuntu yaikiriza ngu tumwegyese Baibuli, nikiba kitoorobi kumuhwera kwesiga Yehova n’abu atooraine omu nsi.
2 Amazima gari ngu, abeegi ba Baibuli tibo bonka abaine kwega kwesiga Yehova n’ekibiina kye. Nangwa naitwe abamazire emyaka mingi omu mazima, twine kuguma nitwijuka ngu omuringo ogu Yehova arikukoramu ebintu nigwo gurikukirayo oburungi. Obumwe nihabaho embeera ezirikubaasa kugyeza obwesigye bwaitu omuri Yehova. Omu kicweka eki nituza kureeba oku okwikiriza kwaitu kurikubaasa kugyezibwa omu miringo eshatu: (1) twaba nitushoma ebiri omu Baibuli, (2) ekibiina kya Yehova kyatuha eby’okukuratira, (3) na twahikwaho oburemeezi omu biro by’omumaisho.
YESIGYE YEHOVA WAABA NOOSHOMA BAIBULI
3. Ebimwe ebiri omu Baibuli nibibaasa kugyeza bita obwesigye obu twine omuri Yehova?
3 Twaba nitushoma Baibuli, nitubaasa kubangaanisa aha muringo ogu Yehova yaatwariizemu abantu abamwe n’encwamu ye. Nk’eky’okureeberaho, omu kitabo ky’Okubara, nitushoma ngu Omwisraeli owaabaire naasheenya enku ahari Sabato, Yehova akamucwera orubanja rw’okufa. Omu Samueli ekya kabiri, nitwega ngu bwanyima y’ebyasha bingi, Yehova akasaasira Omugabe Daudi owaashambaine kandi akaita. (Kub. 15:32, 35; 2 Sam. 12:9, 13) Nitubaasa kwebuuza, ‘ahabw’enki Yehova yaasaasiire Daudi omwitsi kandi enshambani, kwonka omushaija owaakozire enshobe erikureebeka nka nkye akaitwa? Kubaasa kugarukamu ekibuuzo ekyo, twine kuteekateeka aha nshonga ishatu twaba nitushoma Baibuli.
4. Ebiri omu Okutandika 18:20, 21 n’Eky’Ebiragiro 10:17 nibikuhwera bita kwongyera kwesiga omuringo ogu Yehova arikucwa emanja?
4 Obumwe Baibuli terikutuha obushonshorekye bwona obw’ebyabaireho. Nk’eky’okureeberaho, nitumanya ngu Daudi akeeteisiza kimwe ebibi bye. (Zab. 51:2-4) Kwonka shi omushaija owaahenzire ekiragiro kya Sabato akaba ari omuntu wa muringo ki? Mbwenu shi akeeteisa? Haine ekiragiro eki yaabaire yaahenzireho enyima? Akaba yaayehugizeho okurabura nari akakwanga? Ekyo Baibuli terikukigambaho. Kwonka eki turikumanya n’eki: Yehova taine “kutahikiirira” kwona. (Bir. 32:4) Naacwamu arikwihirira aha buhame bwona, kutari kuhurira buhurira, okushoroora, nari ekintu ekindi kyona ekirikureetera abantu kucwamu kubi. (Shoma Okutandika 18:20, 21; Eky’Ebiragiro 10:17.) Twayongyera kwega ebirikukwata ahari Yehova n’emitindo ye, nitwongyera kwesiga encwamu ye. Nangwa n’obu ekiri omu Baibuli kyakutureetera kwebuuza ebibuuzo ebi taine by’okugarukamu hati, nitumanya ebirikumara ahari Ruhanga waitu, ngu “n’ohikiriire omu mitwarize ye yoona.”—Zab. 145:17.
5. Obutahikiirira nibutureetera buta kugira emiteekateekyere etahikire aha buringaaniza? (Reeba akabokusi “Obutahikiirira Nibuturemesa Kureeba Gye Oburingaaniza.”)
