Muheereze Yehova

1. Abantu baingi nibatwara bata okuba omuhuuku, kandi obuhuuku oburikugambwaho omu Abarooma 12:11 n’obw’omutaano buta?

ABANTU baingi nibateekateeka ngu omuhuuku naaba naatwarwa nk’ow’ahansi kandi arikutwarizibwa kubi. Kwonka okuba omuhuuku wa Ruhanga, nikitaanira kimwe ahari ekyo. Ekigambo kya Ruhanga nikigamba aha buhuuku oburikutwariramu omuntu kwehayo ayekundiire kuheereza Mukama we. Obu entumwa Paulo yaayehanangiriza Abakristaayo kuheereza Yehova omu kyasha ky’okubanza, akaba naabahiga kuheereza Ruhanga ahabw’okumukunda. (Rom. 12:11) Obuhuuku obw’omuringo ogu nibutwariramu ki? Nitubaasa kwetantara tuta kuba abahuuku ba Sitaane n’ensi ye? Kandi ni birungi ki ebirikuruga omu kuba omuhuuku wa Yehova omwesigwa?

“NINKUNDA MUKAMA WANGYE”

2. (a) Niki ekyabaire kireetera omuhuuku Omwisraeli kugumizamu naaheereza nk’omuhuuku? (b) Okufumura okutu kw’omuhuuku orikwenda kuguma na mukama we kukaba kwine makuru ki?

² Ebiragiro ebi Ruhanga yaahaire Abaisraeli, nibituhwera kumanya omuringo gw’obuhuuku ogu Yehova arikutwenza. Omuhuuku Omuheburaayo, omu mwaka gwa mushanju akaba aheebwa obugabe kwecweramu yaaba naayenda kugumizamu n’obuheereza bwe. (Kur. 21:2) Kwonka, Yehova akaba ateeraireho abahuuku abarikukunda bakama baabo entebeekanisa y’okugumizamu n’obuheereza bwabo baaba nibenda. Mukama w’omuhuuku akaba amutwara amwemereza aha rwigi nari aha kiti ky’omuryango reero amufumura okutu n’empindu. (Kur. 21:5, 6) Ekikorwa eki eky’okufumura okutu kikaba kiine ekigyendererwa. Omu Ruheburaayo okworobera omuntu kiine akakwate n’okuhurira hamwe n’okuhurikiza. Omuhuuku orikukunda mukama we, akaba agumizamu naamuheereza arikumworobera. Eki nikituhwera kusiima okwehayo kwaitu ahari Yehova, ekirikutureetera kumworobera ahabw’okumukunda.

3. Niki ekirikutureetera kwehayo ahari Ruhanga?

³ Ku turikwehayo kubatizibwa, nikiba nikyoreka ngu twacwiremu kuheereza Yehova ekirikumanyisa okuba abahuuku be. Tukehayo ahabw’okugira ngu nitwenda kworobera Yehova n’okukora ebi akunda. Tihaine owaatugyemire kukikora. Nangwa n’eminyeeto ku barikubatizibwa, nibakikora beekundiire beitu ti ahabw’okwenda kushemeza abazaire baabo. Abakristaayo nibeehayo ahari Mukama waabo Yehova ahabw’okumukunda. Entumwa Yohaana akahandiika ati: “Oku nikwo kukunda Ruhanga, itwe okworobera ebiragiro bye.”​—1 Yoh. 5:3.

ABAHUUKU, KWONKA AB’OBUSINGYE

4. Niki ekirikwetengyesa kubaasa kuba “abahuuku b’okuhikiirira”?

⁴ Ka nikitushemeza munonga kumanya ngu Yehova naatubaasisa kuguma turi abahuuku be! Okwikiririza omu kitambo kya Kristo nikitubaasisa kuruga omu buhuuku bw’ekibi. N’obu turaabe turi abatahikiriire, tukeecweramu twekundiire kworobera Yehova na Yesu. Paulo akashoboorora gye eki obu yaahwerwa Ruhanga kuhandiika ati: “Mufiire aha kibi, kwonka . . . muri abahuriire ahari Ruhanga omuri Kristo Yesu.” Kandi akarabura ati: “Timurikumanya ngu ogwo ou mweha nk’abahuuku kumuhurira, muba muri abahuuku b’ogwo ou muhurira, yaaba kibi ekireeta okufa, nari okuhurira okureeta okuhikiirira? Kwonka Ruhanga asiimwe, ahakuba imwe abaabaire bari abahuuku b’ekibi, mbwenu muhindukire abarikutegyekwa enyegyesa ei mwahairwe, mukagyorobera omu mitima yaanyu; kandi nk’oku mwacungwirwe okuruga omu butegyeki bw’ekibi, muhindukire abahuuku b’okuhikiirira.” (Rom. 6:11, 16-18) Yetegyereze ngu entumwa Paulo akagamba aha ‘kworoba kuruga omu mutima.’ Buzima, okwehayo kwaitu ahari Yehova nikutuhindura “abahuuku b’okuhikiirira.”

