Emikoro Yoona shi Neeshemeza Ruhanga?

Yehova naayenda ngu twesiimire amagara, kandi tukuze n’emikoro emwe. Kwonka shi emikoro yoona n’ebiro bikuru byona nibimushemeza? Nitubaasa kworeka tuta ngu nitukunda Yehova aha bikwatiraine n’emikoro?

1. Ahabw’enki emikoro emingi etarikushemeza Yehova?

Noobaasa kutangaara kumanya ngu emikoro emingi terikwegamira aha byahandiikirwe, nari neekomooka omu bukaafiire. Emikoro nk’egi neebaasa kuba eine akakwate n’ediini y’ebishuba. Neebaasa kuba eine akakwate n’obufumu, nari erikwegamira aha nyikiriza ngu omuntu aine omwoyo ogutarikufa. Emikoro emwe erimu emigyenzo nari okwikiririza omu ngisha. (Isaaya 65:11) Yehova naarabura abarikumuramya ati: ‘Mubeetaaniseho mutakora aha kintu kyona ekitashemeire.’—2 Abakorinso 6:17.a

2. Yehova aine miteekateekyere ki aha mikoro y’okuhimbisiriza abantu?

Yehova naaturabura kutagwa omu mutego ‘gw’okwesiga omuntu-buntu.’ (Shoma Yeremia 17:5.) Ebiro bikuru ebimwe nibihimbisisa abategyeki nari abaserukare. Ebindi nibihimbisa obumanyiso bw’eihanga nari okwetegyeka. (1 Yohaana 5:21) Kandi hariho ebiro bikuru ebirikukwata aha by’obutegyeki n’ebigombe by’abantu. Yehova naayehurira ata, na munonga twahimbisa ekibiina nari omuntu oine emiteekateekyere etarikuhikaana n’ekigyendererwa kye?

3. Ni mitwarize ki erikubaasa kureetera omukoro kuba ogutashemeire?

Baibuli neezibira ‘obusinzi, okuraara enkyera, n’okunywa amaarwa maingi.’ (1 Petero 4:3) Emikoro emwe neeba erimu okuteezibira n’obuhwanshoni. Kubaasa kuguma turi banywani ba Yehova, twine kwetantarira kimwe ebikorwa ebitashemeire.

SHWIJUMA GYE

4. Yetantare emikoro etarikuhaisa Yehova ekitiinisa

Shoma Abaefeso 5:10, kubaasa kugarukamu ebibuuzo ebirikukurataho:

• Twine kuba nituhamya ki twaza kucwamu kwejumba omu kukuza ekiro kikuru?

• Ni biro bikuru ki ebirikukira kukuzibwa ahu orikutuura?

• Nooteekateeka ngu ebiro bikuru ebyo nibishemeza Yehova?

Nk’eky’okureeberaho, oreebuurizeho eki Ruhanga arikuteekateeka aha kukuza ebiro by’okuzaarwa? Baibuli terikworeka ngu hariho omuheereza wa Yehova owaakurize ebiro by’okuzaarwa kwe, kwonka neegamba aha bantu babiri abaabaire batarikumuheereza, abaakurize ebiro by’okuzaarwa kwabo. Shoma Okutandika 40:20-22 na Matayo 14:6-10, kubaasa kugarukamu ebibuuzo ebi:

• Okukuza okuzaarwa oku kwombi nikushushanisa ki?

• Kurugiirira aha byahandiikirwe ebi, nooteekateeka ngu Yehova aine miteekateekyere ki aha kukuza ebiro by’okuzaarwa?

Kwonka nabwo noobaasa kuba nooyebuuza oti: ‘Yehova shi naafayo naakuza okuzaarwa nari emikoro etarikuhikaana n’ebyahandiikirwe?’ Shoma Okuruga 32:1-8. Bwanyima, zaana VIDIYO kubaasa kugarukamu ebibuuzo ebirikukurataho.

VIDIYO: Emikoro n’Ebiro Bikuru Ebitarikushemeza Ruhanga (5:07)

• Ahabw’enki twine kumanya ebi Yehova arikusiima?

• Nitubaasa kukikora tuta?