5 Obutahikiirira nibuturemesa kucwamu gye. Ruhanga akatuhanga omu kishushani kye, n’ahabw’ekyo twine ekyetengo ky’okureeba abantu nibatwarizibwa gye. (Kut. 1:26) Kwonka, ahabw’okugira ngu tituhikiriire, nitubaasa kugwera orubaju n’obu twakuba twine obuhame bwona. Nk’eky’okureeberaho, ijuka oku Yona yaagizire ekiniga ahabw’okugira ngu Yehova akacwamu kugirira esaasi abantu ba Nineeve. (Yon. 3:10–4:1) Kwonka, teekateeka aha byarugiremu. Haihi abantu ba Nineeve abarikurenga 120,000 bakahonokaho! Kandi, Yona niwe yaabaire aine kuhaburwa, beitu atari Yehova.
6. Ahabw’enki Yehova kitarikumwetengyesa kutugambira encwamu ye?
6 Yehova tikirikumwetengyesa kushoboororera abantu encwamu ye. N’amazima, akaikiriza abaheereza be aba ira kugamba oku barikwehurira aha bi yaacwiremu nari ebi ari haihi kucwamu. (Kut. 18:25; Yon. 4:2, 3) Kandi obumwe, akaba ashoboorora encwamu ye. (Yon. 4:10, 11) Kwonka, Yehova tikirikumwetengyesa kutushoboororera encwamu ye. Ahabw’okugira ngu n’Omuhangi waitu, naaba ataine kutwehanuuzaho atakacwiremu, nari yaaheza kucwamu.—Isa. 40:13, 14; 55:9.
YESIGYE YEHOVA WAAHEEBWA EBY’OKUKURATIRA
7. Nitubaasa kugumirwa kukora ki, kandi ahabw’enki?
7 Nitwikiriza tutaine kubangaanisa kwona ngu butoosha Yehova naakora ebihikire. Kwonka ekirikubaasa kutugumira, n’okwesiga abashaija abu atooraine. Nitubaasa kwebuuza yaaba abaine obushoboorozi buringaniire omu kibiina kya Yehova nibacwamu ebirikuhikaana n’obuhabuzi bwe, nari nibacwamu ebyabo. Bamwe nibabaasa kuba baagizire emiteekateekyere nk’egyo omu bunaku bwa Baibuli. Teekateeka aha byagambwaho omu kacweka 3. Omunyabuzaare w’omushaija owaahenzire ekiragiro kya Sabato, naabaasa kuba yaayebuurize yaaba Musa akabanza kwehanuuza ahari Yehova atakamucwereire ogw’okufa. Kandi munywani wa Uriya Omuhiiti, ou omukazi we yaashambaine na Daudi, naabaasa kuba yaateekateekire ngu Daudi akakoresa obushoboorozi bwe nk’omugabe kwetantara kufubirwa. Amazima agarikureebwa butunu gari ngu titurikubaasa kugira ngu nitwesiga Yehova, twaba tutarikwesiga obu atooraine omu nsi, kandi abu arikwesiga.
8. Ebiri omu Ebyakozirwe 16:4, 5, biine kakwate ki n’oku ekibiina Ekikristaayo kirikutwaza hati?
8 Obunaku obu, Yehova naayebembera ekicweka eky’omu nsi eky’ekibiina kye arikukoresa ‘omwambari omwesigwa kandi ow’obwengye.’ (Mat. 24:45) Nk’akakiiko akareeberezi omu kyasha ky’okubanza, omwambari naareeberera abaheereza ba Ruhanga omu nsi yoona, kandi naaha abareeberezi b’ekibiina eby’okukuratira. (Shoma Ebyakozirwe 16:4, 5.) Abareeberezi nabo nibahamya ngu byakuratirwa omu bibiina. Nitworeka ngu nitwesiga oku Yehova arikukoramu ebintu turikworobera obuhabuzi obu turikuheebwa ekibiina n’abareeberezi.