5. Niki eki turikuteeraho kurwanisa twena, kandi n’ahabw’enki?

⁵ Kwonka, hariho ebirikubaasa kuturemesa kukora ebirikuhikaana n’okwehayo kwaitu. Hariho ebintu bibiri ebirikubaasa kuturemesa. Eky’okubanza, n’eki Paulo yaagambireho ati: “Omu mutima gwangye nsiima ebiragiro bya Ruhanga.” Akongyera yaagira ati: “Kwonka omu ngingo zangye nshangamu ekindi kiragiro ekirwanisa ekiragiro eky’omu bwengye bwangye, kimpindura omuhuuku w’ebiragiro by’ekibi ebiri omu ngingo zangye.” (Rom. 7:22, 23) Naitwe tukiine obutahikiirira. N’ahabw’ekyo, twine kugumizamu niturwanisa ebyetengo by’omubiri. Entumwa Petero akatuhiga ati: “Mugire obusingye, kwonka obusingye bwanyu mutabukoresa nk’eky’okushwekyerera obubi, kureka mube abahuuku ba Ruhanga.”​—1 Pet. 2:16.

6, 7. Sitaane naareetera ata ensi egi kureebeka nka nungi?

⁶ Ekya kabiri, n’ensi egi erimu ebikorwa bya baadaimoni. Omutegyeki w’ensi egi Sitaane, naata omutima aha kuturemesa kuguma turi abeesigwa ahari Yehova na Yesu. Naateeraho kutureetera kwohibwa kukora ebibi. (Shoma Abaefeso 6:11, 12.) Omuringo gumwe ogu Sitaane arikukoramu eki, n’okureebekyesa ensi ye nka nungi. Entumwa Yohaana akarabura ati: “Omuntu weena ku akunda ensi, okukunda Isheboona kuba kutamurimu. Ahakuba byona eby’omu nsi, ebi omubiri gwetenga, n’ebi amaisho geetenga, n’okwehimbisa ahabw’eby’amagara aga, tibiruga hari Isheboona, kureka biruga omu nsi egi.”​—1 Yoh. 2:15, 16.

⁷ Ensi neereetera abantu kugira ekyetengo ky’okuba abatungi. Sitaane naareetera abantu kwikiriza ngu esente nizireeta okushemererwa. Amaduuka g’okuguramu ebintu ni maingi. Ebi barikuranga nibihiga abantu kusherura eby’obutungi n’eby’okweshemeza. Ebitongore eby’eby’okurambura, obwire bwingi nibitutwara omu myanya erimu abantu abaine emitwarize y’ensi. Buzima, byona ebiri omu nsi nibireebeka nka birungi, kwonka nibyoreka emitindo y’ensi.

8, 9. Ni kabi ki akari omu kwenda kwigutsa ekyetengo ky’amaisho, kandi n’ahabw’enki?

⁸ Petero arikugamba aha Bakristaayo omu kibiina omu kyasha ky’okubanza abaabaire bagizire emiteekateekire y’ensi, akarabura ati: “Beesiimira ebinoomo nyomushana; n’abantu b’amabara mabi n’obumogo, bazaana kubi omu magyenyi gaabo, nibariira hamwe naimwe. Bagamba ebigambo ebikuru eby’okwetunguura ebitaine mugasho; boosya abantu ababahungire abatuura omu buhabe, nibababeihabeihesa okwetenga okubi okw’omubiri. Babaraganisa obusingye, haza bo bari abahuuku b’okujunda; ahakuba ekisingura omuntu, nikyo aba omuhuuku waakyo.”​—2 Pet. 2:13, 18, 19.

⁹ Okwigutsa ekyetengo ky’amaisho tikirikureetera omuntu kuba ow’obusingye. Kureka, ekyo nikikuhindura omuhuuku ow’omutegyeki w’ensi egi Sitaane Omuregi. (1 Yoh. 5:19) Akabi akarimu n’okuba omuhuuku w’eby’obutungi, kandi eki kigumire kwetantara.

EKIRIKUREETA OKUMARWA

10, 11. Ni baahi abu Sitaane arikukira kwenda kuhabisa, kandi obwegyese bw’ensi nibubareetera kugumirwa kukora ki?

