Abajurizi ba Yehova shi baine abakazi abaheereza?

Eego, Abajurizi ba Yehova baine abakazi baingi abarikubuurira omu nsi yoona. Nibo babuurizi baingi ab’amakuru marungi g’Obukama bwa Ruhanga. Zaaburi 68:11 neegira ngu Yehova ‘naaha ekiragiro, abakazi abarikutwara amakuru n’eihe rihango.’

Kwonka, otakateekateeka ngu obuheereza bw’abakazi b’Abajurizi ba Yehova nibushushana n’obw’abakazi ab’amadiini agandi. Hariho entaaniso mpango munonga. Nibataana mu muringo ki?

Nibaheereza abantu b’omutaano. Abakazi abari omu diini ezindi, na munonga eya Kristendomu, nibeebembera omu bibiina byabo, n’abari omu kanisa zaabo. Kwonka abakazi Abajurizi ba Yehova, obuheereza bwabo nibugasira ab’aheeru y’ekibiina, abarikutwariramu abu barikubuurira enju aha nju nari omu myanya endiijo.

Ekindi, abakazi Abajurizi ba Yehova nibataana aha b’amadiini agandi ahabw’ebi barikukora omu kibiina. Abakazi abeebembezi omuri Kristendomu n’ab’ediini ezindi nibeebembera kandi beegyesa abakuratsi baabo emigyenzo y’ediini yaabo. Kwonka abakazi Abajurizi ba Yehova, tibarikwegyesa abashaija ababatiziibwe baaba bariho. Kureka abashaija abatoorainwe nibo bahairwe obujunaanizibwa bw’okwegyesa omu kibiina.—1 Timoseo 3:2; Yakobo 3:1.

Baibuli neeshoboorora ngu abashaija nibo bonka baine kuheebwa obujunaanizibwa bw’okureeberera ekibiina. Yetegyereze ebi entumwa Paulo yaagambire Tito, omureeberezi mugyenzi we: “Eki naakutsigiire Kureete, . . . n’okutaho [abareeberezi] omuri tauni zoona.” Paulo akoongyeraho arikugira ngu buri mushaija oraatooranwe “abe otaine ki arikugaywaho, oine omukazi omwe.” (Tito 1:5, 6) Paulo akagambira Timoseo obuhabuzi nibwo bumwe aha bikwatiraine n’okutoorana abareeberezi ati: ‘Omuntu ku arikwenda omurimo gw’omureeberezi, naaba akunzire omurimo murungi. Mumanye ngu omureeberezi ashemereire kutagira ki arikugaywaho, omushaija oine omukazi omwe, orikurahukirwa kwegyesa.’—1 Timoseo 3:1, 2.

Ahabw’enki obujunaanizibwa bw’okureeberera abandi nibuheebwa abashaija bonka? Paulo naagira ati: “Ahakuba tindikwikiriza mukazi [kwegyesa] nari kutegyeka abashaija, kureka agume ahunami, ahakuba Adamu niwe yaabandize kuhangwa, haakurataho Haawa.” (1 Timoseo 2:12, 13) N’ahabw’ekyo, oku abantu bakurataine omu kuhangwa nikyoreka ekigyendererwa kya Ruhanga eky’obujunaanizibwa bw’okureeberera abandi.

Abaheereza ba Yehova nibatooreza Yesu Kristo, Omwebembezi waabo. Omwegi Luka akahandiika aha buheereza bwa Yesu ati: Akaba ‘naagyendagyenda omuri tauni n’ebirorero naabuurira kandi naagamba ebigambo ebirungi by’Obukama bwa Ruhanga.’ Bwanyima, Yesu akoohereza abakuratsi be kukora omurimo nigwo gumwe: “Baagyenda, baaraba omu birorero, nibabuurira [amakuru marungi].”—Luka 8:1; 9:2-6.

Obunaku obu, abaheereza ba Yehova abashaija n’abakazi nibeejumba omu kuhikiiriza obunabi obu Yesu yaagambire: ‘Kandi [amakuru marungi] g’Obukama nigaija kugambwa omu nsi zoona okuba eky’okuhamya aha mahanga goona, obwo nibwo emperu erihika.’—Matayo 24:14.