Ekitebyo 60

Abigaili na Daudi

NOOMANYA ogwo mukazi murungi orikwija kubugana Daudi? Eiziina rye ni Abigaili. Aine obwengye kandi yaazibira Daudi okukora ekintu kibi. Kwonka tutakeegire ahari ekyo, ka tureebe ebitwire nibihika ahari Daudi.

Bwanyima ya Daudi kuhunga Saulo, akeeshereka omu nyanga. Bakuru be n’ab’omu ka ye boona baamushangayo okwo. Abashaija nka 400 boona baija ei ari, kandi Daudi yaahinduka omwebembezi waabo. Daudi bwanyima aza ow’omugabe wa Moabu kandi amugira ati: ‘Naakweshengyereza, ikiriza tata na maawe batuure naiwe okuhitsya obu ndamanye ekirambeho.’ Bwanyima Daudi n’abashaija be batandika kweshereka omu bibungo.

Aha nyima y’ebi nibwo Daudi yaabugabugana Abigaili. Iba Nabali n’omutungi; aine eitaka rye ahabwe. Aine entaama 3,000 hamwe n’embuzi 1,000. Nabali n’omushaija mubi. Kwonka omukazi we Abigaili ni murungi munonga. Kandi naamanya kukora ebihikire. Kandi hoona rimwe akakiza ab’eka ye. Ka tureebe oku kyabaireho.

Daudi n’abashaija be batwire nibakorera Nabali eby’embabazi. Bakamuhwera kurinda entaama ze. Mbwenu eizooba rimwe, Daudi ayohereza abashaija be ahari Nabali okushaba obuhwezi. Abashaija ba Daudi baija ahari Nabali obu we n’abahwezi be baabaire nibacemura ebyoya by’entaama. N’eizooba ry’obugyenyi, kandi Nabali aine ebintu birungi bingi eby’okurya. Mbwenu ebi nibyo abashaija ba Daudi baagambire: ‘Tukubereire ab’embabazi. Titwibire ntaama yaawe n’emwe, kureka tukuhwereire omu kuzireeberera. Mbwenu hati, twakweshengyereza, nitukushaba tuhe eby’okurya.’

‘Tindikubaasa kuheereza abashaija nkaimwe eby’okurya,’ Nabali aba nikwo yaagira. Agamba kubi munonga, kandi agamba ebintu bibi ahari Daudi. Abashaija ku bagarukayo kandi bagambira Daudi ebyo, Daudi aitwa ekiniga kingi. Agambira abashaija be ati: ‘Mukwate rurara zaanyu!’ Reero batandika orugyendo rwabo kuza kwita Nabali n’abashaija be.

Omwe aha bashaija ba Nabali, owaahuriire ebigambo bibi ebi Nabali yaagambire, agambira Abigaili ekyabaho. Ahonaaho Abigaili atebeekanisa eby’okurya. Abita aha ndogoya kandi atandika orugyendo rwe. Ku abugana Daudi, aruga aha ndogoya, atsimba amaju ahansi omu maisho ge kandi agira ati: ‘Sebo, naakweshengyereza, otakaata omutima ahari ibanyi Nabali. Hanu nyineho ekiconco. Naakweshengyereza kitware, kandi otusaasire ahabw’ebibaireho.’

Daudi agarukamu ati: ‘Ori omukazi w’obwengye. Wanzibira kwita Nabali okumuzimuurira ahabw’obunyakantu bwe. Hati garuka omuka n’obusingye.’ Bwanyima, Nabali ku afa, Abigaili aba omwe aha bakazi ba Daudi.

1 Samueli 22:1-4; 25:1-43.