Tukabaho Tuta?

Okutandika, ekitabo kya Baibuli eky’okubanza nikigamba aha bukomooko bw’eiguru n’ensi kiti: “Omu kutandika Ruhanga akahanga eiguru n’ensi.” (Okutandika 1:1) Ruhanga ku yaaherize kuhanga ebimera n’enyamaishwa, yaahanga abantu b’okubanza Adamu na Haawa. Bakaba nibataana aha nyamaishwa ahabw’okuba bakahangwa n’emitwarize nk’eya Ruhanga, erikutwariramu n’obugabe bw’okwecweramu. N’ahabw’ekyo, bakaba nibajunaanwa ahabw’ebikorwa byabo. Abantu b’okubanza abu twena twakomookireho, ku baakworobeire ebiragiro bya Ruhanga, bakaagizire obusingye, n’amagara agahikiriire omu nsi, ebiro byona.

Kwonka maraika omwe, akenda kukoresa abantu kuhikiiriza ebigyendererwa bye ebigwire. N’ahabw’ekyo, akahinduka Sitaane ekirikumanyisa “Omuhakanisa.” Kurabira omu njoka, Sitaane akabeiha Haawa arikumugambira ngu naija kuba gye yaaba atarikukuratira obuhabuzi bwa Ruhanga. Adamu na Haawa bakakuratira Sitaane, omukago gwabo n’Omuhangi waabo gwafa. Ahabw’okucwamu kubi, abazaire baitu ab’okubanza bakafeerwa amagara agatahwaho kandi baatuhunguza ekibi, okutahikiirira, n’okufa.

Ahonaaho, Ruhanga akagamba ekigyendererwa kye eky’okwihaho embeera mbi egyo, kandi yaateeraho baijukuru ba Adamu omuhanda gw’okutunga amagara agatahwaho. Ruhanga akagira ngu ‘oruzaaro,’ niwe muntu w’omutaano akaacwekyereize Sitaane kandi aiheho okubonabona kwona okwaretsirweho Sitaane, Adamu, na Haawa. (Okutandika 3:15) Oruzaaro orwo akaija kuba oha? Ku haakuhingwireho obwire oruzaaro orwo rukaamanyirwe.

Bwanyima, Sitaane akaguma naateeraho kuremesa ekigyendererwa kya Ruhanga ekirungi. Ekibi n’abantu ababi bikeeyongyera kukanya. Ruhanga akamariirira kucwekyereza abantu ababi arikukoresa omwegyemure. Akaragiira Noa kwombeka obwato obwabaire buri nk’ekibokisi kihango kubaasa kwecungura n’ab’omu ka ye, hamwe n’enyamaishwa ezi yaabaire aragiirwe kutaatsya omu bwato.

Bwanyima y’omwaka kwiha obu Omwegyemure gwatandika, Noa n’ab’omu ka ye bakaruga omu bwato baaza omu nsi eboneziibwe. Kwonka ‘oruzaaro’ orwaraganisiibwe rukaba rutakareebekire.

​—Nibiihwa omu Okutandika, eshuura 1-11; Yuda 6, 14, 15; Okushuuruurwa 12:9.