Oku turikubaasa kumanya omukoro ogutarikushemeza Ruhanga

• Nigwegamira aha nyegyesa ezitari mu byahandiikirwe? Kubaasa kumanya, condooza obukomooko bw’emikoro egyo.

• Niguhimbisiriza abantu, ebigombe, nari obumanyiso bw’eihanga? Nituha Yehova ekitiinisa okukira ebindi byona, kandi nitumwesiga ngu niwe araiheho oburemeezi oburi omu nsi.

• Emigyenzo n’ebikorwa ebirimu nibihakanisa emitindo ya Baibuli? Twine kuguma turi abashemeire omu micwe.

5. Reetera abandi kuha ekitiinisa ebi orikwikiriza

VIDIYO: Gamba Enyikiriza Zaawe omu Bwengye (2:01)

Shoma Matayo 7:12, kubaasa kugarukamu ebibuuzo ebirikukurataho:

• Kurugiirira aha kyahandiikirwe eki, oine kugambira abanyabuzaare baawe abatari mu mazima ngu tibaine kukuza ekiro kikuru?

• Noobaasa kukora ki kuhamiza ab’eka yaawe ngu n’obu oraabe otarikukuza ekiro kikuru nabo, kwonka noobakunda kandi noobasiima?

6. Yehova naayenda ngu tushemererwe

Yehova naayenda ngu tushemererwe n’ab’amaka gaitu n’abanywani. Shoma Omubuurizi 8:15, kubaasa kugarukamu ekibuuzo eki:

• Ekyahandiikirwe eki nikyoreka kita ngu Yehova naayenda tushemererwe?

Yehova naayenda ngu abaheereza be bashemererwe kandi babe n’abandi. Zaana VIDIYO kureeba oku eki kitwire nikibaho omu nteerane zaitu empango ezirikubamu n’ab’amahanga agandi.

VIDIYO: Obufura aha Nteerane Empango Eziriho n’Ab’amahanga Agandi (5:40)

Shoma Abagalatia 6:10, kubaasa kugarukamu ebibuuzo ebi:

• Twine kukuza ebiro bikuru by’ensi kubaasa ‘kukorera gye’ abandi?

• Ni kuha kwa muringo ki okurikubaasa kukushemeza? N’okugyemeserezibwa kuhayo aha biro bikuru nari n’okuha abandi ahu waayendera hoona?

• Abajurizi ba Yehova baingi obumwe nibatebeekanisiza abaana baabo ebintu by’omutaano, kandi nibabaha n’ebiconco. Waaba oine abaana, ni bintu ki eby’omutaano ebi orikubaasa kubakorera?

OMU BUGUFU

Yehova naayenda ngu tushemererwe n’ab’amaka gaitu n’abanywani. Kwonka nabwo naayenda ngu twetantare emikoro etarikumushemeza.

Okweijutsya

• Nitubaasa kwebuuza bibuuzo ki kutuhwera kumanya emikoro etarikushemeza Yehova?

• Nitubaasa kuhwera tuta ab’amaka gaitu n’abanywani kwetegyereza okucwamu kwaitu aha bikwatiraine n’ebiro bikuru?

• Noomanya ota ngu Yehova naayenda tweshemeze kandi tugire obunanukye?

JUMBURA EBINDI

Manya bimwe aha biro bikuru ebi Abakristaayo batarikubaasa kukuza.

“Ahabw’enki Abajurizi ba Yehova Batarikukuza Ebiro Bikuru Ebimwe?” (Eky’aha mukura)

Reeba enshonga ina ahabw’enki nitwikiriza ngu okukuza ebiro by’okuzaarwa tikirikushemeza Ruhanga.

“Ahabw’enki Abajurizi ba Yehova Batarikukuza Ebiro by’Okuzaarwa?” (Eky’aha mukura)

Reeba oku omunyeeto omwe yaatwarize omu muringo gw’obwengye aha ishomero, obu yaabaire naarahurwa ahabw’okutakuza Noiri.

Okutwaza Gye omu Kurahurwa (2:04)

Abajurizi ba Yehova tibarikukuza Noiri. Nibeehurira bata ahabw’okucwamu batyo?

“Bakabona Ekirikukirayo Oburungi” (Omunaara gw’Omurinzi, Desemba 1, 2012)