¹⁰ Nk’oku Sitaane yaakozire omu kibanja Edeni, naahabisa abo abatarikumanya bingi. Sitaane naakira kwenda kuhabisa eminyeeto. Sitaane tarikushemererwa omunyeeto nari omuntu ondiijo weena ku arikucwamu kuba omuhuuku wa Yehova. Sitaane naayenda ngu boona abeehaireyo ahari Ruhanga baremwe kuguma bari abeesigwa.

¹¹ Ka tugaruke tureebe eky’okureeberaho ky’omuhuuku owaabaire aikiriza ngu okutu kwe kufumurwe. Akaba ahurira obusaasi kumara akiire kakye, kwonka bwanyima bukaba buhwaho aguma n’akamanyiso ako ebiro byona kworeka ngu acwiremu kuguma na mukama we. Nikibaasa kushaasha eminyeeto kandi kibagumire baaba nibacwamu kukora ekintu ekirikutaana n’eky’abantu abandi. Sitaane naareetera abantu kuteekateeka ngu okutunga omurimo omu nsi nikireeta okumarwa, kwonka Abakristaayo nibaijuka ngu baine kwigutsa ekyetengo kyabo eky’eby’omwoyo. Yesu akeegyesa ngu “baine okushemererwa abarikufayo aha kyetengo kyabo eky’eby’omwoyo.” (Mat. 5:3, NW) Abakristaayo abeehaireyo ahari Ruhanga nibakora ebi akunda beitu bitari ebya Sitaane. Nibakunda ebiragiro bya Yehova, kandi nibabiteekateekaho nyomushana na nyekiro. (Shoma Zaaburi 1:1-3.) Kwonka, eby’obwegyese obunaku obu, tibirikubaasisa abaheereza ba Yehova kutunga obwire burikumara kumuheereza, okuteekateeka n’okwigutsa ekyetengo kyabo eky’eby’omwoyo.

12. Eminyeeto mingi obunaku obu nibaba baine kucwamu ki?

¹² Omuhuuku Omukristaayo nikimugumira yaaba naakorera mukama we otari Mukristaayo. Paulo arikuhandiikira Abakorinso akabuuza ati: “Okeetwa ori omuhuuku?” Kandi akaha obuhabuzi obu: “Kirekye kukusaasa; kandi n’obu waakuba noobaasa kuburugamu, haakiri obugumemu.” (1 Kor. 7:21) Omuhuuku nk’ogwo akaba aine obugabe bw’okuruga omu buhuuku. Obunaku obu, omu mahanga agamwe eminyeeto nibaba baine ahu baine kugarukira omu kushoma. Bwanyima y’ekyo nibaba baine kwecweramu. Okweyongyerayo omu by’obwegyese kubaasa kutunga omurimo omu nsi egi, nikireetera eminyeeto kugumirwa kuza omu buheereza obw’obutwire.​—Shoma 1 Abakorinso 7:23.

OBWEGYESE BW’AHAIGURU NARI OBURIKUKIRAYO?

13. Ni bwegyese bwa muringo ki oburikugasira abaheereza ba Yehova?

¹³ Paulo akarabura Abakristaayo Abakolosai ati: “Mwerinde hatagira omuntu owaabanyagisa obwengye bw’abantu n’oburyarya obutaine mugasho, omu kukuratira emigyenzo y’abantu n’okukuratira eby’okubanza eby’omu nsi egi, okutakuratira Kristo.” (Kol. 2:8) Abeegyesa baingi nibeegyesa “obwengye bw’abantu n’oburyarya obutaine mugasho.” Obwegyese bw’ahaiguru, tiburikuhwera abeegi kutunga emyoga erikubaasa kubahwera kwebaisaho. Okutaana n’ekyo, abaheereza ba Yehova nibacwamu kutunga obwegyese oburikubabaasisa kugira emyoga, ekirikubahwera kumarwa n’ebi baine omu kuheereza Ruhanga. Nibagyendera aha buhabuzi obu Paulo yaahaire Timoseo obu: “Okutiina Ruhanga, okurimu okumarwa, kurimu enshaagi nyingi. Ku turaabe twine eby’okurya n’eby’okujwara, ebyo bigume bitumare.” (1 Tim. 6:6, 8) Omu mwanya gw’okutunga amabaruha na diguri, Abakristaayo ab’amazima nibata omutima aha kutunga “ebaruha z’okutusiimisa” barikwejumbira kimwe omu kubuurira.​—Shoma 2 Abakorinso 3:1-3.