9. Ni ryari obu turikubaasa kugumirwa kwikirizana n’encwamu y’abareeberezi, kandi ahabw’enki?
9 Obumwe, nitubaasa kugumirwa kwikirizana n’encwamu y’abareeberezi. Nk’eky’okureeberaho, omu myaka egi saketi n’ebibiina bingi bikozirwemu empinduka. Omu mbeera ezimwe, abareeberezi bashabire ababuurizi kushagika ekibiina ekindi kugira ngu Ebyombeko by’Obukama bikoresibwe omu bwijwire. Twashabwa kwegaita aha kibiina kisya, nitubaasa kugumirwa kutsigaho banywani baitu n’amaka gaitu. Mbwenu shi Ruhanga naagambira butunu abareeberezi kucwamu ekibiina eki buri mubuurizi araazemu? Ngaaha. N’ahabw’ekyo eki nikibaasa kutureetera kugumirwa kukuratira encwamu yaabo. Kwonka Yehova naayesiga abareeberezi kucwamu ebintu nk’ebi, kandi naitwe twine kubeesiga.b
10. Kurugiirira aha Abaheburaayo 13:17, ahabw’enki twine kukwatanisa n’abareeberezi?
10 Ahabw’enki twine kukwatanisa n’abareeberezi, kandi tukabashagika n’obu twakuba tutarikukunda encwamu yaabo? N’ahabw’okugira ngu twakikora, nituhwera omu kurinda obumwe bw’abantu ba Ruhanga. (Efe. 4:2, 3) Boona omu kibiina baayorobera encwamu y’akakiiko k’abareeberezi, nihabaho obuteeka. (Shoma Abaheburaayo 13:17.) Ekikuru munonga, nitworeka ngu nitwesiga Yehova, twakwatanisa n’abu ahaire obujunaanizibwa bw’okutureeberera.—Byak. 20:28.
11. Niki ekirikubaasa kutuhwera kwongyera kwesiga abareeberezi baatuha eby’okukuratira?
11 Nitubaasa kwongyera kwesiga abareeberezi baatuha eby’okukuratira, turikwijuka ngu nibabanza baashaba Yehova kubaha omwoyo gurikwera, baaba nibashwijuma enshonga ezirikukwata aha kibiina. Nibateeraho n’okwetegyereza emisingye ya Baibuli erikubahwera kucwamu gye, kandi nibashwijuma eby’okukuratira ebi ekibiina kya Yehova kirikubaha. Buzima nibaba nibenda kushemeza Yehova, kandi nibakora kyona ekirikubaasika kureeberera gye abaheereza be. Abashaija aba abeesigwa nibamanya ngu Ruhanga naafayo aha ku barikuhikiriza obujunaanizibwa bwabo. (1 Pet. 5:2, 3) Teekateeka ahari eki: Omu nsi erimu okushoroora omu rangi, ediini, n’eby’obutegyeki, abaheereza ba Yehova nibakwatanisa omu kumuramya. Eki kibaasize kubaho ahabw’okugira ngu Yehova naashagika ekibiina kye!
12. Abareeberezi nibaihirira ahari ki kumanya yaaba omuntu ayeteisize?
12 Yehova ahaire abareeberezi obujunaanizibwa bw’amaani obw’okurinda ekibiina kuguma kiri ekishemeire. Omukristaayo yaakora ekibi ky’amaani, Yehova ahaire abareeberezi obujunaanizibwa bw’okucwamu yaaba aine kuguma omu kibiina. Emwe aha nshonga ezi baine kumanya, ni yaaba omuntu ogwo ayeteisiize kimwe ahabw’ebi akozire. Naabaasa kworeka ngu ayeteisize, kwonka shi naayangira kimwe ekibi eki akozire? Mbwenu shi amaririire kutagaruka kukora ekibi? Abanywani babi ku baraabe nibo baamureeteire kushiisha, ayeteekateekire kubeetaanisaho? Abareeberezi nibashaba kandi bashwijuma Ebyahandiikirwe, obwo barikuteekateeka n’aha miteekateekyere ei omusiisi aine aha kibi eki akozire. Bwanyima nibacwamu yaaba omusiisi aine kuguma omu kibiina. Kwonka obumwe, naaba aine kubingwa omu kibiina.—1 Kor. 5:11-13.
