Ruhanga Akatebeekanisa Kucungura Abantu

Ruhanga akaraganisa Abrahamu ngu “oruzaaro” orwaraganisiibwe rukaba nirwija kuruga omuriwe. Kurabira omu ruzaaro orwo, abantu ‘b’amahanga goona’ bakaatungire emigisha. (Okutandika 22:18) Bwanyima, omwijukuru Yakobo akaza Misri, ahu eka ye yaakanyiire rikaba eihanga rya Israeli.

Omuri Misri, omutegyeki mubi Faraho akahindura Abaisraeli abahuuku kuhitsya obu Ruhanga yaatebeekanisa nabi Musa, owaayebembeire ab’eihanga eryo kuruga Misri barikuraba omu nyanja erikutukura. Bwanyima y’ekyo, Ruhanga akaha Abaisraeli ebiragiro, otwariremu n’Ebiragiro Ikumi, kubeebembera n’okubarinda. Ebiragiro ebyo bikooreka ebitambo ebi baabaire baine kuhayo kubaasa kusaasirwa ebibi byabo. Arikuhwerwa Ruhanga, Musa akagambira Abaisraeli ngu Ruhanga akaba naija kuboherereza nabi ondiijo. Nabi ogwo akaba naija kuba “oruzaaro” orwaraganisiibwe.

Bwanyima y’ebyasha nka bitaano, Ruhanga akaraganisa omugabe Daudi ngu “oruzaaro” orwagambirweho omuri Edeni, rukaba nirwija kutegyeka omu bukama obutarihwaho. Ogwo akaba naija kuba Mesia, omucunguzi owaatoorainwe Ruhanga kucungura abantu n’okugaruraho paradiso omu nsi.

Kurabira omuri Daudi na baanabi abandi, mporampora, Ruhanga akooreka ebirikukiraho ebirikukwata aha ruzaaro orwo. Bakaranga ngu akaba naija kuba omucureezi, omunyambabazi kandi ngu ahansi y’obutegyeki bwe tihaakubaireho njara, obutari buringaaniza, n’engamba. Abantu boona bakaba nibaija kuturaana omu busingye hamwe n’enyamishwa. Ebi byona ebyabaire bitari mu kigyendererwa kya Ruhanga eky’okubanza nk’endwara, okubonabona, n’okufa bikaba nibiija kuhwaho n’abaafiire bazooke.

Kurabira omuri nabi Miika, Ruhanga akoreeka ngu Masia akaba naija kuzaarwa omuri Betelehemu kandi kurabira omuri nabi Danieli akooreka ngu akaba naija kwitwa. Kwonka, Ruhanga akaba naija kuzoora Mesia amwemekye nk’Omugabe omu iguru. Danieli nawe akoorekwa ngu obukama bwa Mesia bukaba nibwija kwihaho obugabe obundi bwona, bwo bugumeho ebiro byona. Buzima Mesia akaija nk’oku kyarangirwe?

​—Nibiihwa omu Okutandika eshuura 22-50, Okuruga, Eky’Ebiragiro, 2 Samueli,2 Zaabuli, Isaaya, Danieli, Miika, Zekaria 9:9.