14. Kurugiirira aha Abafilipi 3:8, Paulo akatwara ata omugisha gwe gw’okuba omuhuuku wa Ruhanga na Kristo?

¹⁴ Teekateeka aha ky’okureeberaho kya Paulo. Akaba ayeegyesiibwe Gamalieli omwegyesa w’ebiragiro by’Ekiyudaaya. Obwegyese obu Paulo yaatungire nibubaasa kugyeragyeranisibwa n’obwa yunivasite obunaku obu. Kwonka shi Paulo akatwara ata obwegyese obwo waabugyeragyeranisa n’omugisha gwe gw’okuba omuhuuku wa Ruhanga na Kristo? Akahandiika ati: “Byona nimbibara nk’ebifiire, ahabw’okuba okumanya Kristo Yesu Mukama wangye nikubikira munonga.” Kandi akongyeraho ati: “Ahabw’Ogwo nkafeerwa byona, naabibara nk’eshaabo, ngu mbone kutunga Kristo.” (Fil. 3:8) Emiteekateekyere nk’eya Paulo neebaasa kuhwera Abakristaayo eminyeeto n’abazaire baabo, kucwamu gye aha bikwatiraine n’eby’obwegyese. (Reeba ebishushani.)

GASIRWA OMU BWEGYESE OBURIKUKIRAYO

15, 16. Ekibiina kya Yehova nikituha bwegyese ki, kandi ekigyendererwa kyabwo niki?

¹⁵ Omu matendekyero ag’ahaiguru, nihakira kuba hariyo mitwarize ki? Abeegi nibakira kwejumba omu bikorwa by’obushambani, obusinzi n’ebindi bikorwa bibi. (Efe. 2:2) Okutaana n’ekyo, ekibiina kya Yehova, nikyebembeza obwegyese oburikukirayo obu turikutungira omu myanya yaitu ey’okuramizamu. Buri omwe ahariitwe aine omugisha kugasirwa omu Ishomero ry’Obuheereza. Kandi hariho amashomero agandi nk’aga baapayoniya abatari mu bushwere (Eishomero ry’Ab’eishe-emwe Abatakataahire omu Bushwere) n’erya baapayoniya abari omu bushwere (Eishomero ry’Abakristaayo Abashweraine). Obwegyese nk’obwo nibutuhwera kworobera Yehova.

¹⁶ Nitubaasa kwongyera kwega bingi turikushwijuma Watch Tower Publications Index nari Watchtower Library eri aha CD-ROM. Ekigyendererwa kyaitu ky’okutunga obwegyese obwo, n’okutuhwera kuramya Yehova. Nibutubaasisa kumanya oku turikubaasa kuhwera abandi kugarukana na Ruhanga. (2 Kor. 5:20) Ekiraarugyemu, nabo nibwija kubahwera kwegyesa abandi.​—2 Tim. 2:2.

OMUGABO GW’OMUHUUKU

17. Obwegyese oburikukirayo niburugamu birungi ki?

¹⁷ Omu nfumu ya Yesu erikukwata aha taranta, abahuuku babiri abeesigwa bakasiimwa mukama waabo kandi yaashemererwa nabo arikubongyera emirimo endiijo. (Shoma Matayo 25:21, 23.) Okutoorana obwegyese oburikukirayo nikureeta okushemererwa n’ebindi bihembo. Yetegyereze eky’okureeberaho kya Michael. Akakora gye omu ishomero, reero abashomesa be baamweta omu rukiiko kugamba aha ku araaze omu yunivasite. Kikabatangaaza, Michael ku yaacwiremu kuza omu itendekyero eriine amashomo agarikutwara obwire bukye, ekyamubaasiise kuguma naayebeisaho nka payoniya ow’obutwire. Mbwenu shi naayefuuza? Naagira ati: “Obwegyese obw’eby’omwoyo obu naatungire nka payoniya n’okuheereza nk’omureeberezi, omu kibiina n’obw’omuhendo munonga. Emigisha n’obujunaanizibwa obu ntungire, tiburikubaasa kugyeragyeranisibwa n’esente ezi naakutungire. Buzima nyine okushemererwa ahabw’okugira ngu tindatooraine obwegyese bw’ahaiguru.”

18. Niki ekirikukuhiga kutoorana obwegyese oburikukirayo?

¹⁸ Obwegyese oburikukirayo nibutuhwera kumanya ebi Ruhanga akunda n’okuba omuhuuku we. Nibutubaasisa kugira amatsiko ‘g’okucungurwa, tukareka kuba ab’okujunda’ kandi bwanyima nitwija kutunga “obusingye bw’abaana ba Ruhanga obw’ekitiinisa.” (Rom. 8:21) Ekikuru munonga, nitwega omuringo murungi gw’okworekamu ngu buzima nitukunda Mukama waitu ow’omu iguru, Yehova.​—Kur. 21:5.