13. Nitubaasa kwebuuza ki munywani waitu nari omunyabuzaare yaabingwa omu kibiina?
13 Obwesigye bwaitu omu bareeberezi nibubaasa kugyezibwa buta? Otari munywani nari otari munyabuzaare yaaba niwe yaabingwa, nitubaasa kurahuka kwikiriza eki abareeberezi bacwiremu. Kwonka shi ku haakubingwa omunywani ow’aha mara? Nitubaasa kuteekateeka ngu abareeberezi tibashwijumire gye obuhame bwona, nari nitubaasa kwebuuza yaaba baacwiremu nk’oku Yehova yaakucwiremu. Niki ekiribaasa kutuhwera kugira emiteekateekyere mirungi aha ncwamu y’abareeberezi?
14. Niki ekirikubaasa kutuhwera, abareeberezi baacwamu ngu omuntu orikutukwataho abingwe?
14 Twine kwijuka ngu Yehova niwe ataireho entebeekanisa y’okubinga, kandi neegasira ekibiina n’okozire ekibi. Omusiisi yaayanga kweteisa kandi akaguma omu kibiina, naabaasa kushiisha abandi. (Gal. 5:9) Kandi, naabaasa kutamanya obuhango bw’ekibi eki akozire, nari kutagira ekihika gw’okuhindura emiteekateekyere ye n’ebikorwa bye kubaasa kugaruka kusiimwa Yehova. (Mub. 8:11) Nitubaasa kugira obwesigye ngu abareeberezi nibatwara obujunaanizibwa bwabo nka bukuru, kyahika aha kucwamu ngu omuntu abingwe. Nibeetegyereza ngu, nk’abaramuzi omuri Israeli eya ira, ‘tibarikuramurira abantu, kureka’ Yehova.—2 Bus. 19:6, 7.
OKU OKWESIGA YEHOVA HATI KIRIKWIJA KUTUHWERA OMU BIRO BY’OMUMAISHO
Niki ekiraatuhwere kwesiga eby’okukuratira ebi turaatungye omu kubonabona kwingi n’okubyorobera? (Reeba akacweka 15)
15. Ahabw’enki twine kwesiga eby’okukuratira ebi Yehova arikutuha obunaku obu okukira obundi bwona?
15 Obu entebeekanisa y’ensi egi eri haihi kuhendera, twine kwongyera kwesiga omuringo ogu Yehova arikukoramu ebintu okukira obundi bwona. Ahabw’enki? Ahakuba omu bwire bw’okubonabona kwingi, nitubaasa kuheebwa eby’okukuratira ebirikureebeka nk’ebitarikwetegyerezibwa, ebitarikukora, nari ebitarikuhikaana n’embeera zaitu. Amazima agari ngu, Yehova tarikwija kugamba naitwe butunu. Naabaasa kwija kutuha eby’okukuratira arikukoresa abajwekyerwa abu atooraine. Obwo tibwo buraabe buri obwire bw’okuteekateeka ngu nihabaasa kuba hariho omuringo omurungi, nari kubangaanisa, nari kwebuuza tuti: ‘Buzima nibiruga ahari Yehova, nari ab’eishe-emwe abatoorainwe nibo bariyo nibakorera aha nyehurira zaabo?’ Noija kutwaza ota omu bwire obwo obugumire munonga? Eky’okugarukamu nikiija kurugiirira aha ku hati orikutwara eby’okukuratira ebi ekibiina kirikutuha. Ku oraabe nooyesiga eby’okukuratira ebi turikuheebwa hati kandi okabigyenderaho, noobaasa kwija kukora nikyo kimwe omu kubonabona kwingi.—Luk. 16:10.
16. Obwesigye bwaitu aha ncwamu ya Yehova nibubaasa kwija kugyezibwa buta omu biro by’omumaisho?
16 Hariho enshonga endiijo ei twine kuteekateekaho, oku Yehova araacwemu aha bikwatiraine n’emperu y’entebeekanisa y’ensi egi. Hati, twine amatsiko ngu abatarikuheereza Yehova, otwariiremu n’abanyabuzaare baitu nibabaasa kuhinduka. Kwonka ahari Haramagedoni, Yehova arikukoresa Yesu naija kucwamu eky’aha muheru aha bikwatiraine n’ebiro byabo eby’omumaisho. (Mat. 25:31-33; 2 Tes. 1:7-9) Tiitwe abaraacwemu ou Yehova araagirire embabazi nari akanga kuzimugirira. (Mat. 25:34, 41, 46) Mbwenu shi nitwija kwesiga encwamu ya Yehova, nari nitwija kuteerwa entsibo? Buzima, twine kwongyera kwesiga Yehova hati, kugira ngu nyentsya twije tumwesigire kimwe.
17. Nitwija kugasirwa tuta omu ncwamu ya Yehova aha bikwatiraine n’emperu y’entebeekanisa y’ensi egi?
17 Teekateeka aha ku turikwija kwehurira twaba turi omu nsi ensya turikureeba ebirugire omu kucwamu kwa Yehova. Ediini z’ebishuba, ab’eby’obushuubuzi abanyamururu, na gavumenti ezitwire nizinyangaraza abantu zikabareetera n’obusaasi bwingi omu byafaayo byona, nibiija kuhweraho kimwe. Nitwija kuba tutakiteganisibwa amagara mabi, bukuru, n’okufeerwa abakundwa baitu. Sitaane na baadaimoni nibaija kukomwa kumara emyaka rukumi. Byona ebirugire omu bugomi bwabo nibiija kuhwaho. (Kush. 20:2, 3) Ka nitwija kushemererwa munonga kumanya ngu tukeesiga omuringo ogu Yehova arikukoramu ebintu!
18. Ni mashomo ki agu turikwegyera aha Baisraeli nk’oku kiri omu Okubara 11:4-6 na 21:5?
18 Omu nsi ensya shi nihaija kubaho embeera eziraagyeze obwesigye bwaitu omu muringo ogu Yehova arikukoramu ebintu? Teekateeka aha ku Abaisraeli baatwarize ahonaaho baherize kucungurwa omu buhuuku Misri. Bamwe bakatandika kwetomboita barikwegomba eby’okurya ebi baabaire nibaryayo, kandi baareeba emaanu ei Yehova yaabaire naabaha nk’ekitaine mugasho. (Shoma Okubara 11:4-6; 21:5.) Naitwe shi nitubaasa kwija kutwaza tutyo okubonabona kwingi kwaheza kuhendera? Titurikumanya oku omurimo gw’okuboneza ensi egi esiisikaire guraabe nigwingana, kugyendera kimwe kuhitsya obu eraabe paradiso. Obundi, omu kubanza emirimo neija kuba eri mingi kandi egumire. Mbwenu shi nitwija kuteeraho kwetomboitera Yehova omu bwire obwo? Hariho ekintu kimwe eki twineho obuhame: Twaba nitusiima ebi Yehova arikutuha hati, nikiija kutworobera kusiima ebi araatuhe omu bwire obwo.
19. Noobaasa kugufuhaza ota enshonga enkuru ezi twayega omu kicweka eki?
19 Omuringo ogu Yehova arikukoramu ebintu butoosha nigwo guhikire. Eki titwine kukibangaanisaho. Kandi twine kuta obwesigye omu bu Yehova arikukoresa kutuha eby’okukuratira. Guma noijuka ebi Yehova yaagambire kurabira omuri nabi Isaaya ebi: ‘Omu kutuuza n’omu kwesiga nimwo amaani gaanyu garaarugye.’—Isa. 30:15.
EKYESHONGORO 98 Ebyahandiikirwe—Bikahandiikisibwa Ruhanga
a Ekicweka eki nikiza kutuhwera kureeba ngu twine kwongyera kwesigira kimwe Yehova, n’abu atooraine omu nsi. Kandi nituza n’okureeba oku turikugasirwa twakikora hati, n’oku kirikutuhwera kwetebeekanisiza embeera zigumire ezirikwija kubaho.
b Obumwe, nihaba hariho embeera ezirikureetera kyayetengyesa ngu omuntu nari eka egume omu kibiina eki erimu hati. Reeba Obuheereza Bwaitu obw’Obukama, aka Novemba 2002, “Akabokusi k’Ebibuuzo.”